CHAPTER 3

Kumilos si Reedz. Nanlilisik ang mga matang hinarap na talaga siya. “When I purchased this ring a while ago, you assured me that no woman would refuse my proposal. So, why did Avy reject me? Umamin ka, binola mo lang ba ako para mabentahan mo lang ako?”

Bumuka ang kanyang bibig, gusto niyang magpaliwanag, pero walang salita na gustong lumabas sa kaniyang bibig. Ngayon pa yata talaga nagkahiyaan ang bibig at dila niya. Ngayon pa talaga ayaw magsalita. Dati naman ang daldal niya, eh. Naman, oh!

Napalunok siya, pero syempre ay nilabanan niya ang takot. Hindi siya humakbang upang umatras. Ikinuyom niya lang nang sobrang higpit ang kaniyang mga kamao. Hitsura ng taong hinihintay na lang na sakmalin ng halimaw ang kaniyang ulo.

Ganito ang napapala ng pakialamera, at talagang tukso pa sa kaniya ng konsensya.

Napangiwi siya. Pakialamera na pala ang tawag sa gusto lamang tumulong? Malay ba niya kung gusto ng taong ito na magpakamatay. At least, nailayo niya ito sa kapahamakan.

Ikaw naman ang mamamatay! ayaw patalong saad pa rin ng kaniyang konsensya. Epal.

Animo’y gusto na siyang lamunin ni Reedz ng buhay nang humakbang ito upang mas maglapit pa sila. Ang mga mata niya’y namumula na tulad ng mga demonyo.

“I won't forgive you for deceiving me!” dikawasa’y madiing sabi nito.

Napausal na talaga si Calynn ng, ‘Juskolord’.

“Ang lakas ng loob mo! Do you not know who I am? I am Reedz Rovalez of Regal Empire! I can even buy you if I desire!” malapit na sa kaniyang mukha na sabi pa ng binata. Amoy na amoy na niya ang mainit nitong hininga.

“Lasing ka po?” bigla ay tanong niya. Hindi niya pinansin ang pagpapakilala nito. Wala siyang pake kung sino itong poncho pilato. Ang naging pake niya ay ang naamoy niyang amoy chiko na hininga ng lalaki. Kaya naman pala parang wala sa sarili.

Mas inunawa na niya ito. Heartbroken na lasing, syempre wala sa ayos ang utak nito.

“I’m not drunk!” ngunit ay bulyaw nito sa kaniya.

“Sir!” Kung hindi niya naibaling ang kaniyang ulo at itinulak ito sa dibdib ay sure si Calynn na nagdikit ang kanilang mga labi. Muntik na ang kaniyang first kiss. Yikes!

Ang nakapagtataka ay biglang nagtatawa si Reedz. Umayos na ito ng tayo at parang nabaliw na ng tuluyan.

“Kaya ko kayong bilhin lahat! Name your price, b*tches!” sigaw nito ng malakas ulit sa kawalan, na sa sobrang lakas ay lumabas pa ang litid nito sa leeg, kasama na ang ugat nito sa mga kamao nito dahil sa higpit ng pagkakawak sa kahon ng singsing.

Hindi nabahala si Calynn sa pinagsasabi ni Reedz. Ang ikinabahala niya ay ang singsing. Baka mayupi. Akmang kukunin niya sa kamay ni Reedz ang kahon pero hindi naman niya magawa kaya nakakagat na lamang niya ang kuko ng hintuturo niya.

Paulit-ulit siya na ganoon habang nakangiwi.

“Ang tataas ng tingin niyo sa sarili niyo, you sons of b*tches! You don't deserve to be loved!” sigaw pa ni Reedz.

Napapangiwi na lang si Calynn.

“Even you! I'm aware that you also have high standards for men! You're quite a drama queen too, acting all high and mighty! Admit it!” ang hindi niya inasahan ay nanlilisik ang mga matang baling sa kaniya ng binata.

Speechless siyang napamulagat. Luh, ba’t siya nadamay?!

Nagtatawa na naman ang lalaking lasing. Nagyuko ng ulo tapos maangas na tumingala habang nakabukol ang dila sa pisngi.

Wala na nabaliw na nga.

Napakagat-labi si Calynn habang pinapanood ito. Nayayabangan na siya sa binata, pero kasabay niyon ay naaawa rin siya. Wasak ang puso nito kaya normal lang siguro ang ikinikilos nito at pinagsasabi… kahit mesheket!

Masakit dahil siya pinagbintangan na siyang malas, nasabihan pa siyang kasama sa mga b*tch. Eh, di wow.

“Damn you, Avy! I swear, you will regret that you rejected my proposal!” saglit ay kay lakas na sigaw na naman ni Reedz. Animo’y nandoon sa may abot-tinging bahagi ng ilog ang Avy na minumura nito.

“Sir, huwag!” At grabe ang panic ni Calynn nang akmang itatapon ni Reedz ang hawak na box ng singsing.

Tumigil sa ere ang kamay ni Reedz. Natigilan. Pagkuwa’y pabiglang tumingin sa kaniya.

“Sayang po, Sir. Milyon po ang halaga niyan, eh. Huwag mo pong itapon please,” paliwanag niya. “Saka singsing ko po ‘yan, eh!” dagdag pa nga niya pero syempre ay sa loob-loob na lang niya iyon.

Maang na napatitig sa kanya si Reedz. Pagkuwan ay nagpakawala ito ng nakakalokong tawa. Mayamaya ay pinaikot-ikot nito sa kamay ang box na ibinaba. Tila may pinag-iisipan habang palipat-lipat ang tingin nito sa mukha niya at sa box.

“Sir, kung anuman po ang problema niyo ni Miss Avy ay naniniwala akong maaayos niyo po. Huwag niyong itapon ang singsing kasi sigurado na kapag handa na siyang magpakasal ay YES na ang isasagot niya po sa proposal niyo. Itago niyo na lang po muna habang—“

“Oh, sa 'yo na,” ngunit ay pamumutol ni Reedz sa kanyang mahaba-habang litanya dapat. Inilahad nito ang box ng mamahaling singsing sa harapan niya na parang tag-piso lang na candy.

Ang lakas ng naging “Po?” ni Calynn.

“Kunin mo. Sa ‘yo na lang,” seryoso ang mukhang panlilinaw ni Reedz.

Umiling naman siya. “Ayoko, Sir.”

“Kukunin mo o pupunta ako kina Kabhy at Eyrna at sasabihin ko sa kanila na ini-scam mo ako para lang makabenta?” Bumaba ang tingin nito sa kaniyang damit, damit na uniform nila sa Golden Pawn.

Madali niyang tinakpan ang logo ng company nila sa bandang taas ng kaliwang dibdib niya.

“Hindi ka sales associate ng Lux Fine?” Naningkit na naman ang mga mata ni Reedz.

Umasim ang mukha ni Calynn. Paktay na talaga siya!

Minsan pa ay parang baliw na nagtatawa si Reedz. Pero hindi nagtagal ay kinuha nito ang kamay ni Calynn at inilagay roon ang box. “Good night,” saka parang wala lang na sabi.

“Sir!” tawag ni Calynn rito nang makita niya na patungo na ang binata sa sasakyan nito. Iniwan na siya, kasama ang singsing.

“Sir! Ang singsing mo po!” Habol niya pa rin sana sa mayamang lalaki, ngunit kay bilis na pinasibad na ni Reedz ang sports car nito.