Kabanata 5

SIERRA

MAHIGPIT akong niyakap ni Kuya Eros kahit nasa harapan lang kami ng dalawang lalaki na ngayon ay pinapanood lang kami. Mahina kong tinapik si Eros sa likod dahil nakita kong kunot na ang noo ni Mayor Caleb.

Bakas na kasi rito ang iritasyon sa mata nito na para bang hindi nagustuhan ang nakikita ngayon.

"Excuse me but can I borrow my secretary," puno ng diin ni Mayor Caleb at sa wakas ay binitawan na ako ni Eros at tumawa.

"Grabe ka naman, pre. Pagbigyan mo na ako, ngayon ko lang ulit nakasama ang pinsan ko." Paliwanag ni Eros kaya kitang-kita ko ang saglit na pagkagulat sa mga mata ni Mayor Caleb na mabilis namang nawala.

"She's your cousin?" Paninigurado ng dalawa kaya tumango naman itong katabi ko habang ako naman ay naiilang na dahil nakatitig pa rin sa akin si Mayor Caleb.

"Aba oo, siya ang kinekwento ko sa inyo. Bakit ano bang akala niyo sa amin?"

"Akala ko ay magkasintahan kayo," sabat ni Governor Laxon na ikinatawa naman ni Eros habang ako ay napangiwi.

"Gago! Incest 'yan. By the way, umupo nga tayong apat. Ngawit na akong tumayo, 'wag kayong mag-alala treat ko ang pagkain." Masayang saad ni Eros kaya umupo na ako sa tabi ni Mayor Caleb pero su Governor Laxon ay nakatayo lang sa tapat namin.

"Hoy Laxon, ano? Hindi ka pa ba uupo, anong gusto mo? Ipagtulak pa kita ng upuan?" Pagbibiro ni Eros kaya napailing na lang ako. Ngumisi at umiling lamang si Governor Laxon.

"Hindi muna ako makikijoin sa ngayon. May kailangan kasi akong ayusin pa. Next time na lang, sige alis na ako." Paalam niya kaya tumango na lang kami at katahimikan ang bumalot sa lamesa naming tatlo.

"So Sierra, nabalitaan ko kay Tita na dito ka pala nagtatrabaho sa kaibigan ko, buti natitiis mo ang pagiging masungit at sup-" Naputol agad ang sasabihin niya ng mahina ko siyang sinipa sa paa na ikinaaray naman niya.

"Fuck, biro lang pre. Hindi naman kayo mabiro na dalawa." Natatawa ngunit umiiling niyang saad dahil masama na rin pala ang tingin ni Mayor Caleb sa kanya.

"Ilang linggo or buwan ka ng nagta-trabaho dito kay Caleb, baby?" Malambing niyang tanong pero nakita ko naman sa gilid ng mata ko ang pagdiin ng palad ni Mayor sa hawak niyang panyo.

"Three weeks na." Tipid ko namang sagot kaya kay Mayor Caleb naman bumaling ang paningin ni Eros.

"Good to know that my Sierra is working for you, pre. Sana ay mabawasan na ang pagiging mainit ng ulo at pagkasuplado mo. Baka ikaw ang unang maging pasyente niyan kapag naging Psychologist na 'yan." Pananakot ni Eros kaya sinaway ko naman siya pero mukhang hindi nagpatinag si Mayor sa kanya.

"Don't worry, I will take care of her. Hindi naman ako nananakit ng empleyado, Eros." Aniya ni Mayor sa seryosong boses kaya tumango naman itong kaharap namin.

"Anyway, alam mo ba Sierra na araw-araw kitang kinekwento dito dati kay Caleb," panimula niya na ikinagulat ko naman at sa kauna-unahang pagkakataon ay nakaramdam ako ng kahihiyan.

Bakit ba kasi kinuwento pa ako ni Eros kay Mayor Caleb? Ibig sabihin ay matagal na akong kilala ni Mayor Caleb? Hay nako, Sierra huwag ka munang assumera baka hindi interesado sa'yo si Mayor ng mga oras na 'yon.

"And he's really interested in you kaya araw-araw kitang nababanggit sa kanya, simula sa kung ano ang achievement m-"

Sa ikalawang pagkakataon ay naputol muli ang pagsasalita ni Eros dahil tumayo na si Mayor Caleb na ikinagulat ko naman.

"I remember that we have to do something important, Eros. We can talk some other time. Let's go, Sierra." Nagmamadaling saad ni Mayor kaya naguguluhan naman akong tumayo kaya sumunod na rin si Eros.

"Sure, I understand. Ingat kayo. Baby, ingat." Mahinahong habilin sa akin ni Eros at niyakap pa ako kaya mabilis akong yumakap pabalik sa kanya.

Pagkaharap ko ay saglit akong nagulat dahil nakatingin lang sa amin si Mayor Caleb pero hindi ko mabasa ang emosyon sa mga mata niya. Blangko ito pero pakiramdam ko ay may nakapaloob dito.

"We will, Eros. Mag-ingat ka rin. Now can I have my secretary, kailangan na namin bumalik sa munisipyo." Paalam ni Mayor at natulos na lang ako ng hawakan ni Mayor ang kamay ko at sabay na kaming lumabas ng restaurant.

Saktong paglabas namin ay siya namang tigil ng sasakyan na ginamit namin at ako ang pinauna niya. Pagsakay ay saka lang ako nakahinga ng maluwag dahil binitawan niya na ako.

Habang nasa byahe kami ay pinagmamasdan ko lang ang daan na tinatahak namin. Aminin ko man hindi ay naiintimidate pa rin ako dahil sobrang tahimik ng sasakyan at tanging radyo lamang ang naririnig.

"You're Eros' cousin?"

Mabilis akong napalingon kay Mayor Caleb ng basagin niya ang katahimikan sa loob ng sasakyan. Kaya tumango muna ako bago sumagot.

"Ah, oo Mayor. Sa side nila Papa, hindi lang halata dahil hindi naman kami minsan nagkikita-kita ng mga pinsan ko. Tanging si Kuya Eros lang ang close ko," paliwanag ko kaya napatango naman siya kaya ako naman ang naglakas loob na magtanong sa kanya.

"Kaibigan pala kayo ni Eros? Ang alam ko lang kasi ay may dalawa siyang kaibigan na lalaki pero hindi naman niya pinapakita sa akin. Kaya nagulat lang ako na kayo pala 'yon," natatawa kong paliwanag kaya saglit akong nagulat ng tipid na ngumiti si Mayor Caleb sa akin.

Shet, ang mas gwapo si Mayor Caleb kapag nakangiti.

"Yeah, we've been friends for 5 years. Nagkakakilala lang kami sa isang meeting and then naging close na kaming tatlo." Paliwanag niya kaya napatango naman ako at napatingin kay Kuya Jose ng itigil niya na ang sasakyan sa tapat ng munisipyo.

"Nandito na po tayo," anunsyo niya kaya nagpasalamat naman ako at nauna na ng bumaba kay Mayor Caleb.

Pagpasok sa munisipyo ay sinalubong kami ng bati ng mga empleyadong nagtatrabaho dito na timatanguan na lamang ni Mayor. Habang ako naman ay binabati ang ilan sa kanila pabalik.

Pagsara ng elevator ay nakahinga na lamang ako ng maluwag dahil ngayon ko lang naramdaman ang pagod. Ang init pa kanina sa labas, kulang nalang ay magprito ka ng itlog dahil sa alinsangan ng panahon.

"Okay ka lang?" Baritonong tanong ni Mayor kaya saglit akong napatingin sa kaniya at tumango.

"Opo, okay lang." Sagot ko na lamang at nang magbukas na ang elevator ay sabay na kaming lumabas ni Mayor at katulad ng nangyari ay may iilan na kababaihan na iniirapan at tinataasan ako ng kilay.

Mabuti na lamang ay hindi ito nakikita ni Mayor o baka napapansin niya pero ipinagsasawalang kibo na lamang niya. Napatigil na lang ako sa paglalakad ng harangan ako ni Ate Reina.

"Sierra, pwede bang tulungan mo akong mag-ayos ng relief goods?" Pagtatanong niya kaya hindi naman ako nag-alinlangan pang sumagot.

"Sige ate, ilagay ko lang sa opisina 'tong gamit." Saad ko at ng makapasok na kami ni Mayor sa opisina ay nagmamadali akong ibaba sa table ko ang mga papeles at hindi na nakapagpaalam kay Mayor dahil sa sobrang pagmamadali.

Paglabas ko ay sumalubong sa akin si Ate Reina at hinigit ako papunta sa isang kwarto kung saan dito pala magpa-pack ng mga relief goods.

Pagpasok ko ay naagaw namin ng atensyon ang dalawang babae na nagbabalot rin, tipid ko silang nginitian pero hindi nila ako pinansin kaya nahihiya tuloy akong sumunod kay Ate Reina.

Grabe sila, gusto ko lang naman makipag-kaibigan.

"Sierra, ito ang ilalagay natin sa relief goods. Isang kilong bigas, limang de lata, limang lucky me. Tapos ang mga prutas ay bukas na para hindi mabulok." Pagbibigay ng direksyon sa akin ni Ate Reina kaya tumango naman ako at nagsimula na ring mag-pack.

Habang binabalot ko ang mga kailangan sa relief goods ay napapansin kong panaka-naka ang tingin sa akin ng dalawang ito na para bang pinag-uusapan ako. Pero nawala ang atensyon ko sa kanila ng magsalita si Ate Reina na katabi ko lamang.

"Tatlong linggo ka na pala kay Mayor, Sierra. Kumusta naman?" Magiliw niyang pagtatanong na para bang binabawasan niya ang awkwardness na nangyayari ngayon kaya tipid naman akong napangiti.

"Okay naman, Ate. Masaya naman maging secretary ni Mayor kaso talagang iintindihin mo siya lalo na kapag mainit ang ulo niya," paliwanag naman kaya napailing na lang siya.

"Nako, ganon talaga 'yang si Mayor pero nakakatuwa lang dahil hindi na ganoong masungit at suplado si Mayor Caleb. Dati kasi kapag bumabati o dumadaan man lang siya ay hindi siya tumatango, ngayon ay ginagawa na niya." Masayang kwento niya kaya napailing na lang ako.

"Baka naman ay nauntog si Mayor at narealize niya na sobra na pala siya at kailangan na ng character development," pagbibiro ko pa kaya napaaray na lang ng hatawin ako ni Ate Reina sa braso.

"Ikaw talaga, Sierra. Pero sana ay magtagal ka kay Mayor, mukha kasing komportable siya sa'yo. Napansin ko lang na simula ng dumating ka dito ay kumakain na siya sa loob ng opisina niya. Wala lang, nakakatuwa na may pagbabago na kay Mayor." Aniya kaya nacurious pa ako.

"Bakit hindi ba nakain si Mayor sa loob ng opisina niya?"

"Hindi, Sierra. Ayaw niya kasing madumihan ang opisina pero nong nalaman ko na komportable ka pala kapag sa lugar na tahimik ka nakain ay hinayaan ka na lang ni Mayor," bakas sa boses niya na kinikilig siya kaya mahina akong natawa at palihim na tiningnan ang dalawang babae na kasama namin na ngayon ay nakasimangot na.

"Nako Ate Reina, tigilan mo ako. Hindi ko naman alam na ayaw pa lang madumihan ni Mayor ang opisina niya. Simula sa lunes ay sa labas na ako kakain." Saad ko pa kaya napailing na lamang si Ate Reina at nagpatuloy kami sa pagpapack ng relief goods.

MATAPOS ang ilang oras na ginawa namin ay sa wakas ay natapos na kami. Kahit may iilan na tumulong sa amin pero ang iba ay bumabalik agad sa trabaho nila dahil may kailangan din silang ayusin.

Hindi namin napansin na out na pala naming lahat, sakto ay tapos na kami sa relief goods. Nang makita naming ayos na ay inunat ko ang katawan at braso ko bago magpaalam kay Ate Reina na ngayon ay nakaupo at bagsak na rin.

"Sige na Ate, aalis na ako. Thank you pala." Pasasalamat ko kaya tipid naman niya akong nginitian pero bakas ang pagod sa mga mata niya.

"Thank you rin, Sierra. Sige na, umuwi at magpahinga ka na rin."

Bago pa man ako bumalik sa opisina ni Mayor ay pumunta muna akong restroom para mag-ayos at umihi na rin. Pagpasok ko sa isang cubicle ay nagmamadali akong magbawas.

Nang ayos na ay akmang lalabas na sana ako pero napatigil ako sa pagbukas ng pinto ng may pumasok na dalawang babae at binanggit ang pangalan ko.

"Kilala mo ba 'yung bagong secretary ni Mayor Caleb?"

"Ah, yung Sierra ba? Ay 'di ko type ang babaeng 'yon. Ewan ko ba, naiinis ako sa kanya." Saad pa ng isa at ramdam ko ang pagkadisgusto sa boses niya na ikinalunok ko naman.

"Same, I hate her. Akala mo kung sinong makangiti at makabati sa atin. Secretary lang naman siya, basta naiinis ako sa kanya!" Gigil naman na sabi ng isa kaya napaatras ako at huminga ng malalim.

Akala ko ay maganda ang mangyayari sa akin ngayong araw pero hindi ko akalain na ganito ang maririnig ko, masyadong mabigat sa dibdib.

"Yeah, feeling ko nga ay sineseduce niya si Mayor kapag sila lang dalawa. Kasi simula ng dumating siya ay paunti-unti na ring nagbabago si Mayor," anas naman ng isa kaya sa mga oras na ito ay lakas loob na akong lumabas sa cubicle at taas noong hinarap ang dalawa na ngayon ay gulat na gulat.

"Kung sineseduce ko man si Mayor Caleb ay sana ay matagal niya na akong pinaalis sa trabaho na 'to. Porket nagbabago ang tao ay may nang-seduce na? Pwede bang character development lang," seryoso ngunit puno ng diin kong saad kaya ng maka-recover ang dalawa ay tinaasan naman ako ng kilay ng isa.

"So what? Basta kapag nakikita ay naiinis ako sa'yo. Akala mo kung sino ka na makaasta kapag kasama si Mayor, secretary ka lang naman niya. Minsan kasi alamin mo kung ano ang lugar mo." Naiirita niyang saad kaya napaismid na lang ako sa sinagot nito sa akin.

Inilalabas ng isang 'tong ang pagiging m*****a ko. Patay ka sa akin ngayon.

"Alam ko ang lugar ko, taga-sta rosa nga ako, eh. At saka bago ka magsalita bago ka magsalita, alamin mo muna ang ginagawa ko. Napaghahalataan kang ayaw mo talaga sa akin." Taas noo kong saad at nakangising nilagpasan siya.

Paglabas ko ng restroom ay rinig na rinig ko ang sigaw at pagbabanta niya sa akin. "May araw ka rin sa akin!" Nang tuluyan na akong makalayo doon ay napahawak naman ako sa pader bilang suporta dahil nanlambot ang tuhod ko.

"Calm down, Sierra. You did great today. Huwag kang magpapakain sa kanegahan nila. They deserve your words because they insulted you." Pagpapagaan ng loob ko sa sarili kaya kumalma na ang puso ko pero ng bumalik sa isipan ko ang sinabi nila sa akin ay unti-unting namuo ang luha ko.

"Nagtatrabaho lang naman ako ng matiwasay dito, bakit ganoon kaagad ang tingin sa akin ng iba? Para bang pinaparamdam nila sa akin na 'di dapat ako ang secretary ni Mayor Caleb?" Naiiyak kong tanong kaya hinayaan ko munang mailabas ang frustration at sakit na nararamdaman ko ngayon.

Mabuti na lamang ay tago itong pinagsandalan ko kaya walang makakarinig at makakakita sa akin. Makalipas ang ilang minutong pagkatulala ay inayos ko ang sarili ko.

Baka nakauwi na rin si Mayor dahil ginabi na rin kami sa pag-aayos. Nasa akin naman ang susi ng opisina niya at paniguradong nauna na iyon sa akin.

Pagbukas ko ng pinto ay halos mapatalon ako sa gulat ng bumungad sa harapan ko si Mayor na ngayon ay parang naghihintay. Kaya ng maisara ko ito ay tumingin ako sa kanya.

"Hala, Mayor. Bakit hindi ka pa nauwi?" Pagtatanong ko kaya dumaan na ako sa harapan niya at kinuha na ang mga gamit ko. Pagharap ko ay nakakatitig siyang maigi sa mukha ko na para bang may mali siyang nakita dito.

"Mayor," pagtawag kong muli sa kanya pero titig na titig pa rin siya sa akin dahilan para sumikdo ang puso ko sa kaba.

"Sierra, did you cry?"