CARLOS, THE CLOWN

JARED POV:

“BABE, saan ka natulog kagabi?”

Si Carlos ang nakatayo sa gitna ng sofa habang papasok ako sa sala ng bahay ko. Magka-krus ang mga kamay sa tapat ng dibdib, suot  ang robang pink na giveaway sa hotel na pag aari niya sa San Luis.

Huhulaan ko, nagsumbong sa kanya si Cassy at gusto niyang malaman kung may magagawa siya para sa ex ko. Napapadalas siya dito sa bahay mula nang makipag break ako doon kaya ginagawang pastime ang pambubwisit sa akin.

Mahirap siyang iwasan dahil pinsan ko siya, close sa akin at partner ko rin sa Shipping Business.

Noong wala pa si Cassy sa buhay ko, nabalita sa TV na baka bakla ako, ang nag-iisang tagapagmana ng naiwang ari-arian ng mommy ko at ng stepdad ko sa sobrang close namin ni Carlos kahit na kadugo ko siya.

Palagi kaming magkasama halos sa lahat ng oras higit pa sa mga karelasyon niya.

Bunso sa pitong anak na puro lalaki, talagang ginagawa niyang magkunwaring bakla para pasayahin ang mommy niya noon pa man.

Sanay na ako pero wrong timing ngayon dahil mainit talaga ang ulo ko.

Sumakit ang mata ko sa headband niya na terno ng roba at may mga cream pa sa mukha. Naiwan ni Cassy sa bahay ko na wala akong oras dispatsahin dahil malala ang mental state ko mula nang makita ko uli si Anna two weeks ago.

At yon din ang sagot sa tanong ni Carlos–hindi na ako nakaalis sa opisina ko mula nang mahawakan ko ang babaing yon sa bahay nito kagabi. Doon ako dinala ng paa ko dahil wala ako sa sarili.

Magdamag akong gising at hindi ko alam ang gagawin.

Wala naman talaga sa plano ang sex contract sa pagitan naming dalawa. Gusto ko lang sanang makitang nahihirapan ito.

Pero nang makita ko siya sa manipis na bra at bikini at  may holster sa puno ng hita—nasiraan na ako ng bait at gustong-gusto ko itong ikama en punto.

Kailangan kong huminga at i-proseso ang mga nangyari kaya hindi ako nakauwi.

At paano ko aaminin yon kay Carlos na daig pa ang atat na paparazzi pagdating sa lovelife ko dahil naawa nga kay Cassy?

“Bakit ba umaalis at dumadating ka dito na parang asawa ko? Gusto mo bang palitan ko na ang passcode sa pinto?”

Inihagis ko ang coat ko at pinaluwag ang kurbata ko. Iniisip ko kung kaya ko bang maghintay ng halos 24 oras para sa muling paghaharap namin ni Anna. 

Para akong mababaliw. 

Araw-araw itong laman ng isip ko at libo-libong paraan ang naiisip ko kung paano maghihiganti dito, pero dahil lang sa isang halik, parang nabaliktad ang mundo ko at nawala na sa akin ang lahat ng kontrol.

Para akong nasumpa.

“Naku, masama ito,” nagpapaypay si Carlos na parang Geisha at naupo sa tabi ko, iniipit ang balls niya sa upong- babae, deretso ang likod, ginagaya si Cassy kaya inambahan ko siya ng sipa para lumipat sa single sofa sa kabila ng center table pero umusog lang siya sa pinakadulo. “Huhulaan ko, nakita mo na ang nag iisang babae na kayang buhayin ang natutulog na dragon sa pagkatao mo, ‘no?” Nagsimula siyang magpaypay gamit ang hair brush ni Cassy na lalo akong naasar.

Lintik.

Kumuha ako ng alak at nagsalin ng para sa akin. Ayoko siyang kausapin.

Wala ako sa kanyang aaminin.

“Yong para sa akin, asan?” Dumukwang siya sa akin.

“Girlfriend ba kita?” Singhal ko sa kanya. “Magtagay ka mag isa mo!”

Umatras ang mukha niya palayo sa akin, nakatakip ang hairbrush sa mukha. “Ganyan na ganyan ka kapag nasa paligid si Anna noong mga bata pa tayo. Lahat sa yo tumatayo mula sa balahibo mo sa katawan, sa pagkalalaki mo at sa higante mong ego na mas malaki sa yabang mo kaya nga kahit ako halos matakot nang lumapit sa yo.”

“Nakita ko na siya.” Lintik. Huli na bago ko napigilan. 

Bakit ba inamin ko yon? Bakit ang sarap sabihin no’n sa kanya na parang maganda yong titulo higit sa lahat ng nakuha ko na?

“Oh, thank God!” OA na bulalas niya.

“At makakasama ko siya.” Hindi na ako nag iisip, tutal nasimulan ko na.

“Oh, lintik. Hindi!”

“Hindi ako nagbibiro, Carlos.”

Halos hindi siya humihinga, hindi makapaniwala. “Pagdating sa kanya, nawawala ka sa sarili mo, insan, kaya alam kong hindi ka talaga nagbibiro.” Inakbayan niya ako at kinabig sa balikat. “At ano ang plano mo pagkatapos? Ihahanda mo ba ang mga canyon sa El Fraile at dudurugin ang puso ng kawawang babaing yon?”

“Ako ang nawalan ng pamilya,” binaklas ko ang mga daliri niya sa balikat ko at inihagis yon palayo,  “paanong siya ang naging nakakaawa?”

“At minasaker  ang mga batang kasama niya pagkatapos niyon kaya hindi ba masakit din yon para sa kanya?”

“Walang kinalaman doon ang pamilya ko,” nagtagis ang bagang ko, “wala sa lahi namin ang mamamatay-tao.”

“At ibang tao ang napangasawa ng mommy mo kaya hindi mo rin masasabi kung ano ang totoong nangyari, diba?”

Hinilot ko ang sentido ko. “Nakita ko si Frank na sunog na sunog. Imposibleng mabuhay pa siya.”

May mga nagsasabi kasi na nakitang buhay pa ang stepdad ko at pasakay sa isang bangka paalis sa San Luis kasama ang isang grupo ng mga kalalakihan sa araw na dapat ay dadaan ang bangkay nito sa cremation.

“Eh, kung sakyan mo ang bali-balita ngayong may pagkakataon ka na?”

“Na posibleng nabuntis ang kapatid ni Anna at si Frank ang ama?”

“Bakit hindi? Madali na ang DNA test ngayon.”

“Imposible kasi malayo ang edad ng anak ni Erin kung nagbunga nga noon ang hinala ng mga tao.”

“Subukan mo pa rin.” Giit niya. “Maging fair ka rin kay Anna, once and for all.  Bigyan mo siya ng benefit of the doubt. Baka nga totoong may dahilan siya kaya nagawa niya yon noon kay Uncle Frank. Walang mawawala sa yo at matutuldukan na ang mga hinala ng tao at higit sa lahat, makakalaya ka sa lahat ng tanong mo, hindi ba?”