CHAPTER 3

"Sir!"

Niyugyog ni Thyra si Brett at ipinatong ang ulo nito sa kaniyang mga hita. Naramdaman niyang mainit ito.

"Nilalagnat ka na rin," mahinang sambit ni Thyra.

Unti-unting nagmulat ng mga mata si Brett at hindi maipaliwanag ang istura nito dahil sa sakit ng ulo.

Napatingin ito kay Thyra kaya napalunok naman ito.

"Tumayo na po kayo," saad niya saka siya inalalayan.

"Bakit kasi alak ang iniinom mo, Sir? Bakit hindi gamot?" Dagdag niya pa saka ipinatong ang kaliwang braso nito sa kaniyang balikat.

Natahimik din agad siya nang mapansin niyang seryoso si Brett habang tumatayo.

Ilang minuto silang umakyat sa hagdanan dahil malaki ang katawan ni Brett.

Tinulungan siya ni Thyra na ihiga sa kaniyang kama nang makapasok sila.

"S-Sir, kung may kailangan po kayo, puwede niyo po akong tawagan," turo ni Thyra sa telepono.

Bahagya naman itong tumango at kinumutan siya ni Thyra.

Kinuha niya ang oras na iyon para lagyan ng bandaid ang mga sugat ni Brett sa kaniyang mga daliri.

Hindi naman ito umimik at nakatingin lang sa kaniya.

Nanginginig si Thyra habang hawak ang mga daliri nito.

Nang matapos siya ay pinagmasdan niya muna si Brett na nakapikit na bago lumabas doon.

"Overworking kasi," mahinang sabi niya saka siya lumabas.

Kinaumagahan ay dinalhan ni Thyra ng kape si Brett sa kaniyang kuwarto.

Habang hawak niya ang kape at nasa labas ng kuwarto ni Brett ay ngumiti siya at naisip niyang tamang oras iyon para makuha na nito ang loob niya.

Nakita niya si Brett na nakaupo na sa kama at minamasahe ang kaniyang ulo.

"Good morning, Sir!"

Napatingin naman si Brett sa kaniya at wala man lang itong reaksyon.

‘Naninibago siguro 'to sa'kin. Dapat lang. Sa'yo lang ako ganito.’

Inilapag ni Thyra ang kape sa side table saka inalalayan si Brett na maupo.

Agad itong uminom ng kape at napangiti si Thyra nang makitang nagustuhan nito ang tinimpla niya dahil malapit na niya itong maubos.

"Sir, nagluto po ako ng sopas. Gusto niyo po bang kumain?" Tanong niya.

Tumango lang si Brett at halatang masama pa rin ang pakiramdam.

Dinalhan niya ito at binantayang kumain.

Napapatingin siya sa cellphone nitong paulit-ulit na tumutunog dahil sa dami ng texts.

"Masakit po ba ang ulo niyo, Sir?" Tanong niya nang matapos itong uminom ng gamot.

"Obviously," sagot nito saka ini-relax ang likod sa headboard.

Pinigilan naman ni Thyra ang sarili na mainis.

"Puwede ko po kayong imasahe."

"No need."

Tumango-tango naman si Thyra.

"By the way, I want tinola for lunch," saad ni Brett.

"Sige po. Kung may kailangan po kayo, sabihan niyo lang po ako."

Nang makapagluto si Thyra ay agad niyang pinuntahan si Brett. Ngunit napatigil siya sa pagpasok nang makitang natutulog ito.

Dahan-dahan siyang lumapit at inilapag sa lamesa ang pagkain nito.

"I'm doing good," mahinang sambit ni Brett.

Napalunok naman si Thyra nang marinig iyon habang natutulog ito.

Bahagya siyang nakaramdam ng awa, lalo na nang maisip kung gaano ito naapektuhan sa nangyari sa kaniyang negosyo.

Lumapit siya at hinawakan ang braso nito saka siya tinapik.

‘Lubus-lubusin ko na, baka bumalik agad siya sa pagiging masungit.’

Nagmulat naman si Brett ng kaniyang mga mata.

"K-Kumain na po kayo."

Ilang segundo pa itong natulala bago naupo at kumain.

Naupo sa gilid si Thyra at tinitignan ang kabuuan ng kuwarto nito.

Hindi pa man nito nasusuri ang loob nito dahil sa kaluwagan ay natapos na agad kumain si Brett.

Lumapit agad si Thyra at may inilabas mula sa bulsa ng kaniyang uniform.

Napakunot-noo naman si Brett.

"What's that?"

"Pain relief patch po. Ayaw niyo pong magpahilot, kaya lagyan na lang po natin ng ganito ang noo niyo."

"Ayoko niyan. That's only for babies," wika ni Brett.

Natawa naman si Thyra.

"Baby ka rin naman—"

Napatigil agad siya nang mas lalong kumunot-noo si Brett.

"L-Lagyan na lang po natin, Sir."

"I can do it myself," saad ni Brett saka kinuha iyon.

Pinanuod naman niyang ilagay iyon ni Brett sa kaniyang sarili bago lumabas. Napangiti si Thyra habang umiiling.

Naupo sa poolside si Thyra upang mag-fill out ng form para sa OJT nang matapos siyang maglinis.

Umiinom siya ng chocolate drink habang binabasa ang form. Biglang nahagip ng paningin niya si Brett sa itaas at nagtama ang kanilang paningin.

Nasamid siya kaya agad siyang nag-iwas ng tingin.

Binilisan niyang magsulat nang biglang mag-ring ang kaniyang cellphone.

Inilabas niya iyon mula sa kaniyang bulsa at napakunot-noo siya nang makitang si Zane ang tumatawag.

"Ano?" Walang ganang tanong niya.

"Miss Sungit, they said we can go to the school tomorrow para bumunot kung saan tayo mag-o-OJT," saad ni Zane.

Ibinaba naman ni Thyra ang hawak na ballpen.

"Sinabihan na ako ni Felip."

"Sana same hotel tayo. Hindi kita papahirapan sa training," masayang sambit ni Zane.

Nag-roll eyes naman si Thyra.

"Alam mo—"

Napatigil siya sa pagsasalita nang makitang papalapit si Brett sa gawi niya at may kausap din sa cellphone.

"H-Huwag mo na ulit akong tawagan kung hindi importante," sabi ni Thyra.

"But I'm—"

Hindi na niya pinatapos si Zane at pinatay na ang tawag.

Ibinaba niya agad iyon sa lamesa nang makalapit si Brett at wala na itong kausap.

Tatanungin na sana ni Thyra kung ano ang kailangan niya, ngunit nag-ring ulit ang kaniyang cellphone.

"Answer it," utos ni Brett at naupo sa harapan niya.

Napalunok naman si Thyra.

"Hello, 'te! Hintayin kita sa harap ng school bukas," masayang wika ni Nadia.

"S-Sige," sagot naman niya. Bahagya siyang nahiya kasi kaharap si Brett.

"'Te, if ever na same tayo ng hotel na papasukan, ako na ang bahala sa rent mo kung malayo ang hotel," suhestiyon ni Nadia.

Nailang naman si Thyra nang mapansing nakatingin sa kaniya si Brett. Ibinaling na lang niya ang paningin sa pool.

"H-Hindi na. Kaya nga ako nagtatrabaho para may gamitin ako. Tsaka ilang buwan pa naman bago mag-start," sagot niya.

"Ikaw ang bahala. By the way, Zane told us na makikipagpalit siya ng hotel para magkasama kayo. That creep," saad ni Nadia.

Napakunot-noo naman si Thyra ngunit agad niya rin iyong binawi.

"Kakausapin ko ang mga teachers natin kapag ginawa niya 'yon. S-Sige na, may gagawin pa ako. Sabihan mo na rin si Felip, para sabay na tayong tatlo," sambit ni Thyra saka hininaan ang boses.

Nagpaalam na rin si Nadia kaya umayos ng upo si Thyra.

"M-May kailangan po kayo, Sir?"

"Cook steak for tonight," sagot ni Brett saka umubo.

"Okay, Sir. Maayos na po ba ang pakiramdam niyo?"

Umiwas naman ng tingin si Brett.

"Kinda. The patch was effective."

Napangiti naman si Thyra.

"It's your fault that I got a fever," wika ni Brett saka tumingin sa kaniya.

"Luh? Bakit po ako?" Kunot-noong tanong ni Thyra.

"The day you fainted—"

Napatigil agad si Brett at umiwas ng tingin saka tumayo.

"Magluto ka na," sambit niya saka umalis sa harapan niya.

Kunot-noo namang sinundan siya ng tingin ni Thyra.

Pagkatapos magluto ni Thyra ay bumalik siya sa kaniyang kuwarto upang isulat ang mga kailangan niyang bilhin para sa OJT nila.

Pagtingin niya sa orasan ay mag-aalas-otso na ng gabi kaya bumaba na siya.

"Ang tagal mo."

Muntik nang mabitawan ni Thyra ang cellphone niya nang magsalita si Brett habang naghihintay sa kaniya upang kumain.

Ibinulsa niya agad ang cellphone at naupo na rin.

"Let's eat. Baka hindi ka makapagtrabaho nang maayos if you're thin and sick," saad ni Brett.

‘Siya nga 'tong sick.’

Habang kumakain ay nagsalita na naman si Brett.

"Prepare your things for tomorrow. May kukunin akong papers."

"Sige po," sagot niya saka tumango-tango.

Napatigil siya sa pagnguya nang maalala niyang kailangan nilang pumunta sa school bukas.

Napatingin siya kay Brett at abala naman ito.

‘Kailangan ko pa ring kunin ang loob niya. One week na simula noong nandito ako.’

Maagang nagising si Thyra at agad niyang tinimplahan ng kape si Brett.

"Coffee, Sir," sambit niya nang makapasok si Brett sa kusina.

Naupo naman agad ito. Kumain lang si Thyra ng tinapay at umupo rin sa harap ni Brett.

Napangiti siya nang makitang tinitignan ni Brett ang kaniyang kape.

Mabilis lang silang nag-ayos at agad na umalis.

"Why are you there?" Kunot-noong tanong ni Brett habang nakatingin kay Thyra sa rear-view mirror.

"Po?"

"I look like your driver. Dito ka sa harap maupo," sambit nito.

Agad namang bumaba si Thyra at lumipat sa harap.

Luminga-linga sa paligid si Thyra habang nagmamaneho palabas si Brett. Hindi niya maiwasang ma-amaze nang may pinindot si Brett at bumukas ang malaking gate.

Inilabas niya ang kaniyang cellphone at nag-text kay Nadia na hindi siya makakapunta at siya na lang ang bubunot para sa kaniya.

"Next time, don't wear thin shirt," wika ni Brett.

Napalingon naman si Thyra sa kaniya saka tinignan ang sarili. Nakasuot kasi siya ng long sleeves na puti.

"Sir, may sando naman po ako sa loob," sagot niya.

Napakunot-noo naman si Brett.

"I don't care."

Hindi naman umimik si Thyra at ibinaling ang paningin sa labas.

Napatingin si Thyra sa malaking building na napapalibutan ng mga puno nang makarating sila roon.

Naunang bumaba si Brett kaya sumunod na rin siya.

"Aray!"

Sumabit ang damit niya sa isang matulis na bakal sa parking lot habang inaayos ang kaniyang bag.

"I told you," wika ni Brett nang makitang napunit ang damit niya at kitang-kita ang sando nito sa loob.

Hindi naman umimik si Thyra at tinakpan na lang iyon gamit ang strap ng kaniyang bag.

"You can stay here. Mabilis lang ako. We will go somewhere else later," sabi ni Brett.

"Sige po."

"Don't go away from here. I will be the one to blame if something happens to you," dagdag pa ni Brett.

Sasagot pa sana si Thyra nang tumalikod na ito.

Habang naghihintay ay naglakad-lakad siya at napansing ang building na pinuntahan ni Brett ang pinakamalaki roon.

Nang maburyo siya ay bumalik na siya sa sasakyan.

Nanlaki ang kaniyang mga mata at bumilis ang tibok ng kaniyang puso nang makitang may dalawang lalake ang nasa likuran ni Brett. Mas malaki ang mga lalake kaysa sa kaniya.

Nakakunot-noo naman si Brett habang nakataas ang kaniyang mga kamay at kinakapkapan siya ng mga lalake.

Mas lalong kinabahan si Thyra nang makitang may hawak na kustilyo ang isa at nakatutok sa tagiliran ni Brett.

Pinulot ni Thyra ang isang malaking kahoy sa gilid at dahan-dahang lumapit sa kanila.

Hinampas niya nang malakas ang batok ng lalake at napad*ing ito. Tinadyakan niya ang ari ng isa pa nang lumapit ito sa kaniya dahil sa ginawa niya.

Ininda nila ang ginawa ni Thyra habang nilapitan naman niya si Brett.

"Sir! Sir, okay lang po kayo?" Tanong niya at hinawakan sa braso si Brett.

"I-I'm okay. Let's go. Let's call—"

Biglang nabingi si Thyra at sumakit ang ulo niya.

Nanlaki ang mga mata ni Brett na napatingin sa kaniya saka ibinaling ang paningin sa lalakeng pumalo sa ulo ni Thyra.

Napahiga si Thyra sa sahig at hinawakan niya ang likod ng ulo niyang humahapdi. Halos hindi siya makahinga nang makitang may dugo iyon.

Nanlabo ang paningin niya at naaninag niyang nakikipag-away si Brett sa mga lalake.

"F*ck! Don't—"

Hindi na narinig pa ni Thyra ang sinabi ni Brett at naramdaman niya na lang na hinawakan siya nito.