Chapter 2

Raina

Nanlaki ang mga mata ko nang mabasa ko ang resulta ng pagsusuri sa akin ng doktor. No! It can't be. Oo nga't hindi ko pinagsisihan na ibinigay ko ang virginity ko sa lalaking iyon isang buwan na ang nakalilipas ngunit hindi ko inasahan na magbubunga ang isang gabing pagiging wild ko.

"Congratulations, because you're three weeks pregnant," nakangiting bati sa akin ng doctor. Masaya siya para sa akin ngunit hindi nito alam na labis ang pag-aalalang nararamdaman ko ngayon dahil sa aking natuklasan.

"Are you sure na hindi po kayo nagkamali ng diagnosed sa akin, Dok?" Kahit na malabong mangyari dahil nagdudumilat sa mga mata ko ang katotohanan ay nagtanong pa rin ako sa doktor.

"Yes, I am very sure na buntis ka. Wala kang sakit pero buntis ka," nakangiti pa rin na wika ng doktor. Hindi yata nito napansin ang pagkabahala sa aking hitsura.

Bumisita ako sa hospital at nagpa-check up dahil lately ay marami akong nararamdaman na kakaiba sa katawan ko. Napapansin ko na nagiging madalas ang aking pagkamahiluhin. Nangangasim din ang sikmura ko at palagi akong nagsusuka lalo na sa umaga. Madalas ay tinatamad din akong bumangon at gusto ko lang na matulog. Naaapektuhan tuloy ang trabaho ko bilang isang interior designer sa isang architecture firm, ang Apex Architectural Studio. Kapag kasi nagising ako na masama ang pakiramdam ko ay hindi na ako pumapasok sa opisina dahil baka sa trabaho pa ako biglang mahimatay.

Nang hindi ko na matiis ang nangyayari sa akin ay nagdesisyon akong magpa-check up sa doktor dahil baka may sakit ako. Ngayon lang naman kasi ito nangyari sa akin. Ngunit hindi ko akalain na sa halip na sabihin ng doktor na may karamdaman ako ay malalaman kong buntis pala ako. Ngayon lang sumagi sa isip ko na hindi pa nga pala ako dinaratnan ng buwanang dalaw ko para sa buwan na ito.

Nanghihina ang mga tuhod na naupo ako sa bakanteng upuan sa labas ng opisina ng doktor na tumingin sa akin. Hindi ko namalayan na nakalabas na pala ako sa opisina nito matapos niya akong bigyan ng reseta para sa aking pagbubuntis.

Labis akong nag-aalala sa aking kalagayan. Kapag natuklasan ng aking ama na buntis ako at walang ama na maipakilala sa kanya ay tiyak na itatakwil niya ako o di kaya ay pilitin na ipalaglag ko ang bata sa sinapupunan ko. Hindi ko man gusto na magkaroon ng anak sa mga panahong ito ngunit hindi ko naman maaatim na ipalaglag ang buhay na pumipintig sa loob ng tiyan ko. Pero ano ang gagawin ko sakaling matuklasan ng ama ko na nagdadalan-tao ako?

Mataas ang expectation sa akin ng aking ama, hindi lang siya kundi maging ang halos buong angkan namin. Hindi man kami nagmula sa mayayaman at kilalang angkan ngunit malaki ang angkan na pinagmulan ko.

Ang ama ko ang tumatayong pinuno ng angkan namin. At ipinagmamalaki niya ako sa buong angkan dahil palagi akong kasama sa honor list noong nag-aaral ako. Nagtapos ako bilang summa cum laude sa isang private university kung saan ang kinuha kong kurso ay Bachelor of Science in Interior Design. At mas lalong naging proud sa akin ang aking ama nang pagka-graduate ko ay nakapasok ako sa isang malaking architectural firm.

Hindi lang ang ama ko ang proud sa akin kundi pati na rin ang mga kamag-anak namin. Ang iba kasi sa mga pinsan ko ay maagang nag-asawa at nagka-anak, ang iba naman ay tamad, at ang iba naman ay may trabaho ngunit hindi katulad ko na mataas ang sahod at sa malaking kompanya pa nagtatrabaho.

Matamlay na umuwi ako sa bahay pagkagaling ko sa hospital. Nagtaka ako nang makita ko na abala ang lahat sa pag-aayos ng buong sala na para bang may magaganap na okasyon.

"Anong meron at busy ang lahat?" tanong ko kay Adela, ang katulong namin na halos kasing-edad ko ngunit mas matanda pa sa akin ang hirsura dahil stress sa asawa't mga anak.

"Nakalimutan mo na ba na mamayang gabi ang engagement party ni Rina at ng kanyang fiance na si Congressman Evo Mondragon?" paalala nito sa akin.

Bahagyang natampal ko ang aking noo. Tama siya. Nakalimutan ko nga ang bagay na iyon. Paano ko ba nakalimutan ang engagement ng aking half-sister gayong halos araw-araw niyang ipinagmamayabang sa akin ang guwapo at mayaman nitong fiance?

Si Rina ay ang nag-iisa kong half-sister. Namatay ang mother ko pagkatapos akong ipanganak at pagkalipas ng tatlong taon ay muling nag-asawa ang ama ko. Iyon na ang ina ni Rina, si Minerva, na itinuring kong sariling ina kahit na hindi maganda ang trato sa akin.

Nagseselos kasi si Minerva dahil sa magkaiba raw kung itrato kami ni Raina ng ama namin. Favorite daw ako ng ama ako kahit na hindi ko iyon maramdaman. Mahigpit nga sa akin ang ama ko at hindi katulad kay Rina na anuman ang gusto nito ay ibinibigay agad niya. Samantalang ako, kapag may hiningi sa ama sa kanya ay kailangan ko pang maghanda ng very convincing na paliwanag para pagbigyan lang niya ang gusto ko. Kaya hindi ko maintindihan kung saan nanggagaling ang selos ng aking madrasta at half-sister.

"Magpapahinga lang ako sa kuwarto. Kapag hinanap nila ako sabihin mo na masama ang pakiramdam," bilin ko kay Adela bago ako umakyat sa hagdan para magtungo sa silid ko.

Pagkapasok ko sa silid ko ay agad akong nahiga sa kama ko nang hindi nagpapalit ng damit. Inaatake na naman ako ng antok kaya agad akong nakatulog at hindi namalayan ang paglipas ng oras. Nagising na lamang ako dahil sa malakas na pagsarado sa pintuan ng aking silid. Pagmulat ko ay nasa paanan ng kama ko si Rina at matalim ang tingin habang nakatingin sa akin.

"Bakit hindi ka pa nakabihis ng maayos na damit, Raina? Alam mo naman na engagement party ko ngayon. Dapat nasa akin ang center of attention because this is my night but you ruined it as always. Kanina pa kami naghihintay sa paglabas mo sa silid mo. Hindi ko magawang ianunsiyo sa mga bisita ang tungkol sa nalalapit na kasal ko kay Evo dahil gusto ni Daddy na present ka kapag mag-announce na ako para bang ikaw ang ikakasal at hindi ako," mahabang talak ng halfh-sister ko.

Saka ko lang napansin na nakasuot na pala siya ng evening gown at magandang-maganda ang hitsura niya.

"I'm sorry. Napagod ako kaya nakatulog ako ng matagal," paumanhin ko sa kanya. "Magbibihis lang ako ng dress at bababa na ako agad."

Bumaba ako sa kama at lumapit sa aparador para kumuha ng damit na angkop sa okasyon.

"Ano ba itong inasikaso mo at umalis ka pa ng bahay sa halip na tumulong sa pag-aayos ng sala?" tanong ni Rina. Paglingon ko sa kanya ay biglang nanlaki ang mga mata ko nang makita kong hawak niya ang envelope na naglalaman ng aking pregnancy result. Mabilis akong napatakbo palapit sa kanya para agawin ang envelope ngunit mabilis niya itong naiiwas sa akin.

"Huwag mong pakialaman iyan," natatarantang sigaw ko sa kanya. Sa naging reaksiyon ko ay mas lalong nagpursige si Rina na makita kung ano ang laman ng envelope hanggang sa nagtagumpay itong mabasa ang aking pregnancy result.

"Y-You're pregnant, Raina?" nanlalaki ang mga matang bulalas ni Rina.

"Please, huwag mong sabihi kay Daddy ang natuklasan mo, Rina," nakikiusap ang boses na sabi ko sa kanya. Hindi ako natatakot na itakwil ni Daddy, ang mas ikinatatakot ko ay ang posibleng gawin niya sa baby na nasa tiyan ko.

"Sino ang ama ng ipinagbubuntis mo? Nasaan ang ama ng batang iyan?" tanong ni Rina matapos makabawi sa pagkabigla. Nang hindi ako sumagot ay bigla itong natawa. "Walang ama ang batang nasa tiyan mo? You're really great, Raina. Kailangan itong malaman ni Daddy."

"Anong ibig sabihin ni Rina na buntis ka at walang ama, Raina?"

Sabay kaming napatingin ni Rina sa may pintuan nang marinig namin ang malakas at galit na boses ng aking ama na nakatayo sa bukas na pintuan. Bakas sa mukha nito ang matinding galit at pagka-sorpresa.

Dahil natagalan si Rina sa aking silid kaya siguro umakyat na ito para tawagin kami at nagkataong narinig nito ang sinabi sa akin ni Rina.

"Dad! Evo!" Lumapit si Rina kay Daddy at sa lalaking kasama nito na nasa gilid pala ng pintuan.

Para akong natuka ng ahas nang makilala ko ang mukha ng fiance ni Rina. Pinaglalaruan yata ako ng tadhana dahil ang lalaking naka-one-night-stand ko at ama ng batang nasa tiyan ko at ang fiance ng aking half-sister ay iisa!