Chapter 6

Aleya's POV

Bago pa lumapat ang mga labi ni Enrique sa aking mga labi ay agad ng bumalik sa tama ang aking pag-iisip. Iniuntog ko ng malakas ang aking noo sa noo niya pagkatapos ay mabilis akong bumangon mula sa pagkakadagan sa katawan niya. Mabilis akong tumalikod at naglakad palabas sa kuwarto niya. Hindi pa ako tuluyang nakakalabas sa kuwarto niya nang bigla akong mapakunot ng noo. Weird yata na hindi man lang nag-react si Enrique sa ginawa ko. Sa ugali niya ay tiyak na nakatanggap na ako ngayon ng hindi magagandang salita ngunit ngayon ay tila tahimik yata ito. Nilingon ko siya para makita kung ano ang ginagawa niya. Bigla akong kinabahan nang makita kong nakapikit ang kanyang mga mata habang walang katinag-tinag sa higaan na para bang hindi na ito humihinga.

"What the heck! Did I killed him with just a simple head bang?" kausap ko sa aking sarili. Agad akong lumapit sa kanya at dinama ang kanyang leeg habang itinapat ko naman ang aking tainga sa ibabaw ng kanyang dibdib. Nakahinga ako ng maluwag nang marinig kong tumitibok pa naman ang kanyang puso. Mukhang nakatulog lamang ito dahil sa ginawa ko at dahil na rin siguro sa kalasingan. Medyo nasobrahan din yata ang lakas ng pagkakauntog ko sa aking noo sa kanyang noo. Sa akin ay wala lang iyon ngunit sa katulad nitong hindi sanay sa ganoong klaseng sakit ay posibleng mahimatay talaga ito lalo pa at nakainom ito ng maraming alak.

Akmang aalis na ako nang bigla na lamang yumakap ang isang kamay ni Enrique sa aking leeg at pagkatapos ay humaplos pababa sa aking likuran. Agad na uminit ang aking dugo sa kanya. Kahit na natutulog ito ay babaero pa rin. Siguro ay nananaginip ito na may babae kasama at hinahaplos ng kamay nito. Sinuntok ko ng malakas ang dibdib niya at dali-dali akong lumayo sa kanya. Ngunit siniguro ko na ang suntok na pinakawalan ko ay hindi niya ikamamatay kundi sapat lamang para makadama siya ng sakit. Inayos ko ang aking sarili pagkatapos ay inirapan ko ang natutulog na binata bago tuluyang lumabas sa silid niya.

Pagkapasok ko sa silid ko ay kinuha ko sa itim na lagayan ang isang maliit na chip. Ito ay tracking device na nakakakonekta sa aking cellphone. Ilalagay ko ito sa likuran ng relo ni Enrique para kapag natakasan niya ako ay malalaman ko agad kung nasaan siya. Bitbit ang dalawang maliliit na tools at cellphone ay muli akong bumalik sa silid ni Enrique. Masarap pa rin ang tulog nito. Perfect time para maisakatuparan ko ang paglalagay ng tracking device sa relo niya. Ilang minuto lamang ay maayos kong nailagay sa likuran ng relo niya ang maliit na tracking device pagkatapos ay chineck ko sa cellphone ko kung gumagana ba. Napangiti ako ng makita kong gumagana ng maayos ang device na inilagay ko sa kanyang relo. Pagkatapos ay magaan ang loob na lumabas akong muli sa silid niya.

Pagbalik ko sa silid ko ay agad akong naligo para ma-preskuhan ang katawan ko. Tinuyo ko muna ang basa kong buhok bago ako natulog ng mahimbing. Puwede na akong matulog ng mahimbing dahil walang kawala sa akin ang playboy na boss ko.

PAGKAGISING ko ay agad kong tiningnan ang phone ko. Napangiti ako nang makita kong hindi pa rin gumagalaw ang location ng tracking device kaya ang ibig sabihin ay nasa loob pa rin ng silid nito si Enrique. Walang pagmamadali na bumangon ako sa kama at naligo. Nag-enjoy ako sa pagligo kaya medyo natagalan ako. Paglabas ko ng banyo ay muli kong tiningnan ang cellphone ko. Gumalaw na ang tracking device ngunit malapit lang. Ibig sabihin ay naroon pa rin sa loob ng bahay nila ang boss ko. Kapag wala sa paningin ko si Enrique ay kailangang palagi kong i-check ang cellphone ko para malaman ko kung nasaan siya.

Pagkatapos kong magbihis ay lumabas na ko sa silid ko at nagtungo sa kusina para humigop ng kape. Sa kusina ko naabutan ang boss ko na humihigop ng mainit na kape at halatadong kagigising pa lamang. Magulo pa ang buhok nito at gusot ang damit. Ngunit kahit bagong gising pa lamang ito ay hindi ko maipagkakailang guwapo pa rin ito. No wonder na pinagkakaguluhan ito ng maraming kababaihan kahit na alam naman nila ang pagiging matinik nito sa babae. Dahil sa pisikal na anyo nito at siyempre sa wallet nitong makapal.

Basta guwapo kahit bagong gising at hindi pa nakakapaghilamos ng mukha ay guwapo pa rin, naisaloob ko habang nakatingin sa binatang nakakunot ang noo. Marahil ay nagtataka ito kung bakit ako nakatitig sa kanya.

"Bakit ganyan ka makatitig? Naga-guwapuhan ka sa akin, 'no? Sinasabi ko na nga ba't hindi ka immune sa taglay kong kakisigan," nakangising kausap ni Enrique sa akin. Umagang-umaga ay nag-uumapaw ang hangin nito sa katawan.

"Kaya kita tinititigan ay dahil iniisip ko kung naghilamos ka ba ng mukha at nagmumog bago ka lumabas sa kuwarto mo at humigop ng kape. Kahit magsuklay ng buhok ay hindi mo nagawa. Mukha tuloy pugad ng ibon na kinahig iyang buhok mo," nakataas ang kilay na sagot ko sa kanya bago ako naglakad papunta sa kinalalagyan ng electric thermos para magtimpla ng sarili kong kape.

Naningkit naman ang mga mata ni Enrique sa sinabi ko at pagkatapos ay inirapan ang dalawang maid na nasa kusina at hindi napigilang mapahagikhik nang marinig nila ang sinabi ko sa aming amo.

"Anong itinatawa-tawa niyo diyan?" masama ang tingin na sita nito sa dalawang maid.

"Wala po," nagpipigil ng ngiti na magkapanabay na sagot ng dalawang maid. Nagmamadaling naglakad ang dalawa palabas ng kusina para siguro pakawalan ang pinipigil nilang tawa. Ngunit biglang bumalik ang isang katulong at muling kinausap ang binata. "Nasa ibang bansa nga pala ang daddy mo, Sir Enrique. Bago siya umalis ay nagbilin siya sa akin na sabihin sa'yo na huwag ka raw magpasaway kay Aleya. Kapag magpasaway ka raw ay puwede ka raw paluin ni Aleya sa puwit," sabi ng katulong kay Enrique pagkatapos ay natatawang naglakad ito ng mabilis palayo sa amo na lalong naningkit ang mga mata.

"Anong akala niya sa akin bata na puwedeng paluin sa puwit kapag nagpasaway?" umuusok ang ilong na kausap ni Enrique sa sarili nito.

Napailing na lamang ako habang natatawa sa sinabi ng katulong. May basbas mula sa pinakaitaas kaya kapag gumawa ng kalokohan si Enrique ay maaari ko siyang parusahan.

"May lakad ba tayo ngayon, Sir?" tanong ko sa kanya matapos kong makapagtimpla ng kape.

"Wala!" pasigaw nitong sagot sa akin sabay tayo sa kinauupuan. "Ngayong wala rito ang aking ama ay puwede ka ng umalis bilang bodyguard ko, Aleya. Bumalik ka na lamang kapag nakauwi na si Daddy," utos niya sa akin bago naglakad palabas sa kusina bitbit ang kape nito. Agad ko siyang sinundan bitbit naman ang mainit kong kape.

"Hindi ikaw ang nagpapasahod sa akin, Mr. Villareal. Ang daddy mo ang nagpapasahod sa akin kaya siya lamang ang susundin ko. Kapag sinabi niyang umalis na ako bilang bodyguard mo ay ora-orada akong aalis," mariin ang boses at seryoso ang anyo na sagot ko sa kanya.

Huminto si Enrique sa paglalakad at madilim ang mukha na hinarap ako. "Bakit ba ang hirap mong pakiusapan? Kahit na hindi mo ako bantayan ay hindi pa rin mababawasan ang sasahurin mo ngayong buwan."

Napaismid ako sa sinabi niya. Iniisip niyang pera ang dahilan kung bakit ayaw kong sundin ang ipinag-uutos niya sa akin.

"Sorry, Mr. Villareal pero hindi ako tumatanggap ng libreng pera. At uulitin ko sa'yo ang sinabi ko una pa lamang. Hindi ko kagustuhan ang maging bodyguard ng isang playboy na katulad mo. Wala akong choice dahil utos ito sa akin ng aking superior. Getz mo?"

Nakuyom ng kanyang kamao ang binata na tila ba mauubusan na ito ng pasensiya sa akin. "Bakit ba ang hirap mong tanggalin? Ikaw lang yata ang dumi na mahirap ipagpag."

Dumi na mahirap ipagpag? Ang kaal ng mukha niya para sabihing isa akong dumi.

"Mr. Villareal, kung ang tingin mo sa akin ay dumi na mahirap ipagpag ang tingin ko naman sa'yo ay isang latak sa lipunan na dapat mawala," maanghang na sabi ko sa kanya. Siya ang naunang mang-insulto at ibinabalik ko lamang ang ginawa niyang pang-iinsulto at pangmamaliit sa akin. Saka totoo naman ang sinabi ko sa kanya. Latak siya ng lipunan dahil isa siyang playboy. Pinaglalaruan lamang niya ang babae at kapag nagsawa na siya ay basta na lamang itatapon na parang walang halagang laruan.

"How dare you to say that on me!" bulyaw niya sa akin sa malakas na tinig. "Isa ka lang tauhan na pinapasahod ng aking ama kaya wala kang karapatan na pagsalitaan ako ng ganyan!'

"At ikaw, may karapatan ka bang pagsalitaan ako ng mga salitang hindi maganda, Mr. Villareal?" balik-tanong ko sa kanya habang nagpipigil ng aking galit. Dapat kong pigilan ang aking emosyon at baka kung ano pa ang magawa ko sa kanya. "At alam mo ba, Mr. Villareal? Dahil sa pagiging playboy mo ay baka isa, dalawa o higit pang babae ang nasa likuran ng pagtatangka s buhay mo. Gusto ka nilang paghigantihan sa ginawa mong paglalaro sa damdamin nila."

"Hindi mo ako kilala kaya wala kang karapatang pagsabihan ako ng ganyan!" malakas pa tin ang boses na sabi niya sa akin. Akmang sasagutin ko siya nang biglang dumating si Gigi na halatadong kagigising lang din.

"Ano ba iyan, Kuya Enrique? Umagang-umaga ay inaaway mo ang bodyguard mo? Ano ba ang problema ninyong dalawa?" tanong ni Gigi habang nagpapalipat-lipat s aming dalawa ng nakatatanda niyang kapatid ang kanyang mga paningin.

"Kung may lakad ka ay sabihan mo lang ako't nasa paligid lamang ako," seryoso ang mukha na sabi ko kay Enrique pagkatapos ay hinarap ko si Gigi at bahagyang tinanguan bago ako umalis sa harapan ni Enrique na namumula ang mukha sa galit.

"DAMN!" hindi ko napigilan ang mapamura ng mahina habang bumabangon ako sa higaan. Hindi ko sinasadyang makatulog. Late na ako natulog kagabi kaya inantok ako kanina pagpasok ko sa silid ko. Agad kong hinagilap ang aking cellphone para alamin kung umalis ba si Enrique. Nakahinga ako ng maluwag nang makita kong nasa loob pa rin siya ng bahay nila. Mabuti na lang at hindi ito umalis. Kung nagkataong umalis ito at may masamang nangyari rito ay tiyak na ako ang masisisi dahil hindi ko ginampanan ng mabuti ang aking trabaho.

Inayos ko muna ang aking sarili bago ako lumabas sa silid ko. Kumakalam na rin ang aking sikmura dahil kape lamang ang laman ng tiyan ko mula kaninang umaga. Agad akong dumiretso sa kusina para maghanap ng makakain.

"Nagugutom ka na ba, Aleya? Nakapagluto na ako ng tanghalian," nakangiting tanong sa akin ng maid na si Sonia.

"Medyo nagugutom na nga ako, eh. Si Mr. Villareal kumain na ba?"

Biglang nalukot ang mukha ni Sonia kaya nagtaka ako kung bakit ganito ang kanyang ekspresyon na tila ba may hindi ito nagustuhan.

"Nasa swimming pool si Sir at may kasamang babae na sobrang arte. Masyadong demanding. Nagpaluto ng sarili niyang pagkain tapos ang daming request. Huwag lagyan ng ganito, ganyan. Dapat ganito, ganyan. Hay naku. Nakaka-highblood ng babaeng iyon. Ayoko ngang pagsilbihan siya ngunit wala akong choice kasi kailangan kong dalhin sa kanila itong pinaluto niyang pananghalian nila ni Sir," himutok ni Sonia na sa sobrang inis yata sa kung sino mang babaeng kasama ni Enrique ay hindi napigilan ang maglabas ng sama ng loob.

"Ako na lang ang magdadala nitong tanghalian nila," pagboboluntaryo ko.

"Sigurado ka, Aleya? Baka pagtripan ka ng babaeng iyon lalo pa at mas maganda ka kaysa sa kanya. Tiyak na pagseselusan ka niya," nag-aalala ang boses na sabi ni Sonia.

"Don't worry. Ako ang bahala sa sarili ko," pagbibigay ko sa kanya ng assurance. Hindi ko na hinintay ang sagot niya at kinuha ko na ang isang tray na puno ng pagkain pagkatapos ay naglakad ako palabas ng bahay para ihatid ang pananghalian nina Enrique at ng babaeng bisita nito sa may swimming pool. Hindi pa ako nakakalapit sa kanila ay dinig na dinig ko na ang maharot na hagikhik ng babaeng kasama ng binata na para bang kinikiliti ito sa singit.

Nakita kong naghaharutan sila sa tubig ngunit nagkunwari akong hindi ko sila nakita. Tuloy-tuloy lamang akong naglakad papunta sa maliit na mesang nasa tabi ng pool at inilapag ang dala kong tray. Saka pa lamang ako napansin ng dalawa nang tumunog ang paglalagay ko ng tray sa mesa.

"Bakit ikaw ang nagdala niyan? Nasaan si Sonia?" nakakunot ang noo na tanong sa akin ni Enrique.

Hindi ko na siya nagawang sagutin dahil lumingon sa akin ang babaeng kasama nito na agad naningkit ang mga mata nang makita at mamukhaan ako. Tiyak na aawayin niya ako. Hay naku. Katatapos ko pa nga lang makipagsagutan kanina kay Enrique ngayon naman ay mapapalaban akong muli sa girlfriend niya.