Chapter 54-Banta

Mabilis na pinigilan ni Stella si Aprilyn nang likumin nito ang gamit at ilagay sa isang maliit na box. Ang akala niya ay abutin pa siya ng ilang araw sa department na ito bago mabunyag ang tunay na estado niya sa kompanya. Hindi niya hahayaang mawala sa kompanya ang tauhang matino at may puso.

"Stella, ayaw ko na ring isiksik ang sarili ko dito at ayaw ko na makatrabaho ang tulad nila." Ipinagpatuloy Aprilyn ang pagligpit sa gamit.

Galit na inagaw ni Stella ang hawak ni Aprilyn at sininghalan ito. "No, manatili ka sa department na ito at sila ang dapat na alisin sa trabaho!"

Tigagal na napatitig si Aprilyn sa babaing nagagalit. Mukha naman itong hindi nasisiraan ng bait pero umaakto ng hindi tama.

"Anong kagulohan ang nangyayari dito?"

Natahimik ang lahat nang marinig ang matinis na tinig ng bagong dating na babae.

"Manager Laura, mabuti at dumating ka na. Kanina pa nanggugulo ang bagong pasok na empleyada at pati ang pinsan mo ay pinagsasalitaan ng hindi maganda!" Sumbong ni Loida.