Belen at Luisa

Nang malaman ni Belen na nag asawa na ang Amerikanong kasintahan na si Timothy Anderson ay halos gumuho ang mundo nito. Isa siyang tanyag na mananayaw sa isang malaking club sa Olongapo sa kalagitnaan ng dekada 90. Para makalimot ay nagdesisyon itong tumungo ng Japan ngunit sa kasamaang palad ay nalaman niyang isang buwan na siyang buntis. Na depress ito at nagtangkang ilaglag ang nasa sinapupunan. Nang malaman ito ng naglilinis ng kuwarto niyang si Luisa ang plano nito ay pinigilan siya.

Si Luisa ay isang security guard sa isang maliit na grocery store sa tabi ng inuupahang apartment ni Belen. Day shift siya at bago ito umuwi sa kuwartong inuupahan ay dumadaan muna ito kay Belen para linisin ang kanyang kuwarto o di kaya ay ipaglaba at ipagplantsa. Nagkikita sila ng 4pm ng hapon bago umalis si Belen ng 7pm ng gabi. Kahit gaano ka iksi ng oras na sila ay magkasama ay masaya sila. Naging matalik silang magkaibigan at si Luisa ang karamay ni Belen ng lumaki ang tiyan nito.

Simula nuon ay lumipat na si Luisa sa bahay ni Belen at doble kayod ito sapagka’t lumalaki na ang tiyan ng kaibigan. Trabaho sa araw bilang security guard at trabaho sa gabi sa isang maliit na kainan malapit sa kanila pandagdag sa gastusin at para makalibre sa hapunan. Tuluyan ng huminto si Belen sa pagsasayaw simula ng lumaki tiyan nito. Pansamantalang nagtrabaho si Belen sa isang panaderya para sa kanyang gastusin at para libre sila ng agahan. Mabait ang may ari ng club at binigyan si Belen ng malaking halaga para bayad siya para pang siyam na buwan at ang iba niyang kasama sa trabaho ay nag ambag para sa kanyang panganganak. May iba din siyang clients na nagbigay ng munting ambag lalo na sa magiging baby nito. Kalaunan ay iniluwal niya ang pagkaganda gandang baby at pinangalanan niya itong Barbara o Barbie.

Si Luisa ang naging ninang nito at bumalik si Belen sa pagsasayaw sa club. Salinsinan silang magkaibigan sa pag aalaga kay Barbie. Si Belen sa araw at sa gabi naman si Luisa. Lingid sa kaalaman ni Luisa ay nagkaroon ng kasintahan si Luisa. Si Elmer Uy. Si Elmer ay anak ng intsik ng grocery store na pinapasukan nito. Nag aaral ito sa kolehiyo ng ligawan niya si Luisa. Si Elmer ang namamahala nito bago pumasok sa paaralan sa hapon hanggang gabi. Kalaunan ay nagbuntis si Luisa ngunit tutol mga magulang ni Elmer sa kanilang pagmamahalan. Nahinto sa trabaho si Luisa kaya’t napirme siya sa bahay ni Belen habang inaalagaan si Barbie. Lalong gumanda ang kita ni Belen sa club lalo na nuong nagkaroon ito ng boyfriend na Japanese.

Nang lumaki ang tiyan ni Luisa ay lumipat sila sa isang townhouse at kumuha ng isang katiwala si Belen sapagka’t alam niyang kahit laging sinasabi ni Luisa na okay lang siya ay alam niyang hirap na ito. Matapos ang unang kaarawan ni Barbie ay nanganak si Luisa ng sanggol na babae. Pinangalanan niya itong Veronica o Nica. Hindi man sila nagkatuluyan ni Elmer ay nagpapadala ito ng pera para sa bata at sinagot ng pamilya Uy ang gastos sa ospital. Gamit din ng sanggol na si Veronica ang apelido ng ama. Naging maayos ang lahat hanggang sa umalis si Belen para sumama sa kanyang Japanese boyfriend. Sa tatlong taon na pamamalagi ni Belen sa Japan ay nakapagpatayo silang magkaibigan ng munting grocery sa ibaba ng bahay nila sapagka’t masinop si Luisa sa pera. Naging fulltime na sa pag aalaga sa mga bata at sa maliit na grocery si Luisa.

Mag a apat na taon na si Belen sa Japan ng bigla itong napauwi. Minamaltrato pala siya ng Japanese boyfriend nya at meron na pala itong asawa. Pinatrabaho niya ito sa club ng isang kaibigan at ginawang sex slave. Tiniis niya ang mga nangyari sa kanya sapagka’t gusto niyang mabigyan ng maayos ng kinabukasan ang munti niyang pamilya. Ulila na si Belen at wala siyang mga kapatid at kamag anak kaya’t isang biyaya sa kanya ang kaibigang si Luisa at dagdag sa kanilang biyaya ang kanilang mga munting anghel.

Nagpasyang mag aral ng secretarial course si Belen at nang matapos ito ay napasok siya sa munisipyo ng Maynila bilang all around clerk at dito nagsimula ang pagbabago ng kanyang buhay. Masaya na sana sila ngunit isang araw ay biglang may hindi inaasahang pangyayari sa kanilang buhay.

Umalis ng hapon si Luisa para dalawin ang isang kaibigan sa Pasig ngunit hindi na ito nakauwi. Inakala ni Belen na nagkasayahan marahil sila ng kwentuhan ng kaibigan nito sa Pasig at duon na nagpalipas ng gabi. Hindi na din nag abalang tawagan pa ito. Kinabukasan ay may pumuntang pulis sa bahay niya para sabihin sa kanyang natagpuang patay na si Luisa sa ilalim ng tulay. Ninakawan daw ito at ginahasa. At sa kasamaang palad ay pinatay. Gumuho ang mundo ni Belen at ang tangi niyang karamay ay si Tindeng, ang katiwala nila sa bahay na matandang dalaga. Si Tindeng ang kanyang pinabantay sa mga bata habang inasikaso niya ang burol ng kaibigan. Nangako si Belen sa puntod ng kaibigan na aalagaan niya si Nica.