Simula

Simula

"NAGBABAGANG balita! Kakapasok lang, CIC, o Crimson International Company kabilang ngayong taon sa top-five most fastest growing company in Asia!"

"Wow! Ang galing!" napapantastikuhan kong kumento habang nginunguya ang popcorn sa bunganga ko. Inayos ko rin ang pagkakabukaka ko dito sa habang sofa-ng inuupuan ko at mas nakinig pa ng mas maige sa palatastas tungkol sa kompanyang nabanggit. 

Ang Crimson International Company kasi ay kilala bilang taga-export sa iba't-ibang mga bansa ng mga matataas na materyales pang instraktura. Purong Pilipino rin ang nagmamay-ari ng malaking kompanya na iyon kaya mas lalong nakaka-proud!

Biruin, buong asia? Grabe! Hindi na ako magtataka kung makikilala ang kompanyang iyon sa buong mundo pagkaraan pa ng ilang taon. Ang bilis nilang lumago. Ilang taon pa lang ang tanda ng kompanyang iyon pero heto na sila. Nakikipag-kompetensya na sa mga naglalakihang kompanya sa iba't-ibang mga bansa.

Napa-isip tuloy ako. Totoo kayang guwapo ang tagapagmana ng CIC? — Single rin kaya ito??

Napa-hagikhik ako ng malandi sa mahalay na naisip. Datapwat, nawala rin iyon sa isip ko kalaunan ng bumalik na sa ere ang teleseryeng pinapanood ko. Ipinagpatuloy ko na lang ang panonood hanggang sa makatulog na lang ako.

---

Kinabukasan, nagising ako sa tahol ng aso ng kapitbahay namin. Bwisit! 

Inis akong napabangon sa sofa na medyo masakit ang likuran dahil namali ang puwesto ng paghiga ko. Tinungo ko agad ang CR. Pagkatapos maligo, nagbihis na agad ako ng uniform ko sa school na pinagtuturuan.

Dala-dala ko paglabas ng apartment ko ang sama ng loob sa aso ng kapitbahay kong dakilang chismosa na si Manang Lina.

Inambahan ko pa ito ng sapak habang naka-kagat labi ng makita dahil kada umaga, sobrang lakas talaga nito tumahol! Sarap gawing adobo at kaldereta sa isip-isip kung puwede nga lang para naman wala ng tatahol kada gabi at umaga!

"Good Morning Ma'am Luise! Ang ganda niyo po ngayong umaga!" ani Kuya Ben. Ang kilala kong trisikel driver at ang madalas na sinasakyan ko papunta sa Magbano High School. Iyong school na tinuturuan ko nga. 

Nginitian ko naman ng tipid si Kuya Ben at inirapan ng pabiro, "Ikaw Kuya Ben, ah! Wala pa akong sahod ngayon kaya wala akong ibibigay sa 'yo! Naku! Tigilan mo 'yan!"

Natawa na lang ang matanda sa sinabi ko. Sumakay na ako sa trisikel niya at sa daan. Nag-kuwentuhan pa kami ng kaunti tungkol sa mga chismis dito sa probinsya namin. 

"Thank you Kuya Ben! Mamaya po ulit! Sunduin niyo 'ko pag-labasan na!" ani ko ng makarating na kami sa Magbano High. Marami na ring estudyante at kapwa ko guro ang pumapasok sa gate kaya nagmadali na ako't 'di na nakipag-kuwentuhan dahil baka ma-late pa ako sa unang klase ko! Monday na monday pa naman. 

"O sige Ma'am Luise! Text niyo na lang po ako katulad ng nakagawian. Ingat po kayo!"

Tinunguan ko siya at kinawayan. "Opo! Kayo rin!"

"Good morning po Ma'am Luise!" bati sa akin ng guard sa gate na si Mang Lipio naman. Nginitian ko na lang naman ito ng tipid bago sinat-wayp sa scanner ang ID ko para maka-log in na ako ngayong araw. 

"Good morning rin po."

Sa daan papuntang faculty room kung saan ako naka-assigned. Marami pang bumati sa aking mga co-teachers at mga estudyanteng minsa'y na-handle o naturuan ko na. Ang iba namang bumabati, hindi ko talaga kilala ang mukha at bumabati lang at ang karamihan pa sa mga iyon ay mga estudyanteng lalaki. 

Sumipol pa ang nakasalubong kong estudanyeng lalaki ng maka-salubong ako. Pinasadahan pa ako nito ng malagkit na tingin. Ulo hanggang paa. 

"Grabe Ma'am Luise! Ang sexy niyo talaga!" papuri niya. Nagtawanan ang mga kasamahan niya at sumapaw pa. 

"Oo nga Ma'am! Sobrang ganda niyo pa!"

"Para kayong estudyante tingnan Ma'am! Ganda niyo po!"

"Ma'am may jowa na po ba kayo?"

"Hoy Denver! Bawal 'yan!" Makahulugan banta nung isa sa kasama niya doon sa isa niya pang kasama. Nagtawanan sila pagkatapos ay nagsuntukan pa.

Natawa at napa-irap na lang ako. Hindi ko minasama ang mga sinabi nila at naki-sakay na lang rin ako katulad ng parati kong ginagawa sa mga ganitong senaryo. 

"Hmm..." kunwari akong nag-isip. Natahimik ang grupo at tumitig sa akin. Nginitian ko sila. "Wala pa, e. Wala kasing nagbabalak manligaw sa akin."

Agad nanlaki ang mata noong estudyanteng nagtanong sa akin kung may jowa ba raw ako.

"T-Talaga Ma'am? Wala pa kayong jowa?!" nabubuhayan niyang utas. Tinunguan ko siya ng tipid. Inasar naman siya ng mga kasamahan niya at pinagtulakan pa siya palapit sa akin.

Natatawa na lang ako pati na ang mga nakakakita sa aming kapwa ko guro at mga kapwa nila estudyante. 

"E-Edi Ma'am, p-p'wede pala ako manligaw sa 'yo?" bigla nilusob ng hiya ang boses ng binata. Nag-sigawan lalo ang mga katropa niya. Habang ako, pinipigilan ko lang ang matawa ng malakas. 

"O-Oo naman..." anas ko pa. Nanlaki lalo ang mata niya. "Basta hindi estudyante na gaya mo ang manliligaw sa akin, ayos lang." dugtong ko. Na ikina-wala ng malaki niyang ngiti. 

Doon mas lalo siyang inasar ng mga kasamahan niya at pinagtawanan. Iniwan ko na lang sila roon at dumeretso na talaga ako sa faculty room. Umiiling-iling. 

"Hoy gaga! May pinag-trip-pan ka na naman daw na estudyante? Sabi sa gc?!" Bungad agad sa akin ng baliko kong bestfriend na si Marian Rivera. Joke! Apolinario Bernardo talaga siya! Alias 'Honey' lang dahil naga-alboroto siya kapag tinatawag sa totoong pangalan. 

Natawa ako at saka nilapag muna ang bag ko sa table ko bago hinarap ang kaibigan. "Ano ba 'yan, mi! Ang aga-aga chismis agad ang almusal mo?" asar ko sa kanya. Inirapan niya ako. 

Hinila niya ang mahaba kong buhok bago sumalampak sa swivel chair niya. Mas lalo akong natawa.

"Gaga! Pinagu-usapan ka kasi sa gc ng mga teachers kaya ko nalaman! Hindi ako chismosa 'no!" asik niya sa akin sabay hawi pa ng imaginary bangs niya. 

Inilingan ko na lang siya. Sunod, umupo na rin sa swivel chair ko. Kinuha ko rin sa bag ko ang cellphone ko at agad tiningnan ang sinasabi ng kaibigan tungkol sa akin. At tama nga siya, pagkabukas na bukas ko pa lang ng group-chat naming mga teachers. Bumungad sa akin ang pangalan kong topic nila. 

"Oh see bakla? Sabi sa 'yo e! Ikaw ang topic. Ang kalat mo kasi!" tumingala ako para maharap si Honey damulag na mataman nakatingin sa akin. 

Inilingan ko lang siya at bahagyang natawa. Hindi ko na siya pinatulan. Dahil ano pa bang bago? Ako naman lagi ang talk-of-the-town dito sa Magbano High School. Bukod kasi sa maboka talaga ako, hindi rin ako kill-joy katulad ng mga gurang na ditong guro, na kapag nabiro lang ng estudyante, galit na. Ako hindi. Hindi ako ganoon dahil malakas rin ang sapak ko sa utak kaya sinasabayan ko lahat. 

Iyon rin ang dahilan kung bakit naging kilala agad ako dito sa Magbano High. Kahit na... magd-dalawang taon pa lang akong guro rito. Dahil kakakuha ko pa lang naman ng license ko as a teacher last two years ago. 

At yes, teacher ako. At ang major ko ay Filipino. Pero hindi ibigsabihin niyon, mamahalin ko na rin ang kapwa ko Pilipino. Hindi. Tanging wika at kultura lang ang minahal ko. Dahil may mantra akong sinusunod. At iyon ay, 

'Say no to four-inches and say yes to seven.' In short, pro AFAM ako! 

"Hoy Luise! Anong tinatawa-tawa mo d'yan? Baliw ang peg?" Maarteng puna ng kaibigan sa pagtawa kong mag-isa dahil sa naisip. 

Inirapan ko siya bago kunin sa table ko ang lesson plan ko na nakahanda na, "Wala! Tara na nga! Pumasok na tayo!" pagkasabi ko no'n. Nauna na akong umalis sa faculty room dahil sakto ring tumunog na ang bell hudyat ng pagu-umpisa ng araw. 

-

"Ok, class. Iyon na ang pagtatapos ng ating aralin ngayong araw. Bukas naman, magkakaroon tayo ng pagsusulit tungkol sa inaral. 20 items. Kaya mag-review! Iyon lang. Dismiss." ngiti ko sa panghuling mga estudyante na tinuruan ko ngayong araw. 

Nag-thank you pa ang mga ito sa akin ng sabay-sabay bago magkanya-kanya na rin ng ligpit at usapan.

Lumabas na rin ako sa classroom nila at agad tinungo ang pabalik ng faculty room. Nag-ayos agad ako ng mga gamit pagkarating ko. Wala pa si Honey kaya malamang, hindi pa nagpapa-dismiss ang babaitang iyon dahil kahit magkasing lakas kami ng sapak sa utak. Iba si Honey pagdating sa pagtuturo. Terror teacher talaga ang isang 'yon hindi katulad ko na mas maluwag pa sa panty ni Mama ang way ng pagtuturo.

Tinext ko na rin si Kuya Ben na mag-hintay na sa labas ng gate dahil papauwi na ako pagkatapos ko maligpit lahat ng gamit ko. Ni-reply-yan naman ako ng matanda pagkaraan na papunta na raw kaya mas lalo kong binilisan ang paga-ayos ng sarili at gamit. Uwing uwi na kasi talaga ako. Gustong gusto ko na matulog! Puyat talaga ako kagabi sa kakapanood noong favorite kong midnight show.

"Oh, aga mo naman ata mag-alsa baluta? May date ka day?" patuyang bungad ni Honey ng maabutan niya akong paalis na. 

Inirapan ko siya. "Che! Anong date. Sino namang lalaki ang ide-date ko? Wala nga akong makitang pogi!" 

 Inirapan niya ako pabalik. "Tss, edi si Sir. Allan! Hindi ba may gusto iyon sa 'yo? Bakit hindi mo patulan?!" Giit niya pa. Disgusto ko siyang tinitigan at nginiwian. 

Si Sir Allan kasi is yung masteral degree holder na nagt-turo sa senior high sa kabilang building dito rin sa Magbano. Head din iyon ng isang faculty dito.

Guwapo, matangkad, may laman naman ang katawan kahit papaano. 'Pero'—sobrang hangin nga lang. Lagi niyang bina-brag ang mga achievements niya sa mga co-teachers niya at ang tingin niya sa sarili niya, sobrang taas na puwedeng ihalintulad sa Burj Khalifa.

Nagpakita sa akin iyon ng matibo noong isang taon, nung bago pa lang ako rito sa school. Iniiwasan ko nga lang dahil ayaw ko talaga sa mga katulad niyang lalaki at isa pa... 

"Mi! Ayaw ko nga kay Sir Allan! Saka isa pa, alam mo naman ang mga bet ko 'di ba?-"

"-Foreigner!"

"Foreigner!" Sabay niya sa akin sa pagbigkas.

Nagkatitigan kami ni Honey. At kalaunan, parehong humagalpak ng tawa. Nag-apir pa kami ng lumapit siya sa akin at tumawa ulit. 

Buti na lang talaga, solo namin ni Honey ang faculty room na ito hindi katulad ng ibang teachers. Maliit rin kasi ito at sakto lang talaga para sa dalawa at mga gamit namin. 

"Hay grabe! Iba talaga 'yang pangarap mo maka-jackpot ng foreigner 'no? Talagang dito ka pa talaga sa probinsya nangarap makatagpo ng papi! Magaling Luise! Pinapagana mo talaga ang utak mo!" 

Inirapan ko siya. "Che! Bitter! Bahala ka! Pag ako, natagpuan ko na yung foreigner na para sa 'kin, hindi kita irereto sa kapatid no'n! Kapag may lalaking kapatid ang baby ko!"

Pinalo niya ako sa braso at malakas ulit natawa. "Ito naman! Parang hindi mabiro!"

-

"Kuya Ben, dito niyo na lang po iparada. Ok na po ako rito, salamat." magalang kong paki-usap kay Kuya Ben ng mahatid niya na ako sa tapat ng two storey building na apartment ko. 

Hop, 'wag mag-imagine. Yung pangalawang palag lang ang inuupahan ko. Ang chismosang maalamat na si Manang Lina ang umuupa sa baba kasama ng aso niyang sarap gawing kaldereta. 

"Abay, sigurado ka ba Ma'am Luise? Gabi na. P'wede naman kitang ihatid sa tapat talaga niyo," naga-aalalang balik ni Kuya ng masuyod niya ng tingin ang madilim na paligid na kinatatayuan ng apartment ko. 

Gabi na rin kasi ako naka-uwi dahil sa napasarap ang kuwentuhan at asaran namin ni Honey. Tss. Kainis iyon. Siya ang dahilan nito kung bakit inabutan na kami ng dilim ni Kuya Ben sa daan!

Inilingan ko agad si Kuya. "Naku Kuya Ben! Ok lang po! 'wag niyo na pong i-urong. Unting lakaran ko na lang naman po 'yan. Kaya ko na po."

"Sigurado ka na ba Ma'am Luise?" nag-aalala talaga si Kuya Ben. Tinunguan ko lang siya ng tipid dahil hindi naman talamak ang krimen dito sa probinsya namin.

Bumuntong hininga na lang siya saka tumungo. Inabot ko agad ang bayad sa kanya at bumaba na rin ng trisikel niya. Nagpa-alam pa ako sa matanda at hinintay ko pa siyang umalis bago pumanik ng apartment ko. 

Medyo madilim na at walang ilaw sa hagdan pataas. Tanging sa harapan lang ng pintuan ko ang meron kaya talagang nagulat ako ng pagkatungtong ko sa hallway ng ikalawang palapag, bumungad sa akin ang walang malay na bulto ng isang lalaking maraming tattoo sa dalawang braso na may sugat na malaki sa kanyang ulo! At naliligo sa sariling dugo! 

Natutop ko ang bibig ko at nanlisik ang dalawa kong mata. 

Jusko po! Sino ito?! 

Itutuloy...