Chapter 30

Chapter 30: Flabbergast

Kinabukasan ay bandang hapon na kami ni Gavin nakabalik sa syudad. Nagtampisaw muna kasi kami sa dagat bago namin napagpasiyahang umuwi.

Mula sa biyahe hanggang sa makatulog ako kinagabihan ay ramdam ko pa rin ang saya. Kahit na hindi ako nasundo ni Gavin kinaumagahan dahil may kinailangan siyang puntahan bago pumasok sa opisina, naging maganda pa rin ang gising ko. Tudo ngiti pa nga akong pumasok sa trabaho.

"Good morning, sis!" pagbati ko kay Felicity nang maabutan ko siyang naghihintay sa pagbukas ng elevator.

"Ikaw pala," pansin niya sa presensiya ko. "Good morning din. Saan ka ba galing at ngayon ka lang pumasok? Mukhang ang saya mo rin ata ngayon."

"Monthsary namin ni Gavin kahapon. Nagdate kami sa isang isla,” kwento ko. Hindi ko napigilan ang paghagikhik. Sariwa pa talaga sa isip ko ang mga nangyari sa misamis kaya hindi ko maitago ang aking kilig.