5

“Sinabi kong date natin ito, bakit hindi ka man lang nag-ayos? Gusto mo bang ipakita sa lahat na ang asawa ng Mandia Group ay losyang na?” Mapangutyang tanong ni Joshua nang makita niya si Alexandra. 

Ngunit imbes na maapektuhan, napangiti lang si Alexandra—isang ngiting puno ng panunuya. 

“Hindi ako pumunta rito para sa date na gusto mo,” malamig niyang sagot. “Nandito ako para makipaghiwalay.” 

Kanina pa siya gutom at balak sanang makipagkita kay Bea, pero natanggap niya ang tawag ni Joshua bago pa siya makaalis. Sa kabila ng kanyang pag-aalangan, pinili niyang sagutin ito. Siguro nga, ito na ang tamang oras para tapusin na ang lahat sa pagitan nila—bilang respeto na rin sa kanilang pamilya. 

Napatingin si Joshua sa kanya, pilit na pinapanatili ang anyong mahinahon. Ngunit sa likod ng kanyang tingin ay may apoy ng galit. 

“Sa tingin mo ba talaga papayag ako?” tanong nito, puno ng hinanakit. 

“Bakit naman hindi?” sagot ni Alexandra, titig na titig sa lalaki. “Ikaw naman ang may babae, hindi ba?” 

“Huwag mong sinasabi iyan!” madiin ang boses ni Joshua habang palinga-linga sa paligid. “Nandito tayo sa pampublikong lugar! Gusto mo ba talagang mapahiya?” 

Napangisi si Alexandra. “Ako ba ang mapapahiya? Hindi ba ikaw iyon?” 

Lalo lang nagdilim ang mukha ni Joshua. “Ano ba talaga ang gusto mong mangyari? Gusto mong kaladkarin sa kahihiyan ang pamilya natin?” 

“Pwede ba, Joshua? Ikaw ang manloloko! Ikaw ang walang kwenta, pero bakit ako ang sinisisi mo?” matigas ang boses ni Alexandra. “Anong karapatan mo? Pwede nga kitang kasuhan, ikaw at ang babae mo!” 

Biglang humigpit ang hawak ni Joshua sa kanyang braso. “Hindi mo ako matatakot! Hindi mo ako pwedeng basta iwan! Hindi mo alam kung ano ang ginagawa mo, Alexandra!” 

Nanatiling matatag ang tingin ni Alexandra sa kanya. “Ikaw? Anong pinanghahawakan mo at ayaw mong bitawan ang kasal natin? Hindi ko naman kayang bigyan ka ng anak, hindi ba? Kaya mas mabuti pang tapusin na lang natin ito!” 

Nakita niya kung paano humigpit ang panga ni Joshua. “Anong sinabi mo?” 

Bigla na lang itinaas ni Joshua ang kamay, akmang sasampalin siya. Ngunit bago pa ito lumapat sa kanyang pisngi, isang malaking kamay ang sumunggab sa braso ng lalaki, pinipigilan ito. 

Napatingin silang dalawa. 

“Tito Tyron?” gulat na tanong ni Joshua. 

“Tyron?” halos bulong ni Alexandra, hindi makapaniwala sa presensiya ng lalaki. 

Matigas ang titig ni Tyron kay Joshua, puno ng awtoridad. “Ano sa tingin mo ang ginagawa mo? Akala mo ba, dahil nasa pinakamataas ka nang posisyon sa kumpanya, pwede mo nang saktan ang asawa mo?” 

Tahimik ang paligid, ramdam ang tensyon sa hangin. 

“Nasa publiko kayo,” patuloy ni Tyron, ang boses niya’y malamig pero matalim. “Kung gusto niyong mag-away, doon niyo gawin sa bahay niyo! Huwag niyong idamay ang pangalan ng pamilya Mendez sa kahihiyan na ito. Lalo ka na, Joshua. Magpakalalaki ka naman!”

 Tiningnan ni Joshua nang masama si Tyron bago marahas na tumalikod at naglakad palabas ng restaurant. May ilan sa mga bisita ang palihim na sumusulyap sa kanila, habang ang iba naman ay walang pakialam. Mabilis siyang sumakay sa kanyang sasakyan, pilit pinipigil ang galit na bumabara sa kanyang dibdib.

Wala pa man siyang naipapasok na susi sa sasakyan ay biglang nag-ring ang kanyang cellphone. Agad niya itong sinagot nang makita ang pangalan sa screen.

"Babe, where are you?" Malanding tanong ng nasa kabilang linya.

Napailing siya at sinandal ang ulo sa headrest. "Bakit? Anong nangyari?"

"Wala lang. I wanted to see you and tell you a good news."

Napakunot-noo si Joshua. "Good news? Anong good news ‘yan, Sofia?"

"Just come here, babe. I'll tell you everything."

Si Sofia Kim Velasquez—isang mapanuksong modelo. Nakikipagkonekta siya sa iba’t ibang kumpanya upang makuha ang mga endorsement at commercials na magpapataas sa kanyang kasikatan. Ngunit si Joshua Mandia ang naging pinakamadaling target niya. Alam niyang may asawa ito, pero hindi naging hadlang iyon upang akitin siya. Mas matagal pa silang magkasama kaysa kay Alexandra, at kahit pa sikreto ang relasyon nila, sigurado siyang siya ang paborito ni Joshua.

At ngayon, may plano na siya upang tuluyang makuha ito.

Pagkarating ni Joshua sa condo ni Sofia, agad niya itong binungad ng matalim na tanong. "Ano ‘yong sasabihin mo?"

Ngumiti si Sofia at lumapit sa kanya. "Bakit ka naman nagmamadali? Come inside, babe. Let’s go to our room."

Hinimas-himas pa ni Sofia ang braso ni Joshua bago pinihit ang doorknob. Pagbukas ng pinto, isang sorpresa ang bumungad sa lalaki—ang buong silid ay punô ng lobo at pulang petals, habang sa dingding ay may mga nakasabit na litrato ng isang sanggol: may gumagapang, may tumatawa, may umiiyak, at may kumakain.

Napakunot-noo si Joshua. "What is the meaning of this?"

Sa halip na sumagot, lumapit si Sofia at hinawakan ang kanyang mga kamay. Nagningning ang mga mata nito bago masayang bumulong:

"I’m pregnant! Magkakaanak na tayo, babe!"

Nagtagal ng ilang segundo ang katahimikan bago unti-unting lumitaw ang ngiti sa labi ni Joshua. Isang bata. Isang tagapagmana. Hindi niya maitanggi ang tuwa na nararamdaman.

Ngunit habang nakahiga silang dalawa sa kama, nakatingin sa kisame at pinag-uusapan ang kanilang mga plano, isang bagay ang biglang sinambit ni Sofia na nagpabago sa ekspresyon ni Joshua.

"Babe… kailan mo hihiwalayan si Alexandra?" malambing ngunit may bahid ng pagpupumilit ang tono nito. "Ayokong ipanganak ang anak natin nang hindi tayo kasal."

Napatingin si Joshua sa kisame, tila nag-iisip. "Hindi ko pa maisip kung paano ko siya hihiwalayan."

Napataas ang kilay ni Sofia. "Huh? Anong hindi mo maisip? Iniwan ko pa ‘yung panty ko sa kama niyo para mahuli ka niya. Siguradong alam na niyang may babae ka. Dapat hiniwalayan ka na niya!"

Biglang bumangon si Joshua mula sa kama. "What? Ginawa mo ‘yon?"

"Oo! So hiwalayan mo na siya!"

Napabuntong-hininga si Joshua at mabilis na bumangon mula sa kama. "I’ll call you later. May meeting pala ako."

Naiwang nakakunot-noo si Sofia habang pinagmamasdan ang pag-alis nito.

Habang nagmamaneho si Joshua pauwi, isang mas malaking problema ang pumasok sa kanyang isip. Kung makikipaghiwalay siya kay Alexandra, may posibilidad na mahati ang shares niya sa Mendez Group—o mas malala, tuluyan itong mawala sa kanya.

Ang Mendez Group ay isang kumpanya na itinatag ng dalawang makapangyarihang babae: sina Zenaida Mendez, ina ni Tyron, at si Gloria Villarama, lola ni Alexandra. Ang kasunduan ng mga ito ay ipakasal ang kanilang mga anak upang mapanatili ang paghawak ng pamilya sa negosyo.

Noong panahong iyon, ang kasunduan ay hindi talaga para kay Joshua—si Tyron ang totoong napiling maging asawa ni Alexandra. Ngunit dahil sa hindi maayos na relasyon ni Tyron sa kanyang ina, napunta kay Joshua ang kasunduan.

Napangiwi si Joshua. Kung tuluyang mawawala sa kanya si Alexandra, hindi malayong maghabol si Tyron sa kumpanya na pinaghirapan niyang makuha.

At iyon ang bagay na hindi niya kailanman hahayaang mangyari. Kinuha niya ang kaniyang cellphone, nang sagutin ng kabilang linya ang tawag, bumuntong hininga muna siya.

“I’m Sorry. I am really sorry.”