Overthinking

Maaga pa lang ay ginising na ako ng aking byenan na babae para tumulong daw sa paghahanda ng almusal.

"May mga bisita ako mamaya kaya kailangan mong tumulong sa pagluluto," sabi nito pagkatapos nilang mag-almusal. Hindi niya ako pinasabay sa pagkain sa kanila, kaya nang umakyat na siya sa kaniyang kuwarto, pinuntahan ko si Lolo upang doon na lang ako kumain.

Nagbabasa ng libro si Lolo kaya hindi din kami makapag-usap. Hinayaan lang din niya ako dito sa kaniyang silid dahil naiintindihan niya ang aking sitwasyon.

Inabot din yata ako ng isang oras dito. Pinahanap lang ako ng byenan ko kaya kailangan kong bumaba at sumunod sa inuutos niya.

Nakasalubong ko pa si Stacey.

"Pupunta ang mga friends ko ngayon, kaya mag-prepare ka ng food and drinks para sa amin. Doon kami sa may pool."

"May inuutos ang Mommy mo, ka—"

Masama niy akong tiningnan. "Hindi ka señorita sa pamamahay na ito. Wala kang karapatang magreklamo kapag inutusan kita."

I sighed and just nod my head.

"Okay." Bumaba na ako. Tumulong ako sa paghihiwa ng mga rekado. Sobrang daming lulutuin kaya madami din akong kailangang hiwain at tadtarin.

"Rosario! Iyong pagkain namin!"

At heto na nga si Stacey. Nakasigaw na. Bakit ba kasi sumabay pa siya sa Mommy niya. Alam naman niya na madaming ginagawa dito. Puwede naman silang mag-order na lang.

"Puntahan mo na muna," nakangiting sabi sa akin ni Tilde.

Bumuntong hininga ako bago binitawan ang hawak kong kutsilyo.

Mahilig sa prutas si Stacey kaya nag-slice ako ng fruits. Ito ang una kong dinala sa kanila sa labas.

"Bakit iyan lang?" agad na tanong ng aking hipag pagkalapag ko ng babasaging bowl.

"Gagawa pa ako sa loob. Gusto niyo ba ng salad?"

"Gusto namin," sabi ng kaniyang mga kaibigan, kaya ngumiti ako at tumango.

"Who is she?"

"Your new maid?" Napaawang ang labi ko.

"She's pretty, huh." Mabuti na lang at bumawi.

"Oo, maid lang namin siya," nakasimangot naman na sagot ng aking hipag na hindi ko na lang kinontra pa. Medyo pagod na din kasi ako.

Pumasok na ako sa loob upang gawin naman ang salad para sa kanila. Gumawa din ako ng sweets, para walang masabi ang babaeng iyon.

Magkaibang-magkaiba sila ng asawa ko. Kung ano'ng bait at kakalmado nito, kabaliktaran nito ang kapatid niyang pinaglihi yata sa sama ng loob.

Habang inaayos ko ang bowl na dadalhin ko sa labas, sumulpot naman ang byenan ko.

"What are you doing? Why are you not helping?"

"Ah... Inutusan po ako ni Stacey na ipaghanda sila ng pagkain."

"Pagkatapos mo diyan, tumulong ka na doon."

"Opo."

Dinala ko sa labas ang salad, saka ako nagmamadalimg bumalik sa kusina upang tumulong para sa handa ng aking byenan.

Tanghali na at pagod na pagod na din ako. Heto nga si Stacey at sumisigaw na naman kaya dali-dali kong kinuha iyong mga pinalamig na drinks sa fridge.

"Mag-order ka ng pizza para sa amin."

"Okay."

Bumalik ulit ako sa loob. Nag-order ako ng pizza at habang hinihintay, tumulong ulit ako sa pagluluto.

Kaso nang dumating ang pizza ni Stacey, ako pa ang pinagbayad niya kaya umakyat ulit ako sa aking silid.

Pagod na pagod ako. Natuyuan na din ako ng pawis. At nang dumating ang mga bisita ng aking byenan, pinaakyat niya ako sa aking kuwarto ng hindi man lang pinapakain.

Alas-siete na ng gabi. Hindi pa ako kumakain ng lunch. Gutom na gutom na ako at sobrang sakit na din ng aking katawan.

Naligo ako at hinintay na tumawag ang aking asawa. Nasa hotel na siya ngayon. Katatapos lang din niyang maligo.

"Hi, honey..."

"I miss you," masuyo at halos bulong niyang sambit habang titig na titig sa screen ng kaniyang phone.

"Miss na din kita."

Humikab ako. "Inaantok ka na?"

"Oo." Hindi ko naman maaring sabihin na napagod ako. Ayaw kong sabihin na ginagawa akong katulong ng kaniyang kapatid at ina.

Nag-usap pa kami ng ilang minuto bago siya nagpaalam. Ilang oras na akong nakatulog nang magising ako dahil sa katok mula sa pintuan.

Alas-dos na ng madaling araw.

"Bakit, Tilde?"

"Eh, sabi ni Ma'am, tumulong ka daw sa paglilinis at pagliligpit."

Huminga ako nang malalim. Bigyan niyo po ako ng mahabang pasensya. Hindi pa man din ako matiyagang tao, natuto lang ako mula nang lumuwas ako dito sa Manila.

"Sige po." Sobrang daming hugasin. Ang dami ding dapat linisin. Sumabay pa ang pool na puno ng kalat. Nag-party daw sina Stacey kanina.

Alas-singko na ako nakaakyat sa silid naming mag-asawa. At alas-siete ginigising na naman nila ako, dahil may utos daw ang byenan ko.

"Ano po iyon?"

"Dalhin mo ito sa condo ng kumare ko," utos niya sa akin.

"Sige po." Nagbihis na muna ako. Sumakay ako sa taxi dahil may pupuntahan daw sila kaya hindi ako mahahatid ng driver.

Nagpunta ako sa address na sinabi niya sa akin. Nagulat pa ako nang isang lalake ang magbukas ng pintuan para sa akin.

"Pasok ka," sabi ng lalake. Ayaw ko man kaso hinila niya ako. May kukunin din kasi ako sa kaniya kaya pumasok na lang din ako kahit hindi ako komportable.

Inalok niya ako ng juice pero tumanggi ako.

"Huwag na. Asan na iyong pinapakuha ng byenan ko?"

Iba na talaga kasi ang pakiramdam ko.

Nakatitig lang sa akin ang lalake. Napapadila din siya sa kaniyang labi kaya pinili ko na lang na umalis.

Pag-uwi ko ng bahay ay nadatnan ko si Stacey sa living room. Kararating ko lang pero may utos na agad siya.

"Kuhanan mo ako ng juice at cake."

Dumiretso naman ako sa kusina upang kunin ang inuutos niya. Pagbalik ko ay may ka-videocall na siya. Naka-loudspeaker kaya naririnig ko ang usapan nila.

"Hi, sissy! How are you? I miss you na. Nandiyan si Kuya ngayon, ah."

"Talaga? Saan siya nag-stay?"

"Sa Vermont hotel. Puntahan mo siya." Humagikgik ito. Sumama ang pakiramdaman ko sa naririnig ko na usapan ng dalawa.

"Baka ipagtabuyan ako ng Kuya mo." Tumatawa naman ang babae.

"Hindi iyon. Saka first love ka n'on, di ba? Magagawa ba niya iyon sa'yo?"

"Well, tingnan ko. Pero try kong puntahan mamayang gabi."

Nagtawanan sila. Para akong nalulunod sa kanilang tawanan. Sumisikip ang dibdib ko. May hinala ako na ito iyong ex ni Raiden.

Diyos ko po. Ilayo mo po sa tukso ang aking asawa. Huwag mo pong hayaang manaig ang demonyo. Mahal na mahal ko po siya. Huwag mo po sanang hayaan na masira kami.

"Okay, sissy! Bye na!"

Nakangising tumingin sa akin si Stacey.

"Alam mo kung sino iyon?"

"Ex ni Kuya. Pupuntahan daw niya si Kuya sa hotel niya. I want you to overthink. Ma-stress ka at mabaliw sa kaiisip. Isipin mo na lang na pagbalik ni Kuya, makikipaghiwalay na siya sa'yo."

Malakas siyang humalakhak. Sobrang bigat naman ng aking dibdib. Kaya bago pa ako makagawa at makapagsalita ng hindi maganda, tinalikuran ko na si Stacey.