5

LIMITADONG kilos ang ginawa ni Caramel kasama ang dalawang bodyguard ni Fourth. Sumunod siya sa mga ito papasok ng mansiyon. Mapapalula talaga s'ya sa lawak at ganda ng buong mansiyon. Maraming naka-display na mga antigong kagamitan at ang mga mamahaling painting na naka-display sa dingding. Sa pagkakaalam niya, dito rin umuuwi ang kapatid ni Fourth na sina Sixto at Fifth.

Ang tatlo nalang kasi ang wala pang asawa. Madalas naman, ang mansiyon na ito ang pinipiling venue kung magpa-party ang mga anak at pamangkin ni Don Primero dahil sa lawak at ganda ng lugar. Mas malapit rin ito sa syudad kaysa sa unang mansiyon na napuntahan niya na medyo may kalayuan talaga sa syudad.

Agad silang sinalubong ng tatlong katulong. Sabay-sabay pang gumalang sa amo nila.

" Where's Fourth? " tanong ni Don Primero sa unang katulong.

" Natutulog pa po, sir " magalang na tugon nito.

" Sinabi ko na sa kanya na gumising siya ng maaga para masamahan niya ako sa meet up namin ng ama ni Feng Xian. " Naiinis na bulong ni Don Primero.

" Gisingin mo siya, " utos nito sa katulong.

" Sir, kanina pa po kasi namin ginigising si sir Fourth pero sinasagawan lang kami na huwag siyang istorbohin sa pagtulog niya, " hinaing naman ng isa. Napabuntong hininga na lamang ito.

Napatingin si Caramel sa second floor.

" Don Primero, puwede po bang ako nalang ang gumising sa kanya? Mala-late na po kayo sa meet up niyo sa Xian Family, " magalang na wika niya rito. Napangiti ito at inutusan ang katulong na iabot sa kanya ang master key.

Sigurado kasing hindi pagbubuksan ng pintuan ni Fourth ang nasa labas. Marahan siyang umakyat ng hagdan at pagkarating niya sa malapad at makinis na pinto na gawa sa mamahaling kahoy, agad siyang kumatok ng tatlong beses.

" Fourth, maghanda ka na! Kung ayaw mo parin buksan ang pinto, gagamitin ko ang master key! " wika niya sa labas ng pintuan.

Hindi naman nagpataranta sa loob ng kwarto si Fourth. Bagkus, sinalampak nito ang earplugs para hindi marinig ang boses ng inaakala niyang katulong. Gusto niyang magpahinga at ayaw niyang sumama sa kanyang ama para i-meet ang babaeng papakasalan niya.

Nakakakilabot talaga na isipin na ikakasal siya sa isang babae. Wala talaga siyang balak magpakasal pero syempre may balak siyang magkaroon ng anak, through the help of science.

Walang ibang choice si Cara kundi gamitin ang master key. Ayaw kasing makinig ng bakla kaya binuksan niya ang pinto at pumasok sa malawak na kwarto ni Fourth. Parang buong bahay na nila ang kwarto nito. Kagaya ng kwarto ni Garnet nakakatakot ang espasyo baka maraming nakatirang multo at ligaw na kaluluwa.

Agad dumako ang kanyang tingin sa taong nakakulob sa kama habang abala sa pagkulikot ng cellphone. May nakasalampak rin na earplugs hone sa taenga nito.

Agad siyang nakaisip ng paraan para istorbohin ito. Wala naman sa rules na hindi siya puwedeng mangialam sa ginagawa nito. Wala rin sa rules na hindi niya puwedeng hawakan si Fourth. Basta ang nasa rules, kung kailangan niyang gumamit ng dahas para pasunurin ang makunat na bungo nito ay puwedeng-puwede niyang gawin.

Ang ibig sabihin, puwede niya itong batukan, suntukin at bugbugin kapag hindi ito nakinig sa kanya. Napahagikhik naman siya. 'Di ba may pagka-harsh talaga ang kanyang utak. Sumampa siya sa malambot na kama at muli itong kinausap.

" Fourth, kumilos ka na kundi masasaktan ka talaga! " sigaw niya rito ngunit hindi siya pinansin kaya napangisi siya at sumampa sa kama. Sinilip niya ito. Nakapikit parin ang mga mata nito habang nakikinig ng musika.

Umupo siya at mabilis na isiniksik ang dalawang kamay sa ilalim ng tagiliran nito para daklutin ang katawan ni Fourth at itulak ito pababa ng kama. Nagulat ito sa ginawa niya ngunit bago pa man ito makalingon, nagawa niya nang itulak ito at tuluyan itong bumagsak sa sahig.

" PUTIK! HOW DARE YOU TO- " natigilan ito ng makilala siya.

" Caramel? "

" Yes papa? " Nakangising tugon niya. Naningkit ang mga mata nito at tinarayan siya.

" Eating sugar? "

” No papa! "

" No papa! Bigwasan kita diyan e! Anong ginagawa mo rito!" yamot na tanong nito bago napatayo. Bumaba naman ng kama si Caramel at inayos ang suot.

" Kanina pa naghihintay ang daddy mo. Baka mainip siya at hindi lang pagbagsak mula sa kama ang makukuha mo, " tugon niya rito.

" Bakit ka nga nandito? " Kunot-kilay na muling tanong nito.

Napatingin sa sarili si Caramel. Nakasuot siya ng black suit katulad ng mga bodyguard ni Fourth. Gusto niya lang ipaalam kay Fourth na siya ang bagong bodyguard nito.

Tumaas ang makapal at mataray na kilay ni Fourth noong mapagtanto nito ang ibig niyang sabihin.

" Ang ibig sabihin ikaw ang kinuha ni dad para bantayan ako! " gulantang na tanong ni Fourth. Napatango siya. Napasapo ito sa noo.

" What the fudge!" pabulong na wika nito.

" Maligo ka na! Kung ayaw mong buhatin kita papasok ng banyo at isalampak kita sa inodoro! " pananakot niya rito.

Minata naman siya ng bakla. Mas matangkad kaysa sa kanya si Fourth pero hindi kalakihan ang katawan nito. Yung tamang-tama lang ang laki kagaya ng mga Korean actor pero may pandesal na pinagmamalaki.

" Ang tapang mo naman. Kaliit mong babae, " pangmamaliit nito. Tumaas ang kanyang kilay.

" Excuse me? Kahit mas matangkad ka sakin kaya kitang buhatin at ibalibag sa sahig, " mahina itong natawa.

" K.fine! Maliligo na ako. "

" Bilisan mo! " pahabol na utos niya rito.

Muli nitong binuksan ang pinto ng banyo at sumilip.

" Boss mo ako kaya huwag mo akong utusan! " sigaw nito sa kanya sabay pabagsak na isinirado ang pinto. Napailing na lamang si Caramel.

Kapag maraming tao, tatawagin n'ya itong boss ngunit kapag silang dalawa lang—neknek nito!Hinding-hindi n'ya ito tatawaging boss maliban lang kung required talaga.