Chapter 4

Amira

Sumilip ako sa bintana ng makarinig ng ugong ng sasakyan sa labas. Nakahinto ito sa tapat ng bahay namin. Bumukas ang pinto ng passenger seat at lumabas si itay na may bitbit na box ng kilalang brand ng cake. Lumabas naman sa driver seat si señorito Yñigo at binuksan ang likurang sasakyan at inalalayan pababa si inay.

"Maraming salamat sa paghatid señorito." Nakangiting sabi ni itay.

"Walang anuman ho."

"Gusto nyo bang pumasok muna sa loob?" Aya naman ni inay.

Tumingin si señorito Yñigo sa bahay namin at saktong sa bintana ito tumingin at nagtama ang aming paningin. Nginitian nya ako, umiwas naman agad ako ng tingin at tinuon na lang sa notes ko ang atensyon.

"Sa susunod na lang ho Manang Esme, Mang Carlitos. Gabi na rin ho kaya mauuna na ako." Dinig kong paalam nya kanila itay at inay.

"O sige, mag ingat kayo sa daan."

"Oho."

Ilang sandali pa ay dinig ko na ang ugong ng sasakyan na paalis. Kasunod non ay ang pagbukas ng pinto at pumasok sina itay at inay. Tumayo naman ako at sinalubong sila ng mano.

"O andyan ka lang pala Amira. Hindi ka man lang lumabas para batiin si señorito." May himig panernermon na sabi ni itay.

"Eh, may ginagawa ho kasi ako tay." Nagkamot pa ako sa ulo.

Nakita naman nya ang mga notes ko sa lamesita at tumango. "Pero sa susunod kapag nandito si señorito batiin mo. Baka akalain hindi ka namin tinuturuan ng magandang asal." Pangaral pa nya.

"Hayaan mo na, busy lang ang anak mo sa pag aaral." Awat naman ni inay na kinuha ang box ng cake mula kay itay at dumiretso ng kusina.

"Magpapalit muna ako ng damit para makakain na tayo. Maghain ka na anak." Tinapik ako ni itay sa balikat gaya ng nakagawian nya at pumasok na sa kanilang kwarto.

Pasimple naman akong bumusangot, hindi dahil kay itay kundi dahil sa panernermon nya sa akin dahil hindi ako lumabas para batiin si señorito. Naalala ko tuloy bigla noong pinagalitan at pinalo nya ako nung bata pa ako dahil pumasok ako sa library ng mansion at sinulatan ko ang isang papel na pag aari ni señorito. Galit na galit din si señorito sa akin noon at nakakatakot ang itsura nya. Parang kakainin nya ako ng buhay. Pinaliwanagan naman ako ni inay na mali ang ginawa ko.

Bumuntong hininga ako at tumungo na sa kusina para maghain. Nakita ko naman ang cake na nakalapag sa mesa. Sa brand pa lang halatang mahal na. Binuksan ko ito at halos maglaway ako ng makitang chocolate flavor ito. Marami pang toppings ng chocolate sa ibabaw at gilid. Kumuha ako ng isang toppings at sinubo. Napapikit pa ako habang tinutunaw ang chocolate sa aking bibig.

"Galing kay señorito yan. Nagpunta kami ng bayan kanina. Naalala nya paborito mo ang chocolate kaya bumili sya nyan, para sa'yo yan anak. Masarap yan, maraming chocolate na toppings." Ani itay na umupo na sa lamesa sumunod naman ang inay.

"Kaya magpasalamat ka kapag nakita mo ulit sya." Dugtong pa ni inay na nagsandok na ng kanin sa bawat plato.

Para tuloy nahirapan akong lunukin ang tunaw na chocolate. Nagsalin ako ng tubig sa baso at uminom.

"O anak kain na. Mamaya na yang cake." Sabi ni inay.

***

"Sigurado ka ba dyan acla? Ang hirap pa naman magsinungaling sa harap ng tatay mo." Nag aalinlangan na sabi ni Tonyo.

"Oo nga, basta sabihin mo lang kapag tinanong ka itay, may ginagawa kaming group project sa bahay ng kaklase ko. Saka hindi naman ako magtatagal eh."

Kahit din naman ako ay nahihirapang magsinungaling sa harap ni itay. Hindi ko naman kasi ugaling magsinungaling dahil tinuruan ako nila itay at inay na laging maging tapat. Ngayon lang naman dahil gusto kong makasama si Alvin at makapunta sa bahay nila. Inimbitahan kase ako ng bunsong kapatid nya dahil birthday nito. Sandali lang naman ako at uuwi na.

"Oo sige na. Basta bilisan mo ah! At wag kang basta marupok, baka ihiga ka lang nun sa kama nya bubukaka ka na." Paalala pa nya.

"Gaga, hindi ako ganun no." Sabay kurot ko sa tagiliran nya na ikinangiwi nya.

"Aray! Ang sakit mo namang mangurot acla." Angal nya at maarteng hinimas himas pa ang tagilirang kinurot ko.

"Bunganga mo kase -- o sige na! Batsi ka na! Andyan na si Alvin. Basta yung bilin ko sayo ha?" Pinandilatan ko pa sya ng mata.

"Oo na. Talande.." Sabay irap nya.

"Inggit ka lang! Wala kang jowa." Sabay irap ko din sa kanya.

"Aba't -- "

"Hi! Nag aaway ba kayong dalawa." Nakangiting bati ni Alvin sa aming dalawa. Hinalikan pa nya ako sa noo. Kilig na kilig naman ako sa ginawa nya.

"Hindi ah! Ganito lang kaming maglambingan nitong jowa mo hmmp! -- sarap sabunutan, haba ng hair!" Sabay hila nya sa buhok ko.

Gumanti naman ako at hinila ang patilya nya na ikinatili nya. Natatawa namang pinapanood lang kami ni Alvin. Nasanay na sya sa ganitong eksena namin ni Tonio. Nung una nga daw pinagselosan pa nya ito dahil lagi kong kadikit.

"Gusto mo bang sumama sa amin Tonio?" Aya ni Alvin.

"Toni, ilang ulit ko bang sasabihin na Toni at hindi Tonio. At hindi ako sasama dahil baka pagselosan ako nyang jowa mo." Sabay hawi nya ng invisible nyang mahabang buhok.

"O sige pre, mauuna na kami ng babe ko." Tila nang aasar pang sabi ni Alvin sa kanya sabay suntok ng mahina sa braso nya.

"Ay nakakainis ka fafa Alvin!" Kunwaring naiiyak na sabi ni Tonio at maarteng pinalo palo ang braso ni Alvin.

Tumawa lang kami ni Alvin at tinungo na ang nakaparadang kotse nya. Binuksan nya ang pinto ng passenger seat at inalalayan akong umupo sa loob. Sabay pa naming kinawayan si Tonio bago umalis.

Bumuntong hininga ako habang kipkip sa kandungan ang paper bag na may lamang regalo para sa kapatid nya.

"Ang lalim naman nun." Nakangiting bumaling sya sa akin. "Ayos ka lang?"

Tumango ako. "Kinakabahan lang."

"O bakit ka naman kinakabahan?" Nakangiting tanong nya at kinuha ang kamay ko.

"Baka sungitan na naman ako ng mama mo eh." Napakagat labi ko. Nung huling punta ko kasi sa kanila ay hindi maganda ang salubong sa akin ng mama nya.

"Hindi yan, sinabihan ko na si mama. Wag ka ng mag alala ha?" Dinala nya ang kamay ko sa labi nya.

Ngumiti na lang ako at pilit kinakalma ang nagwawala kong puso sa kaba.

Ilang minuto pa ay nasa tapat na kami ng isang malaking bungalow type na bahay. Modern ang design nito at talagang namumukod tangi sa mga bahay naroon. Hindi man ito kasing kasing laki at rangya ng mansion sa hacienda pero nagsusumigaw pa rin ito ng yaman ng mga taong nakatira dito. Kung sabagay vice mayor ang daddy ni Alvin at isang business woman sa bayan na ito ang mommy nya. Pang limang punta ko na rito sa bahay nila. Mabait naman ang daddy nya sa akin at kasundo ko rin ang bunso nyang kapatid. Kabaliktaran nga lang sa mommy nya. Bumundol na naman ang kaba sa dibdib ko.

Nang makababa na kami ng kotse nya ay kanyang hinawakan ang aking kamay at inakay ako papasok ng malaki nilang bahay. Marami na ring tao sa loob na karamihan ay mga estudyante sa isang sikat na paaralan na malamang ay mga kaklase ng kapatid nya o kaibigan. Halatang galing din sa mga may kayang pamilya. Maraming mga bumabati sa kanya at nagpapa cute na tinatawanan lang nya. Ayos lang naman sa akin dahil mga bata pa sila. Hindi ko na rin pinapansin ang mga pasimpleng irap nila. Mga tipikal na spoiled brat kagaya ng grupo nila Suzette.

"Kuya!"

Tawag ng kapatid nya na masayang lumapit sa amin. Ang ganda nito sa suot na sweetheart dress na kulay pink. Ang alam ko 16 years old na ito at nasa unang taon ng señor high.

"Ate Amira buti nakasama ka. Magtatampo sana ako sayo kung hindi ka makaka attend ng birthday ko eh." Nakangiting sabi nya at yumakap pa sa akin.

Hinagod hagod ko naman ang likod nya at nangingiti. Parang kapatid na kasi ang tingin ko sa kanya. "Syempre hindi ko nakakalimutan ang birthday mo. Happy birthday Aileen." Sabay abot ko ng paper bag sa kanya. Masaya naman nyang tinanggap ito.

"O bitawan mo na ang girlfriend ko at baka malamog mo." Pangaasar ni Alvin sa kapatid. Hindi pa kasi ako binibitawan ni Aileen.

Nakangusong binalingan sya ng kapatid at kumapit sa braso ko. "Birthday ko ngayon at bisita ko si ate, kaya akin na muna sya." Sabay hatak sa akin palayo sa kuya nya.

Sasabat pa sana si Alvin pero pinandilatan ko sya ng mata. Kakamot kamot na lang sya ng ulo. "Sandali lang ha, ibalik mo sa akin agad si Amira." Baling nya sa kapatid.

"Oo na, ipapakilala ko lang si ate sa mga kaklase ko. Lagi ko kasing pinagmamalaki sa kanila na maganda ang girlfriend ng kuya ko at matalino pa." Bigla naman akong mahiya sa sinabi nya.

Ngumisi naman si Alvin na tila nagyayabang. "And I'm proud of it!"

Nag init naman ang pisngi ko sa sinabi nya. Isa ito sa minahal ko sa kanya. Hindi nya ako kinakahiya at laging ipinagmamalaki. Kahit na ba ang alam ng karamihan sa university ay nililigawan pa lang nya ako. Sana lang matanggap na rin sya ni itay para maipagmalaki ko rin sya sa kanila.

"Tara na nga ate." Hinatak ako ni Aileen papunta sa direksyon ng grupo ng mga kaklase nya.

"Hey guys!" Tinawag nya ang atensyon ng mga kaklase nya. Lumingon silang lahat sa amin at ngumiti.

"Gusto kong ipakilala sa inyo ang pinaka magandang naging girlfriend ni kuya. Si ate Amira." Sabi nya sabay hilig sa balikat ko. Natouch naman ako sa paraan ng pagpapakilala nya sa akin. Nag hi naman ang mga kaklase nya at ngumiti pa sa akin.

"She's pretty, but ate Suzette is more pretty. Mas bagay sila ni kuya Alvin." Sabat ng isang sosyalerang classmate nya. Siniko naman ito ng isang kaklase pa nila. Pero umirap lang ito. Kilala nya si Suzette? Baka kamag anak.

Nahihiyang nilingon ako ni Aileen at humingi ng pasensya sa akin. Ngumiti lang ako. Hindi naman ako apektado dahil sanay na akong makarinig ng ganon sa school pa lang.

Pagkatapos nya akong ipakilala sa iba pa nyang mga kaklase ay hinatid na nya ako sa isang lamesa kung nasaan ang kuya nya. Tumayo naman si Alvin at pinaghila ako ng upuan sa kanyang tabi.

"Nagugutom ka na ba? Ikukuha kita ng pagkain -- "

"Alvin hijo, nandyan ka lang pala!" Ang mommy nya na papalapit sa amin at may kasamang babae -- si Suzette? Anong ginagawa nya dito? Imbitado din sya?

"Mom." Tumayo si Alvin at hinalikan sa pisngi ang mommy nya. Tumayo na rin ako at ngumiti. Akmang lalapit ako at magmamano pero nilayo nya ang kanyang kamay. Kaya naiwan ang kamay ko sa ere.

"Mom, kasama ko si Amira." Sabi ni Alvin.

"I know. Anyway, Suzette is here. Inimbitahan ko sya at ang mama nya. Gusto ka nyang makita anak." Nakangiting turan ng kanyang ina na hindi man lang ako tinapunan ng tingin. Napakagat labi na lang ako sa pagkapahiya.

Ngumiti naman ng matamis si Suzette kay Alvin at hinalikan sa pisngi. Agad namang dumistansya si Alvin sa kanya at hinapit ako sa bewang. Tumaas naman ang kilay ng babae.

"Hijo, why don't you join us in our table? Nandoon din ang daddy mo." Nakangiting aya sa amin ng mommy nya o mas tamang sa sabihin sa kanya, dahil hindi naman ako pinapansin nito.

"Sure mom. Susunod na lang kami."

"Okay. Hintayin ka namin doon." Sabi ng mommy nya at tumalikod na na hindi man lang ako pinansin.

Ngumiti naman kay Alvin ng matamis o tamang sabihin na nang aakit si Suzette at irap naman ang binigay sa akin bago sumunod sa mommy ni Alvin.

Narinig kong bumuntong hininga si Alvin. Hinawakan nya ang kamay ko ng mahigpit. "I'm sorry sa inasal ni mommy babe, hayaan mo sasabihan ko uli sya."

Pilit naman akong ngumiti at umiling. "Ayos lang Alvin."

Ngumiti naman sya at kinabig ako saka niyakap.

Pakiramdam ko ay mag isa lang ako sa table   kasama ang mga magulang ni Alvin at mga amiga at amigo ng mga ito. Idagdag pa na bidang bida sa usapan si Suzette at pasimpleng inerereto ng mommy nya sa kanya. Hindi ko tuloy malunok ang kinakain ko. Kung hindi lang nandito din sa lamesa si Alvin at Aileen ay mag wo-walk out ako. Umiling iling lang siya at pinipisil ang kamay kong hawak hawak nya sa ilalim ng lamesa. Alam kong ramdam nya na hindi ako komportable. Nahihiyang ngiti naman ang binibigay sa akin ni Aileen. Ang daddy naman nya ay busy sa pakikipag usap sa kumpare nito na isang konsehal.

Parang gusto ko ng umuwi..

*****