Chapter 3

Sa bahay pugad kung saan dinala nung Allan sina Marife at Berry ay sinalubong sila ng babaeng namamahala sa mga taong nakatira doon.

"Sila na ba ang bagong talent na sinasabi ni Madam Lorena?" tanong ng babaeng halos hindi naman nalalayo ang edad kina Berry sa lalaking umaalalay sa magkaibigan.

"Sila nga Jessa, ikaw na ang bahala sa dalawang yan. Mga mukhang walang muwang, turuan mo na muna bago mo isabak sa trabaho sa club para may idea sila kung ano ang gagawin nila sa club. Magpapahinga na muna ako at mamaya ihahatid ko na naman ang mga alagang kalapati mo. Ipatawag mo na lang ako mamaya kapag nakaready na kayong lahat," aning saad ng lalaki sa nagngangalang Jessa.

"Bahala ka, basta siguraduhin mong nakalock ang gate at ang mga kasamahan mo ay nagbabantay roon. Mahirap ng matakasan tayo ng mga ito dahil tayo ang malilintikan," biling saad ni Jessa kay Allan.

"Kahit hindi mo ipaalala Jessa, Alam ng mga tao ko ang trabaho nila rito. Wag mo kong manduhan ha! hindi ikaw ang boss ko," paangil na sagot nung Allan sa babae na inirapan na lang ang lalaki at hinarap silang magkaibigan.

"Kayong dalawa, sumunod kayo sa akin!" utos ng babae kina Berry at Marife.

Walang imik na sumunod ang magkaibigan kay Jessa. Malawak ang bakuran ng lugar at dalawang palapag ang kabuuan ng malaking bahay. Sa itaas ng bahay sila dinala ng babae.

Paakyat pa lang sina Berry at Marife ay pansin na nila ang ilang mga kababaehan na nakatanaw sa kanilang pagdating. Ang iba ay mapapansin agad ang awa sa mga mata nito, ang iba naman ay parang natutuwa sa pagdating nila at ang iba ay mga nakataas na ang kilay sa kanilang magkaibigan. Halos mga kaedaran lang din nila ang mga babaeng nakikita nila Berry at sapalagay nila ay katulad din nila ang sinapit ng mga babaeng iyon.

"Maupo kayong dalawa," utos sa kanila nung Jessa.

Naupo sina Berry at Marife at parehong nakikiramdam sa paligid habang kinakausap sila nung babaeng sa tingin nila ay hindi naman ganoon kasama ang ugali.

"Mga mukhang isa rin kayo sa mga naloko ni Cristy. Saang probinsiya kayo narecruit ng balasubas na babaeng 'yon? Ikaw, maganda at makinis ka at maganda rin ang hubog ng iyong katawan, pwede kang maging dancer sa club. Anong pangalan mo?" aning tanong ni Jessa na napansin agad nito ang katangian ni Berry.

"Be-Berry Marasigan po ang pangalan ko, ma'am." sagot agad ng dalaga dahil sa takot.

"Maganda rin ang pangalan mo ha, bagay sa iyo. Ikaw, anong pangalan mo? medyo payat ka lang pero maganda ka rin at lalo kang gaganda kapag naayusan ka at tumaba ng kaunti. Magkaibigan kayong dalawa?" seryosong tanong pa ng babae sa kanila.

"Maria Fe Cantiga po. Taga Catanduanes kaming dalawa at oo, nadenggoy kami ng demonyang babae na yun at kaya kami naririto ngayon ay dahil sa kanya. Kapag nagkasalubong uli ang landas namin ng talipandas na gurang na iyon ay naku lintik lang ang walang ganti talaga!. Dahil sa ginawa niya sa amin ni Berry hindi ko alam kung anong kakahantungan ng buhay namin rito," mahumanay na sagot ni Marife ngunit halata ang galit nito sa babaeng naging dahilan ng pagkakasadlak nila ni Berry sa trabahong hindi nila kailanman ginustong pasuking magkaibigan.

Hindi naman pinansin ng babae ang galit ni Marife at nagpatuloy sa pag iinterview at briefing nito sa dalawa.

"Dito kayo manunuluyan sa bahay pugad sa buong araw at sa gabi ay sa club kayo magtatrabaho bilang mga entertainer at dancer. May makukuha naman kayong sahod tuwing katapusan ng buwan, anim na libo. Hindi naman sobrang sama ng mga boss natin at maayos naman silang tumutupad sa usapan. Ang bawat isa sa inyo ay maaaring makalaya sa lugar na ito basta maibigay na ninyo ang isang daang libong halaga ng pang tubos sa sarili ninyo. Kaya kung gusto ninyong mapadali ang pag alis ninyo rito ay gumawa kayo ng paraan upang makalikom ng ganoong halaga, naiitindihan n'yo?" mahabang paliwanag ni Jessa sa dalawa na tumango lang.

"Si Allan ang tagahatid at sundo ninyo sa Club. Wala kayong dapat na ikapangamba kay Allan dahil hindi kayo sasaktan nun kung hindi ipag- uutos ni boss. Sa bahay na ito ay safe naman kayo, walang gagalaw sa inyo rito at walang mananakit sa inyong tauhan ni Madam Lorena. Except na lang kung magtatangka kayong tumakas. Syempre ibang usapan na kung susuway kayo sa rules. Kung hindi ninyo makuha ang ibig kong sabihin ipapaintindi ko para sa inyo," litanya ni Jessa kina Berry at Marife na magkahawak kamay at pinakikinggan ang bawat sabihin ng babae sa kanila.

"Kapag matigas ang ulo ninyo rito ay mapaparusahan kayo. Kapag kayo ay nagtangkang tumakas at mahuli kayo, ipagdasal na ninyo ang buhay ninyo dahil baka ibenta kayo sa mga halang ang bitukang kakilala ni boss dahil sa katigasan at tapang na ipapamalas ninyo. Kaya ngayon pa lang ay binabalaan ko na kayong mga bago rito. Hindi sa tinatakot ko kayo pero kailan lang may isang babae rito na nagtangka at ngayon ang alam ko ay ginawa ng sex slave ng mga tauhan ng mga Mafia na kakilala nila boss," pananakot na saad ng babae sa kanila.

Nagkatinginan sina Berry at Marife na napansin naman ni Jessa. "Kaya kung ayaw ninyong sapitin ang dinanas ng ibang mga babae rito ay magpakabait kayo," matinding payo na may pananakot ng babae sa magkaibigan.

"Kumain na ba kayo?" muling tanong ni Jessa.

"H-Hindi pa nga po!" mahinang sagot ni Berry.

"Hindi kami pinakain ni Aling Cristy kanina, habang nasa byahe kami ay binigyan niya lang kami ng biscuits at bottled water ni Berry," sagot naman ni Marife.

Lumayo ng bahagya si Jessa sa kanila at pasigaw na tinawag ang pangalang Janna na isa yatang kasambahay roon sa bahay pugad.

"Janna, maghain ka at kakain silang dalawa," utos ni Jessa sa babaeng lumabas sa isang pintuan.

"May natira pang ulam at kanin kanina, iinitin ko na lang iyon para sa kanilang dalawa, kasya naman na siguro sa kanila ang tirang kanin," wika ni Janna na isa pa lang PWD (Person with Disabilities.) may polio ang babaeng nagngangalang Janna.

"Asikasuhin mo na muna sila, Janna. Ikaw na muna ang bahala sa kanila at matutulog na muna ako," saad ni Jessa at tinalikuran na silang tatlo ng babae.

"Oo na, alam ko naman na ang gagawin ko," pabalang naman na sagot ni Janna na hindi pinansin ni Jessa at nagtuloy-tuloy ito sa paglalakad.

"Welcome mga girls sa bahay pugad. Ako si Janna ang utusan ni Jessa rito sa bahay. Actually magkapatid kami ng gaga kong ate na yon! Mabait naman yan, huwag lang ninyo gagalitin dahil makikita ninyo kung paano rin yan magalit. Pahihirapan kayo niyan sa rehersal ninyo," Nakangiting pakilala nung Janna sa kanila.

"Hi / Hello," magkapanabay na bati nila Marife at Berry, na nabawasan ng kaunti ang takot at kabang kanina pa nila nararamdaman at dahil iyon kay Janna na sa tingin nila ay maari nilang maging kaibigan sa bahay na iyon.