Chapter 7

LINGO ng umaga, walang trabaho kaya umuwi si Yana sa mansiyon. Pinauwi siya ng kaniyang lolo dahil umano makakasama nila sa lunch ang pamilya ni Alexis, kasama rin umano ang lolo nito. Pinasusuot siya ng lolo niya ng magarang damit. Talagang pinaayusan nito ang indoor garden na merong water fountain at doon sila kakain.

“Ano ba ‘yan si Lolo! Para namang kakain kami sa five star hotel at may bisitang royal family!” maktol niya habang inaayusan ng makeup artist na suki nila.

“Ayaw n’yo po ‘yon, para kayong ikakasal sa prinsepe?” sabi ni Dory, ang baklang makeup artist. Nasa walk-in closet sila na karugtong ng kaniyang malawak na kuwarto.

“Ang OA lang ka’mo ni Lolo, hay!”

Natawa si Dory.

“Ganoon po talaga magmahal ang mga lolo sa apo.”

Umismid siya.

Nakasuot na siya ng pink maxi dress. Hindi niya naisuot ang kabibiling dress ng lolo niya dahil maluwag sa kan’ya. Saktong natapos siyang maayusan ay dumating ang mga bisita.

“Ready ka na ba, Apo?” tanong ni Orlando. Sinundo pa siya nito sa kuwarto. Nakasuot na ito ng itim na suit.

“Ready na po!” tugon niya.

Lumabas na siya ng kuwarto at sinalubong ang ginoo. Sinuyod pa siya nito ng tingin.

“Bakit hindi mo sinuot ang kabibili kong damit?” anito.

“Eh, maluwag po sa akin. Magmumukha akong hanger doon.”

Humalakhak ang ginoo. Pagkuwan ay ikinawit nito ang kamay niya sa braso nito. Sabay na silang bumaba ng hagdanan at tumuloy sa indoor garden.

Naghihintay na roon ang mga bisita. Una niyang pinansin si Alexis na naka-black suit din. Katabi nito sa upuan ang ina na naka-gray dress. Sa gawing kanan nito ay ang ginoo na purong puti na ang buhok pero konti lang naman ang kulubot sa mukha. Ito na marahil ang lolo ni Alexis.

“Magandang tanghali po sa inyo!” nakangiting bati niya sa mga bisita.

Lumuklok siya sa silyang hinila ng kawaksi, sa tabi ng kaniyang lolo. Umupo naman siya at tumapat kay Alexis.

“Your granddaughter was adorable, Orlando. She looks like your late son,” ani Delfin.

“Ah, that’s right. And she’s naughty sometimes but a caring girl,” gatong naman ni Orlando.

“I could sense that. Alexis needs a woman like Yana.”

“Hm. I’m not sure if Alexis can adjust to Yana’s nature. They are opposite.”

Umapela ang dalaga. “Ay, that’s true, Lolo! Alexis was cruel to me sometimes!”

Panabay pang tumitig si Alexis at mommy nito sa kan’ya. Pinagdilatan siya ng mga mata ng binata.

Tumawa naman ang dalawang matanda. “That’s not an issue if love bonds them together,” komento ni Orlando.

Hindi nakaimik si Alexis kaya nasiko ng mommy nito sa braso. Saka lamang ito kumibo upang depensahan ang sarili.

“Pasensiya na po kayo kay Yana. She loves bullying me when she can’t get what she wants from me,” ani Alexis.

Siya naman ang nanilat ng mga mata sa binata.

Nagtawanan lang ang matatanda. Pagkuwan ay kumain na sila.

Kalagitnaan ng tanghalian ay binuksan Alessandra ang usapin tungkol sa kasal.

“Napagpasyahan namin ni Alexis na madaliin ang kasal. Maybe Yana is prepared, too. The wedding will be on next Sunday, at gaganapin sa Baguio. It’s a secret wedding,” ani Alessandra.

Hindi natuloy ni Yana ang pagsubo ng pagkain at nanlalaki ang mga matang tumitig kay Alexis. Nakatingin din ito sa kan’ya pero tuloy lang ang pagsubo ng pagkain.

“I agree. Wala naman na tayong hinihintay. Pero paano ang preperasyon ng kasal?” sabi naman ni Orlando.

“I already organized the wedding. Kami na ang bahala sa gastusin at lahat ng kailangan ng bride. May private resort at hotel kami sa Baguio City at doon na rin gaganapin ang seremonya. May nakausap na rin akong pari na magdadaos ng seremonya. Dad agreed with the venue, too.”

“Wala ba tayong ibang bisita sa side ninyo?” ani Orlando.

“Daddy Delfin agreed not to invite Jeo’s family. It would ruin the wedding.”

Napatitig si Yana kay Delfin. Hindi niya akalaing magagawa nitong balewalain ang karapatan ni Jeo sa ari-arian nito. Bigla tuloy siyang naawa kay Jeo.

“Ano, Yana? Ready ka na ba sa nalalapit mong kasal?” pukaw naman ni Orlando sa apo.

Sinipat pa niya si Alexis na tahimik siyang sinipat. “Uh…. nagkasundo na tayong lahat, wala na akong dahilan para patagalin pa ang kasal,” aniya.

“Excited na rin akong makita kayong magkasama sa bahay at hoping na magkaanak kaagad kayo,” sabad naman ni Delfin.

Kamuntik na maibuga ni Yana ang nainom niyang pineapple juice. Hindi siya nakapagsalita nang maunahan siya ni Alexis.

“We don’t need to rush the offspring thing, Grandpa. Yana and I already talked about our future kids, and she’s not ready yet. Bata pa naman kami pareho at gusto kong mag-focus muna kami sa business. Hindi pa gamay ni Yana ang negosyo ng lolo niya kaya tutulungan ko siya,” ani Alexis.

Mahinang tumawa si Delfin. “Excuse my eagerness, everyone. I just want to see you having kids, Alexis. And you know, I love playing with kids. Don’t pressure yourself. Ang mahalaga ay maikasal ka sa babaeng mahal mo at makatutulong sa negosyo natin. Nakikita ko talaga sa ‘yo ang daddy mo.”

“Thank you, Grandpa. Let’s enjoy the food first.”

Tumahimik naman nang nag-focus silang lahat sa pagkain.

Pagkatapos kumain ay nasolo rin ni Yana si Alexis. Marunong itong tumugtog ng piano kaya tumambay sila sa lobby. Ang matatanda ay naiwan sa indoor garden at tuloy ang kuwentuhan.

Lumuklok siya sa tabi ni Alexis at pinanood ang bawat pagtipa ng mga daliri nito sa keyboard ng piano.

“Marunong ka rin bang kumanta?” tanong niya.

“I can, but I don’t like to sing,” anito.

“Nge. May gano’n? Music lang ba ang gusto mo?”

“I just love hearing instrumental music, no voices.”

“Weird. Teka, may gusto akong linawin tungkol sa mana mo. Bakit gano’n ang lolo mo? Ayaw ba niyang bigyan ng mana si Jeo?”

Bumagal ang pagtipa ni Alexis sa keyboard at sinipat niya. “It sounds like you’re concerned about Jeo.”

“Of course, hindi ako selfish. Para kasing one-sided ang lolo mo at may favoritsm. Ang unfair naman n’on. Anak din naman niya ang mommy ni Jeo kahit pa may mali itong ginawa.”

“Hindi unfair ang desisyon ni Lolo. He was just wise. Alam niya’ng mentally unstable ang mommy ni Jeo, at hindi rin magaling sa business si Jeo. Ang gusto ni Lolo ay sa akin mapunta ang rights ng ZT Investment Holdings dahil ang daddy ko naman ang nagpalago nito. Si Lolo lang ang nagtatag ng kompanya, but without my dad’s efforts, the company will not last. Jeo’s mother stole millions from Grandpa, and the money is enough for her shares. Hindi naman matatanggalan ng mana si Jeo. May makukuha pa rin siyang shares at properties, pero hindi ang ownership ng kompanya.”

“Gano’n pala ‘yon. Ang mommy lang pala ni Jeo ang may atraso sa lolo mo, bakit pati siya pinagkakaitan ng karapatan sa kompanya ng lolo mo?”

“You need to understand the history first, Yana. Kailan lang naman nagkainteres si Jeo sa kompanya, noong namatay si Daddy dahil sulsol ng mommy niya. And Jeo will do anything to satisfy his mother.”

Ngumuso siya, hindi pa rin matanggap ang desisyon ng lolo ni Alexis. May simpatiya pa rin siya kay Jeo.

“Kawawa pa rin si Jeo, naiipit sa sigalot ng mommy niya at lolo n’yo,” komento niya.

Mayamaya ay kumislot siya nang biglang lakasan ni Alexis ang pagtipa sa keyboard. Umugong sa tainga niya ang ingay. Nahampas niya sa kanang braso ang binata.

“Ano ba! Ang sakit sa tainga!” angal niya.

“Iyang katigasan ng ulo mo, ‘yan ang magpapahamak sa atin,” anito.

“Excuse me! Hindi ako kasing tigas ng paninindigan mo! Hindi ako ganid. Kung may kapatid nga lang ako, ibibigay ko ang kalahati ng mana ko. Ayaw ko magdamot.”

“Hindi pagdadamot ang ginagawa ko, Yana. I’m just protecting the company from abusive people. Maraming kinukontiyaba ang mommy ni Jeo para pabagsakin kaming mag-ama noon. Pati si Mommy, ginawan na niya ng isyu para magalit ang Dad ko, pero hindi siya nagtagumpay. Hindi mo kilala ang mommy ni Jeo, kaya mag-ingat ka sa kilos mo.”

“Nag-iingat naman ako, eh. Hindi nga alam ng katrabaho ko na fiancee mo ako.”

“But you are still giving Jeo a chance to get close to you.”

“Eh, iniiwasan ko na nga siya. May time lang talaga na ang hirap niyang tanggihan. Hindi naman kasi ako snob kagaya mo. Sanay ako na kaibigan lahat ng tao sa paligid ko. Ayaw ko ng gulo.”

“Kung ayaw mo ng gulo, manahimik ka sa isang tabi.”

“Paanong manahimik?”

“Ignore the threat. Once kasal na tayo, lilipat ka na sa bahay ko. Lilipat ka rin ng department sa kompanya, iyong hindi kayo basta magtagpo ni Jeo.”

“Ano? Bakit ikaw ang masusunod? Sinabi ko kay Lolo na ayaw ko ng nasasakal ako! Kung hihigpitan mo ako, aba! Hindi ako papayag!”

Napabuga ng hangin si Alexis at tumayo. “I already talked to your grandpa about our setup. You can still live free, but you must know your limitations.”

Napangiwi siya. “Kaya kong panindigan na walang makaaalam na mag-asawa tayo, pero huwag mo akong diktahan sa mga gagawin ko! Ibang usapan ‘yon, Alexis!”

Tinalikuran na siya ng binata at hindi man lang kumibo.

Tumayo na rin siya at sumunod kay Alexis pabalik sa indoor garden. Nakabuntot siya rito kaya nang bigla itong huminto ay bumalya siya sa matigas nitong likod.

“Aw!” daing niya nang masaktan ang noo. Hinipo niya ito ngunit mayamaya ring natigilan.

Naaktuhan nila ang seryosong usapan ng matatanda. Nakaupo pa rin ang mga ito sa harap ng lamesa kasama si Alessandra.

“Ipagkakatiwala ko si Yana kay Alexis. Hindi ko alam kung hanggang kailan ko kakayaning labanan ang sakit ko. Natutuwa ako dahil naisip ng apo ko na mapakasal. Hindi na ako mahihirapan at mag-aalala para sa future niya,” sabi ni Orlando.

“Huwag po kayong mag-alala, Sir. Gagabayan ko rin si Yana at ganoon din si Alexis,” sabi naman ni Alessandra.

Napakapit si Yana sa kanang braso ni Alexis. Aware siya na naoperahan na sa puso ang lolo niya, pero wala itong update kung kumusta na ang kalusugan nito. Akala naman niya ay wala na itong malalang sakit.

“May sakit pa ba si Lolo na hindi nasasabi sa akin?” aniya. Bigla na lamang nanikip ang kaniyang dibdib.

“You should talk to your grandfather about his health, Yana,” ani Alexis.

Nanubig na ang kaniyang mga mata habang nakikinig sa usapan ng matatanda.