CHAPTER 7

"Hop in."

Umiling si Yolly. Ayaw niyang sumakay sa motor ni Andy.

"Bakit?"

Napangiwi siya at tiningnan niya ang palda niyang suot. Iyon ang dahilan kaya hindi siya puwedeng sumakay sa motor. Isa pa ay takot siya na baka mahulog siya. Ngayon lang kasi siya makakasakay ng single na motor kung sakali.

Napakamot-ulo si Andy. "That's okay. Pa-side ka na lang umupo."

"Ayoko," giit niyang nahihiya.

"Sige na."

"Ayaw ko talaga. Mag-taxi na lang ako ta's sunod ka. Saan mo ba gusto kumain?"

"Are you sure?"

"Oo at baka kasi may makakita sa 'tin. Ayoko nang matsismis ulit."

Napalabi si Andy. "Sabagay," pagkuwa'y anito.

Nag-abang na nga ng taxi si Yolly. Sakto ang kinatatayuan niya, may mga taxi roon na dumadaan para sa mga sosyaling mga estudyante.

"Saan ba tayo?" at tanong niya kay Andy nang makapara siya. Hawak na niya ang bukasan ng pinto ng taxi.

Nakatingin lang sa kanya ang binata. Nakahawak sa baba nito. Nag-iisip siguro.

"Anong sasabihin ko sa driver na pupuntahan natin?" ulit niyang tanong.

"Wait lang," imbes na sumagot ay sabi ni Andy. Walang anu-ano ay pinaandar ang motor at umalis.

Nagtatakang sunod-tingin siya rito. Saan pupunta 'yon? Biglang nagbago ang isip?

Napakamot siya sa ulo. "Aisst! Sabi ko na nga ba, eh. Sino ba kasing guwapong lalaki na makikipag-date sa isang tulad kong pangit? Asa ka pa, Yolly?!" at saka tukso niya sa sarili na napailing-iling.

Himala na sa halip mainis siya ay gusto niya pang matawa.

"Ano, Miss, sasakay ka ba o tutunganga na lang diyan?" pagsusupladong silip sa kanya ng driver nang bumaba ang salamin ng taxi.

"Ah, eh, hindi na—" Ang isasagot niya sana ay ‘Hindi na po’, pero may umunang nagsalita sa kanya kaya naputol.

"Sasakay po kami, Kuya." At si Andy iyon.

Napatangang napalingon siya sa binata. Totoo ba ito? Binalikan siya ni Andy?

"Ipinark ko lang 'yung motor," nakangiting paliwanag naman nito sa kanya. "Let's go?"

"Huh?" ang tanging nasambit niya tapos ay napalunok. Hindi siya makapaniwala, eh.

"Sabi ko’y tara na. Gutom na ako." Napahawak pa sa sariling tiyan si Andy bago pinagbuksan siya ng pinto. "Get in."

Napangiwi siya. "Uhm... sa susunod na taxi na lang ako," tapos ay aniya na nailang. Mas hindi niya ma-imagine na makakatabi niya sa taxi ang binata. Baka mahimatay siya. Diyos ko!

"Dito na tayong dalawa."

"Gusto mo bang magkatabi tayo riyan?" Parang siya pa ang nahihiya. Kasi naman parang wala talaga siyang lakas na makitabi sa guwapong binata.

"Oo naman. Ayaw mong sumakay sa motor ko, eh, kaya dalawa na lang tayo rito sa taxi. Okay lang naman, 'di ba?"

"Pero baka may makakita sa 'tin?"

"Wala 'yan. Saka medyo tinted naman ang salamin ng taxi kaya sakay na. Papakasaya tayo."

Kamot sa ulo si Yolly. Pero sa huli ay sumakay na rin siya. Ang arte na niya kung aangal pa siya.

Magkatabi nga sila ni Andy, at hindi niya mailarawan kung anong pakiramdam niya. Para siyang nalulusaw na ewan. Para rin siyang nabato sa kinauupuan. Magulo.

"Sa Timog tayo, Kuya," sabi ni Andy sa driver ng taxi bago naging kampante na sa pagkakaupo.

Siya ay pasulyap-sulyap naman sa katabi. Kampanteng-kampante kasi si Andy na nakaupo sa tabi niya. Parang hindi talaga nandidiri sa kapangitan niya ang binata.

Ibang klase. Ibang-iba ito sa mga ibang lalaki. Tapos isipin pang guwapo at sikat ito kaya naman hindi siya lalo makapaniwala.

"What?" bigla ay pansin tuloy sa kanya ng binata. Nahuli siya na patingin-tingin siya rito.

"W-wala." Biglang baling siya ng tingin sa labas ng bintana. Nakakahiya.

"Inom tayo, ha?"

"Huh?!" Balik-tingin siya sa binata. Nanlalaki ang mga mata niyang natatabingan ng malaki niyang eyeglass.

"Don't tell me you don't drink?"

Inosenteng umiling siya. Hindi talaga siya umiinom. Takot lang niya sa nanay niya.

"Ah, hindi nga. Sige ako lang ang iinom. Basta samahan mo lang ako, okay na ‘yun.” Pagkasabi niyon ay ipinikit na ni Andy ang mga mata nito at isinandal ang ulo sa headrest ng kinauupuan. Alam nito kasing matagal pa ang byahe nila dahil traffic.

Si Yolly naman ay hindi alam kung paano kikilos. Naninigas na talaga ang kanyang mga tuhod. Pinapatigas niya dahil kapag nadidikit sa binata ay para siyang nakukuryente. Ang tingin niya kasi kay Andy ay kay linis-linis at siya naman ay kay dumi dahil sa kapangitan niya.

At mas nanigas pa ang buo niyang katawan nang biglang natumba sa balikat niya ang ulo ng binata. Muntik na siyang mapasigaw.

Luh! Nakatulog agad?

She went still. Natutop na lang niya ang kanyang bunganga. Gusto niyang ilayo ang sarili pero matutumba naman si Andy kaya hinayaan na lang niya.

"Gisingin mo na lang ako kapag nandoon na tayo. I'm just going to take a nap. Inaantok kasi ako," mahinang sabi ni Andy. Hindi pa pala tulog.

“O-okay.” Lalo siyang nanigas. Hindi na siya gumalaw pa kahit konti lang. Kahit may makati ay tiniis niyang huwag kamutin. Mga eyeballs lang niya ang gumalaw buong byahe huwag lang maistorbo si Andy sa pagtulog nito. Nilibang na lang niya ang sarili sa pag-amoy ng mabangong pabango ng binata. Ewan niya kung buhok pa lang 'yon ni Andy ang mabango. Basta gustong-gusto niya 'yung amoy. Panglalaki pero hindi matapang. Ang sarap sa kanyang ilong.

"Nandito na tayo? Saan ba rito ang punta niyo?" nang sa wakas ay tanong na sa kanya ng driver.

"Wait lang po." Nataranta siya. Hindi niya alam kung saan gusto kumain ni Andy pero paano niya ito gigisingin? Tulog na yata talaga.

"Gisingin mo na ang boyfriend mo," sabi ng driver.

"Po? Naku hindi po. Hindi ko po siya boyfriend," gulat niyang pagtatama.

"Mga kabataan talaga. Oh, siya sige na, gisingin mo na 'yang kaibigan mo."

"Hindi ko rin po siya kaibigan."

"Ay, naku kahit ano mo pa 'yan! Gisingin mo na!" Nairita na sa kanya ang driver.

Napanguso naman siya. Totoo naman na hindi niya boyfriend o kaibigan si Andy, eh. Tinatama niya lang ito, siya pa galit. Eh, di wow.

"Geh na at naaabala niyo na ako," sabi pa ng driver.

"Opo," sagot niya rito na nataranta. Kaya lang ay hindi niya naman alam kung paano ito gigisingin. Itinaas niya ang kanyang kamay pero kahit buhok ni Andy ay parang hindi niya kayang hawakan.

Napalunok siya nang ilang ulit bago nagkaroon ng lakas-loob. "Andy, gising na. Nandito na tayo."

Kumilos naman ang binata pero umayos lang pala. Lalong idinikit ang ulo sa kanyang leeg.

Nakagat niya ang lower lip niya. Aatakihin siya sa puso nito, eh.

Akmang hahawakan niya ulit sana ito sa buhok pero hindi na niya talaga kaya.

"Kuya?" paghingi na niya ng saklolo sa driver. Bahala nang magalit ito sa kanya.

"Oh?"

"Puwede ikaw na lang po ang gumising sa kanya?"

Maang na napatingin sa kanya ang driver. Takang-taka ang naging tingin nito sa kanya. "Gisingin lang hindi mo pa magawa sa boyfriend mo?"

"Hindi ko nga po kasi siya boyfriend!" Napataas na rin ang boses niya. Ang kulit, eh.

"Ay, ewan ko sa inyong mga bata kayo." Napakadaling kinalabit ng driver ang tuhod ng binata. "Boss, nandito na tayo."

Nagising naman agad si Andy. Pupungas-pungas itong inayos ang buhok at mukha tapos tumingin-tingin sa paligid.

"Yeah, dito na kami. Magkano?" anito na nilabas ang wallet nang ma-confirm ang lugar.

"Ako na." Inunahan ni Yolly ang binata. Madaling kinalkal niya ang kanyang shoulder bag.

"No. Ako na," pero pinigil siya ni Andy.

"Hindi ba treat ko ang lakad na ito?" Napamaang siya.

Ngumiti ang guwapong binata. "'Yung pagkain mamaya ang sa iyo pero ngayon ako muna," saka sabi nito at binayaran na nga ang taxi driver. Keep the change pa kaya tuwang-tuwa ang driver.

"Thank you, Ma'am, Sir. Ingat kayo," biglang bait din.

Napangiwi si Yolly. Ang plastik ni Kuya.

Bumaba na sila ni Andy sa taxi. Todo alalay ito sa kanya. Syempre kinilig na naman siya dahil hindi lang pala mabait ito kundi gentleman din. Ngunit anong pamimilog ng mga mata niya nang makita niyang disco bar pala ang pupuntahan nila ni Andy.

"Let’s go?”

"Ayoko."

"But why?"

"Hindi ako pumapasok diyan."

"Bakit naman?"

"Basta ayoko."

Gustong matawa sa kanya si Andy. "Huwag kang matakot, akong bahala sa 'yo. "I assure you, you will enjoy it here."

"Ayoko talaga."

"Tara. Masaya rito". Bigla ay hinuli ni Andy ang kanyang isang kamay at hinila na siya.

"Baka may makakita sa 'tin?"

"Wala, at kung meron man ay wala silang pakialam. Basta mag-enjoy tayo rito ngayon."

Walang nagawa si Yolly kundi ang magpatianod. Ilang na ilang siya na pumasok sa lugar na iyon. Medyo madami na kasing tao na mga kaedad lang nila ang naroon. May nagsasayawan na sa maliit na stage na mukhang mga lasing na kahit kakaumpisa palang ng gabi. Ang dilim din ng paligid, at hindi siya sanay. Feeling niya ay makakaapak siya ng paa anumang oras.

"Dito tayo."

Sa isang sulok sila umupo ni Andy.

"Inom ka, ha?"

Umiling siya.

"Basta iinom ka."

"Ayoko nga."

Ngumiti na lang si Andy sa kanya at tinawag na ang waiter. Ang daming in-order. Parang last supper na nila.

"Makakain mo lahat 'yan?"

"Oo naman. Matakaw kaya ako," pagyayabang ng binata.

"Hindi naman halata," aniya dahil payat si Andy.

Natawa si Andy. "Nag-aalala ka ba sa bayad? Don't worry, treat ko 'to ngayon. Sa ibang araw na lang 'yung treat mo sa 'kin."

"Huh?"

"Ayaw ko kasing umuwi kaya sasamahan mo akong buong gabi. Okay lang naman, 'di ba?"

"Pero—"

"Kung ayaw mong uminom ay kumain ka na lang nang kumain. Para sa iyo talaga ang mga in-order ko."

Hindi na siya umimik. Bahala na nga.

"Do you want to try?" mayamaya ay alok sa kanya ni Andy nang magsimula na itong magpakalasing.

"Mapait 'yan, 'di ba? Bakit gustong-gusto niyo?"

Natawa si Andy. Muntik nang maibuga ang alak sa bunganga. "Inosente ka nga talaga, ano?"

"Ayoko lang ng mga ganito," pagtatanggol niya ulit sa sarili.

"That's why I like you. Ibang-iba ka sa mga babaeng kakilala ko."

"Sinasabi mo?"

Natawa ulit ang binata. Mas gumaguwapo ito 'pag tumatawa. Ang cute. "I mean I like you because I knew I am safe with you. Hindi mo ako iri-rape kasi guwapo ako."

"Anong akala mo sa akin?” apila niya. “Alam mo akala ko mabait ka. Mayabang ka rin pala talaga.”

Mas malakas ang naging tawa ni Andy.

"Sorry, pero promise totoong safe ang pakiramdam ko sa 'yo. Magaan ka kasing kasama."

“Talaga?” Ngumiti na rin siya rito. Iyon naman pala. Mabuti nang malinaw.

"Friends?" Inilahad ni Andy ang kamay nito sa kanya. Nakikipagkamay.

"Sige, friends," alinlangan man ay pagpayag niya. Sino naman siya para tumanggi, ‘di ba?

Nagngitian sila habang nagse-shake hands.

"Inom ka?" mayamaya ay pilit na naman ni Andy sa isang bote ng alak sa kanya.

"Ayoko nga niyan."

"Sige na. Celebration na rin natin ang gabing ito kasi magkaibigan na tayo kaya hindi naman puwede na ako lang ang umiinom," pagpipilit pa rin ni Andy.

Napalabi siya. "Ano bang lasa niyan at bakit sarap na sarap kayo?"

"Mapait nga pero 'pag nagtagal parang juice na."

"Weh?"

"Try mo kasi kahit konti lang."

Nagdalawang isip man ay inabot na niya ang bote ng alak. Inamoy niya at napangiwi siya.

Napahalakhak si Andy. "Iniinom 'yan hindi inaamoy kasi."

Natawa na rin siya. Hindi lang pala mabait at gentleman si Andy, masarap ding kasama. Suplado sa tingin pero kapag nakasama mo na ay kalog din pala. Sobrang kulit pati.

Nakangiti niyang tinungga ang bote. "Eekk..." At ngiwing-ngiwi siya dahil ang pangit talaga ng lasa. Ang pait.

"Okay, 'di ba?" nakatawa pa ring tanong ng binata.

Nakangiwing tumango siya kahit ang totoo ay parang may gumuhit na ewan sa kanyang lalamunan, at hindi iyon okay.

"Isa pa."

"Ayoko na."

"Sige na. Paano mo malalaman na parang juice na lang ang lasa niyan kapag nagtagal?"

Wala na naman siyang nagawa kundi ang sumimsim na naman sa alak.

Pangalawang lagok.

Pangatlo.

Pang-apat.

Hanggang sa parang juice na nga sa kanyang panlasa ang alak. Tama nga si Andy.

Hindi nagtagal ay parehas na silang nagtatawanan ni Andy. Ang mahinhin na si Yolly ay wagas na kung makatawa. Wala na silang hiya-hiya dahil sa epekto ng alak.

"Isa pa," at si Yolly na ang nagsasabi n'on.

"Dahan-dahan lang. Hindi ka mauubusan ng alak, oy," natatawang saway ni Andy. Taga-lagay na lang siya ng alak sa baso ni Yolly. Siya na tuloy ang hindi makainom dahil nag-alala siya na baka sobrang malasing silang dalawa at hindi makayanang umuwi.