Chapter 19: Ang Rason para Lumaban

"NAY, sa loob lang po kami ng kuwarto ko ni Purity," paalam ni Ara sa kanyang ina. Naghahanda na ito sa pagpunta sa palengke.

"Oh, sige. Ako'y lalakad na rin. May gusto ba kayong ipabili na dalawa ng kaibigan mo para sa tanghalian?"

Napatingin si Ara kay Purity at umiling ito. "Hindi na po, nay. Bahala na po kayo kung anong gusto ninyong pananghalian natin. Hindi naman po namimili ng pagkain itong si Purity."

"Buweno, aalis na ako. Kayo na ang bahala sa bahay. Mamayang gabi pa uuwi ang tatay mo at ang kuya mo galing sa trabaho."

"Mag-iingat po kayo," tugon na paalala ni Ara sa ina.

Mahirap ang buhay nila. Pero masaya pa rin. Normal lamang sa isang pamilya na minsan ay mayroong hindi pagkakaunawaan. Ngunit, naayos pa rin nila. Para kay Purity nakakainggit ang pamilyang katulad ng sa kaibigan.

Nakaalis na ang ina ni Ara at nasa kuwarto na ang magkaibigan. Hawak ni Purity ang limang box ng pregnancy test kit.

"Lahat 'yang kit ay gamitin mo para sigurado tayo saka ka pumunta sa ospital pa