CHAPTER 2: Job Interview

MOLLY'S POV

Pinagmasdan ko ang matayog na gusaling nasa harapan ko, halos malula na nga ako habang pinagmamasdan ito at hindi matansya kung ilang palapag mayroon ito.

"Dito rin nagtatrabaho si Alyse?" tanong ko na inilingan ni Alf na nakatayo sa aking tabi.

"Kalilipat niya lang last month sa isang publishing company. Ngayon lang may dumating na opportunity na nababagay sa gusto niya kaya naman sinunggaban niya agad at iniwan ako rito," sagot niya at hinarap ako. "Can you please remind me on how did I end up marrying that shit?"

Tinignan ko naman siya at ngumuso. "You don't remember? It all started when we tried to dye your hair with gray."

Ngumiwi ito at suminghap sa isinagot ko, halatang hindi niya nagustuhan ang itinugon ko, although 'yun naman ang totoo. May isang araw na nagpagupit siya ng buhok at nagpaplanong magpakulay ng buhok. Sobrang tagal ng magkukulay ng buhok niya dahil may kausap sa selpon kaya ako ang inutusan ni Alf na kulayan ang kaniyang buhok. Then nasa tabi niya lang si Alyse na nakasumbatan ni Alf dahil sa... hindi ko na maalala ang rason at wala naman akong balak na alalahanin ang mga nangyari sa kanila. Hindi ko nga malinaw na maalala ang childhood memories ko, duh.

"Hindi bale na, hindi na kita tatanungin sa susunod," saad ni Alf at naglakad na papasok kaya naman agaran akong sumunod sa kaniya. Pagtapak pa lang namin sa main door ay napatingin na ang mga empleyado sa aming direksyon at banati kami, ah mali, si Alf lang ang binabati nila.

"Nakatutuwang isipin na ginagalang ka ng mga tao rito, habang tinatadyakan lang kita at mukha ka lang maliit na ipis sa mga mata ko," bulong ko kay Alf at sinusubukang ngitian ang mga empleyado, mapapait at naiilang naman nila akong nginitian. Ngayon lang ba sila nginitian ng maganda para ganiyan sila umakto? Tsk.

"Pwes, ngayon ako naman ang tatadyak sa'yo dahil ako ang magiging boss mo," sagot nito at hinila ako papasok sa elevator.

Sasarado na sana ito pero biglang may humarang ng kaniyang kamay kaya bumalik ito sa pagkakabukas at tumambad ang dalawang lalaki. Papasok na sana ang isa pero natigilan ito nang magtama ang mga tingin namin.

"Linus," bulalas ni Alf kaya naman kumurap-kurap ito at napatingin sa katabi ko. "Sa kabilang elevator ka na lang sumakay," hayag pa ni Alf at pinindot ang buton. Hindi naman umangal ang lalaki hanggang sa sumarado na ang elevator.

"Sino 'yun?" taka kong tanong kay Alf at pinatunog ang mga buto ko sa daliri. "Mukhang kaaway mo siya. Ang patayin ba siya ang una kong trabaho, boss?"

Mabagal na umiling si Alf at bumuntong-hininga. "Ang sabi ko ay magiging secretary ka rito, hindi assassin," anito sabay ihinilig ang kaniyang likuran sa elevator. "Step brother ko siya at siya rin ang ginawang President ng kumpanya— na dapat ay pagmamay-ari ko tutal ay mas nauna naman akong ipinanganak kaysa sa kaniya."

Pinagmasdan ko lang ang mukha ni Alf habang nagsasalita. Sa kauna-unahang pagkakataon ay nakita ko ang pagkainis mula kaniyang mukha at kapag galit siya ay ako ang lumiligpit sa taong nagdudulot nu'n. Hindi mainitin ang ulo niya gaya ko, mabait din siya sa mga taong hindi niya kilala o close, kaya hindi siya masyadong nagkakaroon ng kaaway. Uhm, napapaaway lang siya kapag napa-away ako.

"Wait." Hinarap ko si Alf at kinunotan siya ng noo. "Kailan ka pa naghangad na maging mas mataas sa iba? 'Wag mo sabihing nagiging kagaya ka na ng tatay mong rapist," sambit ko, dahilan para matigilan siya. Yumuko ito at mukhang pinag-iisipan ng maigi ang sinabi ko. Uh-oh, mukhang may nasabi akong hindi maganda. Kumapit ako sa braso ni Alf dahilan para mapatingin siya sa akin kaya naman nginitian ko siya. "President man siya o janitor ng kumpanya ay hayaan mo na. Bagay 'yun sa kaniya dahil 'di hamak naman na mas maganda siyang lalaki kaysa sa'yo. Mas maaakit niya ang mga magagaling na empleyado kaysa sa'yo, baka mabankrupt lang ang kumpanya kapag ikaw ang humawak nito," lintana ko.

"Pinapagaan mo ba ang pakiramdam ko o iniinsulto ako?"

"I planned to do both."

Saktong bumukas ang elevator at tumambad ang mga kababaihan kaya naman bumitaw na ako sa braso ni Alf. Naglakad na kami palabas ng elevator habang rinig ko naman ang chismisan ng nga kababaihan dahil sa nakita, pero hindi ko sila pinansin. Mas nag-aalala pa ako sa kalagayan ni Seaweed sa bahay kaysa sa sasabihin nila sa akin. At kung sakali mang makarating kay Alyse ang nakita nila? Paniguradong hindi 'yun tutugon, alam niya kung pa'no kami umasta ni Alf, siguro.

Nagpatuloy kami sa paglalakad. Dinala ako ni Alf sa isang silid at doon ipinakausap sa isang lalaki, pagkatapos ay iniwan kami. Pinag-a-apply niya ako bilang secretary niya dahil nilayasan din siya ng secretary niya, sumama kay Alyse. Nagpasa ako ng resume at sinagot lahat ng katanungan ng lalaki, lahat ng sagot ko ay scripted. Binigyan ako ng script ni Alf kagabi at sinabing kabisaduhin ko iyon at iyon lang ang isasagot ko sa taong mag-iinterview sa akin, wala ng iba, walang kalokohan. Dahil dakilang masunurin ako ay sinunod ko ang inutos sa akin ni Alf, malaki talaga ang tiwala ko sa kaniya.

"Last question, may boyfriend ka na ba? Asawa? O fiancé?" tanong nito na ikinatigil ko.

Walang nakasulat na ganitong tanong sa script ko kaya anong isasagot ko?

"Mister, masyadong personal ang tanong mo at sa tingin ko ay wala naman iyong kinalaman sa trabaho ko," tangi kong tugon para iwasan ang kaniyang tanong. Napatingin naman sa aking mukha ang lalaki.

"Mahalaga iyon, Miss. Ah heto pa, may anak ka na ba?"

Mukha na ba akong losyang para tanungin niya ng ganoong bagay? Hayst, hindi bale na nga.

"Wala akong boyfriend, asawa, o fiancé, maging ang anak," diretso kong sagot na ikinatango-tango nito at isinulat iyon. "Ngayon naman ay itatanong ko sa'yo pabalik ang mga huling itinanong mo sa akin. May girlfriend ka ba, asawa, fiancé, o anak?"

Natigil ito sa pagsusulat at napatingin sa akin at ngumisi. Ipinatong nito ang siko niya sa mesa sabay lumapit sa akin. "Bakit? Gusto mo bang maging babae ko? Gaya mo ay single din ako at walang sabit," anas niya kaya naman ngumiti ako ng matamis.

"Hindi naman po. Nag-aalala lang ako na baka may magluksa kapag pinatay kita rito ngayon," kalmado ngunit puno ng diin kong sagot na ikinapawi ng ngisi sa labi ng lalaki at bumalik sa kaniyang pagkakaupo, halata namang kinilabutan siya sa mga sinabi ko.

"O-okay. Makakalabas ka na."

"Thank you, Sir."

Tumayo na ako at naglakad palabas ng kwarto. Sinalubong ako ng isang babae at nginitian ako nito ng matamis.

"Miss Molly, dito po tayo," aniya at nagsimulang maglakad kaya naman sinundan ko siya hanggang sa makarating ako sa opisina ni Alf.

"Kumusta naman ang interview mo?" untag nito habang nakaupo sa silya niya at nakapokus ang atensyon sa mga papel na nasa kaniyang harapan.

"Ayos lang." Naupo ako sa silya na nasa tapat ng kinauupuan niya at pinagkrus ang aking hita. Inilibot ko ang aking paningin sa paligid at tumango-tango. "Hindi na masama."

"Tsk. Alam mo bang nasasakal ako sa disenyo ng sarili kong opisina? Bookshelf ang nasa tabi ko imbes na ref. Napapalibutan ako ng mga weird na painting imbes na TV. Sobrang tahimik ng paligid na wala ni isa ang gustong mag-ingay. At isa pa, ang papangit ng mga empleyado." Panay ang pagrereklamo niya habang abalang-abala siya sa ginagawa niyang pagpipirma sa kung ano-anong papel.

"Gusto mo bang pintahan ko ang mga pader dito ng mainit-init at mapupulang dugo ng tao? Marami akong oras ngayon kaya, ano?"

Huminto siya at napatingin sa akin.

"Molly, opisina ito. Hindi pwede ang ganiyang gawain sa lugar na'to kaya naman magpakatino ka. Nga pala, wala ka naman sigurong ginawa sa kausap mo kanina, tama?"

Tumango ako at ngumiti. "Well, I even prevented a murder today," sagot ko na mabilis na ikinakunot ng noo nito.

"And how did you do that?" hindi makapaniwala nitong tanong.

"Self control."

Nabalot ng katahimikan ang paligid hanggang sa suminghap na lamang si Alf habang natawa naman ako. Ipinagpatuloy niya na ang kaniyang trabaho habang ako naman ay natulog sa kinauupuan ko habang nakasubsob ang mukha sa desk. Naubos ang oras ko kagabi sa pagkabisado ng script imbes na pagtulog kaya naman heto ako ngayon, parang lantang gulay. Plus, ang init ng suot kong long sleeve polo, idagdag pang naka pants ako. Palibhasa si Alf ang namili ng susuotin ko imbes na si Alyse.

•|||•

Naalimpungatan ako nang maramdamang gumagalaw ang katawan ko. Iminulat ko ang aking mata at doon lang napagtantong pasan-pasan ako ni Alf.

"Uuwi na ba tayo?" walang-buhay kong tanong at napahikab pa. Inaantok pa rin ako.

"Dadalhin sana kita sa clinic para doon ka muna matulog, pero nagising ka na. So, kakain muna tayo sa cafeteria at pagkatapos ay iuuwi na kita pero babalik ako rito para tapusin ang trabaho ko." Tumango na lamang ako ng tipid sa sagot niya.

"Mukhang hirap ka na sa pagbubuhat sa akin ah. Mabigat na ba ako o dulot lang 'yan ng pagtanda mo?"

"Tss. Sinong nagsabi na hirap na ako? Ang gaan-gaan mo kaya. Isa pa, matagal ko ng hindi nagagawa ito sa'yo, kaya naman kahit na mataas ang tingin ng lahat sa akin ay pinasan ko ang tulad mong mukhang butiking naligaw lang sa building namin," depensa niya. Ipinulupot ko ang aking braso sa leeg niya at sinakal ito kaya naman panay ang pag-ubo niya.

"Sinong butiki ha? At saka dapat lang na 'wag mo akong ikahiya, dahil sa pagmumukha kong 'to, hindi ka mapapahiya." Binitawan ko na siya at dumausdos na pababa sa likuran niya ang katawan ko. Inayos ko na ang damit kong nalukot, habang si Alf naman ay hinahabol ang kaniyang paghinga.

"Imbes na magpasalamat ka ay sinakal mo pa ako. Wala ka talagang utang na loob," singhal niya sa akin habang hinahaplos ang kaniyang leeg.

"Miss Molly!"

Kapwa kami napatingin ni Alf sa nagsalita at nakita ang lalaki na nag-interview sa akin kanina. Hinarap ako nito pero dumistansya siya, distansya na sigurado siyang hindi ko siya maaabot para saktan.

"Pasok ka na sa trabaho, congratulations," pamamalita nito na ikinangiti ko at napatingin kay Alf, subalit nakita ko itong nakataas ang kilay habang nakatingin sa lalaki.

"Teka, bakit hindi ka nakipagkamay sa kaniya?" saad ni Alf na nginiwian ng lalaki.

"Ayos lang," sagot ko habang nakangiti. Paniguradong takot 'yan sa akin sa salitang binitawan ko kanina, pero hangal siya dahil naniwala siyang mapapatay ko ang gaya niya. Kung sabagay, kaya ko namang gawin iyon, pero good mood ako ngayon, 'wag niya lang akong bwisitin habang nagtatrabaho.

"Kung ganu'n ay magiging secretary ko na siya?" sunod na tanong ni Alf at nakahinga ng maluwag sabay nakipagkamay sa akin. "Sa wakas! May matino ka ng trabaho. Pero mukhang wrong choice ang nagawa ko," aniya sa nanghihinang boses kaya naman sinipa ko ang kaniyang tuhod.

"Ahm, Sir Sebastian, hindi po siya magiging secretary mo," nakangiwing sambit ng lalaki kaya natigilan agad si Alf at tinignan ang lalaki.

"Kung ganu'n ay anong trabaho ko?"

"Magiging secretary ka ng President."

Wait... what?