Chapter 2

Agad na inayos ni Benjamin ang kanyang suot na suit pagkatapos sabihin iyon kay Celestine. Doon na nakaramdam ng hiya si Celestine sa kanyang sarili.

Naisip niya tuloy ‘yong sinabi ni Shiela sa kanya. Si Shiela ay matalik niyang kaibigan kaya kilalang-kilala nito si Celestine.

‘Celestine, ikaw ang panganay na anak ng mga Yllana. Lahat ng gusto mo ay binibigay nila sa iyo. Ang atensyon nila ay nasa iyo lang dahil mahal na mahal ka nila pagkatapos hahayaan mo lang na ganyan ang trato sa iyo ni Benjamin?”

Sa totoo lang, hindi na rin niya alam. Marahil kaya siya ganoon ay dahil noong na-bully siya noong seventeen years old pa lang siya ay prinotektahan siya ni Benjamin. Lagi siyang sinasabihan nito na huwag siyang matakot dahil nasa tabi lang siya lagi ni Celestine.

Ang hindi niya alam ay pwedeng-pwede pa lang sabihin ni Benjamin iyon kahit kanino. Hindi lang sa kanya. Akala niya ay espesyal siya para rito pero nirmal lang pala sa kanya na maging maaalalahanin.

Dahil doon ay saglit na ipinikit ni Celestine ang kanyang mga mata. Sa totoo lang, manhid na ang puso niya. Hindi na nga niya alam kung ano pa ba ang pakiramdam nang masaktan.

Dahil sa nakalipas na tatlong taon ay nakaranas siya ng sobrang sakit na mga pangyayari sa buhay. At ang matindi pa roon ay galing iyong lahat sa taong pinakamamahal niya, si Benjamin Peters.

Sa mata naman ni Benjamin ay isa siyang malupit na asawa at gusto na ni Benjamin na maghiwalay na sila.

Pagkatapos ng pitong taon na relasyon nila, kahit ang aso ay mapapasunod na niya sa sobrang tagal na nilang magkasama.

Pero, wala. Ni minsan ay hindi pinakita ni Benjamin na pinagkakatiwalaan na niya si Celestine.

Para sa kanya, tama na siguro ang pitong taon na panloloko sa sarili at ayaw na rin kasi niyang masaktan nila ang isa't isa.

Ayaw na niyang ituloy pa kung ano ang meron sa kanila dahil sigurado naman siyang walang patutunguhan iyon. Iyak dito, iyak doon. Lagi na lang ganoon ang buhay niya bilang Mrs. Peters.

Tumingin siya kay Benjamin kahit na nakatalikod ito sa kanya. Pinunasan din niya ang luha sa kanyang mga mata.

“Benjamin, pirmahan na agad natin ang divorce papers,” sabi ni Celestine.

Agad na napatingin si Benjamin sa asawa, halatang gulat na gulat ito sa narinig. Hindi siya makapaniwala na manggagaling iyon kay Celestine.

Parang may kung anong matalim na humiwa sa kanyang puso nang marinig iyon mula sa kanyang asawa.

Masunurin at mapagmahal na asawa kasi si Celestine. Todo alaga siya sa asawa at laging sinisigurado na maayos ang kanilang relasyon.

Lahat ng gusto ni Benjamin ay binibigay at sinusunod niya dahil ayaw niyang mawala ang asawa sa kanya.

Kaya naman, bago sa pandinig ni Benjamin na gusto na nitong pirmahan na agad ang kanilang divorce papers.

Sa nakalipas na tatlong taon na mag-asawa sila ay nakilala na niya ang asawa, kahit ano pang masasamang salita ang sabihin niya rito ay kahit kailan, hindi ito magyayaya ng divorce.

Inayos niya ang tono ng kanyang boses bago magsalita. Hindi niya pinahalata na apektado siya sa sinabi ni Celestine.

“Alam mo, imbes na kung anu-ano pang sinasabi mo dyan ay mabuti pang pumunta ka na lang sa ospital. Bisitahin mo si Diana roon at humingi ka ng tawad sa kanya!” sigaw ni Benjamin.

Napakagat labi na lang siya, alam na niya noon na ayaw ni Benjamin ng mga sinasabi niya.

Pero, hindi siya nagpatalo. Sa unang pagkakataon ay buong tapang niyang sinagot ang asawa at walang takot na inulit kung ano man ‘yong sinasabi niya kanina.

“Hindi mo ba narinig ang sinabi ko? Ang sabi ko, gusto ko na ng divorce. Pirmahan na natin agad ang papers natin.”

Naging malamig tuloy lalo ang tingin niya sa aswa nang marinig iyon. Agad siyang lumapit, nakaupo pa rin noon si Celestine sa sofa. Malapit na sila sa isa’t isa noon pero parang malayo pa rin.

Nang matingnan nang malapitan ni Benjamin ang asawa ay nabigla siya. Alam niya sa sarili na matagal na niyang hindi tinitingnan si Celestine.

Halata na pumayat na ito, hindi na siya kasing ganda noong una silang magkita at magpakasal. Para bang ibang-iba na ang taong nasa harapan niya.

Kitang-kita rin niya na nilalamig ito, pilit na niyayakap ang buong katawan dahil nalaglag nga siya sa pool. Pansin niyang hiyang-hiya si Celestine sa kanya.

Hindi niya tuloy maiwasang maisip ‘yong mga panahon na bata pa sila at wala pa sila sa ganito kalabong sitwasyon.

Si Celestine ay ang pinakamamahal na anak ng mga Yllana. Mahilig siyang tumugtog ng piano noong bata pa lang sila at aminado rin naman si Benjamin na maraming manliligaw noon si Celestine.

Pero, isa lang ang nasa puso ni Celestine, si Benjamin lang. Nangako ito na sa kanya lang siya ipapakasal.

Noong mga panahon na iyon ay may sakit ang ina ni Celestine. Dahil siya nga ang panganay sa pamilya Yllana ay natuto siyang magluto ng masasabaw na pagkain para sa kanyang ina. Siya rin ang nagmamasahe rito kapag may sumakit sa katawan ng ginang. Alagang-alaga niya si Helen Yllana.

Sa totoo lang niyan ay noong una, hindi naman talaga siya galit kay Celestine. Siya pa nga ang pumayag na makasal rito.

Pero, kailan nga ba siya nagbago?

Iyon ay noong mga panahon na si Diana ang pinipili niyang pakasalan pero si Celestine ay gawa nang gawa ng paraan para siya ang pakasalan ni Benjamin.