Kabanata 004

Sa higit isang oras na paghihintay ng masasakyan, sa wakas ay nakapara na rin si Leil ng isang taxi. Sinabi niya ang address ng inuupahang condo sa driver.

Buti naman at mabilis silang nakarating doon. Nanghihinang umakyat si Leil sa loob at dumeretso sa banyo. Binuksan niya ang shower at hinayaang mabasa ang kanyang buong katawan.

‘Bakit nangyayari ito sa atin, Roscoe? Bakit sobra-sobra ang galit mo sa akin? Bakit ayaw mo akong paniwalaan? Dati naman ay ikaw pa ang pumoprotekta sa akin hindi ba? Ikaw ang nagtatanggol at nagpapasaya sa akin. Bakit ngayon ay nag-iba na ang lahat? Bakit ikaw na ang nananakit sa akin?’

Umagos ang luha sa mga mata ni Leil habang nakasandal sa dingding ng banyo.

Sila ni Roscoe ay dating magkaibigan at pareho sila ng pinapasukang paaralan. Si Roscoe ang nagtatanggol sa kanya kung may nagtatangkang mangbully dito. Hindi niya hinahayaang masaktan si Leil at lalong laging pinapatawa at pinapasaya ng lalaki ang babae.

Pero nagbago ang lahat dahil sa isang trahedya.

Simula nang magalit sa kanya si Roscoe, nagbago ang kanyang buhay. Napaalis siya sa paaralang pinapasukan niya, nawalan siya ng trabaho, at napaalis siya sa kaniyang tinitirhan. Ang kanyang buhay na dati’y magaan, ngayon ay mas naging mabigat at masaklap. Ang dating Roscoe na nagtatanggol sa kanya upang hindi siya masaktan, ngayon ay siya na ang gumuguhit ng mga pasa sa kanyang damdamin.

Natapos na lang ni Leil ang kanyang pagligo nang namamaga ang mga mata. Sobrang bigat ng kanyang dibdib na para bang nakadagan dito ang mga salitang binitawan ni Roscoe kanina. At hindi siya sigurado kung maaalis pa ba ito dito. Siguro ay hindi na. Habang buhay niya nang aalalahanin ang bawat kirot at hapdi na dala ng mga salita niyang iyon.

Tumunog ang kanyang telepono, pangalan ni Princess ang nagpakitang tumatawag.

Huminga nang malalim si Leil bago ito sagutin.

“Hello, Princess? Bakit ka napatawag?” malamlam ang kanyang boses nang tanungin niya ito.

“Tinawagan lang kita para sabihin sa iyo na tinatanggal ka na ni boss sa trabaho simula ngayon at hindi ka na pwedeng pumasok pa rito ulit. Pero huwag kang mag-alala. Babayaran ka pa rin naman niya sa mga araw na nakompleto mo.”

Bago pa makasagot si Leil ay binaba na ni Princess ang telepono.

‘Ano? Tanggal na ako sa trabaho? Hindi pwede ito! Hindi pwedeng mawalan ako ng trabaho!’

Sinubukan niyang tawagan si Princess ngunit out of reach na ito. Kaya naman ay mabilis niyang inayos ang sarili at umalis. Pumara muli siya ng taxi, at buti na lang ay nakasakay siya nang mabilis. Sinabi niya ang address ng kompanyang pinagtratrabahuan at mabilis siyang nakarating dito.

Walang kahit na sino ang nagbabantay sa lobby kaya naman nakapasok siya nang walang sagabal. Dumeretso siya sa opisina ng kanyang boses. Napatigil siya nang marinig ang dalawang taong nag-uusap sa loob.

“Boss…” pamilyar na boses ng babae iyon.

Si Princess ito. Sigurado siya rito dahil kilalang kilala niya ang boses ng babae.

“Hindi ka ba masaya sa nagawa ko? Ginawa ko naman ang gusto mo, hindi ba? Bakit pati sa akin ay nagagalit ka? Hindi ba dapat ay bigyan mo ako ng reward? Maybe another promotion will do?” sa nang-aakit na boses ay saad ni Princess.

Hindi na nagulat pa si Leil sa kanyang mga narinig. Matagal nang usap-usapan ng ibang reporters ang tungkol sa secret affair ni Princess at ng kanilang boss. Ang akala niya dati ay pawang kwento lamang iyon ngunit ngayong naririnig niya si Princess, sigurado siyang totoo ito.

Kaya pala napakabilis umangat ni Princess. Kabago-bago niya pa lang dito ngunit ang bilis niyang ma-promote. Iyon pala ay dahil sa may relasyon sila ng kanilang boss.

Patuloy na nakinig si Leil sa pag-uusap ng dalawa sa loob. Gusto man niyang pumasok na ngayon, naghahanap pa rin siya nang tamang tyempo. Umupo muna siya saglit sa may maliit na couch. Rinig na rinig pa rin dito ang usapan ng dalawa dahil nakaawang nang kaunti ang pinto.

“Boss, nakuhanan ko ng litrato si Leil at Roscoe na magkasama. Pwede na natin itong magamit para sa plano! Kung ilalabas natin ito ngayon at gagawan ng balita, siguradong mabilis itong magiging viral at sa wakas ay makikilala na rin tayo!”

‘Ano? Plano?’

Nanlalaki ang mga mata ni Leil nang marealize niya ang ibig-sabihin ni Princess.

‘So kaya nila ako pinadala roon ay hindi naman para sa secret relationship ng isang sikat na aktres at mayamang business man! Kung hindi ay para i-frame up ako kasama si Roscoe! Napakawalang-hiya mo, Princess!’

“At talagang may gana ka pang humingi sa akin ng reward?! Pasalamat ka at hindi kita sinisante kagaya ng pagsisante ko kay Leil! Kung ginamit mo lang sana ang utak mo! Hindi sana mangyayari ito!” sigaw ng kanilang boss.

Ramdam ang galit ng kanilang boss sa loob ng silid. Hinihimas ni Princess ang hubad na katawan ng kanilang boss, pilit nitong pinapakalma.

“Bakit ba galit na galit ka, boss? Dapat nga ay matuwa ka pa sa akin. Hindi ba iyon naman talaga ang plano? Ang lasingin siya pagkatapos ay dalhin siya sa suit ni Roscoe Villafuerte, hindi ba? Kuhanan ng mga litrato at videos para makagawa ng isang magandang balita. So huwag ka nang magalit, please? Andito ako para pakalmahin ka.” Humagikgik si Princess habang ginagawa iyon.

Hindi na nakapagtimpi pa si Leil nang masiguro na talaga ngang plano na nila ito na gawin ito sa kanya. Binuksan niya ang pintuan dahilan upang magulat pareho ang kanyang boss pati na rin si Princess.

Pareho silang hubad, tanging panty at bra lamang ang suot ni Princess habang boxers naman ang sa kanilang boss. Naaamoy sa buong office ang nakakadiring affair ng dalawa.

“Tama ba ang narinig ko? Kayo ang may pakana ng lahat ng iyon? You two framed me up with Roscoe! Bakit kailangan niyo iyong gawin?!” hindi na napigilan ni Leil ang mapasigaw dahil sa iritasyon at pagkabigo.

Pakiramdam niya ay pinagtutulungan siya ng lahat. Wala siyang kakampi.

Ang tangi at nag-iisang kakampi niya sa buhay ay naging kaaway niya pa.

“Alam ninyong pwede ko kayong kasuhan dahil sa ginawa ninyong iyon!” tumalim ang kanyang matang nakatingin sa kanila. Unti-unting pumapatak ang luha niya kahit anong pigil niya rito. “Idedemanda ko kayo! Ipapakulong—”

Humalakhak si Princess na para bang nakakatawa ang sinabing iyon ni Leil. Umiling-iling pa siya habang nakangisi, at unti-unting nilapitan ang umiiyak na si Leil.

“Awww, what a dramatic scene, Leil. Napakagaling mo naman umarte. Nagbibiro ka ba?”

Mas lalong nagngitngit sa galit si Leil dahil sa sinabing iyon ni Princess.

“Niloko niyo ako! Kakasuhan ko kayo!”

“Go ahead, Leil! Sa tingin mo ba ay may maniniwala sa’yo? Sa itsura mong iyan? Talaga bang papaniwalaan ka ng mga pulis laban sa amin? Lalo pa at wala ka namang ebidensya sa mga ibinibintang mo! Kilalanin mo ang binabangga mo, Leil. Hindi mo kami kakayanin!”