Chapter 9

SOLARA RODRIGUEZ'S POV

Matapos kong ihatid sa kuwarto ni Luna ang kaniyang pagkain ay nagtungo ako sa harapan ng kuwarto ni mama at malakas na kumatok dito ng sunod-sunod.

"Ma, Ilabas mo nga 'yang si Mark!"

Ilang saglit pa ay bumukas ang pinto at bumungad sa akin si Mama na mukhang nagising ko mula sa pagkakatulog niya.

"Ano ba Solara, ang ingay mo," reklamo niya.

"Nasaan 'yang lalaki mo, huh?" Pinagtaasan ko siya ng kilay.

Labag sa loob ko ang pagpapatira niya sa kaniyang karelasyon dito sa pamamahay ni Papa pero wala na akong nagawa at tinanggap ko nalang na tumuloy siya dito dahil sa pag-aakala kong matutulungan niya si Luna.

"Bakit ba? Kita mong natutulog na kami oh." Binuksan niya ng todo ang pinto upang makita kong natutulong ang lalaki.

Itinabing ko ang braso niyang nakaharang sa pinto, dare-daretyo akong pumasok at lumapit sa natutulog na lalaki. Malakas ko siyang niyugyog kung kaya't napabangon ito sa gulat.

"Solara, anong ginagawa mo? Tumigil ka nga!" Suway sa akin ni Mama.