CHAPTER 5

CHAPTER 5 — UNEXPECTED KISS

LOISHA's POV

K

anina ko pa napansin na wala sa mood sa Clyde hanggang sa makarating kami sa restaurant. Ramdam ko na ayaw sa akin ni Clyde pero alam kong matututuhan niya rin akong mahalin. Basta magtiyaga lang ako. 

Matalik na magkaibigan sina Kuya Lux at Clyde mula pa noong highschool sila. Madalas siya noon sa bahay namin pero dumalang iyon ng magkasakit si kuya. Nasa States siya ngayon at nagpapagamot. Kasama niya roon sina mommy at daddy kaya ako lang ang naiwan dito dahil nag-aaral ako. Si Kuya Lux mismo ang nagsabi kay Clyde na tingnan ako habang wala sila.

"Doon tayo sa dulo," wika ko nang makapasok kami. 

Hindi siya kumibo. Sumunod lang siya sa akin hanggang sa makapwesto na kami.

"Anong gusto mong kainin?" tanong ko.

Tiningnan niya ang menu list. Mayamaya pa ay tumawag ng waiter at sinabi ang sariling order.

Nakagat ko ang gilid ng labi ko saka napayuko. 

"Sa inyo po, Ma'm?" tanong ng waiter sa akin.

"Kung ano na lang 'yung order niya." Walang gana kong sagot. Naglista ang waiter sa hawak nitong papel saka tumalikod. Sinulyapan ko si Clyde na ngayon ay nakatitig sa mga kubyertos na nasa mesa. Huminga ako ng malalim bago ngumiti ng pilit. "Siya nga pala, Clyde. Birthday na ni Alexis sa Sabado. Pupunta ka ba?" 

"Nope," tipid niyang sagot. 

"Bakit naman? Magkaibigan din naman kayong dalawa, 'di ba? Come on! Punta na tayo." Pilit kong pinasaya ang boses ko. "Masaya 'yon for sure," habol ko pa.

"Kung gusto mo ikaw na lang." Walang emosyon niyang turan. Ngumuso na lang ako. "Busy ako no'n kaya hindi ako p'wede." 

Alanganin akong tumingin sa kaniya. Nandoon na naman ang mga mata niya sa mga kubyertos. Tila doon nakapokus ang kaniyang isipan.

"Ayaw mo ba ko kasama?" Hindi ko alam kung saan ko nakuha ang lakas ng loob ko upang tanungin siya. 

Nagkibit siya ng balikat. "Busy lang talaga ako."

Napayuko ako. Uminit ang mga mata ko. Alam kong anumang oras ay tutulo na ang mga luha ko. Kahit hindi niya sabihin. Alam kong napipilitan lang siya na samahan ako sa mga ganitong lakad ko dahil kay Kuya Lux.

"Sorry..." bulong niya pero narinig ko. Rinig na rinig. Nag-angat ako ng paningin at kaagad na sinalubong ang mga mata niya.

"O-okay lang." Ngumiti ako kahit na halata naman sa mukha ko na hindi.

Ilang sandali pa dumating na ang order namin. Kumain kami ng walang kibuan.

Panghimagas na ang kinakain namin nang biglang may kumalabit sa balikat ko. Alangin akong nagtaas ng paningin at laking gulat ko nang makita kong si Alexis ang nakatayo roon. 

"Alexis!" sabi ko. Napatayo pa ako para makipagbeso-beso rito.

"Sabi na nga ba, ikaw 'yan, e. Kumusta ba?" Nakangiti niyang tanong sa akin. Lumingap siya sa gilid ko kung saan nakatingin si Clyde sa amin. "Bro," tawag nito rito. Tinapik pa nito ang balikat ni Clyde. Tumango naman ang huli bilang pagbati. 

Napangiti ako. Alam ko kasi na may hindi pagkakaunawaan ang dalawang ito pero matagal naman na iyon. Siguro naman ay nakalimutan na nila kung ano man iyon.

May tumikhim sa likod ni Alexis at doon ko napansin ang isang babae. 

"By the way, this is my girlfriend, Olga. Babe, this is my friends, Loisha, kapatid siya ni Lux at si Clyde. Mga highschool buddies ko."

Ngumiti lang iyong babae sa akin. "Hello... I'm Loisha Coleen. Ish for short," bati ko rito.

Tipid na ngiti lang ang ginanti nung Olga sa akin. 

"Come on, join us," aya ko sa kanila sabay tingin kay Clyde. Ngumiti lang siya sa akin. 

Naupo sina Alexis at Olga sa mga upuan bakante sa mesa namin. 

"Mauna na muna ako sa labas," ani Clyde habang tumatayo. "Nice to see you, bro." Na kay Alexis ang paningin niya. Hindi ko maramdaman na masaya talaga siya sa pagkikita nilang dalawa.

"Sige. Ikaw rin." Hindi ko tuloy malaman kung tatayo na rin ba ako o tatapusin ang kinakain ko. Lumabas na si Clyde at naiwan ako. "Kumusta na ang Kuya Lux mo? Uuwi ba siya sa birthday ko?" Umiling ako.

"Hindi. Hindi pa malakas si kuya," sagot ko saka ko pinagpatuloy ang pagkain.

"Sana makapunta kayo. Isama mo si Clyde." 

"I'll try," tipid kong wika. Gusto ko ng sundan ang lalaking iyon.

Nang matapos ako sa pagkain ay nagpaalam na ako sa dalawa. Nagmamadali akong lumabas at hinanap si Clyde. Nakita ko siya at may kausap na sexy at magandang babae.

Lalapitan ko na sana siya nang marinig ko kaniyang sinasabi.

"Wala... wala akong girlfriend. Don't worry, walang magagalit." Nahinto ako sa kinatatayuan ko. Naikuyom ko ang aking dalawang palad.

Tila kutsilyo na sumaksak sa akin ang mga salitang iyon. Kung sabagay, sino nga ba naman ako? 

Hindi ako ang girlfriend niya.

Hindi nga niya ako tinuturing na bestfriend dahil si Kuya Lux daw ang kaibigan niya.

Sa sobrang sama ng loob ko ay may naisip akong ideya. Wala akong pakielam kung magalit siya pagkatapos ng gagawin ko.

Humakbang ako palapit sa kanila.

"Hi, babe." Kinalabit ko pa si Clyde nang nasa likuran na niya ako. Nang lumingon siya ay bigla ko siyang hinalikan sa labi. Smack lang at mabilis lang iyon. Kitang-kita ko sa mukha ni Clyde ang labis na pagkagulat. Tinaasan ko lang siya ng kilay. Bumaling ako sa babaeng kausap niya. "Hi, Miss, I'm Isha. Girlfriend ng kausap mo. Excuse us but we have to go, bye!"

Hindi ko na hinintay pa na makapagsalita pa si Clyde. Hinila ko siya sa braso hanggang sa makarating kami sa parking lot.

"Ano 'yung ginawa mo kanina? Bakit mo ko hinalikan?" Galit na tanong ni Clyde sa akin.

Nag-iwas ako ng tingin sa kaniya. 

"Walang masama sa ginawa ko. Hinalikan lang kita sa harap nung babaeng nanlalandi sa'yo." 

"Really? Ano bang problema mo?" 

"Ikaw! Ikaw ang problema ko. Bakit ba palagi mo na lang pinaparamdam na a-ayaw mo sa'kin? Wala ka ba talagang nararamdaman para sa'kin? W-wala ba talaga kong h-halaga sa'yo?" Nangingilid na ang mga luha ko sa mga mata ko. Nanginginig ang boses ko pati ang mga tuhod ko.

Hindi siya sumagot. Dumeretso siya sa kotse at pinagbuksan ako sa katabing upuan ng driver.

"Sumakay ka na. Ihahatid kita sa inyo," 

Bumuntong-hininga na lang ako saka sumakay sa loob ng sasakyan.

ANGEL's POV

M

aganda ang mood ko nang magising ako ngayong araw ng biyernes. Napasulyap ako sa gilid ng dingding kung saan nakasabit ang varsity jacket na pinahiram sa akin ni Clyde nung isang araw. Inabot ko iyon saka tiningan ng malapitan. Kulay pula lang naman iyon at napakasimple ng disenyo pero para sa akin ay isang napakahalagang bagay nito kay Clyde at dapat ko lamang na ito ay ingatan.

'Mabait naman pala siya at matulungin'

Napangiti ako nang maalala ang mukha niya.

Seryoso man o ngingiti siya ay talaga gwapo ito. Alagang-alaga rin nito marahil ang balat dahil makinis at maputi. 

Tatlong katok ang nagpagising sa diwa kong nagbabalik-tanaw.

"Sandali lang," wika ko. Isinabit kong muli ang jacket sa dingding saka sumulyap muna sa salamin upang makita ang mukha ko. Nang masiguro kong ayos naman itsura ko ay humakbang na ako para pagbuksan ang nasa labas. "Mommy..." Nagulat talaga ako na nandito siya sa aking harapan at may dala pang tray ng pagkain. Hindi naman kasi ito gawain ni Mommy kaya tila gusto ko magpasalamat sa Diyos sa himalang ito.

"Good morning, baby. Pinagluto kita ng paborito mong almusal. Sinangag na maraming bawang, sunny-side-up egg at hotdog." Kumalam ang sikmura ko nang maamoy ko ang mabangong simoy ng pagkain na dala niya. Pinapasok ko siya at dumeretso siya sa kama ko.

"Hindi na po sana kayo nag-abala pa. Bababa naman po ako mamaya do'n," wika ko habang tinitingnan siyang inaayos ang pagkain ko. Ilang araw kaming hindi nag-uusap dahil sa huling pag-uusap namin nila ni daddy. Busy sila sa negosyo namin kaya hinahayaan ko na lang din. "Anyway, salamat pa rin po. Maliligo lang po ako," paalam ko pero nagsalita siya.

"I'm sorry, anak." Natigil ako ginagawa kong pagpili ng mga damit sa drawer. Nilingon ko siya na may nagtatakang tingin. "Alam kong hindi naging maganda ang pag-uusap ninyo ng daddy mo pero sana maintindihan mo kami. Para din naman sa'yo ang ginagawa namin. Para sa future mo, ninyo ni Clyde."

Biglang gumuhit ang kirot sa sintido ko dahil nagpipigil akong maiyak. Mabilis na nanlabo ang mga mata ko. Napasinghap na lang ako dahil nagsisikip ang dibdib ko kapag naaalala ang huling pag-uusap naming tatlo.

"Bakit naman po kasi kailangan pang magpakasal ako, mommy? Masyado pang maaga para sa pag-aasawa pero matanda na po ako at may sariling pag-iisip. Sa tingin ko naman po ay kaya ko na gumawa ng desisyon para sa'kin." Huminga ako nang malalim. Narinig ko siyang bumuntong hininga. "Sorry po sa sasabihin ko pero sana po, alam din ninyo ni daddy ang mga dapat gawin para sa'kin at iyon ay ang bigyan ako ng kalayaan para magdesisyon para sa sarili ko."

Humarap ako sa kaniya at kitang-kita ko ang mga luhang nagbabadya sa kaniyang mga mata.

"Alam ko 'yon, anak. Kaya lang... wala naman akong magagawa. Kilala mo ang daddy mo, kapag sinabi niya –iyon dapat ang masunod," aniya tila nawawalan ng pag-asa.

"E, pa'no naman po ako, mommy?" Mabilisan kong tanong. 

"Anak, mabait si Clyde. Alam namin ng daddy mo na hindi ka niya sasaktan."

'Alam ko...'

"Alam po ba niya ang tungkol sa arrangement?" tanong ko na wala sa sarili. Nakatitig ako sa pagkaing nasa kama habang bitbit ko ang t-shirt na susuotin ko.

"Ang tito Gerald mo na lang daw ang bahalang magsabi sa kaniya no'n."

"What? Ibig po ninyong sabihin, may tyansang wala pa siyang alam ngayon?" 

"O-oo. Hindi  ko alam. Bakit, anak?"

Hindi ako nakasagot. 

Mabait lang sa akin si Clyde dahil wala pa siyang alam. 

'Paano kung malaman niya? Gaya ko ba ay magagalit din siya?' 

Nanikip ang dibdib ko nang maisip kong magagalit siya sa akin at lalayo. Marami akong nabasa sa mga libro na kapag ayaw ng lalaki sa arrangement, umaalis o hindi kaya ay ginagawang miserable ang buhay ng kapareha nito.

Napailing ako sa naiisip ko.

"Anak, ayos ka lang ba?" Nagulat pa ako nang nasa tabi ko na si mommy. "Masama ba ang pakiramdam mo?" Dinikit pa nito ang palad sa aking noo upang maramdaman niya ang aking temperatura. "Wala ka namang sakit, ah? Gusto mo 'wag ka na muna pumasok?"

Umiling ako. "Papasok po ako."

"Sige, kumain ka na. Ubusin mo 'yan, ha?" Bilin niya sa akin. Tumango lang ako. Naramdaman ko na hinalikan niya ako sa aking noo saka tumalikod sa akin pero agad ding huminto. "Anak, varsity jacket 'yan, 'di ba? Bakit mayro'n ka n'yan?"

Kinakabahan ako bigla. Ang tibok ng puso ko ay rinig na rinig ko na. 

"H-hindi po sa'kin 'yan, mommy. Kay C-clyde po."

Binigyan niya ako ng nagtatanong na tingin. Nagkibit-balikat lang ako. 

"Nagkita kayo?"

"Yeah, pero aksidente lang. Nakita ko siya sa mall, e, may isang babae ang nakatapon ng shake sa damit ko kaya pinahiram niya ko ng jacket niya." Paliwanag ko. Nakita kong kumislap ang mga mata niya. 

'Hindi ko pa nga sinasabi 'yung sa pagbili nito ng blouse sa'kin, ganiyan na agad ang reaksyon niya. Ano pa kaya kapag nalaman?'

"Mommy, magkaibigan lang kami." Pinagpatuloy ko na ang paghahanap ng susuotin ko.

Iniiwasan ko ang mga mata niyang nanunuri sa aking itsura ngayon. 

'Sana'y hindi ako kasing pula ng kamatis ngayon'

"Well, sa pagkakaibigan nag-uumpisa ang lahat. Ituloy lang ninyo 'yan," aniya saka parang kinikilig na ngumiti.

"Mommy..."

"Fine, magkaibigan na kung magkaibigan. I have to go baka gising na ang daddy mo," wika niya at humakbang na patungo sa pinto.

"Wait!" Biglang sabi ko dahilan para humarap ulit siya sa akin. Nilingon ko muna iyong varsity jacket bago alanganing ngumiti kay mommy. "May itatanong lang po ako." Nahihiya kong sabi.

Lumapit ulit siya sa akin at naupo siya sa kama ko.