PROLOGUE

NAGKUBLI SA LIKOD NG isang malaking puno si Rigor nang bumukas ang gate sa bahay ng kanyang target.  Nang bahagyang makalayo ang sasakyan ay nagmamadali siyang sumakay sa kanyang motor para sundan ito.  Isang oras rin mahigit ang itinakbo ng mga ito bago huminto sa isang matarik na bangin.  Napakunot nuo siya.  Muli niyang ipinarada ang kanyang motorsiklo sa hindi kalayuan saka pinakiramdaman ang susunod na gagawin ng nasa loob ng sasakyan.

                Nakita niyang bumaba ang matangkad na lalaki mula sa kulay itim na kotse.  Kumpirmadong ito ang kanyang target.  Sa passenger’s seat naman ay bumaba ang isang babaeng may pigura ng sa isang modelo.  Nagtungo sa likuran ng sasakyan ang mga ito at kinuha ang kung anong nakasilid sa sako saka pinagtulungan iyon ng dalawang buhatin at itapon sa bangin.

                Saka nagmamadali na ang mga itong sumakay sa kotse at umalis.  Bigla siyang kinutuban kaya nagmamadali siyang tumalon sa bangin para alamin kung ano ang laman ng sakong iyon.  Bihasa siya sa training kaya mabilis at maliksi ang kanyang mga galaw.  Wala pang ilang minuto ay tangay na niya ang mabigat na sako, nagmamadali niya iyong binuksan at nagulat siya nang makitang isang babae ang nakasilid duon.

                Kinapa niya ang pulso nito, buhay pa ang babae kung kaya’t mabilis niya itong binigyan ng mouth to mouth resuscitation.  Ilang sandali pa at inilalabas na nito ang lahat ng nainom na tubig sa katawan.  Nagmulat lang ito ng bahagya saka nawalan ng malay tao.

                Binuhat niya ito paakyat sa matarik na bangin.  Mabuti na lamang at sanay ang katawan niya sa mabibigat na bagay, madali lang para sa kanyang buhatin ito habang binabagtas ang paakyat sa matarik na bangin.

                Anim na taong gulang  pa lamang siya ay sinasanay na  siya ng kanyang ama sa kung anu-anong maari niyang suungin na laban kung kaya’t hindi na mahirap para sa kanya ang mga ganito.  Mas madali pa nga ito kaysa sa ginawa niya nuong isang buwan na tumalon siya sa umaandar na helicopter.  Lahat rin ng martial arts ay expert siya.  At magaling rin siya sa kung anu-anong sports.  Tadtad siya ng training sa ama bago siya nito isabak sa kung anu-anong misyon.  At ngayong matanda na ito ay sa kanya na nito ipinapasa ang isang napakabigat na tungkulin.  Ang maging isang Mafia Boss.

                Nuong una ay ayaw niya.  Mas gusto niyang maging isang simpleng mamayan at gawin ang kanyang pangarap.  Ang maging isang magaling na doctor at paglingkuran ang mga mahihirap.  Ngunit nang maipaintindi nito sa kanya kung bakit niya ito kailangang gawin ay hindi na siya tumanggi pa.

                Gagawin niya ang lahat para sa kanyang pamilya.

                Nang makarating sa kanyang motorksiklo ay kinuha niya ang kanyang mobile phone at kinontak ang kanyang mga tauhan para sunduin ng mga ito ang babae.

               

“SIYA SI MRS. REYES. ANG asawa ng target,” sabi ng isa sa mga tauhan ni Rigor nang iaabot nito sa kanya ang hawak na mga larawan, “Si Mrs. Althea Reyes.”

                Napalingon siya sa babaeng nakahiga sa kama, sa braso nito ay may nakasaksak na dextrose.  Naka-oxygen rin ito at kung anu-ano pang mga aparatu. Halos sira na ang mukha nito kung kaya’t napakahirap nitong makilala ngunit ang larawang kuha dito ng isa sa kanyang mga tauhan bago maganap ang insidente ay tumutugma sa suot nitong damit.

                Maya-maya ay tumunog ang monitor, senyales na hindi maganda ang lagay ng puso nito.  Nagmamadali na siyang kumilos para isagawa ang operasyon para dito.  Kakailanganin niya ang babae para maisagawa ang kanyang mga plano.

                Nang bumalik sa operating room ay nakalab gown na siya pati na rin ang kanyang mga assistants na mga professional nurse din at ang dalawa ay intern naman niya.  Ang General Samandehas Hospital ay pag-aari ng kanyang pamilya na isa sa mga negosyong pinamamahalaan niya kung kaya’t ang lahat niyang mga doctor at nurses ay miyembro rin ng kanilang underworld organization.

                “Kawawang asawa,” sabi ng kanyang nurse na si Nelson habang nakatitig sa walang malay na babae, “Saksakan naman kasi ng pangit kaya siguro di na masikmura ng asawa nyang pagtiyagaan kaya tinapon na lang. . .”

                Tiningnan niya ng masama ang lalaki kaya itinikom na nito ang bibig.  Matagal niyang sinubaybayan ang buhay ng kanyang target kung kaya’t alam rin niya ang kwento nito at ng babae.  Alam niyang pinakasalan lamang ito ng kanyang target dahil sa kayamanan nito bagama’t ang totoo nitong mahal ay ang starlet at childhood girlfriend nitong si Britney.  Nang mamatay ang mga magulang ni Althea sa isang car accident na ang kanyang target rin ang may kagagawan, nagsimula ang pagmamaltrato ng kanyang target sa asawa nitong si Althea.

                Since nag-iisang anak si Althea, ito ang nag-iisang tagapagmana ng kompanya ng yumaong mga magulang.  Ngunit dahil sunod-sunuran lamang ang babae sa asawa ay hinayaan nitong pamahalaan iyon ng lalaki.  And worst, halos hindi na umuuwi ang kanyang target kay Althea bagkus ay tuluyan na itong nakisama sa childhood sweetheart nitong si Britney.

                Wala naman siyang planong pakialaman ang kung anumang relasyon mayroon ang kanyang target sa asawa nito.  Ang gusto lang naman niya ay mapatay ang lalaking iyon.  Ngunit may naisip siyang mas magandang plano ngayong pinagmamasdan niya ang kaawa-awang babae.

                Sa lahat ng ayaw niya ay iyong inaapi ang mga taong walang kalaban-laban.  Isa pa, mas magiging exciting ang laban kung makikita niyang magugulat ang kanyang target kapag nalaman nitong buhay ang asawa nito!

                Ngunit hindi ba mas magiging kapanapanabik kung sa halip na pangit, gawin niyang very attractive ang asawa nito?  Ngunit hindi niya basta-basta mababago ang mukha ng babae hangga’t hindi pa siya nito binibigyan ng consent na ayusin niya ang mukha nito.  Labag iyon sa SOP.  Kailangan niyang kausapin ito ng masinsinan at ipaliwanag kung bakit gusto niya itong tulungan.  Ngunit sa ngayon, kailangan muna niyang siguraduhin na ligtas na ang babae sa kamatayan.

MATAPOS NG ISANG LINGGO ay unti-unti nang bumabalik ang lakas ni Althea.  Medyo humuhupa na rin ang mga tinamo niyang sugat sa kanyang katawan.  Ngunit bakit isang lingo na siya dito sa ospital ay hindi pa rin siya dinadalaw ng kanyang asawa?

                Alam ba nito kung nasaang ospital siya?  Bumukas ang pinto ng kanyang silid at pumasok ang kanyang doctor.  Mas mukhang artista ang matangkad na lalaki kaysa mukhang doctor.  Napakaganda rin ng tindig nito.  Palagay niya ay mas matangkad pa ito ng kaunti sa kanyang asawa.  Para itong iyong bidang Turkish actor sa series na pinapanuod niya nuon kapag naiinip siya sa paghihintay sa kanyang asawa.

                “Kumusta na ang pakiramdam mo?” Nag-aalalang tanong nito sa kanya, “Wala na bang masakit saiyo?”

                Umiling siya saka tumingin dito, “Pwede na ba akong lumabas?  Iyong hospital bill, ipapadala ko na lang kapag nakauwi na ko.  I’m sure, nag-aalala na ang asawa ko at. . .”

                Napangisi ito, “Palagay mo mag-aalala ang asawa mo saiyo? Baka nga mas gugustuhin pa nung hindi ka na umuwi.”

                “A-anong ibig mong sabihin?”

                “Wala ka talagang matandaan?” Tanong nito sa kanya.

                “Look, gusto ko ng umuwi!” Giit niya sa lalaki saka bumangon para umalis sa higaan.

                “Go ahead, umuwi ka para makita mo kung sino ng babaeng itinira dun ng asawa mo!” Sigaw nito sa kanya.

                Natigilan siya.  Anong alam nito sa buhay niya?  Sino baa ng lalaking ito?

                Huminga ito ng malalim, “Hindi mo ba itinatanong kung paano kang napunta sa ospital na ito?  Wala ka ba talagang matandaan or nagtatanga-tangahan ka lang talaga?”

                Nagpanting ang mga tenga niya, oo, nagpapasalamat siya dahil ginamot siya nito kahit hindi pa niya ito bayad.  Ngunit para pakialaman nito ang buhay niya, hah?

                “Ipapadala ko na lang ang bill, dodoblehin ko kung gusto mo!” Aniya rito, “Pahiramin mo ako ng telepono para matawagan ko ang asawa ko!”

                “Itinapon ka ng asawa mo sa bangin.  Ako ang sumagip saiyo!” Dinig niyang sabi nito sa kanya.  Bigla siyang napahinto sa pagbubukas ng pinto.  Hindi makapaniwalang napatingin siya sa lalaki.

                Unti-unti ay nanuot sa kanya ang mga putol-putol na ala-ala.  Nasa banyo siya nang bigla na lamang bumagsak ang celiing at may isang mabigat na bagay ang dumagan sa kanya.  Ang mga sumunod na pangyayari ay hindi na niya alam.

                “H-hindi totoo yan,” umiiling na sabi niya rito.  “Mahal ako ni Griff,” may pait sa tonong sabi niya, ramdam niya ang pag-iinit ng kanyang mga mata. Hindi niya alam kung ito ang kinukumbinsi niya o ang kanyang sarili.

                Simula nang mamatay ang kanyang mga magulang at ito na ang magtake over sa mga negosyong naiwan ng kanyang parents ay unti-unting nagbago ang pakikitungo nito sa kanya.  Hindi na ito sweet na gawa nuong nasa courting stage pa lamang sila.  Naalala pa nga niyang isang gabi habang kumakain sila ay sinabi nito sa kanya ang napakasakit na salitang ito:  Nakakasuka ang pagmumukha mo!  Maski ikaw siguro nasusuka sa sarili mo kapag tinitingnan moa ng sarili mo sa salamin!  Kaya pwede ba, huwag mo akong tatawaging honey sa harap ng ibang tao?

                Ngunit pinalampas na lamang niya ang sinabi nito.  Inisip niyang baka lasing lamang o pagod sa trabaho ang kanyang asawa kaya nito nasabi iyon.  Mahal na mahal niya si Griff.  Kaya nga kahit halos hindi na ito umuuwi sa bahay nila ay matiyaga pa rin niya itong hinihintay.  Dumating pa nga sa puntong payag na siya kahit sya na lamang ang nagmamahal dito, huwag lang siya nitong iwan.

                “May kinakasama na ngayon ang asawa mo, alam mo ba iyon?”

                Yamot na nilingon niya ang lalaki, “Ke lalaki mong tao napakatsismosa mo?  Ano bang pakialam mo sa buhay namin, ha?”

                “Gusto kitang tulungan.  Willing akong isailalim ka sa cosmetic surgery para makaganti sa lahat ng katarantaduhang ginawa ng asawa mo saiyo kahit na paano. . .”

                “Hindi ko kailangan ng tulong mo,” mayabang na sabi niya rito, “Salamat na lang.  Don’t worry, ipapadala na lang saiyo ng asawa ko ang kabayaran sa lahat ng ginawa mo sakin!” Pagkasabi niyon ay nagmamadali na siyang lumabas ng kanyang kuwarto.  Walang lingon-lingon na tumakbo siya palabas ng gusali.  May humahabol na nurse sa kanya, siguro ay dahil alam nitong hindi pa siya bayad sa ospital ngunit narinig niya ang boses ng kausap niyang doctor kanina.

                “Let her go,” matigas ang tinig na sabi nito.

                Pumara siya ng taxi at nagpahatid sa bahay nila.  Walang tao nang dumating siya sa bahay.  Nagtataka siyang kahit ang mga maid ay wala duon.  Nang ipihit niya ang door knob ay bumukas ang pinto.  Nagmamadali siyang pumasok sa loob.

                Maya-maya ay narinig niya ang pagpasok ng isang sasakyan.  Napangiti siya.  Nasasabik na siyang makita ang kanyang asawa.  Sasalubungin sana niya ito ngunit laking gulat niya nang makitang hindi lang ito ang bumaba.  Kasama nito ang ex-girlfriend nitong si Britney at base sa expression ng mga mukha ng mga ito ay parang ang saya-saya ng dalawa.  Nagmamadali siyang nagtago sa likuran ng couch kung saan hindi siya mapapansin ng mga ito.

                “Hanggang kelan mo ba pinag-day off ang mga maids?” Dinig niyang tanong ni Britney.

                “Sabi ko mag-day off sila ng isang buwan since ipapa-remodel koi tong bahay.  Sanay naman na silang pinapapag-day off namin sila ng ganun katagal tuwing pinapabago namin ang design ng bahay dito kaya hindi na nila iyon pagtatakhan pa,” dinig naman niyang sabi ni Griff.

                “Napakagaling rin ng plano mo.  Kawawang Althea pero masaya na siguro siya kung nasaan man siya ngayon.  Sa impyerno man o sa langit!” Tumatawang sabi ni Britney.

                Natutop niya ang kanyang mga labi.  Hindi siya makapaniwala sa narinig.

                “Matagal ko ng gustong maitira ka sa bahay na ito, love,” dinig niyang sabi ni Griff, “God, kung alam mo lang ang lahat ng tiniis ko sa tuwing gigising sa umaga katabi ng mukhang unggoy na babaeng iyon!”

                Ang lakas ng tawa ni Britney, “I know.  Bumabaligtad siguro ang sikmura mo sa tuwing nakikita ang pangit na babaeng iyon!”

                “Oo.  At wala akong ibang nasa isip kundi ikaw,” nakita niyang hinila ni Griff ang bewang nito palapit sa katawan nito saka siniil ito ng halik sa mga labi.  Hindi na niya napigilan ang pagpatak ng kanyang mga luha.  Pigil na pigil nga lamang ang ginagawa niyang pag-iyak.  “Wala na tayong dapat na alalahanin pa.  Nasa akin na ang kompanya.  Patay na si Althea.  By the time na may maghanap sa kanya, malamang nakain na iyon ng mga pating sa dagat.  Madali lang namang palabasing naglayas sya since may history naman siya ng ganung ugali maski na nuong dalaga pa siya!”

                Napakurap-kurap siya.  Hindi siya makapaniwalang maririnig niya mismo kay Griff ang gayong mga salita.

“T-TULUNGAN mo ako.  Pagandahin mo ako,” humahaglhol na sabi ni Althea nang balikan niya ang doctor na nag-alok ng tulong niya, “Gusto kong maging magandang-maganda.  Iyong tipong pagpapantasyahan ako ng lahat ng mga kalalakihan,” sabi niya sa pagitan ng paghikbi.  Galit na galit siya.  Wala siyang nasa isip ng mga sandaling iyon kundi ang maging magandang-maganda at ipamukha sa kanyang asawa ang kanyang bagong kagandahan.

                Gusto niyang pagsisihang lahat ni Griff ang ginawa nito sa kanya.  Ngunit higit sa lahat, gusto niyang ipamukha sa Britney na iyon kung sino ang kinalaban nito.

                “Tutulungan kita.  Gagawin kitang isa sa may pinakamagandang mukha sa buong mundo.  Ngunit sa isang komdisyon,” sabi ng lalaki sa kanya.

                “A-Anong kondisyon?” Tanong niya.  Pakiwari niya ay nakahanda siyang pumayag sa kahit na anong kondisyon ang hingin nito, maibigay lamang nito sa kanya ang pinakamimithi niya.  Ang masabi sa pagmumukha ni Griff na:  Hindi na ako ang babaeng pinaglaruan mo!