Chapter 25

Kaharap ni Gabriella ang salamin habang ninanamnam ang sarap na dulot ng pagsuklay ni Y’da Mae sa buhok niya. Pagkatapos niyang magpalit ng damit ay nag-offer sa kaniya si Y’da Mae na ayusin ang kaniyang buhok. Kaya ngayon ay pasuklay-suklay lang ito sa buhok niya.

“Talaga?” tanong niya habang nasa sariling repleksiyon lang din nakatuon ang mga mata. “So, dapat pala graduating ka na?”

Nakita niya ang pagtango nito. “Oo, sana. Pero gano’n talaga, eh. May mga bagay na dapat isakripisyo.”

“Pero sayang,” pagkuntra niya. “Kung may dapat mang i-sacrifice, hindi ang pag-aaral mo.”

“Iyon lang kasi ang nakikita naming paraan—”

“How about your parents?” giit pa niya at pinipilit na siya dapat ang tama. Ano ba namang klaseng kapatid itong si Rey Jhon kung hinayaan lang na tumigil ito sa pag-aaral. “At bakit ba kasi umalis kayo rito? Eh ‘di sana—” Agad siyang umiling. Sabagay, hindi siguro alam ng pamilya ng binata na nagtatrabaho ang binata sa kanila. “Well, siguro may rason kaya kayo umalis.”