Chapter 14

Pinapunta ni William ang mga tauhan niya upang linisan ang nakakalat na dugo sa sahig ng condo niya. Nanatili lang kami sa loob ng kwarto namin ni Evara dahil nag-uusap pa sina William at Ryan. Halos maubos ko na ang kuko ko sa kakakagat sa kaiisip kung ano ang pinag-uusapan nila. Matagal na kaming magkaibigan ni William, pero bakit hindi ko man lang napagtantong magkaibigan sila lalo na't pareho sila ng mundong ginagalawan?

Sinapo ko ang noo ko. Ang tanga-tanga ko. Kung sinabi ko kay William ang pangalan ng lalaking nakabuntis sa akin, baka hindi niya ako papalabasin ng bansa lalo na't naikwento pala ni Ryan, na nakabuntis ito.

Napatayo agad ako nang narinig ang pagkatok sa pinto. Nilingon ko si Evara, mahimbing na itong natutulog habang niyayakap ang paborito niyang unan. Humugot muna ako ng malalim na paghinga bago binuksan ang pinto.

"Kakausapin ko kayo," sabi ni William at pinagkrus ang mga braso niya. "Parang naging kasalanan ko pa kung bakit nahirapan ang kaibigan ko sa pagh