6. TLBAHM

[Amelia]

TINITIGAN niya ang mukha nito. Marami na siyang nakita na may pilat sa mukha pero hindi naman ganito, bakit gano'n? Parang hindi naman 'to pumanget. Kahit siguro tubuan ito ng pigsa sa mukha ay gwapo parin.

Napailing nalang siya. Kung ano-ano na naman ang naiisip niya. Dapat ay umalis na siya sa kinatatayuan dahil baka mamaya ay makita pa siya nito at magalit na naman sa kanya.

'Di yari na naman siya.

Akmang aalis na siya sa pagsilip ng marinig at nakita niya ang malakas na pagmumura nito.

"Damn this nightmare!" Kasabay no'n ay ang pagbato nito ng baso banda sa kinatatayuan niya.

Muntik na siyang mapasigaw sa gulat, mabuti nalang at mabilis niyang natakpan ang bibig niya dahil kung hindi ay tiyak na malalaman ng amo niya na narito siya sa kusina at nakatingin rito.

"Fuck! Fuck! Fuck!" Muling nagmura ito ng malakas.

Muli niya itong sinilip. Napalunok siya ng makita kung ga'no kadilim ang mukha nito. Parang galit na galit ito at handang manakal anumang oras.

Dahil sa takot na baka siya ang masakal nito sa oras na makita siya ay nagmamadali siyang umalis para bumalik sa kwarto niya. Mahirap na, baka mabali pa ang leeg niya dahil sa galit nito. Tiniis niya ang uhaw niya at humiga nalang. Bukas nalang siya iinom ng tubig, pati ang bubog sa sahig ay bukas nalang din niya lilinisin. Baka kasi mamaya pagpunta niya sa kusina ay naro'n pa ang amo niya.

Mahirap ng maputukan ng galit.

Hinawakan niya ang sariling leeg at saka marahas na lumunok. Ngayon ay nasisiguro na niya na nakakatakot nga ang amo niya.

PAGKAGISING niya ay nilinis niya agad ang bubog na nagkalat sa sahig. Natigilan siya ng makita na may bakas ng dugo sa pader.

Kinabahan siya.

Bakit may dugo? Bigla ay na-imagine niya na may inuuntog ang amo niya sa pader na 'yon kaya may dugo. Sa takot niya ay namutla siya at pinagpawisan.

Pero wala naman ibang tao rito maliban sa kanilang dalawa. Hindi kaya sarili nito ang inuntog?

Pinilig niya ang ulo.

Sino naman ang tanga na gagawa no'n? Napabuga nalang siya ng hangin. Wala na siyang pake kung kanino at saan galing ang dugo na 'yon, ang importante ay hindi sa kanya 'yon.

Matapos maglinis ay nagluto na siya para sa almusal ni Sir Damon. Habang naghihintay na matapos itong kumain ay kumain narin siya.

Nagtataka na tiningnan niya ang pagkain na hinain niya ng makita na walang bawas 'yon kahit kaunti. Parang hindi nagalaw alin man sa mga 'yon. Walang bakas na bumaba ang amo niya.

Hindi kaya may sakit ito? O wala lang talaga itong gana na kumain ngayon?

Nagkibit-balikat nalang siya. Kung kumain man ito o hindi ay wala na siyang pake ro'n. Kasambahay lang siya at wala siyang karapatan na mangialam sa bagay na 'yon.

Natapos niya na lahat ng gawain niya bago mananghalian. At tulad ng umaga ay wala na naman bawas ang mga pagkain na hinain niya rito para sa tanghalian.

'Ang mayaman nga naman, hindi nanghihinayang sa pagkain na nasasayang' Aniya sa isip niya habang nililigpit ang mga pagkain na dapat ay sa amo niya.

Dahil sa pagkabagot ay naglibot muna siya sa paligid. Walang sinabi si Miss Neil na hindi siya pwede na maglibot sa paligid, sa ikalawang palapag ay tuwing sabado lang siya pwedeng umakyat, sa dining area naman ay sa tuwing maghahain lang, 'yon lang ang bilin ng matanda.

Ikatlong araw palang niya sa mansion. At tulad ng inaasahan niya ay napakalawak dito, hindi masusukat ng tingin kung ga'no ito kalawak at kalaki. Lahat ng kagamitan sa paligid ay halatang mamahalin at magaganda ang kalidad, malayo sa mga nakita na niya no'n.

Nagningning ang mata niya ng tumingala at naggagandahang chandelier ang bumungad sa mata niya.

Sa paglilibot niya ay napunta siya sa isang pinto. May kulay pink na puso sa harap no'n at may nakalagay na—

'DO NOT DISTURB THE PRINCESS OF THIS HOUSE'

Ito marahil ang kwarto ng kapatid ng amo niya. Pumihit siya paharap para umalis na, gano'n nalang ang gulat niya ng bumangga ang mukha niya sa matigas na bagay.

Masakit ang ilong na napangiwi siya, pero agad din nawala ang ngiwi sa mukha niya at napalitan ng takot ng makita ang mukha ng amo niyang lalaki na madilim ang mukha na nakatingin sa kanya.

Napa-atras siya at ilang beses lumunok. Galit na galit ang mukha nito habang nakatingin sa kanya na para bang may nagawa siyang hindi nito nagustuhan, napansin din niya ang kamay nito na may benda.

"What are doing here idiot?"

Idiot? Tanga ang ibig sabihin no'n diba?

Binasa niya ang labi dahil tila nanuyo 'yon sa kaba niya. Ang dibdib niya ay malakas ang kabog dahil sa klase ng tingin nito sa kanya ngayon.

Ngayon na yata talaga siya masasakal!

Napaigik siya ng hawakan siya nito sa dalawang balikat at malakas na itulak sa pinto na nasa likuran niya.

"Aray ko naman po Sir!" Malakas siyang napadaing. Pakiramdam niya ay nadurog ang mga buto niya sa ginawa nito.

"Anong ginagawa mo ditong bobita ka? Sinong nagsabi na pwede ka pumunta sa lugar na 'to?" Nagniningas ang mga mata na tanong sa kanya ng amo niya habang nakayuko at nakatingin sa kanya.

Napansin niya sa kabila ng galit sa mga mata nito ay malungkot 'yon.

Napakasakit ng hawak ng amo niya sa balikat niya. Sigurado siya na mag-iiwan ng marka ang hawak nito do'n dahil bukod sa malaki ang kamay nito ay malakas pa 'to at malaking tao. Kailangan pa nga niya na tumingala para lang makita ang mukha nito.

"Sir, napadaan lang po ako dito. Promise po." Kabadong sagot niya. "H-Hindi po ako pumasok d'yan sa kwartong 'yan." Dugtong pa niya kung ito ang gusto nitong marinig.

"Get out." Maanghang na sabi nito at saka siya binitiwan.

Mabilis na tumakbo siya paalis at nagmamadaling pumasok ng kwarto. Hindi naalis ang sakit sa balikat niya kahit binitiwan na siya ng amo niya. Pakiramdam niya ay naiwan ang malaki nitong kamay sa balikat niya at nakadiin parin dahil masakit parin 'yon.

Malungkot na tiningnan niya sa salamin ang balikat na may pasa. Tama nga siya, nagmarka ang ginawa ng amo niya sa kanya. Maging ang likuran niya ay masakit din.

"Tiis lang, Amelia. Kaya mo 'yan!" Aniya sa sarili. Natigilan siya ng maalala ang kamay ng amo niya na may benda.

Galing ba sa kamay ng amo niya ang dugo na nakita niya sa pader? Sinuntok nito ang pader?

Pero bakit?