Chapter 1

"Congratulations sa bagong kasal!" masayang sigaw ng isang babaeng matanda sa dalawang tao na dumating sa kanilang mesa. Magarbo ang reception at maraming dumalo sa pinakahihintay na kasal ng dalawang magkasintahan.

Sa buong paligid, mapapansin na tanging mga mayayaman na tao lang ang pumupuno rito dahil sa mga mamahalin nilang suot isama na rin ang elegante nilang mga kilos. Maraming nag-uusap na mga business man sa gilid, habang ang mga kababaihan naman ay nagpapasikatan sa mga mamahalin nilang kasuotan at alahas.

"Mom… masaya po ako dahil ngayon ganap ko nang masasabi na isa na akong Montreal. I am glad that you accept me without any hesitation towards your family," masayang sabi ni Kourtney, ang bagong asawa ni Claude na kanyang groom sa ngayon.

Ngumiti si Mrs. Camilla sa naging sagot ng babae, ang ina ni Claude na nanggaling sa mayamang pamilya mula sa ibang bansa. Napangasawa niya ang ama ng lalaki sa pamamagitan ng arrange marriage na siya mismo ang may gawa kahit na una pa lang ay tutol na ang kanyang magulang noon pa man.

Kinuha nito ang kamay ni Kourtney. "Since the day I saw you with my son, I know exactly that you are the perfect woman for him. Which is why I am so happy that you are officially part of our family."

Mas lumapad ang ngiti ng babae sa kanyang narinig habang ang asawa naman niya ay hindi maalis ang kamay nitong nakapulupot sa kanyang bewang. Suot ng babae ang puting silk gown na umaabot sa sahig at may kaunting slit sa gilid na hindi gaano kataasan na hapit sa kanyang katawan.

Magsasalita pa sana si Claude nang bigla na lang mamatay ang ilaw sa paligid at tanging sa mismong stage ang naiwang nakabukas. Nagtaka ang iba sa nangyari na naging sanhi upang umugong ang ingay sa paligid.

"What is going on?" takang tanong ni Mrs. Camilla sa kanyang anak. Napakibit-balikat ito dahil maski siya'y hindi alam ang nangyayari. Inalis muna nito ang pagkakahawak sa asawa at aalis na sana upang magtanong nang may isang babae ang lumabas mula sa mga kurtina sa gilid ng stage.

Elegante ang kanyang bawat galaw na ginagawa habang papunta sa gitnang bahagi ng stage. Suot nito ang itim na dress na hapit sa kanyang katawan at may kaunting diyamante sa bandang bewang. Backless din ito kaya mas lalong nagpadagdag ng kaseksihan sa babae ang kanyang kasuotan na may pulang-pulang labi na bumabagay sa mala-gatas niyang kutis.

Sa pagtama ng spotlight sa kanya, para siyang kuminang kasama ng simple nitong suot na mga diyamante na kumumpleto sa suot nito na nagpaagaw sa atensyon ng lahat. Maraming namangha sa taglay nitong kagandahan lalo na't nakalugay ang hindi gaano kahabaan nitong kulot na buhok habang ang iba naman ay nagtataka sa kung sino ang babae.

Gulat ang naramdaman ng tatlo sa paglitaw ng babae na ngayo'y may ngisi na sa kanyang labi. Natuon pa ang tingin ng babae kay Claude na para bang na-semento sa kinatatayuan nito't hindi man lang maalis alis ang tingin dito. Napansin ito ng kanyang asawa na si Kourtney kaya naman lumapit siya sa kanya ngunit hindi ito naging sapat upang maalis ang tingin sa babae.

May nag-abot ng mic sa babae na nagpaalis ng tingin nito sa lalaki. "Good evening everyone, I would like to congratulate Mr. and Mrs. Montreal on their marriage which I hope… they will have a healthy relationship until the day of their death. And I'm really happy to see them like this because I didn't expect them to get married after two years."

Sa huling sinabi ng babae, maraming nagtaka sa kung ano ba ang ibig niyang sabihin lalo na't sa tono ng boses nito ay parang hindi siya masyadong natutuwa para sa kanila, kaya mas umugong ang ingay sa paligid. Ang ilang mga reporters na nasa gilid ay nagkaroon ng interes sa kanya na tahimik na nakikinig habang kumukuha ng litrato.

Sinenyasan ni Mrs. Camilla ang ilang tauhan nila sa gilid na agad lumapit sa kanya.

"Ano ba ang nangyayari?! Paalisin niyo siya sa stage," halos pabulong niyang utos.

Tumango naman ang mga tauhan nito na agad sumunod sa matanda, ngunit bago pa man sila makapunta sa taas ng stage, may pumigil na sa kanila na mismong tauhan din ng babae. Napansin niya ito kaya naman ngumiti siya at nagpatuloy sa kanyang sinasabi.

“Like I said… congratulations! And before I forget, I have a wedding present for you two, I hope you all liked it," sabi niya bago gumilid sa stage at mawala sa kanya ang spotlight.

Napunta ang tingin ng lahat sa malaking screen na nasa gitna ng stage kung saan may isang video nila Claude at Kourtney ang makikitang naghahalikan sa loob ng isang kwarto. Halata ring nakatago sa ilalim ang camera dahil sa anggulo nang pagkakakuha ng video sa dalawa na ikinataka ng mga bisita.

Hindi maipinta ang mukha ni Mrs. Camilla sa nakikita na halos patayin na niya sa tingin ang babaeng hanggang ngayon ay hindi pa rin nagpapakilala. Ang dalawa naman’y hindi alam ang gagawin na matamang nanonood sa video na patuloy na nagpe-play sa malaking screen.

"Kailan mo balak alisin sa buhay mo si Rosie?" mapang-akit na tanong ni Kourtney sa loob ng video matapos ng kanilang halikan. Mula sa likuran, niyakap siya ni Claude saka hinalikan sa leeg nito.

"Malapit na… huwag ka masyadong mag-alala dahil kumukuha lang ako ng tiyempo. Tinutulungan naman ako ni mom para tuluyang mawala na ito, pagkatapos nun… papakasalan kita at ipapakilala sa lahat." Mahinang napatawa si Kourtney sa naging sagot nito at humarap kay Claude para yakapin.

Mayroon pa sanang sasabihin si Kourtney sa video ngunit naputol na ito bago pa man marinig ng mga tao sa paligid. Nagkaroon ng diskusyon sa mga bisita at halos lahat ng atensyon ay napunta sa dalawa na ngayo'y pinapalibutan na nang mga reporters. Maski si Mrs. Camilla ay napalibutan ng mga ito kaya napatakbo ang mga tauhan nila upang protektahan ang tatlo.

"Kayo po ba ang nabanggit sa video?" tanong ng isang reporter sa babae na nasa baba ng stage. Nakakuha 'yon ng atensyon sa iba kaya maski sila'y hinihintay ang magiging sagot nito.