Chapter 13

Tahimik lang ako habang nasa biyahe kami ni Dmitri. Hindi ko naman kasi alam kung ano ang sasabihin ko. Ramdam ko na parang naiinis siya sa akin, suguro ay dahil ayaw kong magpahatid sa kanya.

Naiintindihan ko naman kung galit siya. Lalo na’t kaibigan niya ako. Marahil ang iniisip niya ay magiging kargo niya ako kung sakaling may mangyaring hindi maganda sa akin.

Gusto kong mag-sorry sa kanya pero hindi ko magawa. Hindi ko alam kung bakit napakabigat bitawan ng salitang ‘sorry’. Nahihiya ako. Hanggang sa makarating na kami sa apartment ko ay tahimik pa rin kami.

Nang bumaba ako sa sasakyan ay gano’n din ang ginawa niya. Kumunot pa nga ang noo ko nang mapansin na hanggang paakyat sa hagdan ay nakasunod pa rin siya sa akin.

“Okay na ako rito, Dim. Balikan mo na ang girlfriend mo,” mahinang saad ko. “Salamat ulit sa paghatid,” dagdag ko pa.

“I already told you that she’s not my girlfriend, Alison,” madiing saad niya.