Chapter 4

“Kaya kitang tulungan, Hannah, ng higit pa sa inaasahan mo. Subalit may mga kondisyunes ako na nais iparating sayo..” sabi niya sa babae. Puno ng pag asa ang kanyang mga mata na tatanggapin ni Hannah ang iaalok niya.

“Ano yun? Basta matulungan mo akong pabagsakin sila, papayag ako sa kahit anong nais mo..” maririnig ang determinasyon sa tinig ni Hannah.

“Hayaan mong maging malapit ako sayo, at protektahan ka, ng hindi ko na kailangang nakasunod sa anino mo. Nais kong malaman lahat ng iniisip mo.. Ako– ako ang bahala sa iyo..” tugon niya dito.

“Anong ibig mong sabihin, ninong?” naguguluhan niyang tanong.

Napalunok si Edward. Mabigat ang disisyong ito para sa kanya, lalo na at ang kanyang lihim ay nananatiling lihim. Hindi dapat malaman ni Hannah ang iba pang kaganapan sa buhay nila kasama ang magulang nito. Kung magiging legal siyang asawa ng babae, maaari niyang makuha ang nais niya ng hindi man lang nito nalalaman.

“Pakasalan mo ako.. Para magkaroon ka ng karapatan sa buong kayamanan ko, sa gayun, kaya mong labanan ng sabayan ang mga taong umapi sayo. Wag kang mag alala.. Wala akong ibang hihilingin sayo, kundi maging matagumpay ka..” nais ni Edward na magkaroon ng legal na karapatan kay Hannah, upang buo ang proteksiyon na maibigay niya sa babae. Hindi ito magalaw ni Caleb, at ng matupad na niya ang nais na mabawi niya ang kumpanya.

Bagaman at nag aalinlangan si Hannah sa alok na iyon, mas nananaig pa rin sa kanya ang tindi ng poot at sidhi ng paghihiganti. Nais niyang mapalubog sina Caleb hanggang gumapang ang mga ito na nagmamakaawa sa kanya. Tinanggap niya ang alok ng lalaki, na hindi na masyadong pinag iisipan ang lahat. Kung tutuusin, malapit ito sa kanyang mga magulang, at alam niyang hindi siya ipapahamak nito.

MATAPOS ang usaping iyon,napagkasunduan nilang magpakasal.

 Isang buwan matapos ang paghihiwalay nina Hannah at Caleb, nagdaos naman sila ni Edward ng kasal, kasama lamang ang dalawang saksi.

Nanirahan sila ni Edward sa iisang bubong, habang bumubuo ng mga plano ng paghihiganti. Ang kanilang pagiging mag asawa, ay tanging sa papel lamang, at natutulog sila ng magkahiwalay ng kwarto.

“Kumain ka muna, Ninong,” isang umaga ay alok ni Hannah sa lalaki, na halatang bagong ligo.

“Ikaw ba ang nagluto niyan?” tanong ng lalaki at naupo sa hapag, kung saan, nakahanda na ang isang masaganang almusal. “Saka.. di ba, sabi ko sayo, tawagin mo akong Edward?”

Sinalinan niya ng kape ang tasa ng lalaki, saka sinandukan ito ng pagkain. Nahihiya siyang sumagot, “hindi pa ako masyadong sanay.. Hayaan mo munang magkaroon ako ng oras na masanay na tawagin ka sa iyong totoong pangalan.”

Nasamyo ni Edward ang masarap na amoy ng mga putahe sa lamesa, at agad na tinikman ang mga iyon.

“Masarap ka palang magluto..” papuri niya kay Hannah.

“Tatlong taon akong tengga sa bahay, kaya iyan lang ang inaatupag ko,” nakangiti at tila nahihiya si Hannah ng sumagot.

“Iniintindi mo rin ang asawa mo sa umaga?” tanong nito sa kanya.

“Hmmm.. oo, pati mga isusuot niya, ako ang naghahanda..” nakatungo si Hannah, subalit hindi na ganoon kalungkot ang tinig niya.

“Kung isa ka naman palang mabuting may bahay, bakit ka niya hiniwalayan?” nalilitong tanong ni Edward sa kanya.

Huminga siya ng malalim, bago nagsalita, “may mga lalaking naboboring kapag ang mga asawa nila ay plain house wife lamang. Marami pa rin ang may nais ng mga career woman. Ang sabi nung kabit niya, boring daw ako at mukhang losyang.”

Natigilan si Edward pagkarinig niyon. Napatingin ito sa kanya. Si Hannah naman ay parang natauhan, “kalimutan mo na lang iyon ninong, naalala ko lang ang sinabi nila sa akin.”

“Iyan ang una nating babaguhin..” sabi ni Edward sa kanya.

“Ang alin?” nakakunot ang noo na tanong niya dito.

“Ang pagiging losyang na sinasabi mo. Kailangan mong matutong mag ayos. Isa pa, ayoko ng idinadown mo ang sarili mo, hindi ganyan ang espiritu ng paghihiganti,” pangaral nito sa kanya.

“Kung nais mong maghiganti, dapat, confident ka.” isinubo ni Edward ang pagkain na nasa kanyang kutsara, “kailan mo ba gustong mag umpisa?”

“Sa lalong madaling panahon,” iniangat ni Hannah ang kanyang ulo upang salubungin ang titig ni Edward.

“Kailangan mo munang maging handa sa lahat, Hannah. Ang paghihiganti ay hindi isang piraso ng tinapay na kapag inaamag na ay itatapon mo na lang basta. Dapat may konkreto kang plano para sa lahat. Kung saan ka mag uumpisa.. At ano ang dapat mong unahin,” payo sa kanya ni Edward.

“Kung gayon, Ninong, I mean, Edward,  ano ang dapat kong unahin?”

“Ang tamang pakikisalamuha sa mga tao. Alam ko, noon na socialite ka, pero tatlong taon ka ng wala sa lime light. Kailangan mong matutunan kung paano dadalahin ang sarili mo.”

“Paano ko iyon gagawin?”

“Simula ngayong araw, sasama ka sa akin sa opisina, pag aaralan ang tamang pagtatrabaho. Nais mo bang makapasok sa kumpanyang inagaw nila? Kailangan mo ng maraming pera, at ako lang ang makakapagbigay sayo ng ganoon. Kayamanan at kapangyarihan. Pero may nais akong hilingin..”

“Ano yun?”

“Maaari mo ba akong ipagluto araw araw? Hindi kasing sarap ng luto mo, ang luto ng aking mga kasambahay. Kaya madalas, sa labas na lang ako kumakain,” malapad ang ngiti nito ng sabihin iyon sa kanya, “hindi ko akalaing sa galing mo sa mga bagay bagay, makukuha ka pang talikuran ni Caleb.”

“Okay na yun,Edward.. Tapos na. Nais ko na lang ay matutunan ang lahat at ng makakilos ako ng dapat. Ang tagumpay nila ay pasakit sa akin, ang pagbagsak nila ang kaligayahan ko. Sa mundong ito, na puno ng manlilinlang na gaya nila, hindi na sapat na masarap ka lang magluto at maasikaso ka, dapat, alam mo rin ang iyong halaga.”

“Nabulag man niya ako noon, sisiguraduhin kong pipilayan ko siya ngayon.”

“Yan! Ganyan dapat.. Yan ang isang Hannah Agoncillio Ignacio!” tumango si Edward saka sumilip sa kanyang relo, “panahon na para umalis.”

“Saan tayo pupunta?” tanong niya sa lalaki.

“Basta, maghanda ka na, may pupuntahan tayo. Uumpisahan na natin ang transformation ng image mo. Hindi na ikaw si Sarah Geronimo na pangiti ngiti lang sa tabi.. Ikaw na ngayon si Khendall Jenner.”

Naiiling na lang siya at nag iisip, kung binubuska ba siya ng lalaki o ano. Basta ang alam niya, ito na lang ang kakampi niya sa ngayon, at hindi niya ito maaaring awayin. Ito ang tutupad ng lahat ng pangarap niyang paghihiganti.