Gusto Kong Mapag – Isa!

 

 

After exhausting 3 days and 2 nights ay nakapagpahinga na rin sa wakas si Blue. Maginhawa ang pakiramdam niya na nagising at maghanda para sa schedule ng script reading ng pelikula.

It’s nice to be back home.

Kinuha niya ang tuwalya at bumaba para maligo. Humihikab pa siyang pumasok sa banyo pero…

“Aaah!…”

Muntik na siyang matumba buti na lang ay nasalo siya ni Alvarez. But in a very very familiar pose. Iyong pose na naalala niya na karaniwang eksena sa mga pelikula na nakahawak si leading man sa baywang ng niligtas na leading lady in an erotic and slow motion.

Ang problema ay nasa posisyon siya ng leading lady!

AWKWARD!

Tumuwid agad siya ng tayo. Grabe ang gulat niya kay PO2 Napoleon Alvarez na puno ng shaving cream ang mukha at nakatapis lang ng tuwalya sa pang-ibaba.

“Sir, sa susunod pakilock naman ng pintuan,” gigil niyang paalala.

“Sorry, Sir Blue.”

Lumabas siya uli. Siya namang paglitaw ng isang babae sa harapan niya na magulo ang buhok at nakalaylay sa harapan ang mga ito.

“Aaah!...”

Tatakbo sana siya paakyat kaso may nakasalubong siya ulit na isang babae naman na sobrang puti ang mukha.

“Sino ka!” Sa pagkakataong ito ay nawalan na siya ng lakas at naghanap ng upuan.

“Ang aga naman ng ingay na ‘yan,” maktol ng babae na pupungas pungas at nagtatanggal ng muta sa mata.

““Eh, ang aga ko ring aatakehin sa puso dahil sa inyo. Wait, CJ, ikaw ba yan?” tanong ni Blue.

“Bakit? Sino pa ba?” galit na tugon ng manager niya.

“Anong akala mo sa sarili mo JABBAWOCKEEZ? Ba’t ganyan itsura mo?”

Sinipa siya ni CJ sa paa. “Aray!”

“Facial mask to. Nakatulugan ko. Ipagpatuloy mo ‘yan nang ipa-cancel ko kay Direk ‘yong movie mo,” galit na sagot ni CJ.

“Sorry na.”

Ganito na ba ang mapag-isa ngayon?

Palakad-lakad siya habang nakatingin sa kanya ang tatlo na magkakatabi sa mahabang sofa. Kailangan niya ng house rules dahil kung hindi baka maaga niyang ikamatay ito bago pa niya magawa ang kanyang big break movie.

“Okay ka lang ba Blue? Bakit parang nakaamoy ka ng mabaho diyan sa itsura mo?” tanong ni CJ.

Sino ba naman ang hindi sisimangot sa kanila? Lalo na nang makita niya ulit si PO2 Alvarez habang nagluluto ng almusal kanina. Nakasuot ito ng apron na parang isang housewife lang. Baligtad sa image ng pulis! Ang hindi pa niya makakalimutan ay ang eksena sa banyo na kamuntik na niyang ikamatay sa gulat.

Si Sadako naman, hindi niya maintindihan. Minsan masigla, minsan malungkot kaso kadalasan parang multo. Grabe! Ngayon lang siya nakakita ng may amnesia na nanood ng TV na iyak-tawa ang ginagawa nang salitan. Normal pa ba ‘yon? Tapos ang resulta eh mukha na naman itong multo sa laki ng eye bags.

Si CJ kahit ramdam ang presensiya ay dakilang perwisyong pinsan naman. Maganda sana ang pinsan niya. Payat na version ni Camille Prats. Matalino din at masipag. Ang problema, kung gaano ito kasipag at kadedikado sa trabaho ay ganoon din sa pang-aasar. Napakabayolente pa!

“Listen everybody. Before anything else, we need some rules in this house so that we can live here harmoniously. First… Let’s be casual. Masyado tayong formal at awkward,” pagsisimula niya.

“Let’s call each other na lang according to our age. Kuya or ate or first names kapag mas matanda ka,” suhestiyon ni CJ. “29 na ‘ko.”

“I’m 26,” si Blue.

“40 na ‘ko,”si Alvarez.

“40?” Sabay-sabay silang tatlo.

“Wah. This is the most absurd thing so early in the morning,” sagot ni Blue.

“Bakit, ilang taon na ‘ko sa tingin n’yo?” inosenteng tanong ng pulis.

“50!” Sabay-sabay ulit ang tatlo.

“Ako, hindi ko alam,” sagot naman ni Sadako.

Parang chorus na nagsipagbuntung-hininga ang tatlo pagkarinig kay Sadako.

“Alam ko na! By first names na lang,” suggestion ni CJ ulit. “Crystal Jade ako.”

“Napoleon sa’kin.”

“As you all know, my first name is Blue.”

Hinihintay nila na sumunod magsalita si Sadako kaya tumingin silang lahat dito.

“Hmm. Ako si– ” mabagal na sagot ng babae habang nag-iisip.

“Ano? May naalala ka na?” tanong ni Blue na sa sobrang excited ay lumapit pa kay Sadako.

“Hindi ko rin alam,” sagot ni Sadako.

“Let’s wrap this up,” walang kagana-gana niyang sabi. Pagod na ang boses niya. “Bahala na lang kayo sa gusto n’yong itawag sa isa’t isa. Sabihin n’yo na lang kung ano ang gusto n’yong itawag sa inyo, I prefer na Blue na lang sa’kin.”

“I prefer to be called, CJ.”

“Sir Alvarez na lang sa’kin. Sanay na kasi ako.”

Nagtinginan ulit sila kay Sadako. Nag-isip naman ito. Tumingin isa-isa kina Alvarez, CJ at Blue.

“Sa’kin, ahm – .” seryoso ang mukha nito habang nag-iisip ulit.

“Ano? May naalala ka na ulit?” maganang tanong ulit ni Blue.

“Sadako. May pagpipilian pa ba ‘ko?”

“Ah.” Silang tatlo naman ang nagsabay-sabay.

Back to walang gana mode uli si Blue.

“Next, pakisarado ng CR kapag gagamit.” Nakatingin siya kay Alvarez.

Natapos ang kanilang meeting ng isang oras. Halos exhausted ang lahat sa mga sinabing rules ni Blue. Hindi niya alam kung matatandaan ba ng mga kasama ang lahat ng ‘yon.

Palabas sila ng bahay nang makarinig sila ng doorbell.

“Hi everyone! Hi Sir Blue,” bati ng bagong dating. Mataba at maputing lalaki ito na nasa trenta ang edad. May suot itong malaking backpack at may bitbit na isang malaking maleta. Inilapag nito ang mga bitbit sa sala. Dumiretso sa kusina at naghanap ng inumin. Matapos lagukin ang isang baso ng malamig na tubig ay umupo na parang sa kanya ang bahay. Feel at home din ito. “Makakasama n’yo ‘ko sa bahay na ‘to simula ngayon. Dito muna ‘ko titira. Ako si Roger, ang road manager ni Sir Blue.”

“Pati ikaw? Anong akala n’yo dito sa bahay ko? Hotel?” protesta ni Blue.

“By the way, Sir Blue, dala ko na ang bagong celebrity van ng kompanya. Hindi na tayo masikip diyan sa kotse mo. Personal Assistant na lang ang kulang, Sir Blue.”

Napatigil sila ulit dahil may nag-doorbell na naman. Si Alvarez ang nagbukas ng gate.

“Magandang umaga po. Oh. Naku! Naku! Blue Sandejas ikaw nga talaga ‘yan? Ang guwapo n’yo naman lalo na sa personal. Ako nga pala ang partner ni PO2 Alvarez. Ako si Jeanette Dimafelis ng Violence Against Women and Children Division.” Kinikilig habang nagpakilala ang babaeng pulis na bagong dating. Tinanggal nito ang sombrero para titigan nang mabuti ang hinahangaang artista. Nakauniporme ito ng kulay asul. Mahaba ang buhok nito na nakapuyod nang maayos. Hindi rin nalalayo ang edad nito kay Alvarez.

“Oh My! Heto at may dumagdag pa!” maktol ni Blue at naunang sumakay ng van.

“Pagpasensiyahan mo na siya. Broken-hearted kasi,” paliwanag ni CJ sa bagong dating.

Sa loob ng itim na van ay tutop ni Blue ang kanyang ulo. Sa tanang buhay niya ngayon lang niya na-experience ang magkaro’n ng sobrang daming tao sa bahay niya. Lagi kasing wala siyang naabutan sa kanilang mansion sa Maynila.

Habang sa loob ay natanaw ni Blue ang katapat na bahay. Two-storey din ito. Sa bintana sa ikalawang palapag ay nakita niyang may nakasilip na lalaki. Nang mapansin nitong may mga tao na palabas sa katapat na bahay ay isinarado nito ang bintana.