Kabanata 4.1

Nang magising si Czarina ay inilibot niya ang paningin niya, naalala niya namang sa hotel siya natulog. Bababa na sana siya ng kama para maghilamos sa cr nang makita niya si Tyrone na mahimbing na natutulog sa sofa. Hindi niya akalain na hindi pala ito umalis kagabi.

Halos tumalon ang puso ni Czarina sa gulat nang magring ang cellphone niya. Mabilis niya iyung kinuha sa side table at papatayin sana ang tawag nang aksidente niya itong nasagot. Napalunok siya dahil Daddy niya ang tumatawag sa kaniya.

“Where are you?” seryosong tanong nito. Hindi sana kakausapin ni Czarina ang kaniyang ama pero wala na siyang choice dahil nasagot niya ang tawag. Dahan-dahan na bumaba ng kama si Czarina saka siya nagtungo sa balcony. “Czarina, answer me, where the hell are you?!” galit na sigaw sa kaniya ng kaniyang ama.

“Bakit gusto niyo pa rin akong hanapin, Dad? Alam niyo kung anong ginagawa sa akin ni Tita Natalia pero wala kayong ginagawa para sa akin. Hinahayaan niyo akong ikulong niya sa madilim na lugar na yun.” lakas loob niyang saad sa kaniyang ama.

“Umuwi ka ngayon din kailangan kitang makausap. Kapag hindi ka umuwi sa loob ng isang oras, kalimutan mong naging ama mo pa ako.” Galit na saad ng kaniyang ama saka nito ibinaba ang tawag. Napabuntong hininga na lang si Czarina, ayaw niya pang umuwi dahil sigurado siyang ikukulong na naman siya pero oras na itinakwil siya ng kaniyang ama, hindi niya alam kung saan siya pupulutin.

“Umuwi ka muna at kausapin mo ang pamilya mo.” Napalingon si Czarina sa likod niya, nandun naman si Tyrone na mukhang narinig ang sinabi ng kaniyang ama.

“Kapag bumalik ako, sigurado akong ikukulong na naman ako ni Tita Natalia.” Sagot niya, pakiramdam niya ay tuluyan siyang mababaliw kapag muli siyang ikinulong sa atic.

“Paano mo sila lalabanan kung ganyan ka kahina? Kakausapin mo lang sila pero hindi mo magawa? Ang lakas ng loob mong alukin ako ng kasal para makapaghiganti ka sa kanilang lahat pero hindi mo kayang ipaglaban ang sarili mo sa simpleng problema lang?” hindi nakasagot si Czarina. Hanggang kailan ba siya magiging mahina? Kailangan ba ibang tao pa ang gigising sa kaniya? Napabuntong hininga na lang siya saka siya tumango kay Tyrone.

Sabay na silang lumabas ng hotel at sumakay ng sasakyan. Inihatid ni Tyrone si Czarina sa bahay nila pero hindi na ito pumasok at umalis din kaagad. Malalalim ang bawat paghinga ni Czarina dahil natatakot siyang hindi niya magawang ipaglaban ang sarili niya. Pagpasok niya sa sala ay isang malakas na sampal ang sumalubong sa kaniya. Naguguluhan niyang tiningnan ang kaniyang ama na galit na galit sa kaniya.

“Ano bang nagawa kong kasalanan para deserve kong makatanggap nang sampal sa inyo, Dad?” tanong niya rito, gusto niya nang umiyak pero pilit niyang pinapalakas ang loob niya.

“Ano ba sa tingin mo ang iniisip mo, Czarina? Ilalagay mo ba talaga sa kahihiyan ang pamilya natin?! Ikakasal ka na kay Austin ngayong buwan, gusto mo bang i-cancel yun dahil nakikipagkita ka na sa ibang lalaki? Sa dami ng lalaki, bakit si Tyrone pa? Si Tyrone na fiance ng kapatid mo?!” galit na galit na wika ng kaniyang ama. Napalunok si Czarina, ito naman ang gusto niya pero bakit kinakabahan at natatakot siya? Paano nila nalaman na nakikipagkita siya kay Tyrone?

“What are you talking about? Hindi ko alam ang sinasabi niyo.” Pagsisinungaling niya, ayaw niyang idamay pa si Tyrone sa gulo ng pamilya nila lalo na at hindi pa niya ito nakukumbinsi na pakasalan siya.

“Hindi mo alam? Kalat na kalat na ngayon sa news ang pagpasok niyo ni Tyrone sa hotel at kanina lang kayo lumabas. Magdamag kayong magkasama sa iisang kwarto sa isang hotel.” Singit naman ni Natalia. Lalong nagsalubong ang mga kilay ni Czarina. Nasa news na silang dalawa ni Tyrone? Hindi pa niya nakikita yun pero paanong nangyaring nasa news na sila? May reporter bang nakakita sa kanila?

“Tingnan mo ang kapatid mo, umiiyak na ng dahil sayo. Hindi ko alam kung kilala pa ba kita, Czarina. Isa kang malambing at hindi malanding babae pero bakit ibang iba ka na ngayon? Gusto mong isisi kay Natalie kung bakit hindi matutuloy ang kasal niyo ni Austin pero ang totoo, you cheated!” may diing wika ng kaniyang ama. Tipid na lang na ngumiti si Czarina. Siya ba talaga ang malandi? Umiyak lang si Natalie sa nakita nila sa news, siya na naman ang kawawa at biktima? Kung sabagay, ano pa bang aasahan niya sa pamilya niya. Wala naman siyang kakampi sa kanilang lahat, ang sarili niya lang ang meron siya.

“Ako na naman ang mali? Sa tuwing sinasabi ko sa inyo ang mga pagkakamaling nagagawa ni Natalie, hindi kayo kaagad naniniwala. Kailangan ko pang magpakita ng proof sa inyo bago niyo ako paniwalaan pero ako? Kapag sinabi nilang mali ako, hindi na nila kailangan ng kahit anong proweba. Pinaniniwalaan niyo sila kaagad, sasaktan niyo ako kaagad at pagagalitan nang hindi niyo man lang ako tinatanong kung totoo ba ang mga paratang nila sa akin. Ako ang legal niyong anak, Dad! Sinabi niyo sa akin na kilala niyo ako, kilala niyo ako na hindi ko magagawang magsinungaling sa inyo pero bakit hindi niyo na ako kayang paniwalaan? Ako ba talaga ang hindi mo na kilala, Dad, o ikaw ang hindi ko na kilala?” akma sanang sasampalin ni Mateo ang anak niya nang pigilan siya ni Austin na bagong dating.

“Pasensya na po, Mr. Jimenez. Ako na lang ang kakausap kay Czarina.” Saad nito at hihilain niya na sana si Czarina nang inis na inalis ni Czarina ang pagkakahawak ni Austin sa kaniya. Masama pa rin ang tingin niya sa pamilya niya.

“Alam mong ikakasal ka na at si Tyrone naman ang magiging asawa ng kapatid mo. Ito ba ang dahilan kung bakit gusto mong umatras sa kasal niyo ni Austin?! Gusto mong agawin kay Natalie si Tyrone?! Nagmula rin naman sa mayamang pamilya si Austin kaya bakit inaagaw mo pa si Tyrone sa kapatid mo?!” galit na sigaw ni Natalia kay Czarina. Buong tapang naman na sinalubong ni Czarina ang masasamang tingin sa kaniya ng pamilya niya o kung matatawag nga ba niyang pamilya.

Tiningnan ni Czarina si Natalie na umiiyak pa rin.

“Umiiyak ka dahil kasama ko si Tyrone? Bakit hindi mo sabihin sa kanila ang panlolokong ginagawa niyo sa akin ni Austin? Alam kong alam mo Natalie kung anong dahilan ko kung bakit ako umatras sa kasal namin. Gusto mo pa bang iditalye ko lahat?” baling ni Czarina sa kapatid niya. Nanlaki naman ang mga mata ni Natalie.

“What are you talking about?! Huwag mong idinadamay ang anak ko sa dahilan mo kung bakit ka umatras sa kasal!” sabat ni Natalia. Seryosong tiningnan ni Czarina sa mga mata si Natalia.

“Matagal na akong niloloko ni Austin at ang babaeng totoong mahal niya ay—” Hindi natuloy ang sasabihin ni Czarina nang pigilan siya ni Natalie pero ngumisi lang si Czarina.

“Enough, Czarina!” sigaw ni Natalie.

“Hindi ba at ikaw ang babaeng ipinagpalit sa akin ni Austin? Bakit hindi na lang kayong dalawa ang magpakasal, galing din naman sa mayamang pamilya si Austin.” Ani ni Czarina na nakapagpatigil sa kanilang lahat.