Lover 1

"Ino, nasaan ka ba? Tulungan mo nga ako dito! Andaming customer dito hindi ka man lang tumulong!?"

Mula sa kusina ay dinig na dinig ko ang pagbubunganga ni tita Hilde sa labas. Hindi ko tuloy mapigilang hindi mapairap sa hangin. Halos kadarating ko lang mula sa eskwelahan nang utusan agad niya akong maghugas dito tapos ngayon ay hahanapin niya ako. Ni hindi na nga ako nakapagpalit ng damit dahil dito na ako dumiretcho. Napahugot nalang ako ng buntong hininga. Wala yatang araw na hindi ako binungangaan ni tita. Kung sabagay, maliit pa lamang ako ay ganoon na siya kabungangera. Ano pa nga ba ang aasahan ko? 

"Andyan na po!" Sagot ko. Kailangan kong sumagot kung hindi ay lalo niya akong pagagalitan pag hindi niya ako narinig.

Mabait naman si tita Hilde. Sa totoo lang ay siya pa nga ang nag-volunteer na kupkupin ako noong mamatay ang mga magulang ko. Wala kasing may gustong kumupkop sa akin ng mga panahong iyon. Kaya rin siguro napilitan nalang din siya. Bata pa rin kasi ako ng mga panahong iyon at nasa sampung taong gulang pa lamang. At kahit na labing apat na taon na ang nakalilipas ay tandang-tanda ko pa rin kung paano nila ako pinagturo-turuan noong mga panahong na iyon. Labis na hinanakit ang naramdaman ko noon sa kanila. 

Awang-awa ako sa sarili ko ng mga panahon ngayon. Naiisipan ko na nga rin maglayas noon kaya lang ay wala naman akong sapat na pera. Gusto ko na rin ngang tanungin ang sarili ko kung pangit ba ako kaya ayaw nila sa akin pero noong mga panahong nabubuhay pa ang mga magulang ko ay halos abot-abot ang pagpuri nila sa akin. Na kesyo maganda daw ako, na mukha daw akong manika, tapos ngayong wala na ang mga magulang ko ay tila ba mayroon akong nakakahawang sakit na kulang nalang ay ipagtabuyan na nila. Pakiramdam ko pa nga ay para ako iyong sa koreanovela na isang malakas na tulak na lang at swak na swak na sa eksena ng bidang inaalipusta.

Kaya nga noong isama ako ni tita Hilde dito ay hindi na ako nagreklamo. At kahit na ganitong pinagtatrabaho niya ako ay ayos na rin. Malaking pasasalamat ko na din na kahit may hindi kagandahan ang ugali ni tita ay hindi niya ako pinababayaan. Pinag-aaral niya din ako at awa ng Diyos, ngayon ay graduating na sa kursong office management. Kaya hindi rin ako makareklamo sa tuwing uutusan o pagagalitan niya ako.

Nahirapan pa nga ako noong una dahil sa totoo lang ay hindi ko naranasang magtrabaho ng mga gawaing bahay. Noon kasi ay may kakayahan ang mga magulang ko na kumuha ng katulong kaya't hindi rin ako naturuan ni mama ng mga gawaing bahay. Kaya abot-abot din ang sermong inabot ko noon kay tita Hilde dahil sa dami ng mga nababasag kong pinggan. Buong akala ko nga ay palalayasin na niya ako pero hindi naman nangyari. 

"Ino Salve!?"

Wala sa loob na napaurong ako pagkarinig sa muling pagsigaw ni tiya. Dali-dali kong iniwanan ang mga hinuhugasan ko at lumabas ng kusina. Nagpupunas pa ako ng kamay sa kulay pink na hello kitty kong apron nang tuluyan akong nakalabas ng kusina at bumungad agad sa akin ang kumpulan ng mga empleyadong suki ng canteen na ito. Nakapagtataka nga na sa dinami-rami ng mga restaurants at fast foods sa paligid ay patuloy pa ring dinadagsa ang munting canteen ni tiya. At karamihan sa mga suki niya ay mga empleyado ng iba't ibang kumpanyang nakapaligid sa lugar. 

Una kong nakita si Kit na dala-dala ang mga pagkaing order ng isang grupo di kalayuan sa akin. Halos kaedad ko lamang ito, matangkad siyang lalaki, may itsura at working student, si Deborah naman ay kumukuha ng orders habang walang tigil ang pagpapa-cute sa mga lalaking customers. Kasing edad ko rin pero napakaraming kaartehan sa katawan, mataray, at laging may makapal na make up. Di ko tuloy malaman kung dito ba talaga sa sizzlingan ang pasok nya o sa night club. Sabagay, hindi naman siya sinisita ni tita kaya pinababayaan ko nalang din. Naroon din si Shaira na siyang pinakabata sa lahat, isa din sa tauhan ni tita na hindi rin magkandatuto kung saang lamesa ibababa ang mga pitsel at basong dala. 

Sa kabilang dulo ay naroon matandang babae na kanina pa bunganga ng bunganga katatawag sa akin habang kumukuha ng orders ng mga bagong dating na customers. May kaunti na ring puti sa buhok nito, nakasuot ng asul na t-shirt at itim na tokong na pinaiibabawan ng pulang apron. May nakapaskil na ngiti sa mukha na tanging para lamang sa mga customers. May pusta akong oras na mabaling sa akin ang tingin niya ay sasama na ang timpla ng mukha nito.  

"Ino!" Lihim akong napangiwi ng makita kong si Andrei iyon. Ang manliligaw kong kuno. Hindi ko kasi siya itinuturing na manliligaw kahit na ilang beses na niya akong kinukulit. Mabigat kasi ang loob ko sa kanya sa hindi ko malamang dahilan. At katulad din ng ibang naririto ay empleyado rin si Andrei ng isa sa pinakamalaking kumpanya sa lugar. Kung hindi ako nagkakamali ay sa CAG group of companies siya nagtatrabaho. Bagay na lagi niyang ipinagmamalaki na siyang ikinaiinis ko sa ugali niya. Totoo naman ang sinasabi niya. Isa ang CAG sa pinakakilala at pinakamalaking kumpanya sa bansa. Pero ang hindi maganda ay iyong lagi nalang niyang ipinangangalandakan na doon siya nagtatrabaho kahit hindi naman itinatanong sa kanya. Kaya duon palang sa parte na iyon, bagsak na siya sa akin. 

Agad na lumingon sa direksyon ko si tita Hilde. Mabilis akong umalis sa kinatatayuan ko ng tignan ako nito ng matalim na para bang sinasabing "ano pang itinatayo-tayo mo dyan?!". Kahit kasi hindi iyon lumabas sa bibig nyan ay parang kusa ko na iyong naririnig sa tainga ko. Hindi ko na siya hinintay pa na magsalita at mabilis na kinuha ang papel at ballpen na nakapatong sa may lamesa ng kahera at dali-daling lumapit sa isang grupo ng babaeng nagtatawag ng tagasilbi. 

Unang kong hinarap ang babaeng nasa gilid ko. "Ano pong order nyo?" Malumanay ko pang tanong sa kanila. 

Noong una ay hindi pa ako pinapansin ng iba dahil tulad ng ibang grupo sa malapit ay nag-chi-chismisan din ang mga ito. At ako naman na isang kalahating usisera ay hindi mapigilang makinig lalo na at mukhang wala silang balak na magsabi ng order nila. Nakakatuwa rin kasi minsang makinig ng mga usapan nila. Naroong manira sila ng kapwa katrabaho nila at pagpantasyahan ang lalaking amo. Mayroon ding nag-uusap ng tungkol sa mga experience nila sa sex. Bagay na animo kaswal lang para pag-usapan sa kung saan-saan at marinig ng iba. 

Iyon na ang naging gawi ko sa araw-araw na pagtatrabaho sa sizzlingan ni tita. Tulad ngayon na samu't saring chismis naman ang naririnig ko sa paligid kaya hindi tuloy magkandatuto ang tainga ko kung sino ang pakikinggan. Ang kabilang grupo kasi at tungkol sa bago nilang katrabahong babae ang pinag-uusapan. At gaya rin ng dati ay kesyo maarte daw ito at may kalandian ang inirereklamo ng mga ito. Sa kabila naman ay ang boss nilang saksakan daw ng gwapo kaya lang ay madalang pumunta sa opisana kaya nanghihinayang sila. 

"Hoy, ano daw order nyo?" Pukaw ng babaeng katapat ko sa mga kasamahan nitong hindi pa rin tumitigil sa pag-uusap.

"Saan naman daw nakita?" Nababaghang tanong ng katabi nito sa katapat na parang hindi narinig ang katabi. 

"Sa may Balite street daw, ee," nahihindik namang sagot ng katapat. Napukaw naman nito ang interes ko. May palagay akong katatakutan ang pinag-uusapan ng mga ito. 

"Uy, totoo yun," sabad ng lalaking ka-table ni Andrei. "Nakita din daw yun ni Anthony noong isang gabi. Ayun, nilagnat sa sobrang takot kaya di nakapasok. Sinundan daw sya, ee."

"Oh my ghad, parang ayoko ng umuwi ng gabi," nahihindik na sabi ng babaeng nasa likod nito. 

Mukhang may bago na namang katatakutang napulot ang mga ito. Noong nakaraang linggo ay iyon din ang pinag-uusapan ng ilang mga tindero at tindera sa labas. Akala ko ay madali ring mamamatay ang chismis pero hanggang ngayon ay buhay pa rin. Naku-curious tuloy ako kung totoo nga ba iyon. Pero wag nalang din pala. Ayokong makakita ng mga ganun.

Ang Balite street pa namang sinasabi ng mga ito ay iyong nilalakaran ko papuntang bus station pauwi. At sa tinagal-tagal ko rin naman dito ay ngayon ko lang narinig ang mga chismis na iyon. Kaya nakapagtatakang magkaroon ng multo doon. Baka naman naligaw lang iyon. Pasasaan ba at aalis din iyon doon. Hindi naman nagtagal ay ibinigay na din ng mga ito ang mga orders nila.

"Ino." Hindi ko malaman kung lilingon ba ako o hindi nang marinig ko ang boses ni Andrei na tinatawag ako. Sa huli ay nilingon ko nalang din para naman hindi ako matawag na bastos. Baka mamaya ay sigawan na naman ako ni tita Hilde pag hindi ko pinakisamahan ng maayos si Andrei. Alam naman ni tita ang di umanong panliligaw nitong si Andrei, at sa tuwina ay lagi niya akong kinagagalitan sa tuwing sinusupalpal ko ito o di kaya ay tatalikuran. Hindi ko tuloy malaman kung bet ba ni tita itong lalaki na ito o hindi. 

Ang kinagandahan lang kay tita ay iyong hindi siya mahigpit pagdating sa mga manliligaw kahit na isa siyang matandang dalaga. Karamihan kasi ng mga matatandang dalaga ay mga masusungit at tila ba galit na galit sa lalaki. Mabuti nalamang at si tita ay hindi ganoon, kahit papaano ay may konsiderasyon naman siya sa mga manliligaw ko. 

Biglang nangati ang kilay ko at parang gustong umangat ng bongga nang makita ko ang nakakalokong ngisi nito. Iyong gawi pa ng pagngisi niya ay iyong masarap idikit sa kahahango lang na sizzling plate. 

"Gusto mo bang ihatid na kita pauwi?" Anitong punong-puno ng kumpyansa sa sarili. 

Nakaramdam na naman ako ng inis dito kaya abot-abot ang pagpipigil ko sa sarili huwag lamang makagawa ng bagay na ikagagalit na naman sa akin ni tita. Humugot pa ako ng hininga bago magsalita. 

"Okay lang ako, Andrei. Hindi ko kailangan ang tulong mo." Narinig ko pa ang malakas ng kantyawan ng mga kaibigan nito bago ako tuluyang makalayo.