Chapter 3

Matapos ang mahigit dalawang oras na pagaayos nila sa buong pagkatao ko mula ulo hanggang paa, ay narito na ako ngayon sa harapan ng isang malaking pintuan.

Ang narinig ko kanina nang makarating kami ay ito daw ang mansion kung saan nakatira ang pamilya Madrigal.

Hindi na rin ako magtataka dahil sa halata namang pang mayaman ang mala-kastilyong bahay na ito. Hindi pa man kami nakakapasok sa loob ay mahigit dalawampung tauhan na ang nakikita ko.

Pinasadahan kong muli ng tingin ang kulay pulang dress na suot ko ngayon. Hindi ko alam kung bakit ito ang kulay na pinili nilang ipasuot sa akin at masyado pang revealing ang likurang bahagi. Wedding celebration dinner kasi ang pupuntahan namin, kaya naman hindi maganda ang ganitong kulay dahil baka magdala ng malas sa ikakasal.

Hindi na lang rin ako umangal pa dahil kailangan ko lang naman gampanan ang trabaho na ibinigay sa akin, at pagkatapos ay maiuuwi ko na sila inay mula sa hospital. Pagkatapos rin ng gabing ito ay hindi na kami magkikita pang muli ng lalaking kasama ko ngayon.

“Remember everything that I told you. Tonight, you are my girlfriend.” bulong niya sa akin bago kinuha ang aking kamay at isinabit sa kanyang braso.

Halos hindi ko na mabilang kung ilang beses na niyang ipinaalala sa akin iyan.

Nagsimula na kaming humakbang papasok ng bigla akong napahinto dahil sa aking naalala.

“Sandali lang,” tigil ko sa kanya. “Ano nga ulit ang pangalan mo? Mahirap naman kasing magpanggap na mahal kita kung hindi ko man lang alam ang pangalan mo.”

“Jaxson. But, you can just call me Jax.” Sambit niya. “Or, you can call me babe if you want to be more convincing-”

“Jax.”

Sumilay ang ngisi sa mga labi niya ng marinig ang sagot ko.

Saglit akong humugot ng malalim na hininga bago muling magsalita. Masyado kasing nakakaloko ang mga ngiti na ibinibigay niya sa akin at pakiramdam ko ay hinihigop nito ang natitirang hangin ko sa katawan.

“Ako naman si Cattleya. Pwede mo akong tawaging Catt.”

“I love cats.”

Tipid ko lang siyang nginitian dahil hindi na bago sa akin ang birong iyon. Pero siya naman ay halos mapunit na ang labi sa kakangisi. Hindi ako sigurado kung nasiraan na sa utak ang lalaking ito dahil sa bigat ng pinagdadaanan niya ngayon. Sa isang kisapmata kasi ay nagbabago ang ugaling ipinapakita niya.

“Let's go.”

Bahagya akong tumango bago muling kumapit sa braso ni Jax.

Kailangan ay galingan ko ang pagpapanggap ngayong gabi dahil baka hindi ako bayaran ng lalaking ito ng sapat na pera para pambayad sa ospital kapag pumalpak ang plano niya.

“Jaxson, my son! You came.” Salubong sa amin ng isang babae na ilang taon lang yata ang tanda sa akin.

Pinagmasdan ko lang sila ng halikan niya sa pisngi ang lalaking katabi ko ngayon bilang pagbati.

Siya pala ang ina ni Jax. Sa unang tingin ay hindi siya mukhang nanay na. Ang bata pa ng kanyang itsura para maging ina.

“Why would I not?”

Itinago ko ang kaunting pagkunot ng aking noo sa pagtataka kung bakit hindi man lang ngumiti o bumati pabalik si Jaxson sa kanya.

“Catt,” nakangiting nilingon niya ako. “This is my step-mother.”

“Catt?” tanong ng babae at doon lamang niya ako tinapunan ng tingin na para bang ngayon lang niya ako nakita. Kahit na hindi naman binibitawan ni Jaxson ang kamay ko kanina pa.

Hindi ko maintindihan kung bakit para bang hindi totoo ang mga ngiting ipinapakita ni Jaxson ngayon. Ibang iba ito sa mga ngiti niya kanina.

Ipinagsawalang bahala ko na lamang ito at itinuon ang aking atensyon sa sinabi niyang step-mother.

“Hello, ma'am. Good evening.” bati ko sa kanya ngunit awang lang ang mga labi nito na tila ba nakakita ng isang multo.

“Emily, this is Cattleya, my girlfriend.” simpleng sabat ni Jaxson na binigyang diin na ako ang bagong babae niya.

Hindi man lang niya binigyang galang ang kanyang ina, o hindi kaya naman ay tawagin itong nanay Emily. Halatang hindi maganda ang relasyon nila.

Nang kaunting gumilid ang step-mother ni Jaxson, ay doon ko lamang namalayan na nasa harapan pala kami ng iba pang bahagi ng pamilya Madrigal.

Halos walang pinagkaiba ang mga reaksyon nila na tila ba isa akong multo na bumangon mula sa hukay.

Hindi siguro sila makapaniwala na nakahanap agad ng bagong girlfriend si Jaxson matapos ang nangyari. Wala silang ideya na plano niya lamang ang lahat ng ito upang hindi siya mapahiya.

Kakaiba ang pamilya nila, wala akong nadarama kahit na katiting na pagmamahalan.

Nang lumakad na kami patungo sa lamesa, ay saglit akong tumigil sa isang matipunong lalaki na nakaupo sa dulo nito.

“Magandang gabi po, Mr. Madrigal. Ako po si Cattleya, ang girlfriend ni Jax.” magalang kong bati.

Ilang segundo ang itinagal bago niya ako nilingon.

“Welcome to the family, hija. Please take a seat and make yourself at home.”

Sinuklian ko ng ngiti ang pagbati niya bago sumunod kay Jaxson ng marahan niya akong hilahin patungo sa isang upuan.

Kahit na nahihiya ako dahil sa pulang kasuotan ko ngayon na umaangat sa mga nude at simpleng white attires nila ay pilit ko lamang itong tinakpan ng ngiti. Sanay naman ako na magpanggap kaya maliit na problema lang sa akin ito.

Nang tuluyan na akong makaupo, agad kong hinanap gamit ang aking mga mata yung sinasabing ex-fiance ni Jaxson na nabuntis ng step-brother niya, at ngayon ay magpapakasal na.

Natagpuan ko siya malapit sa step-mother ni Jaxson.

Kaya naman pala halos magpakalunod na ang lalaking ito noong gabi sa club. Napakaganda naman pala kasi ng babaeng mahal niya.

Para akong nakakakita ng isang sikat na artista habang nakatitig sa kanya. Ang kutis niya ay mala porselana na mas pinatingkad ng itim na itim at mahaba niyang buhok. Napakalinis niyang tingnan at tila ba inukit ng isang magaling na artist ang kanyang ilong at iba pang parte ng mukha.

Diretso ang mga tingin niya sa katabi kong si Jaxson, kaya naman ay natitigan ko rin ang mabibilog niyang mga mata. Kumikinang ang mga ito at mistulang parang kuting na nawawala sa kalsada. Napaka-perpekto niya.

Sayang lang at nabuntis siya ng ibang lalaki. Kung iisipin, ay bagay sila ni Jaxson dahil sa pareho nilang artistahing mga mukha.

“Alright. Since we're all here. We may now begin the celebration for the upcoming wedding of Lance and Daniella. And of course, the new Madrigal that we are expecting!” galak na bulalas ng step-mother ni Jax. “Help yourselves and let's eat.”

Umangat ang ibabang labi ko habang pasimpleng nilingon si Jax sa aking tabi. Pinagmasdan ko ang reaksyon niya sa sinabing iyon ng kanyang ina.

Parang ang insensitive ng pamilyang ito na kinabibilangan niya. Hindi man lang nila naisip ang nararamdaman ni Jaxson ngayon at tila nakangiti pa silang lahat.

Hindi ba nila alam kung gaano nasasaktan ngayon si Jaxson dahil sa lahat ng pangyayari?

Nang magsimula nang kumain ang lahat ay itinuon ko ang aking pansin sa plato na nakapwesto sa aking harapan. Alam ko na ang tawag sa pagkain na ito ay T-Bone steak, ngunit hindi ko alam kung paano ito kinakain.

Pasimple kong tiningnan ang iba upang malaman kung paano ito. Ayoko naman kasi na mapahiya sa pagkain lalo na sa harapan ng mga mayayaman.

“Why aren't you eating?” malakas na tanong sa akin ni Jax.

Magkatabi lang naman kami, bakit kailangan niya pang isigaw? Ako tuloy ang nahihiya. Hindi pa nga ako tapos pagmasdan ang iba.

Tinitigan ko si Jax at sinubukan na sensyasan siya gamit ang aking mga mata. Kaso, nabigo ako ng tingnan niya lang ako pabalik ng may magka salubong na mga kilay at halatang nagtataka.

Bahagya akong umabante at inilapit ang bibig ko sa kanyang tainga. “Paano ba kinakain 'to, Jax? Ngayon lang kasi ako makakakain ng steak.” maingat kong bulong.

Narinig ko ang mahina niyang tawa. “Follow me.” bulong niya pabalik sa akin at saka ay marahang dinampot ang tinidor at kutsilyo sa kanang kamay.

Inipit niya ang karne at saka ay sinimulang hiwain ito gamit ang kutsilyo. Sinundan ko ang bawat kilos ni Jax, at nang sandaling sabay naming hiwain ang steak ay tila gusto ko na lang tumakbo palabas ng pinto at maglaho.

Umusog lang ang steak palabas ng plato ko pero hindi ito nahiwa kagaya ng ginawa ni Jax.

Mistulang isang gatilyo ng baril ang kinalabit na nagpakawala ng malakas na tawa ni Jaxson sa tabi ko. Umalingawngaw ito sa buong paligid na kumuha ng atensyon ng lahat papunta sa amin.

Napapikit na lamang ako sa hiya dahil sa kagagawan ko. Imbis na tulungan ako ng lalaking ito ay pagtawa ang inuna niya.

Paano kung hindi ko makumbinsi ang ama niya? Ano na lang ang ipambabayad ko sa hospital?

“Cattleya, you don't know how to eat a steak?”

Inaasahan ko na ang tanong na yan mula sa isang tao na ipinanganak sa yaman.

Marahan kong iminulat ang aking mga mata at tiningnan ang ina ni Jax.

“Yes, ma'am.” peke akong ngumiti bago isinalba ang steak at ibinalik sa plato ko.

“My god, why? Are you a vegan?” maarteng tanong nito sa akin. “Or are you… Where are you from? What's your family name, by the way?”

Nabigla ako sa tanong niya pero sinubukan kong i-compose ang sarili ko upang maayos na sumagot. “S-Santos po, ma'am. I'm from Tondo Mani-”

“I mean, your family's status.” singit niya.

“P-Po?” umawang ang bibig ko kasabay ng pag angat ng aking kilay. “A-Ah, wala pong trabaho ang inay ko. Ako ang nagtatrabaho para sa pamilya namin magmula ng mawala ang itay.”

“What? And you said you're Jaxson's new-”

“Enough.” mariing bulalas ni Mr. Madrigal na nagpatigil sa step-mother ni Jax. “We're here to celebrate Lance's engagement, and not to get to know my son's new girlfriend.”

“Right, and your plan for the Armani Corporation.” sabat ng lalaki sa tabi ng ex-fiance ni Jaxson. Sa palagay ko ay siya ang step-brother na tinutukoy nila noong gabi sa club. Abot tenga ang mga ngiti niya habang nakatingin sa kanilang ama. “Now that I am having a successor, I can now take care of the corporation. Besides, I have been studying how to run our business for the past 18 years. I am confident about continuing our family's legacy, father.”

Nakita ko sa gilid ng aking mata ang pagkuyom ng kamao ni Jax pati na ang pagtalas ng kanyang panga.

Tama nga ang sinabi ng kaibigan niya noong gabi sa nightclub. Ito na nga ang susunod na mangyayari.

“Since you are now expecting your own family with Daniella, whose father is a big contributor to our business. I am planning to transfer the entire Armani Corporation to you Lance. Which is originally for my son, Jax.” utas ni Mr. Madrigal.

Hindi ko na rin napigilan ang pag ngitngit ng aking ngipin dahil sa nadama kong inis at simpatya kay Jaxson.

“My decision won't diminish. Unless, Jaxson marries his new girlfriend Cattleya, as soon as possible.”

Naramdaman ko ang marahang paglaki ng aking mga mata kasabay ng pagtigil ng tibok ng puso ko.

“Only then will my selection for the Madrigal inheritor alter.”

Tama ba ang narinig ko?

Anong kasal ang sinasabi ng ama niya?

Isang gabi lang ang usapan namin ng lalaking ito!