KABANATA 4

CHAPTER 4

NAGISING ako dahil sa sama ng pakiramdam. Umiikot ang buong paligid pagdilat ng aking mata. Naglalaway ako na parang may masamang nakain kaya tumakbo na kaagad ako sa banyo.

Sumakit ang aking sikmura dahil sa pagsusuka. Lahat yata ng kinain ko kahapon ay inilabas ko. Mukhang tama si Gieselle, naimpatso ako sa dami ng kinain.

Naghilamos ako at tiningnan ang sariling mukha sa salamin. Ang laki-laki ng aking eyebags at namumutla pa.

Sinuklay ko ang buhok at nag-isip kung ano ang pwedeng lutuin ngayong agahan. Dapat ay maging maingat na ako dahil baka maulit ang nangyari kanina.

Nagtimpla ako ng kape pero nang inilapit ko na ito sa bibig para higupin ay bumaliktad ulit ang aking sikmura dahil sa amoy nito. Tumakbo na naman ako sa lababo at sumuka ng purong laway saka ibinuhos ang kape sa sink.

Ano bang nangyayari sa akin? Wala naman akong lagnat pero bakit ganito ang pakiramdam ko? Naihilamos ko ang sariling palad dahil sa naisip. Pero isang beses lang naman may nangyari sa amin.

‘No, no, no,no, big no! Hindi pwedeng maging ganoon,’ kumbinse ko sa sarili. Masisira ang pangalang pinaghirapan ko, ang career, mga sakripisyo at ang pangarap namin ni Mama at higit sa lahat ay tila pinatunayan ko lang na tama ang mga sinabi ni Papa. Mas lalong hindi ko matatanggap na ako ang lalabas na talunan. Pero hindi pa naman kumpirmado. Baka masama lang talaga ang pakiramdam ko dahil nasira ang tiyan sa mga nakain kahapon.

Nagsaliksik ako kung ano-ano ang mga signs at symptoms ng pagiging buntis. Morning sickness, pagkahilo, tinatamad, nanghihina, nagsusuka, mood swings at marami pang iba pero hindi ko na tinapos dahil halos lahat ng mga iyon ay nararamdaman ko maliban na lang sa mood swings.

Natutop ko ang noo habang pabalik-balik na naglakad sa sala. Kung sinuman ang makakita sa akin ay malamang iisiping nababaliw na ako.

Sino ang pwede kong tawagan? Hindi pwede si Gieselle dahil baka kung anong gawin niya. Baka may gawin siyang mas ikakalala ng aking problema. Pero hindi pa naman kumpirmado. Basi sa nabasa ko ay kailangang mag-pregnancy test muna para makasigurado.

Hindi ko lubos maisip ang sarili na bumili ng pregnancy test. Paano kung may makakakilala sa akin? Lilikha ng malaking iskandalo hindi lang sa aking pangalan pero pati na rin kay Mother Chelsea kung mabubunyag sa publiko na nabuntis ako. Ang tanong, sino ang ama? Hindi ko naman pwedeng ituro ang Arken Fernandez na iyon. Paano kung ayaw niyang aminin? Mas lalo lang akong mapapahiya at pati ang pangalan ni Papa ay kakaladkarin ko sa kahihiyan at iyon ang dapat kong iwasang mangyari.

Pagod akong umupo sa sofa. Wala akong back up plan sa ganito at walang extra ideas. Ang mas masaklap pa ay wala akong maihaharap na tatay ng magiging anak ko kung sakali mang totoo itong hinala ko na buntis ako.

Bago ako lumabas ng building ay sinuyod ko muna ng tingin ang buong paligid. Napapraning na nga siguro ako kung tutuusin.

"Ma'am? May hinahanap po kayo?" Nagulat pa ako sa biglaang pagsulpot ng isa sa mga lady guards ng building.

"Ma-may bibilhin sana pero masama ang pakiramdam ko. Natatakot ako na baka mahilo kapag naglakad sa ilalim ng sikat ng araw." Pilit kong pinapakalma ang sarili at sana lang ay gumana ito.

"Ano po palang ipabibili niyo, ma’am?" nag-aalalang tanong ng babae.

"Diyan lang naman sa pinakamalapit na botika."

"May listahan po ba kayo ng gamot na ipabibili? Pwede naman pong ako na ang bibili para sa inyo at baka mapaano pa po kayo," magalang na sabi nito.

Nagpasalamat ako sa alok niya.

"Pakiabot na lang ng listahang ito sa pharmacist. Salamat, ate," sabi ko sa kanya bago tuluyang umalis. Ngiti naman ang iginanti niya sa akin.

Hindi nagtagal ay bumalik na ang babae na may dalang supot.

Marami akong inilista roon, gamot sa allergy na madalas ay iniinom ko, mouthwash, bulak, cotton buds, betadine, vitamin C at kung ano-ano pa saka ko isiningit ang pregnancy test.

Binuksan ko kaagad ang supot at kinuha ang pregnancy test pagpasok ko sa unit. Kahit hindi ako naiihi ay pinilit ko ang sariling maihi para magamit na kaagad ang pregnancy test. Hindi na ako makapaghintay ng mamaya o bukas dahil gusto ko ng malaman kung totoo ba ang aking hinala.

Hindi ako mapalagay habang naghihintay ng ilang minuto bago makita ang resulta tulad ng nasa instructions. Hanggang sa lumitaw ang dalawang pulang linya. Parang huminto ang ikot ng mundo habang pinipilit kong i-proseso ang nangyayari.

Malalim na hininga ang pinakawalan ko at ang unti-unting pagbalong ng aking mga luha. Ang tanga-tanga ko. Wala akong ibang pwedeng sisihin sa nangyari kung hindi ang aking sarili lamang. Anong mukha ang ihaharap ko? How can I be so clumsy?

Napahagulgol na lang ako ng iyak habang unti-unting dumausdos pababa sa sahig ng banyo. Hinawakan ko ang flat ko pang tiyan. Kakayanin ko bang maging kriminal sa sarili kong anak?

Lumabas ako ng banyo at dideritso na sana sa kusina para uminom ng tubig pero tumunog ang aking cellphone na nasa sala kaya kinuha ko na muna ito.

Pangalan ni Mother Chelsea ang nakarehistro sa screen at hindi ko alam kung sasagutin ko ba o hindi.

Natapos ang kanyang tawag na nakatitig lamang ako sa hawak na cellphone. Naka-recieve naman ako kaagad ng text mula sa kanya.

'Remind lang kita, anak, this coming Monday na ang contract renewal mo, report ka sa office eight a.m sharp,' ang laman ng kanyang text.

Sa susunod na linggo na pala iyon. Paano na ito? Hindi ako pwedeng pumirma ng panibagong kontrata kung ilang buwan na lang ay lolobo na ang aking tiyan at wala akong maiharap na asawa o tatay ng anak ko.

Paano na ang binuo kong good image? Nanghihinang umupo ako sa sofa. I have nowhere to go. Hindi pwede kay Gieselle at mas lalong hindi pwede sa tatay ng anak ko. Kung alam ko lang na magkakaganito sana pala ay ginising ko na lang ang lalaking iyon nang umagang ‘yon. Kung ipapalaglag ko na lang kaya ito, makakaya ko ba?

Nanood ako ng mga videos kung ano ba ang hitsura ng fetus habang lumalaki. Nakita ko na kahit ilang araw pa lang ito sa tiyan ng babae ay may heart beat na siya, may buhay na. Dahan-dahan kong hinawakan ang tiyan dahil sa video na nakita. Nakonsensiya ako sa naisip na ipalaglag ang bata. Hindi naman niya kasalanan kung bakit nagkaproblema ako ngayon. Lalong hindi niya kasalanan kung bakit nagkaroon siya ng buhay.

Muli kong hinpalos ang aking tiyan, 'sorry, baby,kung nag-isip ako ng masama sa'yo,' hingi ko ng tawad sa kanya.

Ilang araw akong hindi lumabas dahil natatakot ako na may makakita sa akin. Pati mga tawag ni Mother ay hindi ko sinagot, maging kay Gieselle. Kung ano-ano na lang ang iniimbento kung dahilan, isa na roon ang pagiging busy.

'Pam, nasa Acropolis kami ngayon. Pumunta ka rito, ASAP,' text sa akin ni Geiselle. Mag-a-alas nuwebe pa lang ng gabi at nasa bar na sila.

'I can't. I’m sorry, Gie,' reply ko. Sa kalagayan ko ngayon ay mas lalong hindi pwedeng pumunta sa ganoong klaseng lugar. Ako lang din ang mahihirapan at madadamay pa ang anak ko.

'Nandito si Arken, with a girl,’ sumbong niya.

'I don't care, Gie,' reply ko pero nakaramdam ako ng inis.

Kung nagkaharap kami nang sumunod na umaga kung kailan may nangyari sa amin ay malaya ko sana siyang maituturo na siya ang nakabuntis sa akin.

Kung ang ama ng anak ko ay iresponsable, babaero at walang plano sa buhay, hindi bale na lang. Lulunukin ko na lang ang masamang tingin nila sa akin pero ang hayaang mabuhay at lumaki ang aking anak na masisilayan ang ganoong klaseng ama araw-araw ay huwag na lang.

Bumangon ako ulit dahil ang dami-daming pumapasok sa aking isip at hindi na rin sumagot pa si Gieselle. Ano na kayang ginagawa nilang dalawa ng babaeng kasama nito? Mabuti pa siya at  may panahong sumaya na hindi man lang tinamaan ng kaunting konsensiya. Kungsabagay, ano nga ba ang maaasahan sa isang kagaya niya? Normal na lang siguro para sa kanya ang magising bawat umaga na iba-iba ang katabing babae. Paano siya ririspetohin ng anak namin kung ganoon ang kanyang imahe?

Dumating na ang araw na kinatatakutan ko, ang araw kung kailan ako pipirma ng bagong kontrata. Sumapit na ang alas diyes ng umaga at nandito lang ako sa condo at nagkukulong.

Hindi ako pwedeng pumirma na panibagong kontrata at mas lalong hindi ko pwedeng sabihin ang dahilan. Hindi nila ako titigilan hangga't walang naririnig mula sa akin. Maraming pangalan ang masisira kapag malalaman ng publiko ang aking kalagayan.

Inulan na ako ng sangdamakmak na tawag at text mula kay Gieselle pagsapit ng alas dose. Tinatanong kung nasaan na ako at bakit hindi ako sumipot sa contract renewal kanina.

Hindi niya ako titigilan hangga't hindi ako magri-reply at wala akong planong sagutin ang mga tawag niya dahil mas mahihirapan lang akong magsinungaling.

'Pupuntahan na kita riyan sa condo mo, Paloma,' text niya na nagpa-alarma sa akin.

'Wala ako sa condo,' palusot ko kaagad.

'Pupuntahan kita kung nasaan ka man ngayon. Kailangan ka rito dahil pipirma ka ng panibagong kontrata. Nandito ang mga malalaking kompanya kung saan may project tayo this year and they want to meet you kaya pumunta ka na rito, ASAP.'

Mas lalong hindi ako dapat magpakita roon. Anong mangyayari kung pipirma ako pero hindi ko naman tatapusin ang nasa kontrata dahil lalaki na ang tiyan at manganganak na ako? Anong mangyayari sa agency ni Mother Chelsea? Wawasakin ko silang lahat kapag magpapakita ako roon.

'Hindi ka pwedeng pumunta rito,' reply ko kaagad.

'Why? Nasaan ka ba?'

Nag-isip ako ng lugar kung saan mahihirapan si Gesielle na puntahan.

'Umuwi ako sa amin. Nandito ako sa bahay ni Papa at kaharap ko siya ngayon.'

Pumikit ako ng mariin nang maipadala na sa kaibigan ang mensahe. Nanginginig ang aking kamay dahil sa halo-halong nararamdaman.  

Kagaya ng inaasahan ay hindi na nangulit pa si Gieselle maging si Mother Chelsea nang marinig ang aking rason sa hindi pagsipot sa meeting na iyon. Sunod-sunod na tunog ng door bell ang narinig ko kinagabihan pero hindi ako nag-abalang buksan iyon.

'Are you home?' text ni Gieselle at malamang siya ang nasa labas. Siguro ay gusto niya talagang siguraduhin kung nasa bahay ako ni Papa.

'No, I'm not.'

'Kailan ka babalik dito?' tanong niya ulit.

'Hindi ko pa alam, Gie.'

'About the contract signing kanina, ‘yong brand ng damit na ini-endorse mo kumuha ng ibang model. Napaka-unprofessional mo raw reklamo ng manager nila.'

Hindi ako nakasagot sa balita niya.

'Guess who sino ang kinuha nila?' text na naman niya.

'I don't have any idea,' sagot ko habang may kaba sa dibdib.

'Si Angel. At alam mo kung sino ang nag-recommend sa malanding iyon? Your ex boyfriend na si Steve. At dahil sa ginawa ng walang-hiyang Steve na iyon lumabas ang mga haka-haka na iniwan ka na niya at si Angel na ang current girlfriend niya. Ang masaklap, pinatutuhanan talaga nila sa harap naming lahat.’

Nailapag ko and cellphone sa mesa. Hindi ako makahuma dahil sa inis, panghihinayang, galit at sakit. Nandito ako, nakikipaglaban sa buhay habang unti-unting gumuguho ang lahat-lahat sa akin.