CHAPTER 6 - CURIOUS

“Good morning, Ms. Tori.”

Ngumiti si Tori sa guwardiya na bumati sa kanya. Kilala na kasi siya ng mga guwardiya ng Madrigal branch ng Madraullo Motors dahil sa malimit niyang pagpunta rito para i-check from time to time ang progreso ng renovation ng coffee corner. At para alam din niya kung kailan siya magsisimula sa pagpapa-deliver ng mga materyales na gagamitin para roon. 

“Good morning din,” balik-bati ni Tori na sinuklian ng guwardiya ng pagyukod sa kanya.

Hanggang maaari, tinitiyempo ni Tori na sa pagitan ng alas onse at alas dose ng tanghali siya nagpupunta sa Madraullo Motors para siguradong hindi sila magkikita ni Xander. 

Mula nang tahasang sabihin ni Xander na hindi siya sang-ayon na si Tori ang magdidisenyo ng coffee corner ng kumpanya, hindi na naalis sa dalaga na magtanim ng sama ng loob sa binata. Ramdam ni Tori na ayaw sa kanya ng binata dahil sa tatlong beses na kakatwa nilang engkwentro. Kaya naman hanggang kaya niyang iwasan ang binata para hindi sila magkita ay gagawin niya hanggang sa matapos ang proyekto niya sa kumpanya ng mga Syjuco.

Dumiretso na si Tori sa lugar ng renovation.

“Good morning, Mam Tori!” ang sabay-sabay na bati ng mga tauhan doon. 

“Good morning din. Huwag n’yo akong intindihin. Ituloy n’yo lang ang mga ginagawa n’yo. Gusto ko lang makita ang progress ng natapos na.”

Pagkasabi nun ay muling nagbalikan sa kani-kanyang trabaho ang mga trabahador. Nagsuot ng hard hat si Tori at saka inilabas ang kanyang pangsukat. Tahimik siyang nag-obserba sa lugar habang tinitingnan ang bawat sulok.

“Ang guwapo ngayon ni Boss Xander, ano?”

Natigilan bigla si Tori nang narinig niyang binanggit ang pangalan ng lalaking iniiwasan. Pinilit niyang ipagsawalang-bahala ang narinig. Wala naman siyang pakialam sa lalaking binanggit.

“Oo nga! Parang ang bango-bango niyang tingnan, ano?”

Muling natigilan si Tori. Napaisip na siya sa narinig. Parang naging curious siya sa itsura ng binata ngayon. Bigla tuloy siyang napa-isip kung paano niya makikita ang binata ng hindi siya nahahalata.

“Mukhang tinamaan na ni kupido ang boss natin, ah.”

Mas napukaw ngayon ang atensyon ni Tori dahil boses ng matandang lalaki na nagsalita. 

“Tingin ko nga rin, brother. Iba ang aura ngayon, eh. Sa tingin ko naman dapat lang. It’s about time na sarili naman niya ang asikasuhin niya. Okay na ang Madraullo Motors. Stable na stable na ang kumpanya.”

Lalo tuloy naging palaisipan kay Tori ang mga naririnig niyang mga usapan ngayon kay Xander. 

Mabilis na hinubad niya ang hard hat at saka lumabas mula roon habang nag-iisip kung paano niya makikita ang binata ng hindi siya napapansin nito. 

Hindi pa lubusang nakakalayo si Tori nang magbago ang isip niya. Naisip niya na ilang araw na nga niyang iniiwasan ang lalaki, tapos ngayon ay bigla siyang susugod sa opisina nito dahil lang sa nga narinig niyang mga usap-usapan? 

Kaagad siyang huminto sa paglalakad at saka mabilis na humarap uli sa direksyon kung saan siya galing. Pero laking gulat niya ng may bigla na lang bumulaga sa kaniya na mukha ng isang may-edad na babae. 

“Ay, sorry po!” 

Pero laking gulat ni Tori nang bigla na lang napahawak sa kanya ang babae at tuloy-tuloy na napaluhod.

“Ay!”

Sinubukang mahabol ni Tori ang babae para hindi ito tuluyang bumagsak, pero pati siya ay nadala nito paluhod. Mabuti na lang at mabilis ang reflexes ni Tori kaya nagawan niya ng paraan na hindi sila bumagsak nang mabilis sa lapag. 

Maingat na inayos ni Tori ang katawan ng babae at saka itinakip sa may tuhod nito pababa ang hinubad niyang cardigan niya. Bahagya niyang itinaas ang ulo nito. 

Inilagay ni Tori ang isang kamay niya sa tapat ng ibabang mukha ng babae, pilit niyang pinapakiramdaman ang paghinga nito. Pagkatapos ay inilagay niya ang isang daliri sa palapulsuhan nito. May pulso naman ito at humihinga naman.

Napansin ni Tori na bahagyang kumikibot-kibot ang mga labi ng babae. May tunog siyang naririnig mula sa katawan ng babae pero hindi niya matukoy kung ano at saan nanggagaling iyon mula sa katawan nito. Tila may ‘beep’ na tunog siyang naririnig. Iginala ni Tori ang mga mata niya sa katawan ng babae, saka niya napansin ang relo nito na tila doon nanggagaling ang tunog.

Iniharap ni Tori sa direksyon niya ang mukha ng relo ng babae. Nakita niya roon ang salitang LOW. Napaisip si Tori kung ano ang ibig sabihin ng salitang iyon. Mabuti na lang at napansin niya ang bracelet na suot ng babae na kasama ng relo niya. Hinawakan niya ito at saka inikot. Doon niya nakita ang salitang DIABETES 1. 

 “S-Sweet…” bigla naman niyang narinig na sabi ng babae sa hirap at mahinang salita.

“Sweet?” ulit ni Tori. 

Hypoglycemia! Iyon agad ang pumasok sa isip ni Tori. Isa itong hypoglycemia episode ng isang taong diabetic.

“Mam, eto po. May iced tea ako na nasa plastic bottle. Kaya n’yo po bang iangat ng kaunti ang katawan ninyo? Iuupo ko po kayo para makainom kayo nang maayos.”

Ganun nga ang ginawa ni Tori. Nang sa tingin niya ay maayos na ang pagkaka-upo ng babae ay iniumang na niya ang dulo ng plastic bottle sa mga labi nito. Nang maramdaman ng babae ang likido sa mga labi niya ay agad naman itong uminom. Nang sa tingin ni Tori ay marami-rami na rin ang nainom ng babae, inawat niya na muna ang pag-inom nito. 

“Mam, check po muna natin. Observe ko po muna kayo ng mga fifteen minutes,” sabi ni Tori habang ibinababa niya ang plastic bottle at tiningnan naman ang relo niya sa pala-pulsuhan, habang pinagmamasdan ang babae.

Nakapikit ito, pero kumpara kanina, medyo mas maganda na ang kulay ng mukha nito. 

“Mam, nahihilo pa rin kayo?”

Marahang tumango ito. Sinilip ni Tori ang relo niya, naka-fifteen minutes na. 

“Mam, gusto n’yo po ba ng iced tea pa? Sa tingin n’yo, kailangan n’yo pa?”

“P-Please…”

Dinampot ni Tori ang plastic bottle. Nakahanda na siyang painumin uli ito ng biglang may sumigaw.

“Mommy!”

Lumipad ang tingin ni Tori sa direksyon ng boses Nakita niya ang nag-aalalang mukha ng taong gusto sana niyang makita kani-kanina lang. Si Xander. 

Mommy niya ang babaeng ‘to?

~CJ