Chapter 3

"HEY, sandali!"

Hindi pinansin ni Yeonna ang pagtawag ni Mark na muntikan nang matumba sa motor nang bumaba siya na hindi pa iyon maayos na naihihinto at naipaparada. Kahit hilam sa luha, tinakbo niya ang direksiyon ng bahay ng tiyuhin. Wala na siyang pakialam kung may nababangga man siyang tao na nakaharang sa kanyang daraanan. Ang mahalaga sa kanya ay mawala na ang takot at kabang nararamdaman niya.

"Yessa!"

Hindi niya maintindihan ang sarili kung bakit ang pangalan ng kapatid ang una niyang tinawag. Mahigit

"Yessa!"

Napatayo ang tiyahin ng dalaga na inaalo sa pag-iyak ng mga anak nito. "Yeonna?"

"Tita Elvie, nasaan si Yessa?" Pinagala ng dalaga ang tingin sa buong kabahayan. "Tumawag siya sa akin kanina. May gusto lang akong linawin sa mga sinabi niya. Nasaan siya?"

"Yeonna," sambit na hagulhol ng ginang.

"Nasaan siya?" sigaw ni Yeonna. "Nasaan ang kapatid ko?"

"Wala na siya, ate."

Nabaling ang tingin niya sa isa sa mga pinsan na babae. "Anong wala na siya?"

"Patay na siya."

Napasapo sa ulo si Yeonna nang biglang umikot ang kanyang paningin. Maagap siyang nahawakan ni Mark na nakasunod sa likuran niya. "Tawagin niyo si Yessa. Gusto ko siyang makausap."

"Ate..."

"Tawagin niyo!"

"Patay na siya!" sigaw ng isa sa mga pinsan na lalaki ni Yeonna.

"Yessa!" Hinawi niya ang pagkakahawak sa kanya ni Mark. At kahit umiikot ang paningin ay inihakbang niya ang mga paa patungo sa silid ng kapatid. Wala ito roon. Pumunta siya sa kusina at likuran. "Yessa!" Hindi niya pinansin ang mga taong nakatingin sa kanya o maging ang reaksiyon ng mga ito. Binalewala niya rin ang pag-awat sa kanya ng mga kamag-anak. "Yessa!"

Natuon ang tingin ng lahat sa humintong sasakyan ng funeral service. Ibinaba roon ang mga gamit para sa lamay partikular ang mga ilaw at patungan ng kabaong. Wala pa roon ang katawan dahil nasa ilalim pa ito ng pag-eembalsamo.

"Alisin niyo iyan dito!" Tinakbo ni Yeonna ang mga lalaki, "Wala ng patay rito!"

Muling pinigilan ng mga kamag-anakan at ilang nagmamalasakit na mga kapitbahay ang nagwawalang dalaga.

"Dalhin niyo sa akin si Yessa! Gusto kong makita ang kapatid ko! Yessa! Yessa!"

"Ipasok niyo na muna siya sa kuwarto," utos ng tiyahin ni Yeonna.

"Ako na pong magdadala sa kanya," boluntaryo ni Mark. Napansin nito ang masamang tingin ng mga kamag-anak ng dalaga. "Huwag po kayong mag-alala. Bakla ako."

"Sige na, Sige na!" pag-aapura ni Elvie. "Samahan niyo na siya na ipasok ang pinsan niyo sa kuwarto!"

"Bitiwan niyo ako! Gusto kong makita ang kapatid ko! Nagmamakaawa ako! Dalhin niyo sa akin si Yessa!"

Kinarga na ni Mark ang dalaga at dinala sa itinuro ritong silid.

"Dino," tawag ni Yeonna sa pinsan. "Nasaan si Yessa?"

"Ate, lakasan mo ang loob mo."

"Nasaan siya?"

"Nagpakamatay si Yessa."

Tigalgal si Yeonna. Kahit naisip na niya iyon, Hindi niya pa rin matanggap na gagawin iyon ng kanyang kapatid.

"Alam kong mahirap paniwalaan. Pero 'yon ang nangyari."

"Hindi magagawa ng kapatid ko ang sinasabi mo! Hindi!"

"Wala kaming alam. Pero lately ay nagging tahimik siya at madalas pinipili niyang mag-isa."

Pinahid ni Yeonna ang mga luha. Kailangan niyang malaman ang totoong nangyari. Hinarap niya si Dino. "Ano pa? Ano pang napansin mo?"

"Hindi ba siyang nagsasabi o nagkukuwento sa 'yo?"

Sandaling napaisip si Yeonna. Madalas may mga tawag sa kanya ang kapatid na hindi agad niya nasasagot. Hanggang nakakalimutan na niyang tumawag pabalik dito dahil na rin sa pagod at puyat.

"Hindi rin siya sa amin nagsasabi. Kilala mo naman siya. Gusto no'n na mas kinikimkim ang problema kaysa ang sabihin sa amin."

Napasapo sa ulo si Yeonna. Pumikit muna siya para ikondisyon ang sarili. Hindi masasagot ng pagbuhos ng emosyon niya ang mga tanong na bumabagabag sa kanyang isip. Pagkatapos ng ilang minuto ay dumilat siya at muling ibinalik ang tingin sa kaharap na pinsan. "Anong sinabi ng mga pulis?"

"Isinara agad nila ang kaso dahil lumabas na suicide ang nangyari."

Napatingin si Yeonna sa suot na relo. "Halos pitong oras pa lang mula nang magkausap kami ni Yessa. Paanong naisara agad ang kaso? At dinala agad siya sa punerarya? Hindi siya idinaan sa autopsy?"

"Nag-suicide ang kapatid mo..."

Natuon ang tingin ng lahat sa pagpasok ng tiyuhin ni Yeonna.

"Walang foul play na nangyari. Umakyat siya sa rooftop ng Deliemar at lumundag doon."

"Deliemar?" Napatayo si Yeonna nang banggitin ang isa sa pinakakilala at malaking call center sa Quezon. "Bakit siya nakarating doon? Paano siya nagkaroon ng access doon?"

"Kumuha ng part-time job si Yessa," tugon ni Dino.

"Part-time? Hindi ba't nagpapadala ako ng pera para sa lahat nang mga pangangailangan niya?"

Mula sa bulsa ng tiyuhin ay kinuha nito ang isang bank book. Inilahad nito iyon. "Iniipon niya ang mga ipinapadala mo. Para raw may pandagdag ka sa gastusin kung maisipan mong magtayo ng sariling law firm."

Nanghihinang muling napaupo si Yeonna. Hindi kaya ng isip niyang tanggapin ang nangyayari.

"Ate!" sigaw Dino.

Tuluyan na ngang nawalan ng ulirat si Yeonna.