Chapter 02

"Miss Eight. Sandali lang naman. Magpahinga naman tayo, kahit saglit lang." Rinig ni Athana na reklamo ni Gun.

Hindi rin alam ni Athana kung bakit biglang naiba ang misyon nila ngayon. Hindi kasi natuloy ang misyon nila noong nakaraang araw dahil 'yong ibang grupo na raw ang gumawa. Iyan din ang hindi niya maintindihan sa kanila. Kahit hindi nila misyon ay inaagaw pa rin nila, kaya ang ending palagi silang napapagalitan at saka napaparusahan. Kaya mahigpit talaga si Athana sa mga kasamahan niya, dahil damay-damay silang lahat kapag may pumalpak na kahit isa man lang sa kanila.

"Dapat kasi hindi ka na sana nagtaas ng kamay mo kanina. 'Yan tuloy pagod na pagod ka ngayon." Saad ni Athana at umupo muna ito sa may malaking bato.

Inutusan kasi sila ni Boss Cheng na singilin daw nila si Mr. Freak dahil halos isang taon na raw itong hindi nagbabayad ng utang niya, at saka hindi raw nagagawa ng ibang grupo na singilin si Mr. Freak kaya sila naman ang susubok ngayon ni Gun.

"Hindi ko naman alam na sa may bukid pala tayo pupunta." Hinihingal na sabi ni Gun at naupo ito sa may maliit na bato.

"Gun," tawag ni Athana sa pangalan nito, at kaagad din naman nitong nasalo ang tubig na inihagis niya.

"Halata sa kanya na hindi siya sanay sa paghihirap. Sa tayo at balat palang ni Gun halatang mayaman ito. Na-curious tuloy ako kong ano ba talaga ang totoong rason niya kung bakit siya sumali sa amin. Saka isa pa, bata pa naman siya kaya puwedeng-puwede pa naman siyang maghanap ng marangal na trabaho, kagaya na lamang ng pagmomodelo dahil bagay na bagay iyon sa kanya." Saad ni Athana sa kanyang isipan.

"Gun... Bakit mo naisipan na sumali sa amin? Wala ka bang pamilya na naghahanap sa 'yo?" Mausisang tanong ni Athana sa kanya.

Nakita niyang nag-iwas ito ng tingin sa kanya.

"May... may isa na lang akong natitirang pamilya ngayon—ang kuya ko." Sagot nito bago uminom ulit ng tubig habang nakatanaw ito sa mga kabahayan sa ibaba.

"Nasaan siya ngayon? Hindi ba siya nag-aalala sa 'yo?" Mausisang tanong pa rin sa kanya ni Athana bago lumingon sa kanya si Gun.

"Hinahanap naman. Sadyang ako lang ang ayaw magpahanap sa kanya."

Napakunot naman ang noo ni Athana sa isinagot niya.

"Bakit ka naman nagtatago mula sa kuya mo? Sinasaktan ka ba niya? May tampuhan ba kayong dal'wa?" Sunod-sunod na tanong ni Athana sa kanya.

Napailing-iling na lamang ito at tumayo na.

Gano'n? Ayaw niyang sagutin ang mga tanong ko?

Huminto ito sa may harapan niya at inabot nito sa kanya ang tubig na binigay niya kanina. Ngunit, hindi niya iyon tinanggap. Tumayo na si Athana at nilagpasan niya lang si Gun.

"May laway mo na 'yan." Sabi niya dahilan upang matawa si Gun.

"Ang arte mo pala, miss eight." Saad niya at tumabi ito sa kanya.

Hindi na s'ya sinagot pa ni Athana, dahil may nakita siyang maliit na bahay sa may dulo. Gawa ang bahay na ito sa may kawayan. Tinuro niya iyong bahay at napatingin naman si Gun doon sa itinuturo niya.

"Bakit naman dito pa siya gumawa ng bahay? Nagbebenta ba ng mga droga si Mr. Freak?" Tanong ni Gun habang naglalakad sila nang mabilis.

"Hindi ko alam." Maikling sagot niya.

Kumatok kaagad si Athana pagkarating nila sa may labas ng bahay ni Mr. Freak. Walang sumagot kaya muli silang kumatok ni Gun. Pumasok na sila sa loob ngunit wala silang nakitang kahit isang tao man lang doon. Lumabas si Gun upang tingnan ang paligid at nagpaiwan naman siya roon sa loob.

"Walang tao rito, miss eight." Saad nito pagkatapos niyang maglibot sa paligid.

Lumabas na kami at sakto naman na may nakita kaming isang lalaking mga nasa edad singkwenta na pero mukhang malakas pa rin naman ito. Mukhang galing ito sa pamimingwit, dahil may bitbit itong tatlong isda na huli niya.

Napakunot naman ang noo ni Athana nang pinatago siya ni Gun sa may likuran nito.

Ano ba ang ginagawa niya? Ako ang pinuno nila tapos ako pa 'yong magtatago? Ganito rin sina Bel sa akin, ako ang pinapatago at pinoprotektahan nila sa tuwing nagkaka-aberya sa misyon namin.

Lumapit sa amin ang lalaki at isa-isa niya kaming tiningnan, mula ulo hanggang paa.

"Si Cheng na naman ang nagpapunta sa inyo rito?" Tanong nito.

Hinawi niya si Gun at lumapit siya kay Mr. Freak.

Mukhang hindi naman masamang tao si Mr. Freak.

"Opo. Si boss Cheng po ang nagpapunta sa amin dito, at sigurado po akong alam n'yo na po ang totoong dahilan ng pagpunta namin dito sa inyo." Sagot niya.

Tumango ito at saka nilagpasan na siya ng matandang lalaki. Pagkalingon niya, naglilinis na ito ng isda. Napaatras naman sila ni Gun nang bigla nitong kinuha ang kanyang itak na nakasuksok lang sa may kawayan sa gilid ng kanyang bahay.

"Anong pangalan ninyong dalawa?" Tanong nito habang patuloy lang itong sa paghihiwa ng isda.

"A-ako po si Miss Eight. Siya naman po si Gun."

Napatingin naman ito kay Athana pagkatapos niyang magpakilala rito.

"Miss Eight?" Pag-uulit ng matanda sa sinabi niya.

Tumango naman siya kaagad dito.

"So, ibig sabihin isa ka sa mga pinuno ng Secretive?"

Muli siyang tumango rito.

Napatingin naman si Athana kay Gun nang binalingan ito ni Mr. Freak.

"Isa po si Gun sa miyembro ko." Sabi niya.

Muling ipinagpatuloy ni Mr. Freak ang kanyang ginagawa. Katamtaman lang ang laki ng tatlong isdang nahuli niya at sigurado akong mabubusog na ito, lalo na kung siya lang ang mag-isang kakain ng mga huli niya.

"Bigyan ninyo ako ng tatlong rason kong bakit ako magbabayad sa inyo ngayon," Saad nito habang hindi ito nakatingin sa kanila ni Gun. "Pero bago ninyo sabihin sa akin, may dala ba kayong mga baril ngayon?" Dugtong na tanong nito at saka pa ito tumingin sa kanila ni Gun.

Parehas silang napailing ni Gun. "Wala po." Sagot naman ni Gun.

Kinuha kasi ni Boss Cheng ang mga baril nila ni Gun bago sila pumunta rito sa bundok.

Pumasok ang matandang lalaki sa loob ng kanyang bahay. Paglabas nito ay may dala na itong isang upuan at shotgun. Umupo ito ng maayos sa may harapan nila habang nakatutok sa kanila ang hawak nitong shotgun. Ilang pulgada lang ang layo nila sa matanda.

"Kung gano'n, simulan niyo nang sabihin sa akin ang tatlong rason ninyo." Saad ng matanda habang seryoso lang itong nakahawak sa kanyang baril.

Nagkatinginan naman silang dal'wa ni Gun.

Kaya pala kinuha ni Boss Cheng ang mga baril nila kanina. May balak kaya siyang ipapatay silang dalawa ni Gun kay Mr. Freak?