Chapter 5

"Mga pakialamero!" galit na sigaw ng lalaking nasa ibabaw kanina ng katawan nang kapatid ni Enrique. Matapos makatayo mula sa pagkakahulog sa kama ay dinampot nito ang isang di-kalakihang lampshade at dinaluhong si Enrique na nananatiling nakayakap pa rin sa kapatid na babae. Ngunit mabilis na nakailag ang binata at  hinila ako sa braso pagkatapos ay itinulak papunta sa harapan nito nang akmang muli na naman ihahataw dito ng lalaking kaharap nito ang hawak na lampshade.

Nagulat ako sa ginawa ni Enrique. At ginawa pa talaga akong pangharang sa kanya. Napaka-ungentleman talaga ng kumag na ito. Mabuti na lang at mabilis akong kumilis kaya nasalag ko ang lampshade at binigyan ng isang malakas na sipa sa sikmura ang lalaki. Tumilapon ito pahiga sa ibabaw ng kama habang namimilipit sa sakit.

"Nice kick," puri sa akin ni Enrique ngunit nang-iinis naman ang tono at ang paraan ng pagkakangiti niya sa akin. Inirapan ko lamang siya at nagpatiunang lumabas sa silid na iyon. Agad namang sumunod sa akin ang magkapatid at iniwan ang lalaking hindi pa rin makabawi sa sakit na nararamdaman.

Ito ang kakaibang katangian ko kaysa sa ibang mga babae pulis. Malakas ang aking sipa at suntok  kumpara sa kanila. Madalas nga ay tinutukso ako ng mga kasamahan kong pulis na malakas daw akong sumipa na parang kabayo. At hindi raw pang-babae ang suntok ko. Tinatawag din nila akong small but terrible dahil sa height kong five inches and four feet tall ay kaya kong patumbahin ang isang lalaking six footer. Hindi naman ako naaasar kapag tinutukso nila ako ng ganyan dahil para sa akin ay advantage ko iyan. Kaya kong lumaban sa mga kalaban ko dahil sa aking liksi at lakas na hindi pang-babae.

"Bakit ka sumama sa lalaking iyon na pumasok sa motel, Gigi?" galit na sita ni Enrique sa kapatid nang makabalik na kami sa loob ng kotse nito.

"Ikaw ba ang bagong bodyguard ni Kuya Enrique?" nakangiting tanong sa akin ni Gigi sa halip na  sagutin ang tanong ng kuya nito. "Ang cool mo kanina. Ang lakas ng sipa mo. Ni hindi man lang nagawang makabangon ni Alfonso sa sobrang lakas ng pagkakasipa mo sa kanya," ani pa ni Gigi. Halatado sa mukha ang paghangang nararamdaman para sa akin.

"Kinakausap kita, Girly Gina," mariing wika ni Enrique. Totoong galit na ang hitsura nito kaya biglang napayuko ang kapatid nito. Mabilis ko namang pinasibad palabas ng garahe nang motel ang kotse.

"Malay ko ba na lalagyan niya ng pampatulog ang juice na ibinigay niya sa akin. Nagdi-discuss lamang kami sa loob ng coffee shop tungkol sa thesis namin tapos bigla akong nakaramdam ng antok. Nang magising ako ay buhat-buhat na niya ako at nasa loob na kami ng motel. Mabuti nga at nakita ko pa ang number ng kuwarto na pinasok namin saka nai-share ko sa'yo ang location ko dahil nagpanggap pa rin akong tulog habang may kinakausap naman siya sa kanyang cellphone," mahabang paliwanag ni Gigi sa nakatatandang kapatid.

"Sa susunod ay siguraduhin mong mabuting tao ang sasamahan mo para hindi ka mapapahamak, okay?" sermon pa rin ni Enrique sa kapatid.

"Yes, Kuya," nakayukong sagot nito. Mayamaya ay biglang umangat ang ulo nito at nakangiting tiningnan ako. "Himala yata na babae ang bodyguard ngayon ni Kuya. Kapag pinasakit niya ang ulo mo ay patikimin mo ng suntok. Lahat ng mga nagiging bodyguard niya ay natatakot sa kanya kaya natatakasan niya kaya sana ay hindi ka matakot sa kanya. Ipakita mo na magaling ka at kaya mo siyang i-handle."

Napailing na lamang ako sa bilis ng pagbabago ng kanyang mood. Hindi ko rin naiwasang mapangiti sa kanyang sinabi. Talagang makakatikim sa akin ang kuya niya kapag masyado niyang pinasakit ang aking ulo.

"Shut up your mouth kung ayaw mong makarating kay Daddy itong nangyari  sa'yo," nandidilat ang mga matang saway ni Enrique sa kapatid na biglang nanahimik sa kinauupuan nito.

Hanggang sa makabalik kami sa bahay nila ay naging tahimik ang loob ng kotse. Pagkapasok naming tatlo sa loob ng bahay nila ay nginitian ako ni Gigi.

"Fighting!" malawak ang pagkakangiting sabi sa akin ni Gigi bago nagtatakbo paakyat sa silid nito. Napangiti na lamang at napailing habang sinusundan siya ng tingin. Mukhang magkakasundo kami ng kapatid ni Gigi. Hindi katulad ng kuya nito na mukhang araw-araw yata kaming magbabangayan. Akmang maglalakad na ako papunta naman sa silid ko nang bigla akong hawakan ni Enrique sa aking siko.

"Saan ka pupunta?"

Pinaikot ko muna ang eyeball ko bago ko sinagot ang obvious niyang tanong. "Saan pa ba ako pupunta kundi sa silid ko, Mr. Villareal? Gabi na at oras na ng pagtulog kaya ano pa ba ang gagawin ko? Don't tell me na may balak ka pang lumabas ngayon?" inis ang boses na tanong ko sa kanya. Wala yatang balak ang lslaking ito na papagpahingahin ako.

"Hindi ako nag-enjoy sa bar kaya samahan mo akong uminom," utos niya sa akin. Bago pa ako makatanggi ay mabilis na niya akong nahila papunta sa loob ng kuwarto niya.

"Ano na naman bang kalokohan ang binabalak mo, Mr. Villareal? Binabalaan ki—"

"Relax, Aleya. I just want you to join me drinking my wine," naiiling na wika ni Enrique. Kumuha ito ng isang bote ng mamahaling alak mula sa lagayan nito ng mga alak at nagsalin sa dalawang baso pagkatapos ay ibinigay sa akin.

"Alam ko ang binabalak mo,Mr. Villareal. Lalasingin mo ako para kapag nalasing na ako ay makakatakas ka na sa akin," seryoso ang mukha na sabi ko sa kanya.

"Pangako, hindi ako tatakas, Aleya. Gusto ko lang talagang uminom tayong dalawa," nakatitig sa mukha ko na sabi niya sa akin.

Dahan-dahang lumapit si Enrique sa akin habang may nang-aakit na tingin. Kahit na halos isang dangkal na lamang ang pagitan namin ay hindi pa rin siya tumigil sa paglapit kaya no choice ako kundi ang umatras hanggang sa wala na akong maatrasan.

"Okay. Okay. Iinom na ako kaya puwede bang lumayo ka na sa akin?" natatarantang pagsuko ko. Mukhang hindi niya ako titigilan hangga't hindi ko pinagbibigyan ang gusto niya kaya pagbibigyan ko na siya.

"Iyan ang gusto ko. So, bottoms up tayo. Kung sino ang maunang malasing ang siyang talo," nakangising hamon niya sa akin pagkatapos bahagyang umatras. Nababasa ko sa kanyang mga ngiti na talagang may binabalak siyang hindi maganda.

"Iinom ako ngunit may kundisyon."

"What is it?" nakataas ang kilay na tanong niya sa akin.

Umupo ako sa gilid ng kama pagkatapos ay nagkunwari akong tinatanggap ang hawak niyang baso na may laman na alak. Ngunit sa halip na ang baso ang hawakan ko ay hinila ko ang kamay niya at sa mabilis na kilos ay nagawa kong lagyan ng posas ang kamay niya't ikinabit sa bakal na gilid ng kama nito.

"Ayan. Puwede na tayong mag-inuman," nakangiting sabi ko. Akala yata niya ay maiisahan niya ako. No way! Kinuha ko ang basong nasa isa niyang kamay at pagkatapos ay pinag-pingki sa basong hawak naman ng isa nitong kamay. "Cheers!"

"Damn you, lady! Alisin mo ang pagkaka-posas ng kamay ko ngayon din," mariing utos niya sa akin.

"Sorry, Mr. Villareal. Wala sa akin ang susi kundi nasa loob ng silid ko. Posas lamang ang dala-dala ko palagi," mabilis kong sagot sa kanya pagkatapos ay sumimsim ako ng alak na ibinigay niya. Masarap ang alak at humahagod sa lalamunan ko ang init. Masarap talaga kapag mamahalin ang isang alak.

Napamura na lamang ng malakas si Enrique at walang nagawa kundi ang umupo na lang din sa gilid ng kama nito.

"I admit na naisahan mo ako ngayon. Akala ko ay magagawa kitang lasingin para makatakas ako pero naunahan mo ako," naiiling na wika nito habng may pagsuko sa boses. Inisang lagok lamang nito ang alak at pagkatapos ay inutusan akong kunin ang bote ng alak na nasa mesa para muling salinan ang baso niyang walang laman.

Nasarapan ako sa alak kaya medyo naparami ako ng inom. Kumpiyansa naman kasi ako na hindi magagawang makatakas ni Enrique kaya hinayaan ko ang aking sarili na magpakasarap sa alak.

"Naubos na natin ang laman ng bote kaya pupunta na ako sa aking silid," paalam ko kay Enrique. Umiikot na ang pakiramdam ko dahil sa nainom kong alak kaya kailangan ko ng matulog.

"Sandali lang," mabilis na pigil niya sa akin nang tumayo na ako mula sa pagkakaupo sa gilid ng kama. Hinila niya ako sa braso para muling umupo ngunit biglang napalakas ang pagkakahila niya sa akin. At dahil sa kalasingan naman ay tila wala akong lakas kaya bigla akong bumagsak sa kama kasama ang katawan ni Enrique na biglang napailalim sa katawan ko.

Hindi ko nagawang makabangon dahil ang kamay niyang nakahawak kanina sa braso ko ay nakayakap na ngayon ng mahigpit sa aking katawan.

"B-Bitiwan m-mo ako, E-Enrique," nauutal na sabi ko sa kanya. Shit! Hindi ko alam kumg bakit biglang bumilis ang tibok ng aking puso sa pagkakadikit ng aming mga katawan. Bigla ring nakaramdam ng kakaibang init ang katawan ko. Dala lamang ito ng alak na nainom ko kaya ito ang nararamdaman ko.

"No, Aleya. You're very beautiful," medyo garil ang boses na sabi sa akin ni Enrique. Umangat ang kamay nito at hinaplos ng isang kamay ang aking pisngi. "I want to kiss you," mahina ang boses na wika niya habang unti-unting lumalapit ang mukha niya sa mukha ko.

Nanlalaki ang mga mata ko habang nakatingin sa mukha niya. Napatitig ako sa mga labi niyang mapupula na tila nag-aanyayang halikan ko. My gosh! Ano ba ang nangyayari sa akin? Bakit ganito ang nararamdaman at iniisip ko sa kanya?