CHAPTER 2

Agad na tumalikod si Hexy kay Brix at binilisan ang paglakad paalis sa parking lot.

"Hey," pagpipigil sa kaniya nito saka hinawakan ang kaliwang braso ni Hexy. Napahinto naman siya at dahan-dahang humarap kay Brix habang nakagat sa kaniyang labi.

Seryoso ang mukha ni Brix at doon mas napagmasdan ni Hexy ang mukha nito.

Matangos ang ilong, makapal ang kilay, maputi, manipis lang ang bibig, at makapal ang nakaayos na buhok. 

"About what happened—"

"S-Sorry po, Sir! Hindi ko po kayo kilala at wala po akong maalalang nangyari sa gabing iyon. Hindi ko po alam kung paano po ako nakarating sa kuwarto niyo. Lasing na lasing po ako!" Sambit ni Hexy at napapikit pa matapos dirediretsong sabihin iyon.

Napamulat lang siya ng kaniyang mga mata nang marinig na humagikhik si Brix.

"Sorry din. Wala rin akong maalala. I'm also drunk at that time. I shouldn't have kiss you," malumanay na wika niya ngunit malalim ang boses. Namula naman si Hexy nang maalala ang halikan nilang dalawa na gumising sa kaniya.

Napakamot na lang ng batok si Hexy at umiwas ng tingin.

"Paano ka ba nakarating sa unit ko? I mean, oo, wala kang maalala pero nakakapagtaka lang na nakarating ka sa unit ko dahil alam naman nila na private 'yon," tanong ni Brix.

"N-Nag-inuman po kasi kami ng friends ko sa bar, same building din ng unit niyo, Sir," nahihiyang sagot naman ni Hexy. Tumango-tango naman si Brix at ilang segundong natahimik.

Umayos ng tayo si Brix at inilahad ang kaniyang kanang kamay sa harap ni Hexy. Napatingin naman si Hexy sa kamay niya, saka dahan-dahang napatingin sa mukha niya.

"I'm Brix Ivane Royale," pagpapakilala nito.

Napalunok naman si Hexy at nanginginig pa ang kaniyang kamay na iniabot ang kamay ni Brix.

"I'm H-Hexy Avory Ocampo, Sir."

Ngumiti naman si Brix na siyang ikinagulat ni Hexy ngunit sinuklian niya rin ito ng ngiti.

"Nice to meet you. No need to call me 'Sir'. Do you need to call me that after we kissed?" Panunukso ni Brix sa kaniya matapos bitawan ang kaniyang kamay.

Nanlaki naman ang mga mata ni Hexy kaya natawa sa kaniya si Brix.

"Before ako umalis, dito ka pala nagtatrabaho?" 

Tumango naman si Hexy sa kaniya.

"O-Opo," sagot niya.

Tumango-tango naman si Brix.

"Kaya pala you seem familiar. Dito ako laging kumakain kapag may oras akong lumabas. Malapit lang kasi ang office ko," wika nito. Dahan-dahan namang tumango-tango si Hexy.

"I need to go. Nice to meet you, Miss Hexy," sambit niya. Ngumiti na lang si Hexy bago ito tuluyang sumakay sa isang itim na kotse.

"Tunog 'sexy' kapag siya ang nagsasabi ng pangalan ko," mahinang sabi ni Hexy saka siya bumuntong hininga.

Napatalon naman siya nang pagtalikod niya ay papalapit sa kaniya si Maverick habang isinusuot ang jacket nito.

"Puwedeng sumabay sa'yo?" Nakangiting tanong niya nang makalapit ito sa kaniya. 

"Hindi," sagot nito at sumakay sa motor na nasa tabi ni Hexy. Lumabi naman si Hexy sa kaniya.

"Grabe ka naman. Pareho lang naman tayo ng pupuntahan," pagmamaktol niya.

Inayos naman ni Maverick ang gloves niya saka isinuot ang kaniyang helmet.

"Iba ang pupuntahan ko," sagot nito sa kaniya saka pinaharurot na ang kaniyang motor.

Bumuntong-hininga naman si Hexy at walang choice kung hindi ang pumara ng traysikel patungo sa tagpuan nila nina Shantal.

Kinabukasan ay maraming guests sina Hexy kaya naging abala siya, dahilan upang hindi niya matanong si Maverick kung saan siya nagpunta kahapon.

Habang pabalik siya sa dining area ay napahinto siya nang makita si Brix na nakapuwesto sa pinakaharap na table.

Napapikit si Hexy at nagpakawala ng malalim na hininga.

‘Nandito na naman? Paano rin ako makakaiwas sa isang 'to?’

Habang nakatingin si Hexy sa mga guests ay hindi niya maiwasang hindi mapatingin sa gawi ni Brix.

‘Mabuti na rin pala at hindi ko kinuwento kina Shantal na magkakilala na kami. Baka kung ano pa'ng sabihin nila.’

"Hexy."

Muntik nang mapatalon si Hexy nang tawagin siya ni Maverick. Nakatayo ito sa kaniyang likod at bahagyang nakatungo ang ulo dahil hindi sila parehas ni Hexy ng height.

"Bakit?" Mahinang tanong naman ni Hexy sa kaniya. Pinilit niyang iwasan ang mapangiti nang sobra dahil hindi siya laging tinatawag ni Maverick.

"Nag-aaya sina Aldrin na manuod sa cinema after duty. Sasama ka?" Tanong nito.

Doon naman napangiti si Hexy.

‘Magkakaroon na rin tayo ng moment.’

"Oo naman. Ikaw ba?" 

Nag-finger crossed naman siya habang nakatago ang kamay sa kaniyang likod.

Tumango lang si Maverick sa kaniya.

"Okay," wika ni Hexy. 

Nang makabalik si Maverick sa kaniyang pwesto ay hindi niya maiwasang mapangiti. Naging magkaibigan sila simula high school, ngunit hindi sila masyadong namamasyal.

Abot-tainga ang ngiti ni Hexy nang makita sina Vanessa sa labas ng sinehan habang kasama si Maverick, kahit hindi sila sumakay sa iisang sasakyan.

"Progress. Iniangkas ka niya?" Tanong ni Vanessa sa kaniya. Umiling-iling naman si Hexy.

"Dalian niyo, baka maubusan tayo ng popcorn," pagmamadali ni Shantal sa kanila.

Napatigil naman sila nang umingay ang kanilang paligid.

"Ano'ng mayroon?" Tanong ni Vanessa.

"Baka may celebrity na manunuod?" Sabi naman ni Hexy saka sila lumingon sa mga taong nag-iingay at waring may nakitang artista.

"Oh? Si Sir Brix pala, eh," wika ni Rio. 

Nanlaki naman ang mga mata ni Hexy nang makita si Brix na may mga kasamang dalawang bodyguards.

"Oh my God, Hexy," kilig na kilig na sambit ni Shantal. Sinamaan naman siya ng tingin ni Hexy.

"Tara na sa loob," sambit ni Hexy at nagmamadaling nagpunta sa pila.

Sumunod naman sa kanila ang kanilang mga barkada.

"Hexy?" 

Napalunok si Hexy nang marinig ang pamilyar na boses na iyon mula sa kaniyang likuran.

"Hex," kurot ni Shantal sa kaniya at pinilit siya nitong humarap kay Brix.

"Hi, Sir!" May pag-aalangang bati niya kay Brix at saka ngumiti nang pilit.

"You're here. Manunuod ba kayo?" Tanong ni Brix at isa-isa silang tinignan.

"O-Opo," kilig na kilig na sagot sa kaniya ni Shantal at halos umabot na sa kaniyang tainga ang kaniyang labi.

Tumango-tango naman si Brix habang nakangiti. Si Hexy naman ay bahagyang napatingin kay Maverick. Seryoso lamang itong nakatingin sa ibang tao at hindi sa kanilang kaharap habang nakapamulsa.

"Hexy, why don't you introduce your friends?" 

Napalunok naman si Hexy dahil sa kaba.

"P-Po?"

"I'm Shantal, Sir!" Pagpiprisinta ni Shantal at kumaway kay Brix.

Sunod namang tumingin si Brix kay Vanessa.

"I'm Vanessa po," wika ni Vanessa saka ngumiti sa kaniya.

"Ako si Aldrin, and this is Rio," pagpapakilala ni Aldrin at inakbayan pa si Rio.

Nang dumako ang tingin ni Brix kay Maverick ay hindi man lang ito nakatingin sa kaniya. Nakatingin lamang ito sa paligid at blangko pa rin ang mukha.

"A-Ah, this is M-Maverick po," sambit ni Hexy saka hinawakan ang braso ni Maverick. Napatingin naman si Maverick kay Hexy nang gawin niya iyon, saka tumingin kay Brix at tumango.

"Nice to meet you all. I'm Brix," saad nito at saka ngumiti.

‘Ngayon, alam na nilang magkakilala na kami.’

Napakagat naman si Hexy sa loob ng kaniyang labi dahil sa sobrang kaba. Hindi niya namalayang napapahigpit na ang kaniyang kapit sa braso ni Maverick.

May ibinulong si Brix sa isa sa kaniyang mga bodyguards at nagmadali naman iyong nagtungo sa counter.

"You wanna watch a movie, right? I'll rent the whole cinema for us to watch," sabi nito.

Napanganga naman si Hexy.

"Oh my God! Really?" Eksaheradang tanong ni Shantal. Tumango naman si Brix habang nakangiti.

"Uuwi na lang ako," mahinang sambit ni Maverick. Lumabi naman si Hexy at hindi binitawan si Maverick.

Napalingon naman ito sa kaniya saka nagbuntong-hininga.

"Let's go," aya ni Brix sa kanila at nauna na siyang pumasok sa loob.

"Iba talaga kapag big time," komento naman ni Aldrin.

"Sinabi mo pa," ani naman ni Rio. 

Napailing na lang si Hexy at hindi nagugustuhan ang nangyayari.

"Hex," tawag ni Vanessa kay Hexy nang papasok sila at papunta sa mga upuan. Napalingon naman si Hexy habang nakahawak pa rin kay Maverick.

"Nakakahiya kay Sir Brix. Dapat tumabi ka sa kaniya. Tutal ikaw ang kakilala niya sa'tin," wika nito. Nanlaki naman ang mga mata ni Hexy.

"Ano? Ayoko nga!" Mahinang sambit niya.

"Sige na, Hex. Ililibre na nga tayo, oh!" Sabi naman ni Shantal at itinuro pa si Brix na nakaupo na.

Napakamot naman ng batok si Hexy at dahan-dahang naglakad patungo sa puwesto ni Brix. Hinatak niya si Maverick at pinaupo sa kaniyang kaliwa.

Napangiti naman si Brix sa kaniya at nameke naman siya ng ngiti.

Dahan-dahan namang tinanggal ni Maverick ang pagkakahawak niya sa kaniyang braso.

"Nilalamig ako," mahinang sambit ni Hexy sa kaniya ngunit humalukipkip lamang ito. Nag-make face naman si Hexy at isinandal ang likod niya sa upuan.

Nagulat siya nang ilagay ni Brix sa kaniyang kanang braso ang coat niya.

"S-Sir, hindi na po kailangan," mahinang wika niya at inilapit pa ang mukha niya.

"Nilalamig ka, right? Remember the morning—"

"Kukunin ko na," mabilis na sabi ni Hexy at kinuha ang coat saka niya isinuot. Napangiti naman si Brix saka umiling-iling.

‘Humanda kayong dalawa sa'kin kapag nakalabas tayo rito.’

Nang magsisimula na ang pag-play ng movie ay hindi maituon ni Hexy ang paningin sa screen. Ikinikiskis niya ang kaniyang kanang kamay sa tapat ng kaniyang dibdib dahil sa kaba.

Napalunok naman siya nang maamoy ang pamilyar na amoy mula sa coat na nakasuot sa kaniya.

Napailing siya nang bahagya at umayos sa pagkakaupo.

"Puwede bang 'wag kang galaw nang galaw?" Bulong ni Maverick sa kaniya.

Lumabi naman siya saka inis na kinuha ang popcorn at kumain.

Nang maburyo siya sa pinapanuod nila ay sumandal siya sa kaniyang upuan, at ini-relax ang kaniyang mga kamay sa armrest. 

Nakaramdam siya ng daloy ng kuryente nang aksidenteng maidikit niya ang kaniyang hinliliit sa naka-relax ding kaliwang kamay ni Brix.

Napatingin siya sa lalake ngunit abala si Brix sa panunuod. Napatingin ulit siya sa kaniyang kamay na nakadampi sa itaas ng kamay ni Brix.

Nanlaki ang kaniyang mga mata nang biglang gumalaw ang kamay ni Brix at mas lalong nagdikit ang mga palad nila.

"Sorry. I didn't mean to—"

"Ayos lang," pamumutol ni Hexy sa sasabihin niya saka mabilis na inilapat ang kamay sa kaniyang mga hita.

Isinandal na lamang ni Hexy ang kaniyang ulo malapit sa gawi ni Maverick at pilit na itinuon ang atensyon sa screen.

Matapos ang ilang oras ay inilabas ni Brix ang kaniyang cellphone, at nakita ni Hexy na nag-aalarm iyon.

Napatingin naman si Hexy sa kaniyang relo at nakitang alas sais na ng gabi.

Pagkatapos ng ilang minuto ay nag-vibrate ulit ang cellphone ni Brix at agad niya naman itong sinagot.

"Yes, Dad. Papunta na ako. May tinatapos lang ako," mahinang sambit ni Brix saka ibinaba ang cellphone.

Napalingon naman si Hexy sa kaniya.

"May gagawin ka pa ba?" Bulong ni Hexy. 

"Yeah. Pero patapos naman na ang movie. Tapusin ko na lang," sagot niya. Tumango-tango naman si Hexy.

Nang matapos ang movie ay agad na tinanggal ni Hexy ang suot niyang coat. 

"Thank you sa treat, Sir Brix," pagpapasalamat ni Shantal saka ngumiti nang malapad.

"No problem," sagot naman nito.

"Kailan kaya ang next time?" Pagbibiro naman ni Aldrin. Nanlaki naman ang mga mata ni Hexy at napatingin sa kaniya.

"Anytime. You can have my number," sambit ni Brix at inilabas ang calling card mula sa kaniyang wallet saka ibinigay kay Aldrin. Pumalakpak naman sa tuwa si Shantal at tumingin pa sa card.

"Thank you again, Sir," nakangiting sabi ni Vanessa at bahagya pang tumungo. Tumango naman si Brix sa kaniya.

"S-Sir, puwede ba tayong mag-usap?" Tanong ni Hexy. Napatingin naman sina Shantal sa kaniya. At kumawala sa bibig nina Vanessa at Shantal ang mahinang tili.

"Sure," sagot naman ni Brix at bahagyang lumayo sa kanila. Bumuntong-hininga naman si Hexy at sumunod sa kaniya.

Nang makalayo sila ay agad niyang iniabot kay Brix ang coat nito.

"Thank you, Sir."

Napangiti naman si Brix sa kaniya.

"I had fun," wika naman niya saka kinuha ang coat.

"Actually, gusto kong s-sabihin na sana last na po i-ito," mabagal na sambit ni Hexy at saka ipinunas ang kaniyang mga palad sa ibaba ng kaniyang damit 

Napakunot-noo naman si Brix.

"Why? I mean it's okay na maging friends tayo," saad niya.

"S-Sorry po. Pero 'yong nangyari po kasi sa'tin, nakakababa po ng dignidad bilang isang babae. A-And ngayon nagkasama pa po tayo. N-Nakakahiya. Hindi naman tayo magkakilala, S-Sir," mahinang sambit ni Hexy saka napaiwas ng tingin at napalingon siya sa mga kaibigan niyang sobra ang ngiti sa kanila.

"Who told you that? Pareho tayong walang maalala sa nangyari, Hexy. I'm sorry if I wanna hang out with you. I'm just being good, dahil masama ang naging first impression mo sa'kin," sabi ni Brix. Bumuntong-hininga siya at mas lalong tumitig kay Hexy.

"I'm not a fan of drama, but only we could..." sambit ni Brix ngunit hindi itinuloy ang sasabihin.

"S-Sorry po," pagbabalik ng tingin ni Hexy sa kaniya.

"I'm sorry again. And I should go. May gagawin pa ako," wika ni Brix at itinuon ulit ang paningin kay Hexy.

"Thank you po ulit. Nag-enjoy po sila," sabi ni Hexy saka tumingin kina Shantal. Nag-uusap naman sila habang nakangiting nakatingin sa kanila ni Brix. 

"How about you?" Tanong ni Brix.

"P-Po? Nag-enjoy po ako," sagot ni Hexy saka nameke ng ngiti. Tumango-tango naman si Brix sa kaniya.

"Mauna na ako. Salamat din sa oras," pagpapaalam nito.

Kumaway pa muna ito kina Shantal bago umalis.

Agad namang lumapit sina Vanessa sa kaniya at saka siya kinurot sa tagiliran.

"Imagine ganiyan ka tratuhin ng isang Royale, paano pa kaya kapag naging kayo?" Tuwang-tuwang sambit ni Shantal habang pumalakpak.

"Straight out from the novel ang love story niyo kapag nagkataon," komento naman ni Vanessa. Umiling-iling naman si Hexy at napakamot ng batok. Palihim siyang tumingin kay Maverick kung ano ang reaksyon nito, ngunit abala ito sa kaniyang cellphone habang mabilis na nagta-type.

"Puwede na natin siyang ayain kapag may inuman tayo. Sure akong siya ang magbabayad," natatawa namang wika ni Rio saka sila nag-apiran ni Aldrin.

Habang naglalakad sila palabas doon ay bahagyang tumabi si Maverick sa kaniya. 

"You know, hindi lalapit sa'yo ang isang mayaman kung wala siyang kailangan," mahinang sambit nito habang nakatingin sa dinaraanan nila. Napakunot-noo naman si Hexy at napatingin sa kaniya.

"So, lalapit lang ang isang tao sa'kin kapag may kailangan? Napaka-judgmental mo 'no?" Inis na sabi ni Hexy.

"And what's the reason bakit siya lumalapit sa'yo?" Tanong ni Maverick.

"Eh, sana tinanong mo kanina sa kaniya. Malay ko ba kung nagandahan pala siya sa'kin?" Pang-iinis ni Hexy sa kaniya. 

Kahit tapos na ang duty ni Hexy sa sumunod na araw ay hindi pa rin niya maiwasang isipin ang pakikisama ni Brix sa kanila, lalo na ang naputol nitong sinabi sa kaniya.

"Ang pogi rin nu'ng kausap ni Maverick," wika ng isa nilang katrabaho habang kinukuha ang mga gamit sa locker. Napakunot-noo naman si Hexy at napatingin sa kanila.

"Baliw! Si Sir Brix 'yon, hindi mo ba kilala?" Natatawang tanong naman ng isa nilang kasama. Nanlaki ang mga mata ni Hexy at hindi pa natapos na kunin ang mga gamit.

"Ano? Nasaan sila?" Pangingialam ni Hexy. Napatingin naman ang dalawa sa kanila.

"Nasa parking lot. Kanina pa nga—"

Hindi na pinakinggan ni Hexy ang mga sumunod na sinabi ng kasama nila at saka nagmadaling nagpunta sa parking lot.

Nanlaki ang kaniyang mga mata nang makitang seryosong nagtititigan ang dalawa habang idinidiin ni Maverick ang sigarilyo niya sa coat ni Brix at unti-unti itong umuusok.

"Maverick!"