Chapter III

SINUSUKLAYAN ni Carla ang kanyang buhok. Chinecheck niya rin kung tinutubuan na ba siya ng puting buhok.

Nakabihis na siya at handa nang umalis. Magkikita sila ni Reese ngayon. Sabado at day off niya. Naghanda siya para sa araw na ito. Pinilit niyang matulog ng maaga at umiwas muna siya sa pag-inom ng softdrinks at alak. May appointment siya ng check-up kay Dra. Malvar, isang gynecologist.

Kinuha niya ang cellphone niya at tinext si Reese na paalis na siya ng bahay. Doon na sila sa clinic magtatagpo.

Tiningnan niya muli ang sarili sa salamin. Okay na ang make-up niya. Nag-suot siya ng sunglasses bago tuluyang lumabas ng kuwarto.

Mabilis na naglakad si Carla patungo sa clinic. Panay din ang masid niya sa kanyang relo sa kamay. Malapit na mag-alas nuwebe ng umaga. Patirik na rin ang araw kaya siya nagmamadali. Naaninag niya si Reese na naghihintay sa labas ng clinic. Dali siyang tumungo rito.

“Hi! Kanina ka pa ba?”

“Five minutes pa lang. Halika na.” ay ani Reese sa kanya.

Isang dalaga na mukhang nasa 20’s ang sumalubong sa kanila sa loob ng klinika. Siya ang receptionist. Tiningnan ni Carla ang name tag nito sabay bigkas ng pangalan niya.

“Irene!” ngumiti siya dito, “I have an appointment at 9 A.M.”

Ningitian siya nito pabalik, “Just on time po. Please follow me, Dra. Malvar is waiting for you.”

Sumunod siya dito habang si Reese ay umupo sa sulok ng lobby at nilabas ang libro. Nag-simula na itong magbasa habang hinihintay ang matalik na kaibigan.

Binuksan ni Irene ang pintuan ng isang kuwarto kung saan siya i-checheck up ni Dra. Malvar. Nandoon na rin ito nakaabang.

“Good morning Doc!” bati ni Carla.

“Good morning iha.” Malambing na sambit ng doktora.

Iniwan na sila ng receptionist at bumalik na ito sa lobby.

“Alright, let’s do some test.”

Unang ginawa ni Dra. Malvar ay interview. Tapos ay sinundan pa ng mga tests katulad ng pelvic exam, ultrasound, breast exam, pap smear, sti testing, blood work at urine sample. Natapos ang check-up at lumabas na si Carla.

“Hi ma’am, kumusta naman po?” tanong ni Irene.

“Okay lang, hindi naman first time, kaso last year hindi ako nagpacheck-up.”

“Balikan niyo nalang po ang result next weekend.”

“Alright. Bye!” nagpaalam na si Carla at tinawag ang kaibigan na naghihintay.

Paglabas nila ay tumingin sila sa paligid. Naghahanap sila ng malapit na restaurant para makakain na ng tanghalian. Naglakad sila sa gawing norte. Nakita nila ang Filipino restaurant na Kusina ni Juan. Naintriga sila at pumasok.

Elegante ang lugar. Mukhang first class pero ang presyo ng pagkain ay abot kaya. They’re just hoping na sana ay masarap. Umupo na sila at umorder. Nilapitan sila ng waitress naka-saya.

“Magandang araw po. Ako si Weng na kukuha ng order ninyo. Ito po ang menu.”

Naimpress sila dahil magalang at nakangiti ang serbedora.

“Okay, dalawang kanin at isang sinigang na hipon.” Si Reese ang unang nagsalita.

“Padagdag nalang ng bagnet.” Nakangiting sambit ni Carla.

“Mamaya na kami oorder ng dessert, tapos tubig nalang ang inumin namin.” Saad ni Reese.

Kinuha ng waitress ang menu sa kanila at umalis.

Tumingin si Reese sa paligid at natuwa sa ayos ng restaurant. Meron itong Filipino vibe na classy. Para kang nasa hotel pero may pusong pinoy ang disenyo. Hindi niya napigilan na purihin ito.

“Ang ganda ng place no? nakakagood vibes.”

Sumang-ayon naman si Carla.

“Samahan mo ako ulit next weekend sa clinic ha.” Pakiusap nito sa kaibigan.

“Oo naman, bihira naman tayong lumabas ‘eh kaya okay lang. Same time pa rin naman di’ba?”

“Yes, tapos kain ulit tayo dito. Subukan naman natin yung iba nilang food.”

Naputol ang kanilang pag-uusap dahil dumating na ang mga inorder nilang pagkain. Hindi sila nabigo sa expectation nila. Hindi tinipid ang serving at may presentation.

Sa unang tikim nila ay nasarapan na sila. Nag-enjoy sila sa kanilang lunch kaya naman ay umorder pa sila ng dessert na halo-halo. Tamang tama ito sa init ng panahon sa labas.

Sa pag-uwi nila ay masaya ang puso ng bawat isa.

SINAGOT ni Carla ang kanyang cellphone. Si Dra. Malvar ang nasa kabilang linya. Sinabi nito na kailangan siyang makausap nito tungkol sa mahalagang bagay. Buti na lamang at maaga siyang bumangon. Ngayon niya kukunin ang resulta ng OB-GYNE check-up niya. Nag-alala siya sa tawag ng doktora kaya umalis na agad siya ng bahay nila.

Pagdating sa klinika ay kinausap agad siya ni Dra. Malvar.

“Carla, According dito sa resulta ng tests. You have a low estrogen level.”

“Ano po ang epekto no’n sa akin doc?”

“Low estrogen count can lead to infertility on multiple grounds. Since you are not regularly na nagpapacheck-up, hindi mo ito namomonitor. Don’t worry meron namang treatment ito and you can also combine the medicines na irereseta ko with natural ways like supplementation.”

Nabunutan ng tinik sa dibdib si Carla nang marinig na merong paraan para magamot ang kanyang hormonal imbalance.

Dagdag pa ng doktora ay “Marami ako naging pasyente na nabuntis pa rin. Huwag kang mawalan ng pag-asa. With today’s technology, marami ng ways.”

Ngumiti si Carla pero inaatake na siya ng anxiety. Natapos na ang pag-uusap nila ng gynecologist niya. Lumabas siya ng kuwarto dala ang lab results niya. Sinalubong siya ni Reese na kakarating lang.

“Friend! Kumusta?”

“Mamaya ko na sabihin sa’yo yung detalye. Tambay muna tayo do’n sa restaurant na kinainan natin last time.” Aya ni Carla.

Inihain na ang order nilang pagkain. Pinakbet at inihaw na panga ng tuna ang kanilang napusuang subukang tikman. Mukhang hindi na naman sila nabigo sa kalidad ng mga ito. Kumain na muna sila at pagkatapos ay sinabi na ni Carla ang tungkol sa resulta ng eksaminasyon.

“Friend, mababa daw ang estrogen level ko. Most likely the reason why hindi ako nabuntis kahit I was sexually active sa mga na-date kong guys dati. Even kay Gio. Ang tagal naming at bata pa ako no’n.” malungkot na pagtatapat niya.

“Sinabi ba talaga yan ng doctor mo or assumption mo? May gamot diyan. Nag-oover think ka na naman. Huwag ka mag-dwell sa past. Ang mahalaga, ngayon aware ka na, ngayon gagamutin mo at may pag-asa for you and your husband in the future.” Payo ni Reese.

“Thank you sa pagpapalakas ng loob ko.”

“Stop overthinking na. It will not do well sa situation mo. I understand your anxiety and mood kasi nga may pinagdadaanan ka. Tumigil ka na sa pagwalwal ha? It will be helpful for you to recover faster.”

“Yes ma’am.”

Tumayo na si Reese at nag-aya nang umuwi.

NAGLILINIS si Carla ng kanyang kuwarto. Nagpalit siya ng punda ng unan at kama. Pinunasan din niya ang mga inaalikabok na gamit sabay vacuum sa buong lugar. Pagkatapos ay nag-sindi siya ng aroma candles na niregalo ni Reese sa kanya noong pasko.

Umupo siya sa kanyang kama at kinuha ang cellphone. Nag-research siya ng mga natural na paraan para mapataas ang kanyang estrogen.

May artikulo na nag-suggest ng pagkonsumo ng soybeans, flax seeds at sesame seeds. Uminom ng Vitamin D at B vitamins.

Natuwa siya nang mabasa na ang red wine ay makakatulong rin sa dinadanas niya. Ito ay may compound na halos pareho sa estrogen. Kahit na limitado lamang ang dapat ikonsumo nito ay masaya siya dahil makakainom pa rin siya ng alak.

Napagod na ang utak niya sa kakabasa ng mga researches kaya naman ay nag-search siya ng about sa astrology. Bagong taon at gusto niya mabasa ang magiging epekto nito sa buhay niya.

Pinindot niya ang unang link na lumabas sa searches. Dinala siya nito sa isang website na bago para sa kanya. Cancer ang astrology sign niya. Binasa niya ang laman nito.

This year will be great for you. You will learn new skills and try to be better in communication. Apply this skill to your family so your bond will grow stronger. Maintain a regular dietary habit, it will be helpful for you to protect from any potential diseases this year. The planets are aligned for your relationship to blossom. Your life will change when you start a family. Luck and prosperity will unfold once you get marry. This is the best time for you to settle down as you enter the new phase of your life. If you are single, start dating now and have a chance to tie the knot at the end of the year.

Tumatak sa kanya ang pangungusap na Luck ang prosperity will unfold once you get marry. Baka nga ito ang kailangan niya para mabago ang takbo ng buhay niya. Ang matagal niya ng hinihiling na suwerte ay maaaring mangyari kapag nag-asawa na siya.

Nag-isip siya kung paano siya makakahanap ng potensyal na asawa. Tinawag niya ang kapatid. Pumasok ito sa kuwarto at nagtanong.

“Bakit?”

“Tingnan mo ‘to. Susuwertehin daw ako kapag nagpakasal ako.”

“Paano ka magpapakasal nang walang kasintahan?”

“Di’ba may mga foreigner na naghahanap ng filipina wife?”

“Oo, usually mga matatanda na like 70’s or 60’s. Gusto mo ba?”

“Wala bang mas bata kahit mga 40’s?”

“Meron naman, pero bihira.”

Nawalan ng pag-asa si Carla. Imposible nga naman na may magpakasal sa kanya agad na pasok sa standard niya. Kung sa matanda naman ay baka mag-runaway bride siya. Humiga siya sa kama at tinitigan ang kisame ng kuwarto niya.

“Ate, huwag kang maniwala sa sinasabi diyan.” Sabay turo sa cellphone niya. “Ikaw lang at ang diyos ang puwedeng lumikha ng destiny mo. Maraming beses ka na humiling. Maraming beses ka na nag-dasal. Bakit di mo siya pagkatiwalaan ngayon? Huwag kang mag-follow up all the time. Ibibigay niya yan sa oras na itinakda niya.” Dagdag pa nito.

Nilingon ni Carla si Maya at ningitian.

“Masyado lang siguro akong pressured na umalis dito. If ever na mapalitan ko yung apelyido ko, baka sakaling mawala yung sumpa sa akin. Mas maging maswerte ako di’ba?”

“Suwerte ka, hindi mo lang nakikita. Nakafocus ka kasi sa ano ang kulang sa’yo.” Sagot ng kapatid. Lumabas na ito ng kuwarto.

Natameme nalang siya at pinukaw ang atensyon sa nakabukas na bintana. Magdidilim na. Gusto niya masilayan ang unang bituin na lilitaw sa langit.

Tumayo siya at pinanood ang paglubog ng araw. Lumabas ang isang bituin sa sulok. Pumikit siya at humiling.

Sana po ay makapangasawa na ako. Yung mabuting tao. Di’bale na kung hindi niya ako sobrang mahal pero pipiliin naman akong makasama habang buhay. I think I need a constant companion in my life. Hindi na rin mag-aalala si nanay kapag nangyari ‘to.

Binuksan niya ang kanyang mga mata. Lumitaw na ang buwan. Ang ganda nito. Binibigyan siya ng liwanag.

Bumalik siya sa kama at nahiga. Pinikit ang mga mata. Hindi niya namalayan na nakatulog na pala siya.