KABANATA 61

Masayang nagtatampisaw na sila sa tubig at kasama niya ang mga kaibigang models din ni Venus na kilala na rin naman niya. Naka-two piece bikini ang mga ito. Hindi talaga siya napilit ni Venus na hubarin ang ipinatong niyang shorts at shirt sa ibabaw ng swimsuit na suot. Hinubad na muna niya ang salamin sa mata at iniwan sa cottage dahil kapag sumisid siya ay tiyak na mahuhulog iyon sa ilalim ng tubig. Mabuti nga nu'ng matumba siya kanina ay mabilis na nahawakan niya ang salamin sa mata para huwag mawala, parang instinct na niya iyon.

Nang umahon na silang lahat sa tubig ay nagkanya-kanyang dapa naman sa buhangin ang mga models. Nanatiling nakatayo lang siya at tinitingnan ang mga ito. Mukha talaga siyang alalay ng mga ito.

" Lagyan ko na kayo ng sunblock lotion," alok na lang niya imbes na tumunganga. Nakakahiya namang dumapa rin siya katabi ng mga babae. Magmumukha siyang basurang napadpad sa baybayin.

" Oh, thank you, Natasha!" nakangiting sabi ng isang model.