Chapter 52

Kinaumagahan, sumakay na kami sa barko at nakasabay pa namin sina Miranda na pauwi na rin sa Maynila.

"Kamusta ang unang gabi bilang mag-asawa?" tanong ni Miranda sa'kin at nandito kami sa deck ng barko, sa may gilid. Tinakasan ko muna si Lino sa nirentahan naming silid dito. Umaga ngayon kaya ibinibilad ni Miranda ang baby boy nila ni Lucio.

"Wala. Natulog lang kami," natatawang sagot ko na kinakunot ng noo niya. Bumuntong-hininga ako. "Nakakapagod pala ang ikasal pero ang saya. I mean, pakiramdam ko, nananaginip pa rin ako," dagdag ko kaya napangiti siya at tumango.

"Ganyan din naman ako noon, Mon. Huwag kang mag-alala, masasanay ka rin. Kung mahal mo na si Lino, tiyak na mas mamahalin mo ang inyong magiging anak," aniya sabay halik sa noo ng anak niya kaya napangiti ako. Ang cute nila! "Wala pa ba kayong planong magkaanak agad?" she asked.

"Hindi ko alam," nagkibit-balikat ako. Parang gusto kong kami muna ni Lino. Pero mukhang gusto niya na magkaanak.