Chapter 2

KENT

Tinatamad na naman akong magbihis. Heto ako ngayon, ayaw pasamahin ni dad sa hapunan hangga't hindi ako nakakapagbihis.

Bakit ba kasi?

Aangal pa sana ako pero dahil nagugutom na ako, umakyat nalang ako sa kwarto para magbihis.

Agad naman akong lumabas pagkatapos kong magpalit. Habang pababa na ako, nakita kong pumasok si Kuya Kyle.

"Dad, you won't believe what just happened a while ago," sabi niya kay dad pagkatapos magmano.

"Ano naman yun?" sabi naman ni dad habang tumatawa na parang excited sa sasabihin niya.

Naku, ano naman kayang kabalstugan tong ginawa ng kapatid ko. Magsasalita na sana siya kaso nakita niya ako.

"Huy Kent, halika ikukwento ko rin sayo yung nangyari!" tawag niya sakin. "You should really hear this."

"Ano na naman ba yan kuya?" sagot ko at naupo na sa hapag kainan.

"May niligtas akong babae kanina na muntik ng mapahamak kasi hinihila siya ng 4 na lalaki," sabi niya.

"Weh? Ano naman ginawa mo?" sabi ko naman na parang hindi naniniwala.

"Napatumba ko yung 4 na lalaki, syempre. And guess what, that girl is from your school!" sabi niya kaya nanlaki ang mga mata ko.

"Talaga kuya? Pati rin ba yung mga lalaki?" tanong ko naman.

Hindi naman sa wala akong pake dun sa babae pero I'm more concerned with those guys. Pano kung dun din sila nag-aaral? Baka yung crush ko naman yung mapahamak! Ang ganda pa naman nun.

Wag niyo na itanong kung sino siya ok? Siya lang naman ang babaeng nagpapatorpe sa isang Kent Cruz na kilalang kilala sa St. Luiz.

"Well, iba yung uniform nila eh kaya I guess they're from a different school," sabi ni kuya kaya kaya medyo nakahinga na ako ng malalim.

"Pero wait? Pano ka naman napadpad doon? Siguro may balak kang sunduin ako no? Si kuya talaga miss ako palagi yiee!" biro ko naman kaya napatawa silang dalawa ni dad.

"Tanga! Doon din naman ako dumadaan no! Nakita ko lang talaga yung scene along the way," sabi ni kuya at umakyat na sa itaas. "Bihis lang muna ako."

Lumipas ang ilang oras at nagsimula na rin kaming kumain.

"Actually, may gusto akong sabihin," biglaang tugon m ni dad kaya napatingin kaming dalawa ni kuya sa kaniya. "Aalis muna ako sa bansa," dagdag pa niya na ikinagulat ko.

Napatingin naman ako kay kuya pero parang hindi naman siya nabigla sa sinabi ni dad.

Alam na ba niya?

"Bakit? Saan po kayo pupunta dad?" tanong ko.

"I'm planning on enlarging our business in Switzerland kaya I'll be staying there for a couple of months. Bukas na ng madaling araw yung flight ko," sabi ni Dad.

Hay, akala ko naman kung ano. Nagmamay-ari kasi kami ng restaurant. May tatlong branch na kami pero mukhang okay din kung may branch na kami abroad.

"Wow, ayos yun dad," sabi ko at binigyan siya ng approve sign.

Kinabukasan, maaga akong pumasok kasi hindi na ako nakatulog matapos akong nagpaalam kay dad kaninang madaling araw.

As usual, sinalubong na naman ako ng mga fans ko. Hindi sa nagmamayabang ha pero sikat talaga ako dito sa St. Luiz. At kung kiligin sila, parang mahihimatay na.

Tsk, hindi ko yun kasalanan no. Pinanganak na akong gwapo. Dagdag points lang tong suot ko pati tong gitarang nasa likod ko.

Nung makita ko yung mga kaibigan ko sa hallway, agad na akong tumakbo patungo sa kanila pero nakita kong wala ata sila sa mood.

"Oy mga pre, bat parang namatayan kayo ngayon?" tanong ko sa kanila.

"Eh ito kasing si Ethan eh. Di dinala yung mga materials para sa assignment natin," sabi ni Augustus.

"Pambihira ka naman Augustus, ako pa talaga yung sisisihin mo? Eh sabi ko ikaw na magdala eh," sabi naman ni Ethan.

Sila lang yung mga nakakausap kong matino dito sa school. (ewan ko ba kung matitino tong mga 'to) Yung iba kasi, nababakla pag kinakausap ako haha!

"Ayan kayo! Wag na kayong magsisihan! Eh kung sinama niyo 'ko sa grupo, edi wala na sana kayong problema. Ako na sana yung magdadala!" sabi ko sa kanila at natawa.

"Tanga, by pair yung assignment diba? At tsaka, ikaw nga yung unang nang iwan eh. Naghanap ka ng ibang ipapartner," sabi naman ni Augustus.

"Oy ayun yung partner mo oh," sabi naman ni Ethan sabay turo sa isang babaeng papalapit samin.

"Kausapin mo naman pre, baka sakaling pagtapos na kayo, ibigay niyo nalang samin yung mga tira tirang materials," sabi ni Augustus kaya sinapak ko na. Ang dadaldal kasi.

"Good Morning, Kent! Dala mo na ba yung mga newspapers para sa gagawin nating project sa physics?" bati sakin ni Keanna, yung pair ko sa assignment.

"Huh? Anong newspapers?" naguguluhan kong tanong sa kaniya. Napansin ko namang tumatawa yung mga kaibigan ko. Para san ba kasi yung newspapers?

"Newspapers. Yung pinadala ko sayong material para sa assignment," sagot naman niya na mas ikinalito ko.

"Huh? Papers yung sinabi mo sakin ah! Kaya heto, nagdala ako ng 1 whole kasi di ko alam yung size. Pwede naman tong hatiin sa 1/2 crosswise, 1/2 lengthwise, 1/4 o kahit 1/8 kaya sureball na," sabi ko sa kaniya sabay abot nung 1 whole na papel sa kaniya mula sa bag ko.

Akala ko pupurihin niya ako kaso nakasimangot lang si Keanna at mas natawa pa yung mga kaibigan ko. Ano bang mali sa sinabi ko? Ang galing ko nga eh, nagdala pa ako ng materials. Minsan lang kaya ako magcooperate kasi tinatamad ako.

"Jusmiyo Mr. Kent Cruz! Newspapers yung kailangan, hindi 1 whole! Buti nalang talaga nagdala ako ng newspapers just in case," pasigaw pa niyang sabi at akmang aalis na.

"Ah ganoon ba? Pasensya, di ko narinig eh. Mabuti naman at may backup ka. Kailan ba natin gagawin yung assignment? Mamayang lunch break?" tanong ko naman.

"Anong natin? Excuse me, Mr. Cruz, di mo rin ba narinig yung sinabi ni ma'am kahapon? Sabi niya, if you find your partner irresponsible, you can do the task individually. The activity is good for solo or pair! And in this case, wala kang naiambag! Ako na nga yung nagdala ng egg, yarn and tape, pati ba naman newspapers ako nalang din? Edi ako nalang din yung gagawa individually! Kaya Mr. Cruz, I won't pair up with you anymore. Good luck nalang sayo!" mabilis niyang sabi at saka umalis na.

Ganoon ba talaga kaingay ang mga babae?

Sinubukan ko pa sana siyang habulin kaso pinigilan na ako ng mga kaibigan ko at pinagtawanan pa! Nagmukha tuloy akong tanga ngayon.

Lumipas ang ilang oras at heto ako ngayon, inaantok na naman sa discussion. Last period na kasi 'to bago maglunch break. Naalala ko naman na last period pa pala sa hapon yung Physics namin kaya pwede ko pang mabili yung mga materials mamayang lunch break. Naaalala ko naman yung mga yun kasi sinabi ni Keanna kanina. Egg, tape, yarn and syempre newspapers, haha! Akala din siguro nung Keanna na yun na kailangan ko siya. Neknek niya!

Lumipas na naman ang oras at ngayon ay malapit ko ng makompleto yung mga materials. Tinignan ko yung oras at nangamba ako nang makita kong quarter to 1 na pala. Newspapers nalang yung kulang ko. Lalabas pa sana ako ng campus para bumili nang nakita kong tumatakbo sina Ethan at Augustus papunta sakin.

"Pre, san ka galing? Bakit di ka sumabay samin maglunch?" hingal na tanong sakin ni Ethan.

"Bumili ako ng mga materials eh. Mukhang ako nalang talaga mag-isa yung gagawa nito," sagot ko naman sabay kamot sa batok.

"Nako sayang pre. Katabi pa naman sana namin kanina ng table yung crush mo," sabi naman ni Augustus kaya napanganga ako.

Sayang naman talaga oh.

"T-tapos anong nangyari?" excited kong tanong.

"Wala naman. Kaso pre, ang ganda niya talaga kanina!" sagot naman ni Augustus kaya sinapak ko.

"Aba. Ako lang dapat yung tumingin sa crush ko ng ganon ha," sabi ko at tumawa naman sila.

Magtatanong pa sana ako tungkol sa crush ko nang bigla kong naalala na wala pa pala akong dyaryo.

"Oy nga pala, mauna muna ako sa inyo mga pre ha. Wala pa akong newspapers eh," sabi ko at akmang aalis na sana pero bigla akong tinawag ni Ethan.

"Teka lang. Newspapers ba kamo pre? Heto oh, may natira pa samin ni Augustus," sabi niya na ikinatuwa ko kasi may inabot siya saking mga dyaryo.

"Oy salamat pre, mahal niyo talaga ako," sabi ko naman at kinuha na yung mga newspapers.

Agad namang nagpaalam sina Ethan kasi may kukunin pa raw sila sa room kaya pumunta muna ako sa school park at naghanap ng bench. Dali dali kong inilabas yung mga materials. Hays, 10 minutes nalang ala 1 na. Di bale na nga lang na malate ako.

Naalala kong sabi ng teacher namin na gamit daw ang mga materials, sisiguraduhin daw naming pag inihulog yung itlog mula sa 3rd floor ay hindi mababasag. Ano daw yun eh, conversation of momentum? Conversation ba yun o conservation? Ah basta, yung goal ko lang ay hindi mabasag yung itlog. Naisip kong gawing shield ng itlog yung mga dyaryo kaya ang ginawa ko ay pinunit ko iyon at isa isang ipinantakip sa itlog. Mapayapa ko namang pinunit yung mga newspapers ng may narinig akong sumigaw mula sa likuran ko.

"OH MY GOODNESS, WHAT THE HELL ARE YOU DOING?"

Tinignan ko kung sino yung sumigaw ngunit laking gulat ko ng makita ko yung babaeng 8 months ko ng crush. Si Christine Del Rosario.

"Napakainsensitive mo! Hindi mo ba alam kung ilang sleepless nights yung dinanas ko para lang matapos yang 12-page tabloid sized na dyaryong yan?" Sigaw pa niya at agad na kinuha mula sa kamay ko yung mga punit na newspapers dahilan para mahulog yung hawak kong itlog at mabasag.

"Sh*t! Tignan mo! Nabasag tuloy yung itlog," sigaw ko sa kaniya.

Totoo ba 'to? Nakakausap ko siya ngayon in person?

"Well, I can pay for that! Ikaw, kaya mo bang gawin ulit yang school paper?" sabi naman niya na ikinagulat ko.

S-school P-paper to? Eh diba siya yung leader sa paggawa nito?

"Ako lang naman ang Editor-in-chief ng dyaryong pinunit mo!" sabi niya.

Tama! Siya nga talaga yung leader este yung Editor-in-chief.

"S-sorry," yun na lamang nasabi ko. Hays. Ano ka ba naman Kent! Pagkakataon mo na 'to! Dapat hindi ka maging torpe sa harapan niya.

"I will report you to the school paper adviser! Iyang mga yan ay dinidistribute sa mga students for monthly news updates hindi para pumitin lang," sabi niya at akmang aalis na sana pero bigla kong hinawakan yung braso niya.

"Ugh! Bitawan mo ako!" Sigaw niya pero di ko siya pinakawalan at hinila ko yung bewang niya dahilan para mapalapit yung mukha niya sakin.

"Kilala mo ba ako?" mahina kong sabi habang tinititigan ang kanyang mga mata.

"H-hindi," utal-utal niyang sabi. Nararamdaman kong kinakabahan siya ngayon. Bakas din ang pawis sa kaniyang mukha.

Inilapit ko ang mukha ko sa tenga niya para bumulong.

"I'm Kent Cruz. I'm the school's heartthrob at gusto kita."