76.

[Apol]

Soon to be ex-wife? Ibig sabihin ay hihiwalayan na talaga siya nito?

Pinahid niya ang luha sa mata at matapang na tumingin rito. “Ang paghihiwalay ay parehong pinagdi-desisyunan ng dalawang tao. At sa kaso nating ito ay wala akong balak makipaghiwalay sa’yo. Kahit na padalhan mo pa ako ng sandamakmak na annulment paper hinding-hindi ako bibitaw sa pagsasama nating ito!”

Tinaas niya ang kamay kung nasaan nakasuot ang singsing ng ikasal sila, maging ang kwintas na nasa leeg niya ay itinuro niya.

“Mahal mo ako, di’ba? K-Kasi kung hindi bakit hindi mo ito kinuha? S-Saka kung hindi dapat ay wala ka nang pakialam pa sa akin… hindi mo na dapat ako pinababantayan pa!” Gusto niyang yakapin si Xerxes pero marami pa siyang gustong sabihin. “Alam ko naman na nasaktan ka ng sobra sa sinabi ko… sorry na, okay? I-Intindihin mo naman ako… hindi ko iyon nasabi dahil hindi kita mahal, nasabi ko ‘yon dala ng takot ko…”

“Naiintindihan kita kaya nga ginagawa ko ang lahat ng ‘to.” Mariing wika nito.