TOO MANY QUESTIONS

Chapter 84

“Bhie, dumating na ang baby mo. Kiss naman diyan. Antagal ko kayang nawala,” biro niya nang dumating siya galing sa grocery. Napakarami niyang bitbit na pinamili. Masayang-masaya siya at hindi ko alam kung paano ko simulang kausapin. Yun bang ayaw mo sanang sirain ang mood ng isang tao lalo pa’t may favor siyang ginagawa para sa’yo. Ayaw ko sanang ako ang pagsimulan ng away ngunit hindi ko na kasi talaga kinakaya pa.

Tinulungan ko siyang ipasok lahat ang mga groceries. Wala akong imik. Tumitingin siya sa akin sa tuwing nagkakasalubong kami sa pagpasok ng mga pinamili niya. Nakangiti siya, hindi ako. Tagaktak siya ng pawis. Hindi ko iyon pinunasan tulad ng nakagawian kong gawin. Nang naipasok namin lahat ang pinamili niya ay bumalik ako sa aking laptop. Nagkunwarian akong abala ngunit ang totoo ay hindi ko alam kung ano ang ita-type ko.

“Baby, tulungan mo naman akong iayos ang mga pinamili ko oh, heto bumili ako ng ice cream mo saka yung paborito mong chocolate cake….”