CHAPTER 99: If We Force Fate

WALANG PLANO NA parating magpunta si King sa bahay ng kanyang ama sa kadahilanang kailangan niya pang makiharap sa lahat ng kamag-anak ni Gustavo na roon nakatira.

Isa pa, masasamang memorya, panlalait at masasakit na salita na nanggaling sa mga ito lamang ang natatandaan niya dahil sa pagiging bastardo. Dati, naranasan niyang tanungin ang sarili kung isa nga ba siyang makasalanan katulad ng ibinabato ng mga ito dahil sa pagiging anak niya sa labas ngunit kalaunan, natutunan niyang tanggapin na wala siyang kailangang patunayan sa kahit na sino. Hindi niya kailangang pagpaguran kung magugustuhan siya ng mga tao.

Mas magaan ang naging buhay niya nang matutunang mawalan ng pakialam at gawin ang mga bagay na gusto niya nang hindi iniisip ang ibang tao. Hangga’t wala siyang nasasagasaan, wala na siyang pakialam sa iba.

Nang maiparada ni King ang kanyang sasakyan, kaagad na bumalot sa kanya ang pagtataka nang hindi makita ang mga bodyguard na dating nakabantay sa iba’t ibang bahagi ng pavi