Chapter 1 : Wallflower's Dream

“Donya Guevarra, The Montblanc are here!” anunsyo ng matandang butler.

Napabuga ng hangin si Yllena nang marinig ang anunsyo ng butler. Hindi niya napigilan ang kaniyang excitement dahil makikita niya ulit ang kaniyang ultimate crush na si Graeson Montblanc. Anak ito ni Sesgundo sa ikalawang asawa at taga-pagmana ng Montblanc Corporation. Samantalang siya naman ay  apo ni Donya Elena Guevarra, isa sila sa mga kasosyo ng mga ito. Pinangako ng kaniyang lola na kahit anong mangyari ay ipakakasal siya nito kay Graeson. Tahimik at mahiyain si Yllena kaya madalas ay nagtatago siya kapag nariyan si Grae at masaya na siyang makita ito mula sa malayo. Ngunit ngayon ay hindi na niya magagawa pang magtago dahil ngayong gabi ay formal silang ipakikilala sa isat-isa. 

Hindi na mapalagay si Yllena kaya hinawakan ng kaniyang lola ang kaniyang kamay.

“Maganda ka at siguradong hinding-hindi mag-aalinlangan si Graeson. They are here. Halika at salubungin natin sila,” ani ng kaniyang lola.

Si Yllenna o Maria Yllena Guevarra ang unang babaeng apo ni Elena Guevarra at sa gulang na disiotso ay kitang-kita na ang angking kagandahan nito. Morena, matangos na ilong, napakagandang mga ngiti at medyo singkit na mga mata. Dagdag pa ang balingkitan nitong katawan at matangkad nitong pigura. Kahit sinong binata ay mag-aasam na makilala ito.

Inalalayan niya ang kaniyang lola at nang mga oras na iyon ay muling lumukso ang kaniyang puso dahil sa kaguwapuhan ni Graeson sa suot nitong tuxedo. Nang magtama ang mga mata nila ay agad niyang iniwas dahil nakaramdam siya ng hiya.

Pinukulan siya ng mapanuring tingin ng kaniyang lola.

“Ang pagpakasal mo sa kaniya ang magiging pagbangon ng ating pangalan,” bulong ni Elena.

Ang tatlong lalaki ay pawang mga makikisig na kabalyerong papalapit sa kanila. 

Sunod-sunod ang pagtango ni Yllena at pagngiti sa kaniyang Lola. Napabuga siya ng hangin dahil sa magkahalong kilig at kabang nararamdaman. May mga sumunod pang sinabi ang kaniyang lola ngunit para siyang nabibingi dahil nasa harap na niya ang  napakaguwapong si Graeson Montblanc.

Ngunit si Graeson ay parang hindi masaya at panay ang tingin sa telepono nito. Magkakaharap sila sa lamesa at naguusap ng pribado ang kanilang mga magulang sa di kalayuan.

Ulila na si Yllena sa mga magulang at tanging ang lola Elena na lamang niya ang nagpalaki sa kaniya dahil ang mga tiyahin at tiyuhin niya ay hindi maganda ang pakikitungo sa kaniya. 

Dala ng labis na pagkahiya at hindi malaman kung paano niya kakayagin ang atensyon ng katabing binata ay inabutan niya ito ng champagne. 

“Hi, baka gusto mo ng Champagne?” nauutal pa niyang sabi. 

Nakuha naman niya ang atensyon ni Graeson ngunit tinitigan siya nito na parang nanunudyo. Kung paguusapan ang self-confidence ni Yllena ay 100% din naman. 100% na wala siyang lakas ng loob at walang bilib sa sarili. 

“Yeah. Thank you. You must be Mrs Guevarra’s granddaughter? Hindi ko akalain na mayroon parin palang mga katulad mo na basta nalang tinatapon ang sarili sa lalaki,” puno ng panunuyang sabi ni Graeson.

“N-Nagkakamali ka. G-Gusto ko lang –“ napapikit siya at namumula sa hiya dahil sa sinabi ng lalaki. Halatado ang pagka-disgusto nito sa tono nito. 

“Unless hindi naman talaga sa lalaki ang gusto mo kundi sa yaman na mayroon ito. I mean me and my wealth!” diretsahang sabi nito.

“H-Hindi totoo iyan! Arogante ka pala!” nakayuko niyang sagot. 

Buti na lamang ay dumating ang kani-kanilang magulang at pormal silang ipinakilala sa isat-isa.

“Mukhang nagkakilala na sila Ginang Guevarra or future balae,” masayang pahayag ni Sesgundo.

“Mabuti naman nang hindi na sila mahirapan pa,” dugtong ng matanda.

Bakas sa mukha ng dalaga ang pagka-dismaya niya sa ugaling ipinakita Graeson. Hindi niya lubos akalaing ganoon kasama ang ugali nito. Lalo na ng bigla itong nagpaalam na aalis.

“Dad, maaari na ba akong umuwi may kailangan pa akong puntahan!” nababagot na sabi ni Graeson at kahit kay Elena ay hindi ito nahiya.

“At saan ka naman pupunta? Hindi pa kami tapos sa paguusap para sa kasal,” pabulong na sabi ni Sesgundo.

“So what!” tumayo ito ngunit ng magtaas ang boses ng ama ay wala itong nagawa kundi ang bumalik sa kinauupuan.

Labis ang kabang naramdaman ni Yllena ng makita ang mag-amang nireresolba ang kanilang mga magagaspang na ugali. Napalingon siya sa kaniyang lola dahil hindi niya ito inaasahan ngunit pinisil lamang ang kaniyang kamay at bahagyang ngumiti ang matanda na waring sinasabi nitong.

‘That’s okay! Everything is fine!’

Sa mundong ginalawan ni Yllena ay maituturing na ilusyon lamang sa paningin ng iba dahil naitatago ng mayayaman ang kanilang karumihan sa mga alahas at magagarbong damit na itinatakip sa katawan. Ngunit nangangalisaw parin ito. 

Nakahinga lamang siya ng dalhin ni Sesgundo ang anak sa hardin para kausapin. Samantalang siya naman ay lumabas din para lumanghap ng sariwang hangin.

“I’ll ruin her career. Alam mo ang kaya kong gawin!” galit na sabi ng matandang lalaki.

“Dad!”

“Ang mga Guevarra ay magaling sa pakikipagnegosasyon at magandang pakisamahan kaysa sa ibang pamilya. Hindi man kalakihan ang shares nila pero ang loyalty ang gusto ko sa kanila.” Mariing sabi ni Sesgundo.

Napahilamos sa inis si Graeson. Dahil kung hindi lang siya interesado sa pagiging CEO na iniwan ng kaniyang kapatid ay hindi siya magpapakabuting anak dito.

“Magpapakasal lang ako sa kaniya kapag hinayaan mo si Evie na tuparin niya ang kaniyang pangarap.”

“Natututo kana. Hindi mo mapapangalagaan ang babaeng iyon kung wala kang kapangyarihan. At magkakaroon ka lamang non kung sisimulan mo sa pagpapakasal sa apo ni Elena,” marahas na pahayag ng ama.

Pinanlisikan siya ng mata ni Sesgundo at inayos ang sarili bago bumalik sa pagtitipon. Sa kabilang gilid ay naroon si Yllena at aksidente niyang narinig ang pag-uusap ng mga iyon. Nais lamang niyang magpahangin pero mas lalong sumikip ang dibdib niya sa kaba. 

Matagal na niyang gusto si Graeson ngunit ngayong abot kamay na niya ang pangarap na pakasalan ito ay parang nais niyang bawiin dahil sa pinakita nitong ugali. 

Sa sobrang pag-iisip niya ay hindi niya napansin ang lalaking bigla nalang sumulpot sa kaniyang likuran.

“Mahilig ka palang makinig sa usapan ng iba?” 

“Ayy Kabayo!” gulat niya at agad na napaharap sa lalaki.

Napahawak siya sa kaniyang dibdib dahil sa kaba. Hindi naman niya pinakinggan ang pinaguusapan ng mga ito. Basta nalang siya napadaan.

Sa mga mata ni Graeson ay may nakita siyang mas nakakatakot dahil sa uri ng tingin nito sa kaniyang kabuuan. Hinubad niya kasi ang suot niyang black silk cloak at ngayon ay kitang-kita ang flawless na likod niya. Nakasuot siya ng isang floral tube dress na may design na butterfly sa likod. Kitang-kita ang napakagandang kurba ng kaniyang katawan. 

Napaatras siya ng bigla itong humakbang papalapit sa kaniya.

Napakunot-noo siya at takot ang unang rumehistro sa kaniya. Sa kaniyang pag-atras ay nawalan siya ng balanse. Agad naman siyang nahapit ni Grae sa kaniyang manipis na baywang pakabig sa katawan nito at ang tingin nito ay napako sa kaniyang malulusog na dibdib.

Napalunok siya at ganoon din ito nang magsalubong ang kanilang mga mata. 

“I guess hindi naman ako talo kung ikaw ang pakakasalan ko. Be ready Miss Guevarra dahil hindi ako maginoo na inaakala mo.” Kinabig pa siya papalapit sa mukha nito hanggang ilang pulgada nalang ang pagitan nila sa isat-isa at magkasalo na sa hanging kanilang nalalanghap.

Punong-puno ng pagnanasa ang mga mata nito.