CHAPTER 125

ISANG TAON ang lumipas ngunit pakiramdam ni Natalia ay napakahabang panahon na iyon. Hindi nga niya akalaing kakayanin niya iyon dahil hanggang ngayon ay hindi pa rin nawawala ang sakit na nararamdaman niya. Kahit anong pilit ang gawin niya ay di siya makamove on sa paghihiwalay nila ni Matt kahit na ang totoo, siya lang naman ang nagmahal dito.

“Ate, excited na ako sa mga pasalubong ni Ate Girlie,” masayang sabi ni Junjun habang inaayos ang suot na polo shirt, “Guwapo na ba ako, ate?”

“Guwapong-guwapo!” Nakangiting sabi niya rito, papunta sila sa airport ngayon para sunduin si Girlie. Uuwi kasi ito ng Pilipinas para magbakasyon ng tatlong buwan and then babalik ulit ito sa Australia dahil hindi pa tapos ang pag-aaral nito.

Masayang-masaya siya sa nangyayaring maganda sa kanyang kapatid. At gaya nina Junjun ay excited rin siya sa pagdating nito.

“San na ba si Papang at si Marco? Baka maipit tayo sa traffic?” Tanong niya kay Junjun.