Chapter 2

“SIGURO, nagtataka kayo dahil biglaan ang family dinner na ito,” pagsisimula ni Dominic. “I don’t know how to say this but we have a very special announcement to all of you.” Mabilis nitong tiningnan si Jameson na nakangiti lamang habang ito ay nagsasalita.

            “Honey, kailangan mo na bang i-announce o after ng dinner na lang?” tanong ni Katherine na asawa nito.

            “What do you think, Jade and Jameson?” Muli nitong nilinga ang mag-asawa na sabay pang ngumiti.

            “I think we should eat first,” si Jameson.

            “I think that’s a good idea,” pagsang-ayon nito. “Kumain muna tayo bago natin pag-usapan ang espesyal na announcement.”

            “Come on, kids! Kumain lang kayo,” si Katherine. “Princess, huwag kang mahihiya ha? Para na tayong isang pamilya rito, hmn?”

            “Thanks, Tita.”

            “Oh, Princess! Hindi mo lang alam kung gaano mo ako napasaya ngayon na nakita na kita sa personal. I’ve been looking forward to meet you for ages! Alam kong you have workloads to do kaya naman masaya ako na nakasama ka namin ngayon.” Masigla itong ngumiti. “Just grab anything you want to eat, okay?”

            “Opo.”

            “That’s what I like you, Princess. You’re not only gorgeous, you’re so kind!”

            “Thanks for the compliment, Tita. I really appreciate it,” nahihiyang tugon ni Princess.

            Tahimik lang na nakamasid si Ethan. Pilit iniisip kung ano ang special announcement na dapat ay sasabihin na ng kanyang Daddy.

            It’s a family dinner with the Locsin family. I wonder why they’re here.

            “Kuya, bakit ayaw mo yatang kumain? Mapapagalitan ka ni Mom kapag nakita kang halos walang gana sa harap ng hapag-kainan. May bisita pa naman tayo,” ani ni Margo matapos siyang sikuhin.

            “May iniisip lang ako.”

            “Asus, na-starstruck ka kay Ate Princess no? Ang ganda niya, as in sobra!” pasigaw na bulong ni Margo. “Mamaya magpapa-picture ako sa kanya.”

            “Bakit?”

            “Anong bakit? Hindi mo ba siya kilala? Isa siyang sikat na model kaya bihira lang ang pagkakataon na magkaroon ako ng picture niya. Ang sabi ni Mom sa akin noon, sobrang busy daw niya sa trabaho dahil marami siyang international photoshoot. Pati ang ibang international models humahanga sa kanya kasi napaka-professional niya sa trabaho.”

            “Totoo iyan,” sabad ni Kaiden. “Marami din sa mga kaklase ko ang mga nagkakagusto sa kanya. Tiyak na maiinggit ang mga iyon kapag nakapagpa-picture ako sa kanya mamaya.”

            Nahulog siyang lalo sa malalim na pag-iisip. Kaya pala pamilyar sa kanya ang mukha ni Princess. Hindi na rin mabilang sa kanyang daliri kung ilang beses niyang nakita ito sa mga magazines. Siya pala ang nag-iisang anak ng mag-asawang Locsin na matagal ng kinukwento sa kanila ng mga magulang.

            “I think it’s time to announce that next month we will all attend a wedding of our family,” ani ni Dominic nang makitang halos tapos na ang lahat kumain.

            “Wedding?” si Kaiden. “Sino ang ikakasal, Dad?” Nakakunot ang noo nito.

            Mahina itong tumikhim. “Actually, matagal na namin ito napag-usapan. At natitiyak namin na ito ang tamang panahon para malaman ninyong lahat na ikakasal na sa susunod na buwan si Ethan at Princess.”

            Sunud-sunod na napalunok si Ethan. Kahit kailan ay hindi niya ugaling sumuway sa kahit na anong nais ng kanyang mga magulang. Pero bakit parang hindi siya sang-ayon sa kasal na sinasabi ng kanyang Daddy?

            “Mom, totoo po ba ang sinabi ni Dad?” tanong ni Margo na namimilog ang mga mata. Halatang hindi ito makapaniwala sa tinuran ng ama.

            “Yes, Margo. Ethan, hindi namin sinabi sa iyo ng Daddy mo dahil katulad mo ay hindi rin alam ni Princess ang tungkol sa kasal ninyong dalawa.”

            Sinulyapan niya si Princess na napatitig sa mga magulang nito. Tila may nais itong isatinig na hindi nito na masabi.

            “Mom, para saan po ang kasal na nais ninyong mangyari?” lakas-loob niyang tanong.

            “Son, kapwa napagkasunduan na namin ito noong maliit pa kayo at sa tingin namin ay ito na ang tamang pagkakataon. Nasa tamang edad na kayong dalawa at ito lang ang tangi naming hiling… ang makasal kayo.”

            “Pero, Mom – “

            “Ethan, magtiwala kayo sa amin ni Princess. Para rin ito sa inyong dalawa. We know na mabibigla kayo, inaasahan na namin iyon. Sigurado kami na sasabihin ninyong hindi kayo dapat makasal dahil hindi ninyo man lang kilala ang isa’t isa hindi ba? Huwag kayong mag-alala, makikilala ninyo ang bawat isa sa oras na makasal kayo,” mahabang pahayag ni Katherine.

            “Wow! I’m so happy for you, Kuya Ethan!” Hindi na siya nakahuma nang yakapin siya ng mahigpit ni Margo kasunod ni Kaiden.

            Nang yakapin ni Margo si Princess ay muling nagtama ang kanilang mga mata. Hindi niya maintindihan ang uri ng paninitig nito sa kanya. Wala siyang makapa na pagkadismaya sa dalaga.

            Hindi kaya mayroon itong alam tungkol sa kanilang kasal?

            Nang nag-iwas ito ng tingin ay napatungo siya. Ikakasal na pala siya next month ngunit wala man lang siyang kaalam-alam. Napailing siya.

            “Excuse me po,” mamaya pa ay sabi ni Princess saka tumayo. Mabilis itong sinundan ni Margo saka ni Kaiden. Mukhang mabilis na napaamo ng mga ito ang dalawa niyang kapatid.

            Dahil ba iyon sa isa itong sikat na modelo? Hindi naman siguro sapat na dahilan iyon. Pero possible nga kaya na mangyari iyon?

            “Ethan, anak, alam kong nabigla ka,” si Dominic. “Sana maunawaan mo kami. Mas mature ka kay Princess kaya inaasahan namin na ikaw ang magdadala ng inyong relasyon. Maayos siyang pinalaki ng Tita Jade at Tito Jameson mo kaya nasisiguro kong hindi magtatagal ay magiging maayos kayong dalawa.”

            “Ethan,” tawag sa kanya ni Jade. “Mabait na anak si Princess. Alam naman natin na hindi mahirap ang trabaho niya pero hihilingin sana namin sa iyo na tulungan mo kaming makumbinsi siyang iwan na ang kanyang nakasanayang trabaho. Nag-iisa namin siyang anak at siya lang ang inaasahan naming mamamahala ng negosyong pinaghirapang itayo ni Tito Jameson mo.”

            “Matutunan ninyo ring magustuhan ang isa’t isa,” sabad ng Dad niya na kanina pa tahimik na nakikinig. “Alam kong pareho pa kayong abala sa mga karera ninyo pero sana magbigay kayo ng oras sa bawat isa.”

            “Susubukan ko po pero hindi ko maipapangako,” aniya. “Excuse me, magpapahangin lang po ako sa labas.”

            Pumunta siya sa garden nila nang makitang kasama pa rin ng dalawa niyang kapatid ang babaeng nakatakda na niyang pakasalan. Dinig na dinig niya ang nakakatuwang bungisngis ni Margo na halatang nag-eenjoy na kausap ang dalaga samantalang si Kaiden ay abala sa pagkuha ng larawan.

            Maaaring hindi pa iyon ang oras para makapag-usap silang dalawa. Pipilitin niyang lawakan pa ang kanyang pang-unawa ngunit naguguluhan pa rin ang kanyang isip kung paano magsisimula.

            Napasinghap siya ng hangin saka bumuntunghininga. It’s not yet the right time. Tumalikod na siya at napagpasyahang magtungo na lamang sa kanyang silid. Gusto niyang makapag-isip ng maayos.

            “Kuya Ethan, nandito ka pala!”

            Natigil siya sa paghakbang nang marinig ang boses ng bunsong kapatid.

            “Halika rito, Kuya!” Bago pa man siya makapagsalita ay nahawakan na siya ng kapatid saka hinila palapit sa dalaga. “Hindi pwedeng hindi ka kasama sa picture. Kuya Kaiden, groupie tayong apat!”

            “Okay, say cheese!” ani ni Kaiden at ilang beses na kumuha ng larawan.

            “Ate Princess, kayong dalawa naman ni Kuya,” makulit na sabi ni Margo.

            “Ha?” tila gulat na tanong ni Princess.

            “Sige na, Ate. Kuya huwag ka namang killjoy diyan. Dali na!” Si Margo na ang kusang nagdikit sa kanilang dalawa. “Kuya, hawakan mo sa balikat si Ate Princess. Ate, pwede mo bang hawakan sa baywang si Kuya?”

            “O-okay lang ba?” mahina niyang tanong.

            “Yeah,” sagot ni Princess.

            “Iyan, ganyan nga! Perfect!” sigaw ni Margo. “Kuya Kaiden, gandahan mo ng kuha ah!”

            Sinubukan niyang tingnan si Princess. Nakangiti ito habang kinukuhaan sila ng larawan. Napaka-natural at napakaganda.

            “Kuya, huwag mo naman masyadong titigan si Ate Princess.” Bigla siyang napalingon kay Margo. “Baka malunod iyan si Ate.”

            Dahan-dahan niyang tinanggal ang kamay sa balikat nito saka mabilis na nagpaalam upang tunguhin ang kanyang silid.